Namurutaʼamɨ jeʼm ancianos

1. ¿Juutypɨk ikwiñkejpa Jehová iga ityoyba ityumpɨy jempɨk ikuyooxayajpa?

JEHOVÁ tsaam ityoyba ityumpɨy jempɨk ikuyooxayajpa. Ikɨan̈kot jeʼm iMaanɨk iityi por jeʼeyaj y ichaknetyim jeʼm ancianos iga ikuixyajiñ (Hech. 20:28). Dios ichakneʼ Jesús juʼuts kobakpɨk de jeʼm kumun. Jeʼeyaj ixunyajpa iga jeʼm ancianos iwɨkuixyajiñ jeʼm tɨwɨtam. Jeʼm ancianos ikupɨkyajpa Jesús y iyooxpaʼtyajpa jeʼm tɨwɨtam iga iniityyajiñ tuum wɨnanɨgoʼoyi kun Jehová (Is. 32:1, 2).

2. ¿Ityam ityeguedaap Jehová? (Ezequiel 34:15, 16).

² Jehová tsaam ityeguedaap ityumpɨy jeʼm iyooxakɨʼɨwiñyaj, pero maaj ityeguedaap jempɨk yaʼachaap ixɨʼyaj iga tan̈kawatneyaj y iyooxpaʼtyajpa ikuyukmɨ jeʼm ancianos (maayɨʼ Ezequiel 34:15, 16).a Jesɨk, ¿tyi wɨɨ iga tan̈wattaʼmiñ siiga tansuntaʼmpa yooxpadoʼoyi? Tanan̈wejpaʼttaʼmiñ Dios y tan̈kuaʼmaytyaʼmiñ jeʼm ancianos iyooxpadoʼoyi (Efes. 4:11, 12).

3. ¿Tyiʼiga yɨʼp kuyuuji tayooxpaʼttaʼmpa tantumpɨytyam?

³ Yɨʼp kuyujijom tan̈kɨʼpin̈taʼmpa juutypɨk Jehová tayooxpaʼttaʼmpa ikuyukmɨ jeʼm ancianos. Tan̈kutson̈taʼmpa yɨʼpyaj akwagoʼoyiyaj: ¿juchix tan̈waʼgaytyaʼmiñ yooxpadoʼoyi jeʼm ancianos?, ¿tyiʼiga wɨɨ iga tan̈wattaʼmiñ? y ¿juutypɨk tayooxpaʼtyajpa? Yɨʼp kuyuuji tayooxpaʼttaʼmpa tantumpɨytyam iga tanakwiñkejtaʼmiñ agradecimiento iga Jehová tayooxpaʼttaʼmpa ikuyukmɨ jeʼm ancianos y tan̈kuaʼmaytyaʼmiñ jeʼm iyooxpadoʼoyiyaj jesɨk tatogoyaytyaʼm.

JUCHIX TANAMURUYAJIÑ JEʼM ANCIANOS

4. ¿Juutypɨk tajoodon̈tam iga Santiago 5:14-16, 19, 20 sɨʼ ijɨykiʼm jempɨk dyam ikuixñeʼ iwɨnanɨgoʼoyi kun Jehová? (Aʼmɨtyim jeʼm imágenes).

⁴ Santiago iwɨan̈mat juutypɨk Jehová ikuyukmɨ jeʼm ancianos tayooxpaʼttaʼmpa. Jeʼ nɨm: «Siiga tu̱m de mimicht́am mimɨmne, jesɨc wɨ̱ iga [inin̈wejaʼyiñ jeʼm ancianos]» (maayɨʼ Santiago 5:14-16, 19, 20). Yɨʼɨm Santiago sɨʼ ijɨykiʼm jempɨk dyam iwɨkuixñeʼ iwɨnanɨgoʼoyi kun Jehová. ¿Juutypɨk tanjoodon̈tam? Jeʼ nɨm iga inimuruiñ jeʼm ancianos y dyaʼ nɨm iga ikuaʼmiñ tuum doctor. Nɨmtyim iga jempɨk mɨmnewɨʼɨp pɨspa jesɨk wadaytyaap perdón jeʼm ityan̈kaʼ. Jesɨk algun i mɨmneʼ nasuntaap iga nɨguiñ iaʼm tuum doctor, in̈madaʼyiñ juʼuts in̈jaam y okmɨ iwadyiñ juʼuts iñɨʼmaʼyba jeʼm doctor. Jeempɨktyim naspa siiga tansuntaʼmpa iga tayooxpaʼttamtaiñ iga eybɨk tanaitytyaʼmiñ tuum wɨnanɨgoʼoyi kun Jehová, wɨɨ iga tanamuruyajiñ jeʼm ancianos y tanan̈madayyajiñ tyityam sɨʼ tannaskataʼm y okmɨ tan̈kupɨktaʼmiñ jeʼm jɨɨxian̈chioʼoyi tachiʼiyajpaʼap ikuyukmɨ jeʼm Biblia.

5. ¿Juutypɨk wɨap tanjoodon̈ataʼm siiga tanaitytyaʼmnam tuum wɨnanɨgoʼoyi kun Jehová?

⁵ Jeʼm capítulo 5 de Santiago taanmajan̈chiʼityaʼmpa iga tanamurutaʼmiñ jeʼm ancianos jesɨk tansuntaʼmpa iga eybɨk tanaitytyaʼmiñ tuum wɨnanɨgoʼoyi kun Jehová. Pero jobitytyi tan̈kuaʼmtaʼmiñ yooxpadoʼoyi, wiñtyi iga tampatstogoytyaʼmpa tan̈wɨnanɨgoʼoyi kun Dios. Jeʼm Biblia nɨmpa iga tanakuixtyaʼmtaiñ iga wɨap tanjɨɨstaʼm iga tanaitytyaʼm tuum wɨnanɨgoʼoyi kun Jehová mex iga dyam jesaneʼ (Sant. 1:22). Jeempɨgam iñaskayaj weeñi cristianos ityyajwɨʼɨp idyɨk Sardis: ijɨɨsyajpa idyɨk iga iniityyaj tuum wɨnanɨgoʼoyi kun Dios, pero Jesús iñɨʼmayyaj iga dyaʼ jesaneʼ (Apoc. 3:1, 2). ¿Juutypɨk wɨap tanjoodon̈ataʼm siiga tanaitytyaʼmnam tuum wɨnanɨgoʼoyi kun Jehová? Tanjɨɨstaʼmiñ juʼtspɨy tantoytyaʼmpa idyɨk Jehová jesɨk tachin̈taʼm y juʼtspɨy tantoytyaʼmpa sɨɨ (Apoc. 2:4, 5). Tanakwaʼktamtaiñ: «¿Jespɨyñam an̈kusuʼnɨʼyba ammay y an̈kujɨɨs jempɨk nɨmpa jeʼm Biblia? ¿Dyaʼ an̈togoʼyba jeʼm an̈tuʼumaajiyaj y an̈wɨkɨʼpin̈ba jempɨk kuyujkataap? ¿Jespɨyñam an̈kusuʼnɨʼyba ampuʼt jeʼm an̈matkuy? ¿Maaj anteguedaap tun̈gak tyidyin̈kej o iga an̈kooñwɨʼyba tumiñ?». Jeʼm ikutson̈oʼoyi tayooxpaʼttaʼmpa tan̈kutɨʼɨyɨytyaʼm tyityam dyaʼ sɨʼ tan̈wɨwattaʼm. Siiga dyaʼ wɨap tan̈kaktaʼm tanjɨɨxi o tan̈watnetaʼmum jempɨk Jehová dyaʼ ikusuʼnɨʼyba, tanamurutaʼmiñ jeʼm ancianos iga tayooxpaʼttaʼmiñ.

6. ¿Tyi wɨɨ iga iwadyiñ jempɨk tan̈kawatneʼ?

⁶ Jesɨk algun i tan̈kawatpa y dyaʼ ikakpa ijɨɨxi toptaap, de jeʼm kumunjom. Jeʼyukmɨ nasuntaap iga inimuruiñ tuum anciano (1Cor. 5:11-13). Y nasuntaap iga yooxpaʼttaiñ iga eybɨk iniidyiñ tuum wɨnanɨgoʼoyi kun Dios. Jehová tawadaytyaʼmpa perdón siiga nunta tanakwiñkejtaʼmpa iga tan̈kaknetaʼmum tanjɨɨxi (Hech. 26:20). Y tanakwiñkejtaʼmpa jesɨk tanamurutaʼmpa jeʼm ancianos.

7. ¿Ityam ixunyajpatyim iga jeʼm ancianos iyooxpaʼtyajiñ?

⁷ Jeʼm ancianos dyaʼ numaaj iyooxpaʼtyajpa jempɨk tan̈kawatneʼ. Iyooxpaʼtyajpatyim jempɨk tan̈kaʼ in̈teeñkamokyaj jeʼm malojpɨk kusuʼnɨyoʼoyiyaj (Hech. 20:35). Tan̈kujɨɨstaʼmiñ iga sɨʼ inin̈an̈kamok tuum malojpɨk kusuʼnɨyoʼoyi y iñjɨɨspa iga dyaʼ wɨap inin̈teeñkamok. Wɨapsɨ iñjɨɨs iga dyaʼ wɨap inin̈teeñkamok iga pekaʼ jaʼy iñjuʼk drogas, iñaʼmpa idyɨk pornografía, o tsaam idyɨk mityan̈kawatpa sexualmente. Odoy kɨɨn̈ɨ y waʼakɨ iga miyooxpaʼttaiñ. Namuruujɨ tuum anciano iga miwɨkumaton̈ba y jeʼ wɨap miñɨʼmay juʼptam kukaki nasuntaap iga in̈wadyiñ iga wɨaiñ inin̈teeñkamok jeʼm malojpɨk kusuʼnɨyoʼoyi. Mikjɨɨspa iga Jehová tsaam maymay siiga in̈kupɨkpa (Ecl. 4:12). Siiga min̈yaʼkpanam iga iniityñam jeʼm malojpɨk kusuʼnɨyoʼoyi, jeʼm ancianos mikjɨɨsyajpa iga Jehová tsaam maymay iga in̈waʼkpa yooxpadoʼoyi, yɨʼp ikwiñkejpa iga immaymaywattoʼoba Jehová (1Cor. 10:12).

8. ¿Juchix dyaʼ nasuntaap iga tanamuruyajiñ jeʼm ancianos?

⁸ Dyaʼ nasuntaap iga tanan̈madaytyaʼmiñ jeʼm ancianos ityumpɨy jempɨk tan̈wattaʼmpa. Tan̈kujɨɨstaʼmiñ iga jesɨk mijoʼyñeʼeba wɨap iññɨʼmay algun tyi tuum tɨɨwɨ iga tsaam pɨɨmi ityoʼyan̈jaampa. Siiga jeempɨgam naspa dyaʼ nasuntaap iga inimuruiñ tuum anciano, maaj wɨɨ iga in̈wadyiñ juʼuts nɨm Jesús iga inimuruiñ jeʼm tɨɨwɨ o jeʼm yoomtɨwɨ (Mat. 5:23, 24). Wɨaptyim in̈kuaʼm información iga miyooxpaʼdyiñ inikwiñkej wɨtampɨk cualidades. Pero siiga iñaʼmpa iga in̈kutyum dyaʼ wɨap in̈wɨtsak jempɨk nasneʼ, nɨʼmaʼayɨ tuum anciano iga miyooxpaʼdyiñ. Jesɨk Evodia y Síntique dyaʼ idyɨk nakunuʼksayyajtaap, Pablo iñɨʼmay tuum tɨɨwɨ iga iyooxpaʼtyajiñ. Tuum anciano itywɨʼɨp in̈kumunjom wɨaptyim miyooxpaʼt (Filip. 4:2, 3).

¿TYIʼIGA TANAMURUYAJIÑ JEʼM ANCIANOS?

9. Mex iga tatsaʼataʼmpa tanamurutaʼm jeʼm ancianos, ¿tyiʼiga wɨɨ iga tan̈wattaʼmiñ? (Proverbios 28:13).

⁹ Siiga tanaʼmtaʼmpa iga dyaʼ wɨap tanan̈an̈kamoktaʼm jeʼm malojpɨk kusuʼnɨyoʼoyi, tan̈waʼgaytyaʼmiñ Jehová iga tayooxpaʼttaʼmiñ (Sal. 94:18). Siiga pɨɨmi tatan̈kawatnetaʼm tanan̈madaytyaʼmiñ jeʼm ancianos y tan̈kaktaʼmiñ tanjɨɨxi iga Dios wɨaiñ tawadaytyaʼm perdón (maayɨʼ Proverbios 28:13).b Wɨapsɨ iga tatsaʼataʼmpa, pero odoy takɨɨn̈taʼmiñ tanamurutaʼm jeʼm ancianos. Tanjɨɨskupaknetaʼmiñ iga Jehová ichakneʼ jeʼm ancianos iga tayooxpaʼttaʼmiñ iga wɨaiñ tanaitytaʼm tuum wɨnanɨgoʼoyi kun jeʼ. Jesɨk tanamuruyajpa jeʼm ancianos, tanakwiñkejtaʼmpa iga tanaidyaytyaʼm confianza Dios y takupɨgoytyaʼmpa.

10. Siiga tatan̈kawatnetaʼm y tanan̈neʼktaʼmpa, ¿tyi wɨap tannaskataʼm?

¹⁰ Juʼuts tan̈kɨʼpin̈netaʼm, tawɨwadaytyaʼmpa siiga tannɨʼmaytyaʼmpa jeʼm ancianos iga tayooxpaʼttaʼmiñ. Pero siiga tanan̈neʼktaʼmpa jeʼm tantan̈kaʼ, tamalnɨgaytyaʼmpa. Tanjɨɨstaʼmiñ jesɨk jeʼm rey David in̈neʼk jeʼm ityan̈kaʼ, pɨɨmi an̈yaʼk iga dyam idyɨk iniity tuum wɨnanɨgoʼoyi kun Jehová (Sal. 32:3-5). Siiga dyaʼ jobity tanatsoʼyɨytyaap jesɨk tamɨmneaktɨn̈taʼmpa majtyim tatɨgɨyaytyaʼmpa jeʼm kaʼakuy. Jeempɨktyim naspa jesɨk tatan̈kawattaʼmpa siiga dyaʼ tanan̈madayyajpa jeʼm ancianos, wɨapsɨ iga tampatstogoytyaʼmpa tan̈wɨnanɨgoʼoyi kun Jehová, jeʼ dyaʼ ixunba iga tannaskataʼmiñ jeempɨk (Is. 1:5, 6, 18).

11. ¿Juutypɨknam wɨap tammalwadayyaj jeʼm tantɨwɨtam siiga tanan̈neʼktaʼmpa jeʼm tantan̈kaʼ?

¹¹ Siiga tanan̈neʼktaʼmpa iga tatan̈kawatnetaʼm wɨap tammalwadaytyaʼm tun̈gakyaj. Siiga jeempɨgam tan̈wattaʼmpa wɨapsɨ iga jeʼm Dios iespíritu santo dyam itypa jeʼm kumunjom, y dyamtyim tanawɨnanɨgaytyamtaap (Efes. 4:30). Siiga tanjoodon̈ataʼmpa iga tuum tɨɨwɨ tan̈kawatneʼ, tannɨʼmaʼyiñ iga inimuruiñ jeʼm ancianos.c Siiga dyaʼ tanan̈madaytyaʼmpa jeʼm ancianos kentyim iga sɨʼ tantan̈kawattaʼm (Lev. 5:1). Iga tantoytyaʼmpa Jehová tanan̈mattaʼmpa jempɨk nasneʼ. Yɨʼɨmpɨgam tanyooxpaʼttaʼmpa jeʼm tɨwɨtam ityyajwɨʼɨp jeʼm kumunjom y jempɨk tan̈kawatneʼ iga eybɨk iniidyiñ tuum wɨnanɨgoʼoyi kun Jehová.

JUUTYPƗK TAYOOXPAʼTTAʼMPA JEʼM ANCIANOS

12. ¿Juutypɨk iyooxpaʼtyajpa jeʼm ancianos jempɨk tan̈kawatneʼ?

¹² Jeʼm Biblia in̈kejaʼyba jeʼm ancianos iga iyooxpaʼtyajiñ jempɨk tan̈kawatneʼ iga eybɨk iniidyiñ tuum wɨnanɨgoʼoyi kun Jehová (1Tes. 5:14). Siiga pɨɨmi mityan̈kawatneʼ, jeʼeyaj mikwaʼkyajpa juʼuts inin̈jaam y tyi iñjɨɨspa (Prov. 20:5). Wɨapsɨ iga uxan̈ tan̈kaʼ inin̈madayyaj jempɨk in̈watneʼ iga dyaʼ mijayajɨyba y michaʼap. Tsaam iyooxpaʼtyajpa siiga inin̈madayyajpa juʼuts inin̈jaam y tyi iñjɨɨspa. Dyatyi ijoo siiga mijoʼyñeʼeba y dyaʼ in̈wɨkujɨɨspa jempɨk miñɨmpa (Job 6:3). Jeʼm ancianos dyaʼ jobitytyi imalkujɨɨsyajpa jempɨk iññɨʼmayyajpa, wiñtyi miwɨkumaton̈yajpa iga wɨaiñ miyooxpaʼtyaj juʼuts in̈kejpa jeʼm Biblia (Prov. 18:13). Jeʼeyaj ijoodon̈yaj iga nasuntaap tiempo iga wɨaiñ iyooxpaʼtyaj algun i, jeʼyukmɨ dyaʼ numaaj tun̈kɨy inimuruyajpa jempɨk tan̈kawatneʼ.

13. ¿Tyiñam maaj iwatyajpa jeʼm ancianos iga tayooxpaʼtyajpa? (Aʼmɨtyim jeʼm imágenes).

¹³ Jeʼm ancianos dyaʼ nɨmyajpa o iwatyajpa algun tyi iga mɨch iñtyoʼyan̈jaamiñ. Jeʼeyaj in̈wejpaʼtyajpa Jehová iga miyooxpaʼdyiñ y jeempɨgam uxtyam uxtyam majtyim wɨam inin̈jaam. Jeʼeyaj mikkamayyajpa «aceite» jeʼm Jehová iñɨɨyimɨ (Sant. 5:14-16). Yɨʼp «aceite» jeʼ jempɨk in̈kejpa jeʼm Dios In̈maatyi. Jeʼm ancianos ipɨkyajpa jeʼm Biblia iga miyooxpaʼtyajpa iga eybɨk iniidyiñ tuum wɨnanɨgoʼoyi kun Jehová (Is. 57:18). Jempɨk mimayayyajpa miyooxpaʼtpa iga duroj in̈wɨwadyiñ. Jehová ikuyukmɨ jeʼm ancianos mijɨɨxian̈chiʼiba y miyooxpaʼtpa iga wɨaiñ in̈wɨwat (Is. 30:21).

14. Juʼuts nɨmpa Gálatas 6:1, ¿juutypɨk iyooxpaʼtyajpa jeʼm ancianos tuum tɨɨwɨ iga jɨɨxtyogoyñeʼ? (Aʼmɨtyim jeʼm imágenes).

¹⁴ (Maayɨʼ Gálatas 6:1). Jesɨk algun i jɨɨxtyogoyba wɨapsɨ iga dyaʼ iwɨpɨk ijɨɨxi o pɨɨmi tan̈kawat. Jeʼyukmɨ jeʼm ancianos iga ityoyyajpa jeʼm tɨɨwɨ in̈jɨyjakyajpa. Jeʼm an̈maatyi griega «an̈jɨyjaakɨ» (o wɨtsaakɨ) nɨmtoʼobatyim jesɨk algun i kuwiksneʼ jeʼm ipaʼk y wɨtsagaytyaap. Juʼutstyim tuum doctor iga ikuixpa juutypɨk iwɨtsagaʼyba ipaʼk, jeʼm ancianos ikwiñkejayyajpa toyoʼoyi jeʼm tɨɨwɨ jesɨk ijɨɨxian̈chiʼiyajpa. Jeʼm Biblia in̈kejaʼyba jeʼm ancianos iga nakuixyajtaiñ jesɨk jɨɨxian̈chioyyajpa, iga tan̈kaɨykɨʼɨwiñyaj wɨaptyim ijɨɨxtyogoyyaj. Pero iga ityoyyajpa jeʼm tɨɨwɨ tan̈kawatnewɨʼɨp dyaʼ ikujɨyyajpa (1Ped. 3:8).

15. ¿Tyi wɨap tan̈wattaʼm siiga sɨʼ tannaskataʼm algun tyi?

¹⁵ Jehová in̈kejayñeʼ jeʼm ancianos iga odoy in̈madayyajiñ tun̈gakyaj jempɨk iwatneʼ jeʼm tɨɨwɨ. An̈kejayñeyajta iga jesɨk jɨɨxian̈chioyyajpa ipɨkyajiñ jeʼm Biblia y odoy tanɨʼmayyajiñ jempɨk jeʼeyaj ijɨɨsyajpa. An̈kejayñeyajtatyim juutypɨknam maaj wɨap tayooxpaʼtyaj (Prov. 11:13; Gál. 6:2). Jeʼm ancianos dyaʼ tumtyi jɨɨxi iniityyaj y weeñi watyña amtyɨyam sɨʼ ikuyooxayaj Jehová, pero siiga tansuntaʼmpa yooxpadoʼoyi wɨap tanamurutaʼm juʼptyin̈kej anciano. Dyaʼ nɨkpa tanamuruyaj tumtum anciano iga tanɨʼmayyajiñ jempɨk tan̈kumaton̈tamtoʼoba. Siiga tan̈wattaʼmpa jeempɨk, tanakwiñkejtaʼmpa iga dyaʼ tan̈kumaton̈taʼmpa jeʼm Jehová iAn̈kiʼmayoʼoyi (2Tim. 4:3). Jesɨk tanan̈madaʼyba tuum anciano jempɨk sɨʼ tannaskaʼ, wɨapsɨ iga jeʼ takwaʼkpa siiga tanamuruneum tun̈gak anciano y juutypɨk tajɨɨxian̈chiʼiñeʼ. Siiga jeʼm anciano ikwiñkejpa modestia iwaʼgaʼyba tun̈gak anciano iga iyooxpaʼdyiñ (Prov. 13:10).

TYI TAN̈WATTAʼMIÑ CADA TUMTUM DE TAƗCHTYAM

16. ¿Tyi tan̈wattaʼmiñ cada tumtum de taɨchtyam?

¹⁶ Jeʼm ancianos tajɨɨxian̈chiʼiyajpa jesɨk sɨʼ tammalnaskataʼm, pero dyaʼ tanɨʼmayyajpa tyi tan̈wattaʼmpa. Kun tyityam tanɨmtaʼmpa y tan̈wattaʼmpa tanakwiñkejaytyaʼmpa Jehová iga tantoytyaʼmpa y tan̈wattamtoʼoba jempɨk jeʼ ikusuʼnɨʼyba (Rom. 14:12). Jeʼ tayooxpaʼttaʼmpa iga tan̈wɨpɨktaʼmiñ tanjɨɨxi, jeʼyukmɨ jeʼm ancianos ipɨkyajpa jeʼm Biblia jesɨk tajɨɨxian̈chiʼiyajpa. Yɨʼbam tayooxpaʼttaʼmpa iga tan̈wɨpɨktaʼmiñ tanjɨɨxi (Heb. 5:14).

17. ¿Tyi tan̈wattaʼmiñ siiga tansuntaʼmpa yooxpadoʼoyi?

¹⁷ ¡Tsaam tamaymaywattaʼmpa iga Jehová takuixtyaʼmpa! Jeʼ ikutsat Jesús iga takɨakputtaʼmiñ y wɨaiñ tampɨktson̈taʼm tuum ityi dyapɨk kuyajpa (Juan 10:11). Ikuyukmɨ jeʼm ancianos ikkupakpa jempɨk tajɨykamayñetaʼm: «Manchiʼityaʼmpa pastores iga iwatyajpa juʼuts ɨch ansunba, y jeʼeyaj mikwiʼktaʼmpa kun jempɨk iixpɨkyajpa y ikutɨʼɨyɨyyajpa» (Jer. 3:15). Jeʼyukmɨ siiga nasuntaap iga tayooxpaʼttamtaiñ iga eybɨk tanaitytyaʼmiñ tuum wɨnanɨgoʼoyi kun Jehová, odoy takɨɨn̈taʼmiñ tanamuruyaj jeʼm ancianos. Tan̈wɨpɨktaʼmiñ yɨʼp xaaja iga Jehová tachiʼiñetaʼm.