Tanyooxpaʼtyajiñ jempɨk iñaskayajpa tan̈kapɨk nasɨyoʼoyiyaj

1. ¿Juutypɨksɨ ikutson̈ba Jehová jeʼm iyooxakɨʼɨwiñyaj in̈wejpadoʼoyiyaj?

¿IÑJOODON̈AM idyɨk iga Jehová wɨap iwat iga iñyooxpaʼdyiñ tuum tɨɨwɨ y jeempɨgam ikutson̈aʼyba jeʼm in̈wejpadoʼoyi? Dyaʼ tyi ijoo siiga takuyooxaoytyaʼmpa juʼuts anciano, siervos ministeriales, precursor, tan̈matkɨʼɨwiñtyam, tamañiñam, tatsaamiam, tapɨxiñtyam o tayomtam. Jesɨk algun i iga ityoyba Jehová iwaʼgaʼyba jeʼm iyooxpadoʼoyi, watykɨy jeʼm tanDios ikutson̈aʼyba jeʼm in̈wejpadoʼoyi y ichiʼiba jeʼm akpoʼksoʼoyi ikuyukmɨ jeʼm ancianojyaj y tun̈gak iyooxakɨʼɨwiñyaj (Col. 4:11). Tuum wɨbɨk xaaja iga wɨap tan̈kuyooxa Jehová y jeʼm tantɨwɨtam. Y wɨap tanyooxpadoy jesɨk jobity an̈pɨkpa tuum kaʼakuy, jesɨk naspa tuum emergencia o jesɨk tayaʼachwattamtaap.

JESƗK JOBITY AN̈PƗKPA TUUM KAʼAKUY

2. ¿Tyiʼigasɨ tan̈kaʼ iga tanyooxpaʼtyajpa jeʼm tantɨwɨtam jesɨk jobity an̈pɨkpa tuum kaʼakuy?

² Jesɨk jobity an̈pɨkpa tuum kaʼakuy wɨapsɨ iga maaj tan̈kaʼ tanayooxpaʼttamta. Juʼuts akwiñkejoʼoyi wɨapsɨ iga nɨktoʼoba tanjooyaytyaʼm jeʼm tɨwɨtam ityɨkkɨʼɨm, pero dyaʼ wɨap tan̈wat. O tantɨʼptamtoʼoba tantɨkkɨʼɨm jesɨk tumiñ kuyajneyajpa, pero dyatyim wɨap. Wɨapsɨ iga tsaam tanyooxpaʼttoʼoba tun̈gakyaj, pero tanfamilia yaʼachaptyim ixɨʼ. Mex iga sɨʼ tanyaʼacha, tanyooxpaʼtyajtoʼobanam jeʼm tantɨwɨtam, y Jehová tsaam maymay jesɨk iaʼmpa iga tan̈watpa ityumpɨy juʼtspɨyam tawɨap iga tanyooxpaʼtyajpa (Prov. 3:27; 19:17). Jesɨk, ¿tyi wɨap tan̈wattaʼm?

3. ¿Tyi tan̈kejaʼyba jeʼm ancianojyaj iakwiñkejoʼoyiyaj jempɨk ityyaj jeʼm Desi ikumunjom? (Jeremías 23:4).

³ Jempɨk wɨap iwatyaj jeʼm ancianojyaj. Siiga mimich mianciano, wɨixpɨɨkɨ jeʼm iñovejajyaj (maayɨʼ Jeremías 23:4).b Desi, jɨykimtawɨʼɨp jeʼm kuyuuji nasnewɨʼɨp, nɨmpa: «Jeʼm ancianojyaj y jeʼm tun̈gak tɨwɨtam ityyajwɨʼɨp idyɨk jeʼm an̈grupojom awaganaputyajpa idyɨk jeʼm an̈matkuy y miñbatyim idyɨk ajooyayyaj».c Iga jeʼm tɨwɨtam iwɨwatyaj iyooxakuy, maaj dyaʼ tan̈kaʼa iga wɨaiñ iyooxpaʼtyaj Desi jesɨgam tsukum jeʼm pandemia del COVID-19 y weeñi ifamiliar kaʼayaj iga imatsyaj yɨʼp kaʼakuy.

4. ¿Tyiʼiga jeʼm ancianojyaj wɨa mu iyooxpaʼtyaj Desi, y juʼp jeʼ jeʼm an̈kejayoʼoyi?

⁴ Desi nɨmpa: «Jeʼm ancianojyaj anamigojyajam idyɨk, jeʼyukmɨ dyaʼ tan̈kaʼa iga wɨaiñ anan̈madayyaj juʼuts anan̈jaam y tyityam akkobakpijpa». ¿Tyi wɨap ikuyujkayaj jeʼm ancianojyaj? Kuixtyaʼamɨ jeʼm iñovejajtam y amigojataʼamɨ wiñtyi iga tsukumiñ tuum yaʼachaaji. Siiga jobitytyi an̈pɨkpa tuum kaʼakuy y dyaʼ wɨap nɨk iñjooyayyaj ityɨkkɨʼɨm, kuaʼmɨ juutypɨknam wɨap inimuruyaj. Desi ijɨɨspa: «Oyba, jeʼtyi jaama waatyi ancianojyaj ajɨymiñayyajpa o akutsadayyajpa idyɨk tuum mensaje. Jeʼm texto iga amayayyajpa nuʼkyajpa idyɨk jeʼm ananmajom, mex iga oybam idyɨk ammayyaj».

5. ¿Juutypɨk wɨap ijoodon̈ayaj jeʼm ancianojyaj tyityam ityogoyayyaj jeʼm tɨwɨtam, y juutypɨk wɨap iyooxpaʼtyaj?

⁵ Tuum manera iga jeʼm ancianojyaj wɨap ijoodon̈ayaj tyityam ityogoyayyaj jeʼm tɨwɨtam jeʼ iga iwɨpɨkyajiñ ijɨɨxi jesɨk iwadayyajpa akwagoʼoyiyaj (Prov. 20:5). ¿Iniityyajsɨ tyityam ityogoyayyaj juʼuts jeʼm wiʼkkuy o jeʼm tsoy? ¿Wɨapsɨ ipatstogoyyaj jeʼm iyooxakuy o jeʼm ityɨk? ¿Ixunyajpasɨ iga tanyooxpaʼtyajiñ siiga iwaʼkyajpa tuum yooxpadoʼoyi iga chioʼyba jeʼm An̈jagoʼoyi? Weeñi tɨwɨtam iyooxpaʼtyaj Desi kun tyityam iniityyaj idyɨk. Pero jempɨk maaj iwɨwaday jeʼ jeʼm yooxpadoʼoyi emocional y espiritual iga ichiʼiyaj jeʼm ancianojyaj. Jeʼ nɨmpa: «Jeʼm ancianojyaj awaganawatyajpa idyɨk an̈wejpadoʼoyiyaj. Dyaʼ anjɨɨspa juʼptam an̈matyiyaj nɨmyajpa idyɨk, pero anjɨɨspa idyɨk juʼuts anan̈jaam. Keʼnam jesɨk Jehová sɨʼ idyɨk anɨʼmay ‹Dyaʼ miity in̈kutyum›» (Is. 41:10, 13).

6. ¿Juutypɨk wɨap tanayooxpaʼttamta kun jeʼm tantɨwɨtam? (Aʼmɨ jeʼm fotojyaj).

⁶ Jempɨk wɨap iwatyaj jeʼm ityyajwɨʼɨp jeʼm kumunjom. Tanjoodon̈tam iga jeʼm ancianojyaj jeʼam jempɨk mojpa iyooxpaʼtyajpa jeʼm tɨwɨtam. Pero Jehová tanɨʼmaʼyba tantumpɨytyam iga tananmajan̈chiʼityaʼmiñ y tanyooxpaʼttaʼmiñ tun̈gakyaj (Gál. 6:10). Hasta tuum xutyu xaaja iga tachioʼyba kun toyoʼoyi wɨap ianmajan̈chiʼ algun i iga mɨmneʼ. Jeʼm tsɨxtyam wɨap iwatyaj tuum tarjeta o tuum dibujo iga ianmajan̈chiʼiyajpa tuum tɨɨwɨ. Jeʼm mañipɨkyaj wɨap nɨk ijuʼyayyaj tyityam ityogoyay tuum yoomtɨwɨ. Tun̈gakyaj wɨap iwadayyaj wiʼkkuy y ininɨgayyaj ityɨkkɨʼɨm algun i iga mɨmneʼ. Pero, jesɨk tuum mɨmneʼiʼ agui an̈pɨkneʼeba, tantumpɨytyam jempɨk taitytyaʼm jeʼm kumunjom tatogoyaytyaʼm anmajan̈chioʼoyi. Jeʼyukmɨ mex siiga por videoconferencia o tanɨkneʼ jeʼm an̈tuʼumayoʼytyɨkjom, wɨɨ iga jesɨk kuyajum jeʼm an̈tuʼumaaji tatsɨʼyiññam iga tanamurupa jeʼm tantɨwɨtam. Y jeʼm ancianojyaj ityogoyayyajtyim anmajan̈chioʼoyi. Jesɨk jobitytyi an̈pɨkpa tuum kaʼakuy jeʼm ancianojyaj tsaam pɨɨmi yooxayajpa y weeñi tɨwɨtam ikutsadayyajpa notas juuty iñɨʼmayyajpa iga tsaam ichoowaixayyajpa jeʼm yooxakuy iwatyajpaʼap. Jeʼyukmɨ tsaam wɨɨ iga tantumpɨytyam tanteguedataʼmiñ iga tan̈kupɨktaʼmpa yɨʼp an̈kiʼmayoʼoyi: «Nacamamwadayt́amta̱jɨ jém [iñanmaj]» (1 Tes. 5:11).

JESƗK NASPA TUUM EMERGENCIA

7. ¿Juutypɨk kukakpa jeʼm iityi algun i iga iñaskaʼaba tuum emergencia?

⁷ Jesɨk naspa tuum emergencia jobity ikukagayaʼyba iityi jempɨk iñaskaʼaba yɨʼɨmpɨk. Wɨapsɨ iga ipatstogoyba tyityam iniity, jeʼm ityɨk o kaʼaba algun i iga ityoyba. Y jeempɨktyim wɨap iñaskayaj jeʼm tantɨwɨtam. ¿Juutypɨk wɨap tanyooxpadoytyaʼm?

8. ¿Tyi wɨɨ iga iwatyajiñ jeʼm ancianojyaj y jeʼm jaatun̈yaj wiñtyi iga naspa tuum emergencia?

⁸ Jempɨk wɨap iwatyaj jeʼm ancianojyaj. Ancianojtam, yooxpaʼtyaajɨ jeʼm tɨwɨtam iga nawɨtsakyajtaiñ wiñtyi iga nuʼkpa tuum emergencia. Teguedataʼamɨ iga ityumpɨyyaj jempɨk ityyaj jeʼm kumunjom ijoodon̈ayajiñ tyi iwatyajpa iga wɨaiñ inikɨakputyajta y wɨaiñ mikujɨymeʼtstaʼm. Margaret, jɨykimtawɨʼɨp jeʼm kuyuuji nasnewɨʼɨp, nɨmpa: «En tuum xutyu najɨʼyoʼoyi aknastawɨʼɨp jeʼm kumunjom, jeʼm ancianojyaj akjɨɨstaʼm iga dyanam kuyajneʼ iga kujipsnaspa jeʼm an̈eymɨ juuty aitytyaʼm y jobitytyi aputtaʼmiñ siiga jeʼm teguedɨʼɨyiyaj anɨʼmaytyaʼmpa iga antsaktaʼmiñ antɨk». Peʼm najɨʼyoʼoyi tsaam yooxpadoy, iga cinco semana okmɨ kujipsnas peʼm an̈eymɨ juuty ityyaj idyɨk. Mijaatun̈tam, jesɨk iniitytyaʼmpa jeʼm kuyuuji en familia, an̈mattaʼamɨ tyityam wɨap in̈wattaʼm tumtum de mimichtyam jesɨk naspa tuum emergencia. Siiga mimichtyam y jeʼm immanɨktam miniwɨtsaktamtaap, wɨapsɨ iga jesɨk naspa yɨʼɨmpɨk dyaʼ jespɨy min̈jeʼktaʼmpa.

9. ¿Tyi wɨɨ iga iwatyajiñ jeʼm ancianojyaj wiñtyi y okmɨ iga naspa tuum emergencia?

⁹ Siiga mimich misuperintendente de grupo, odoy an̈joʼokɨ iga naxiñ tuum emergencia iga iniidyayyajiñ inúmero jeʼm tɨwɨtam ityyajwɨʼɨp in̈grupojom. Waatɨ tuum lista y seguido kɨʼpin̈ɨ jempɨk iñjaykunuʼkneʼ. Jesɨk, siiga naspa tuum emergencia, wɨap iñjɨyñɨgayyaj tumtum de jeʼeyaj y wɨap iñjoodon̈a siiga ityogoyayyaj algun tyi. Y jempɨk iñjoodon̈a, an̈madaʼayɨ jeʼm coordinador de ancianojyaj y jeʼ ijɨyñɨgaʼyba jeʼm superintendente de circuito. Siiga mikumunyooxataʼmpa, in̈wɨyooxpaʼtyajpa jeʼm tɨwɨtam. Okmɨ iga yaj kujipsnaaxi jeʼm an̈eymɨ juuty ity Margaret, jeʼm superintendente de circuito dyaʼ mon̈ 36 hora iga ijɨɨxian̈chiʼiba jeʼm ancianojyaj iga sɨʼ idyɨk ikuaʼmyaj jeʼm 450 tɨwɨtam iga ipoʼyayñeyaj idyɨk jeʼm juktɨ (2 Cor. 11:27). Iga iwatyaj yɨʼp wɨbɨk yooxakuy, ipaʼtyaj juutytyam wɨap ichɨʼyyaj jeʼm tɨwɨtam.

10. ¿Tyiʼiga tsaam importante iga jeʼm ancianojyaj ikuixyajiñ jeʼm ovejajyaj? (Juan 21:15).

¹⁰ Jeʼm ancianojyaj iniityyaj jeʼm yooxakuy iga ichiʼiyajpa jeʼm yooxpadoʼoyi espiritual y emocional jeʼm tɨwɨtam (1 Ped. 5:2). Jesɨk naspa tuum desastre, wiñtyi ityeguedayajiñ siiga jeʼm tɨwɨtam wɨityyaj y iniityyaj jeʼm wiʼkkuy, puʼktuuku y juuty wɨap ichɨʼyyaj. Pero wɨapsɨ iga jempɨk iñaskaneyaj yɨʼɨmpɨk waatyña meses ityogoyayyajpa jeʼm yooxpadoʼoyi espiritual y emocional (maayɨʼ Juan 21:15). Harold, iga iyooxpaʼtpa jeʼm Comité de Sucursal y inimuruneʼ jaʼyan̈yaj jempɨk iñaskaneyaj tuum desastre, nɨmpa: «Tan̈kaʼ iga jeʼm iityiyaj tsɨʼyyajiñ juʼuts wiñtyityim. Wɨapsɨ iga jeʼm tɨwɨtam mojgakpam iwatyaj jempɨk jaʼy iwatyaj, pero jempɨk iñaskaneyaj dyaʼ jobity ikujaʼamayyajpa, wɨapsɨ iga ikujɨɨsɨyyajpa iga kaʼaneʼ algun i iga ityoyyajpa, ipatstogoyñeyaj algun tyi iga tsaam idyɨk ityoyyajpa o iñaskaneyaj algun tyi juuty ipatstogoytyɨʼp iityi. Ityumpɨy yɨʼp wɨap iwat iga eybɨk an̈yaʼkyajiñ. Pero yɨʼp dyaʼ nɨmtoʼoba iga ityogoyayyaj fe y dyaʼ malo siiga iniityyaj yɨkxpɨk jaamoʼoyiyaj».

11. ¿Juʼutspɨk yooxpadoʼoyi ityogoyayyajpa jeʼm familiajyaj?

¹¹ Tsaam importante iga jeʼm ancianojyaj ikupɨkyajiñ yɨʼp an̈kiʼmayoʼoyi: «Aŋyáctaamɨ con jém aŋyácneyajwɨɨp» (Rom. 12:15). Jempɨk iñaskaneyaj tuum desastre ixunyajpa iga tanakjɨɨsyajiñ iga Jehová y jeʼm tɨwɨtam tsaam ityoyyajpa. Jeʼm ancianojyaj wɨap iyooxpaʼtyaj jeʼm familiajyaj iga odoy ichakyajiñ iga in̈wejpaʼtyajpa Dios, kuyujyajiñ, nɨkyajiñ jeʼm an̈tuʼumaajiyaj y putyajiñ jeʼm an̈matkuy. Wɨaptyim ianmajan̈chiʼiyaj jeʼm jaatun̈yaj iga iyooxpaʼtyajiñ jeʼm imanɨktam iga ijɨɨskupakneyajiñ iga tuum desastre dyaʼ wɨap iktogoy ityumpɨy. Mijaatun̈tam akjɨɨstaʼamɨ jeʼm immanɨktam iga juchixkej wɨap iamigojayaj Jehová y jeʼ dyaʼ ichakpa ikutyum. An̈madayyaajɨ iga juchixkej iniityyajpa tuum familia ikuwɨtyi yɨʼp naxyukmɨ, juuty jeʼm tɨwɨtam y yoomtɨwɨtam ityyajpa jeem iga iyooxpaʼtyajpa (1 Ped. 2:17).

12. ¿Juutypɨk wɨap tanyooxpadoytyaʼm jesɨk naspa tuum emergencia? (Aʼmɨ jeʼm foto).

¹² Jempɨk wɨap iwatyaj jeʼm ityyajwɨʼɨp jeʼm kumunjom. Siiga naspa tuum desastre toomjom juuty mich miity, akwaʼakɨ jeʼm ancianojyaj juutypɨk wɨap iñyooxpadoy. Wɨap iniknuʼksoy iñtyɨk iga tsɨʼyyajiñ jeʼm tɨwɨtam jempɨk ichakneyaj ityɨk o jempɨk kutsatneyajta iga yooxpadoyyajiñ. Wɨaptyim iñyooxpadoy iga ininɨgayyajpa wiʼkkuy y tyityam ityogoyayyaj. Y, siiga juʼumɨ miity juuty nas jeʼm desastre, mich wɨaptyim iñyooxpadoy. ¿Juutypɨk? Wɨap iñjɨykimyaj jesɨk in̈watpa jeʼm an̈wejpadoʼoyiyaj y miyooxpadoybatyim jesɨk michioʼyba indonación (2 Cor. 1:8-11; 8:2-5). Y siiga wɨap iññɨk peʼm an̈eymɨ, akwaʼakɨ jeʼm ancianojyaj juutypɨk wɨap iñyooxpadoy. Y siiga mityɨʼptaap, wɨapsɨ iga min̈kejaytyaap juutypɨk in̈watpa, jesɨk wɨap iñyooxpadoy juuty maaj nasuntaap yooxpadoʼoyi.

JESƗK TAYAʼACHWATTAMTAAP

13. ¿Juʼp tan̈kapɨk nasɨyoʼoyiyaj in̈an̈kamokyajpa jeʼm tɨwɨtam ityyajwɨʼɨp jeʼm an̈eymɨ juuty dyaʼ aʼmchioyñɨɨmpa iga koosteñaytyaap Dios?

¹³ Jeʼm yaʼachwadoʼoyi majtyim ityan̈kawadaʼyba jeʼm tɨwɨtam iityiyaj. Jempɨk ityyaj jeʼm an̈eymɨ juuty dyaʼ aʼmchioyñɨɨmpa iga koosteñaytyaiñ Dios, dyaʼ ijaya paʼtyajpa kun tyityam juyjuyoyyajpa, mɨmneyajpa y kaʼayajpa jempɨk ityoyyajpa. Iga sɨʼ iyaʼachwatyajta wɨapsɨ iga jeʼm ancianojyaj dyaʼ wɨap iwatyaj weeñi tyidyin̈kej o dyaʼ jaya wɨap inimuruyaj jempɨk ityogoyayyaj anmajan̈chioʼoyi. Yɨʼbam jempɨk iñaskaʼ Andréi, jɨykimtawɨʼɨp jeʼm kuyuuji nasnewɨʼɨp. Tuum yoomtɨwɨ tumiñ kuyajneʼ idyɨk y okmɨ iñaskaʼ tuum accidente de tránsito. Wadaytya waatyi operación y dyaʼ idyɨk wɨap iyooxa. Mex iga ity jeʼm pandemia y jeʼm an̈jagoʼoyiyaj dyaʼ aʼmchioyyajpa iga koosteñaytyaiñ Dios, jeʼm tɨwɨtam iwatyaj ityumpɨy juʼtspɨyam wɨayajpa iga iyooxpaʼtyajpa yɨʼp yoomtɨwɨ y Jehová dyaʼ ichak ikutyum.

14. ¿Juutypɨk ikwiñkejyajpa jeʼm ancianojyaj iga iniidyayyaj confianza Jehová?

¹⁴ Jempɨk wɨap iwatyaj jeʼm ancianojyaj. Andréi in̈wejpaʼt Jehová y yooxpadoy juʼtspɨyam wɨa. ¿Y juutypɨk ikutson̈ Jehová? Ikuyukmɨ tun̈gak tɨwɨtam ichiʼ jeʼm yooxpadoʼoyi iga ityogoyay idyɨk jeʼm yoomtɨwɨ. Y weeñiyaj ininɨkyajpa idyɨk jesɨk iktsɨʼyba icita kun jeʼm doctor y tun̈gakyaj iyooxpaʼtyajpa idyɨk tumiñmɨ. Jehová ikumayket yɨʼp wɨbɨk jɨɨxi iga ikwiñkejyaj (Heb. 13:16). Miancianojtam, jesɨk dyaʼ taaʼmchityamtaap iga tan̈koosteñaytyaʼmiñ Dios, weʼktaʼamɨ jeʼm iñyooxakuytyam (Jer. 36:5, 6). Pero, juchixkej kuaʼmaytyaʼamɨ jeʼm Jehová iyooxpadoʼoyi. Jeʼ miyooxpaʼttaʼmpa iga wɨaiñ iñchiʼityaʼm jeʼm yooxpadoʼoyi iga ityogoyayyaj jeʼm tɨwɨtam.

15. ¿Tyi wɨap tan̈wattaʼm iga wɨaiñ tanayooxpaʼttamta jesɨk tayaʼachwattamtaap?

¹⁵ Jempɨk wɨap iwatyaj jeʼm ityyajwɨʼɨp jeʼm kumunjom. Jesɨk tayaʼachwattamtaap, wɨapsɨ iga dyaʼ tawaatyityam tan̈tuʼumataʼmpa. Jeʼyukmɨ tsaam importante iga tan̈wɨnanɨgayyajiñ jeʼm tantɨwɨtam. Jeʼm an̈aaji jeʼ kun jeʼm Wookkɨʼɨwiñ, dyaʼ kun tantɨwɨtam. Tan̈wadaʼyiñ perdón jeʼm tantɨwɨtam y tan̈wɨtsaguiñ siiga tanaity tuum jɨpmuruuji kun jeʼeyaj (Prov. 19:11; Efes. 4:26). Tampɨktaʼmiñ jeʼm jɨɨxi iga tanayooxpaʼttamtaap (Tito 3:14). Jeʼm yooxpadoʼoyi iga Andréi y jeʼm igrupo ichiʼiyaj jeʼm yoomtɨwɨ, iwɨwadayyaj ityumpɨyyaj. Majtyim natoyyajtaap juʼuts tumtyi familia (Sal. 133:1).

16. Juʼuts nɨmpa Colosenses 4:3, 18, ¿tyi wɨap tan̈wattaʼm por jeʼm tɨwɨtam iga sɨʼ iyaʼachwatyajta?

¹⁶ Jaʼyan̈ tantɨwɨtam ikuyooxayajpa Jehová mex iga jeʼm an̈jagoʼoyiyaj dyaʼ iaʼmchiyajpa. Weeñiyaj pajneyajta iga ikupɨkyajpa Dios. Tanjɨykimtaʼmiñ jesɨk tan̈wattaʼmpa an̈wejpadoʼoyiyaj, tanjɨykimaytyaʼmiñ jeʼm ifamiliajyaj y ityumpɨy jempɨk chioyyajpa jeʼm yooxpadoʼoyi espiritual, física y legal, mex iga wɨaptyim imatsyajta (maayɨʼ Colosenses 4:3, 18).d Odoy tan̈kujaʼamaytyaʼmiñ juʼtspɨy wɨap iyooxpadoy tanan̈wejpadoʼoyityam (2 Tes. 3:1, 2; 1 Tim. 2:1, 2).

17. ¿Juutypɨk wɨap tanawɨtsaktamta wiñtyi iga nuʼguiñ jeʼm yaʼachwadoʼoyi?

¹⁷ Mimich y jeʼm iñfamilia wɨap iniwɨtsaktamta iganam dyaʼ nuʼkne jeʼm yaʼachwadoʼoyi (Hech. 14:22). Odoy kujɨɨstaʼamɨ ityumpɨy jempɨk wɨap iññaskataʼm. Pɨɨmchityaʼamɨ jeʼm in̈wɨnanɨgoʼoyityam kun Jehová y yooxpaʼttaʼamɨ jeʼm immanɨktam iga jeempɨktyim iwatyajiñ. Y siiga mikobakpijtyaʼmpa, an̈madaytyaʼamɨ Jehová juʼuts inin̈jaamtaʼm (Sal. 62:7, 8). An̈mattaʼamɨ juʼuts familia tyiʼiga wɨap tanaidyaytyaʼm confianza.e Siiga mimich miniwɨtsakneta wiñtyi iga naspa tuum emergencia y iniidyay confianza Jehova, jeempɨgam iñyooxpaʼtpa immanɨktam iga wɨaiñ in̈an̈kamokyaj juʼptyin̈kej nasɨyoʼoyiyaj y odoy kɨɨn̈yajiñ.

18. ¿Juʼp wɨbɨk nɨgɨyoʼoyi tanan̈joʼknetaʼm?

¹⁸ Jeʼm paz tachiʼipaʼap Dios tayooxpaʼtpa iga odoy takɨʼɨn̈iñ (Filip. 4:6, 7). Ikuyukmɨ jeʼm paz, Jehová takkunajaʼyba jeʼm tanjɨɨxi jesɨk tanan̈teeñkamokpa tan̈kapɨk nasɨyoʼoyiyaj juʼuts jesɨk jobity an̈pɨkpa tuum kaʼakuy, jesɨk naspa tuum emergencia o jesɨk tayaʼachwattamtaap. Tayooxpaʼtpatyim ikuyukmɨ jeʼm ancianojyaj iga tsaam iwɨkuixyajpa jeʼm ovejajyaj, y tachiʼibatyim jeʼm wɨbɨk xaaja iga tanayooxpaʼttamtaiñ. Yɨʼp paz tayooxpaʼtpa iga wɨaiñ tanan̈an̈kamoktaʼm tan̈kapɨk kutɨʼɨchiyaj tannɨgɨyoʼoyijom, juʼuts jeʼm mɨjpɨk yaʼachaaji (Mat. 24:21). Peʼm tiempo, tsaam importante iga odoy tan̈jeʼktaʼmiñ y tanyooxpaʼtyajiñ tun̈gakyaj iga odoytyim an̈jeʼkyajiñ. Pero, jesɨk kuyajum jeʼm mɨjpɨk yaʼachaaji, dyam tannaskataʼmpa tan̈kapɨk nasɨyoʼoyiyaj iga tan̈yaʼkwattaʼmpa. Jesɨk wɨabam tanaitytyaʼm jempɨk Jehová ixunneʼ: tuum nuntapɨk paz iga dyaʼ keman kuyajpa (Is. 26:3, 4).