¿Mikuyooxaoytyoʼoba juʼuts anciano?

1, 2. ¿Juʼptam yooxakuyyaj iwatyajpa jeʼm ancianojyaj?

SIIGA dende pekam sɨɨ in̈kuyooxaoy juʼuts siervo ministerial, wɨapsɨ iga inikkupakpa tyityam nasuntaap iga michɨʼyiñ juʼuts anciano. Pero seguido kuyooxaoʼoyɨ iga wɨaiñ in̈wat yɨʼp wɨbɨk yooxakuy (1 Tim. 3:1).

² ¿Tyityam iwatpa tuum anciano? Putyajpa jeʼm an̈matkuyjom, ikuixyajpa jeʼm kumun y ianmajan̈chiʼiyajpa jeʼm tɨwɨtam kun tyityam iwatyajpa y nɨmyajpa. Jeʼyukmɨ jeʼm Biblia nɨmpa iga yɨʼpyaj ancianojyaj pɨɨmi yooxayajpa y jeexyaj juʼuts tuum xaaja jeʼm kumunjom (Efes. 4:8).

3. ¿Tyityam iwadyiñ tuum tɨɨwɨ siiga kuyooxaoytyoʼoba juʼuts anciano? (1 Timoteo 3:​1-7; Tito 1:​5-9).

³ Jesɨk tuum tɨɨwɨ kuyooxaoytyoʼoba juʼuts anciano, dyaʼ jeex juʼuts jesɨk algun i nɨkpa ikuaʼm tuum yooxakuy, chiʼityaap iga wɨap iwat. Pero jempɨk kuyooxaoytyoʼoba juʼuts anciano dyaʼ numaaj iga pudyiñ jeʼm an̈matkuyjom y in̈kejaʼyiñ tun̈gakyaj, iwadyiñ jempɨk nɨmpa 1 Timoteo 3:​1-7a y Tito 1:​5-9 (maayɨʼ). Jeʼam tan̈kɨʼpin̈taʼmpa yɨʼp kuyujijom, siiga algun i kuyooxaoytyoʼoba juʼuts anciano, nasuntaap iga tun̈gakyaj iaʼmyajiñ iga wɨsɨsɨoʼyba, iwɨkuixiñ ifamilia y ikuyooxaiñ jeʼm kumun.

IXPƗKTAAP IGA WƗSƗSƗOʼYBA

4. ¿Tyi nɨmtoʼoba iga «wɨsɨsɨoʼyiñ»?

⁴ Siiga tuum tɨɨwɨ kuyooxaoytyoʼoba juʼuts anciano nasuntaap iga «wɨsɨsɨoʼyiñ» yɨʼp nɨmtoʼoba iga jeʼm kumun dyaʼ ikujɨyba siiga juchixkej wɨsɨsɨoʼyba, nasuntaptyim iga «jempɨk dyaʼ ikuyooxayajpa Dios iixpɨkyajiñ iga iwɨwatpa». Wɨapsɨ iga jempɨk dyaʼ ikuyooxayajpa Dios dyaʼ tumtyi jɨɨxi iniityyaj kun jempɨk tan̈kupɨktaʼmpa, pero dyaʼ wɨap takujɨyyaj siiga juchixkej tan̈wɨwattaʼmpa (Dan. 6:​4, 5). Jeʼyukmɨ nakwaʼktaajɨ, jeʼm tɨwɨtam y jempɨk dyaʼ ikuyooxayajpa Dios, ¿aixpɨkyajpa iga juchixkej an̈wɨwatpa?

5. ¿Tyi nɨmtoʼoba iga «it́óyiñ jém wɨ̱tampɨc cosa»?

⁵ Wɨɨ iga «it́óyiñ jém wɨ̱tampɨc cosa», yɨʼp nɨmtoʼoba iga iaʼmyajiñ juutytyam iwɨwatyajpa jeʼm tɨwɨtam y ianmajan̈chiʼiyajiñ. Dyaʼ numaaj ikuixyajpa jeʼm ityɨwɨtam, iwɨwadayyajpatyim mex iga dyaʼ waʼgayñeyajta (1 Tes. 2:8). Ityumpɨy yɨʼp iwatyajpa kun maymayaaji mex iga nasuntaap iga ityopyajiñ jaʼyan̈ tiempo jesɨk ikuixyajpa jeʼm kumun y ikkupakyajiñ jeʼm iyooxakuy juʼuts anciano (1 Ped. 5:​1-3; Hech. 20:35).

6. ¿Tyityam iwadyiñ tuum tɨɨwɨ jesɨk iwɨpɨktson̈ba tun̈gakyaj? (Hebreos 13:​2, 16; aʼmɨtyim jeʼm imagen).

⁶ Jeʼm tɨɨwɨ jempɨk «iwɨpɨktson̈ba» tun̈gakyaj, dyaʼ numaaj iwɨwadaʼyba jeʼm iamigojyaj (1 Ped. 4:9). Tuum libro nɨmpa iga iwɨpɨktson̈ba ityumpɨyyaj. Jeʼyukmɨ nakwaʼktaajɨ, ¿aixpɨktaap iga juchixkej an̈wɨpɨktson̈ba ityumpɨyyaj? (maayɨʼ Hebreos 13:​2, 16). Dyaʼ numaaj iweʼkpa tyityam iniity kun jempɨk dyaʼ iniityyaj, iwɨpɨktson̈batyim jeʼm tɨɨwɨ de circuito y jempɨk nɨkpa iknasyaj tuum najɨʼyoʼoyi jeʼm kumunjom (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Tyityam iwatpa jeʼm anciano jempɨk dyaʼ ityoyba jeʼm tumiñ?

⁷ «Odoy ityoʼyiñ jeʼm tumiñ», yɨʼp nɨmtoʼoba iga maaj ityeguedaiñ ikuyooxa Dios, dyaʼ tyi ijoo siiga tumiñɨy o dyaʼ (Mat. 6:33). Ipɨguiñ jeʼm itiempo, y tyityam iniity iga ikuyooxaiñ Jehová, ikuixiñ ifamilia y kuyooxaoʼyiñtyim jeʼm kumunjom (Mat. 6:24; 1 Juan 2:​15-17). Jeʼyukmɨ nakwaʼktaajɨ: «¿Juʼuts anaʼm jeʼm tumiñ? ¿Amaymay kun tyityam anaity? ¿An̈kusuʼnɨʼyba an̈kooñwɨy maaj tumiñ y anjuyba tyityam dyaʼ atogoyay?» (1 Tim. 6:​6, 17-19).

8. ¿Tyityam iwatpa jeʼm ancianojyaj jesɨk «nan̈jakyajtaap iyaʼak»?

⁸ Jesɨk algun i kuyooxaoytyoʼoba juʼuts anciano nasuntaap iga juchixkej «nan̈jaktaiñ iyaʼak». Odoy wiʼgan̈naxiñ, odoy ugan̈naxiñ y napuʼktugɨytyaiñ juʼuts ixunba Dios y dyaʼ juʼuts iwatyajpa tun̈gakyaj, dyatyim iaʼmpa tyityam Jehová dyaʼ ikusuʼnɨʼyba (Luc. 21:34; Sant. 4:4). Dyaʼ jobity joʼyba jesɨk nan̈ataap. Jeʼm anciano odoytyim ugan̈naxiñ, jeʼyukmɨ nakwaʼktaajɨ: «¿Juchixkej anakwiñkejpa iga wɨap anan̈jakta an̈yaʼak?».

9. ¿Tyityam iwatpa tuum anciano siiga «wɨjɨɨxiɨy» y siiga iwɨakkupaktoʼoba iyooxakuy?

⁹ Jeʼm anciano ikwiñkejpa iga «wɨjɨɨxiɨy» jesɨk iwɨkɨʼpin̈ba algun tyi kun jempɨk nɨmpa jeʼm Biblia. Jeʼyukmɨ ikujɨɨspa juutypɨk ikkupakpa jeʼm jɨɨxian̈chioʼoyiyaj, iwɨpɨkpa ijɨɨxi y dyaʼ jobity imalkujɨɨspa (Prov. 18:13). Iwatkiʼpspa Jehová jesɨk iwɨpɨkpa ijɨɨxi, «iwɨtsakneiñ ityumpɨy» iga wɨaiñ ikkupak iyooxakuy y odoy kutsuʼuyaiñ. Jesɨk iwɨkupɨkpa ityumpɨy jeʼm jɨɨxian̈chioʼoyiyaj, tun̈gakyaj iixpɨkyajpa iga wɨsɨsɨoʼyba. Sɨɨ tan̈kɨʼpin̈taʼmpa tyityam nasuntaap iga iwadyiñ iga wɨaiñ ikkupak iyooxakuy y iwɨkuixiñ ifamilia.

IWƗKUIXIÑ IFAMILIA

10. ¿Tyityam iwatpa tuum pɨɨxiñ jesɨk «iwɨkuixpa ifamilia»?

¹⁰ Siiga tuum tɨɨwɨ an̈koʼmɨyñewɨʼbam tsɨʼytyoʼoba juʼuts anciano, wɨɨ iga jeʼm ifamilia wɨsɨsɨoʼyiñtyim. Jeʼyukmɨ «iwɨkuixiñ ifamilia» y ixpɨktaiñ iga tsaam ityoyba, iwatpa tyityam nasuntaap iga odoy tyi ityogoyayyajiñ. Iwadyiñ jeʼm kuyuuji en familia, waganɨkyajiñ jeʼm an̈tuʼumaajiyaj y wagaputyajiñ jeʼm an̈matkuyjom. Iwatyajiñ yɨʼɨmpɨk iga jeʼm apóstol Pablo nɨm: «Siiga tuum pɨɨxiñ dyaʼ wɨap ikuix ifamilia, ¿juutypɨk ikuixpa jeʼm Dios ikumun?» (1 Tim. 3:5).

11, 12. ¿Juutypɨk yooxpadoʼyba jeʼm ifamilia siiga tuum tɨɨwɨ kuyooxaoytyoʼoba juʼuts anciano? (Aʼmɨtyim jeʼm imagen).

¹¹ Siiga jeʼm tɨɨwɨ iniity xutyutyampɨk imaanɨk, jeʼeyaj juchixkej «wɨkupɨgoyyajiñ». Mex iga ixunyajpa iga jeʼm imanɨktam maymayayajiñ y mɨɨchyajiñ. In̈kejayyajiñ y ijɨɨxian̈chiʼiyajiñ kun toyoʼoyi, yɨʼɨmpɨgam iyooxpaʼtyajpa iga kupɨgoyyajiñ y iniidyayyajiñ respeto tun̈gakyaj. Jeʼm jaatun̈yaj in̈kejayyajiñtyim imanɨktam iga ityoyyajiñ Jehová, ikupɨgayyajiñ jeʼm ian̈kiʼmayoʼoyiyaj y iyooxpaʼtyajiñtyim iga chin̈yajiñ.

¹² «Wɨ̱ iga jém ima̱nɨctam icupɨcyajpat́im Dios. D́a wɨ̱ siiga imalwatyajpa». Pero siiga jeʼm imaanɨk tan̈kawatpa, wɨapsɨ iga jeʼm jaatun̈ dyaʼ iwɨkuix jeʼm ifamilia y dyaʼ ijɨɨxian̈chiʼ. Jeʼyukmɨ dyaʼ wɨap ichɨʼy juʼuts anciano (aʼmɨ jeʼm Totjaayi Takjoodon̈apaʼap del 15 de octubre de 1996, página 21, párrafos 6, 7 en español).

IKUYOOXAIÑ JEʼM TƗWƗTAM

13. ¿Tyityam iwatpa jempɨk dyaʼ «kamamkobak» y «wɨjɨɨxiɨy»?

¹³ Jesɨk jeʼm tɨwɨtam iwɨwatpa jeexyaj juʼuts tuum xaaja para jeʼm kumun. Jesɨk tuum tɨɨwɨ «wɨjɨɨxiɨy» yooxpadoʼyba iga idyiñ paz. Siiga iñxunba iga miixpɨktaiñ iga juchixkej miwɨjɨɨxiɨy, wɨkumaton̈ɨ tun̈gakyaj y wɨpɨktson̈ɨ jempɨk miñɨʼmayyajpa. Jesɨk an̈tuʼumayajpa, ¿iwɨpɨktson̈basɨ jeʼm jɨɨxi ipɨkneyajwɨʼɨp tun̈gakyaj iga ikupɨkyajpa jempɨk nɨmpa jeʼm Biblia? Jeʼm anciano «dyaʼ wɨɨ iga kamamkobak», yɨʼp nɨmtoʼoba iga odoy ityeguedɨʼyiñ tun̈gakyaj iga nawattaiñ juʼutsam jeʼ ixunba, iwɨpɨktson̈ba jesɨk jɨɨxian̈chiʼityaap (Gén. 13:​8, 9; Prov. 15:22). «Odoy an̈aiñ» y «odoy jobity joʼyiñ». Iga iwɨjɨyaʼyba tun̈gakyaj y dyaʼ an̈aapa, yooxpadoʼyba iga nawɨnanɨgayyajtaiñ mex iga dyaʼ tumtyi jɨɨxi iniityyaj (Sant. 3:​17, 18). Dyaʼ in̈nɨʼmaykuʼmpa tun̈gakyaj mex iga nan̈ayajtatoʼoba (Juec. 8:​1-3; Prov. 20:3; 25:15; Mat. 5:​23, 24).

14. ¿Tyiʼiga dyaʼ wɨap ichɨʼy juʼuts anciano jempɨk «yaguiñ mojneʼ ikuyooxa Dios» y juutypɨk ikwiñkejpa iga kupɨgoʼyba?

¹⁴ Dyaʼ tsaktaap juʼuts anciano jempɨk «yaguiñ mojneʼ ikuyooxa Dios». Mex iga dyanam pekaʼ chin̈neʼ ikwiñkejiñ iga mɨjaneum espiritualmente. Juʼutstyim Jesús, odoy nakujiʼptaiñ y ikuyooxaiñ Jehová juʼutsam jeʼ iñɨʼmaʼyba (Mat. 20:23; Filip. 2:​5-8). Ikwiñkejiñtyim iga «ikupɨkpa» Jehová, jeʼm ian̈kiʼmayoʼoyiyaj, y jeʼm ijɨɨxian̈chioʼoyiyaj chioypaʼap ikuyukmɨ jeʼm iorganización (1 Tim. 4:15).

15. ¿Nasuntaap iga iknaxiñ wɨtampɨk najɨʼyoʼoyi jempɨk tsɨʼytyoʼoba juʼuts anciano?

¹⁵ Jeʼm Biblia nɨmpa iga jempɨk tsɨʼytyoʼoba juʼuts anciano «wɨan̈kejayoʼyiñ», ¿nɨmtoʼoba iga ikñaxiñ wɨtampɨk najɨʼyoʼoyi? Dyaʼ. Ity jaʼyan̈ ancianos iga dyaʼ ixpɨkyajtaap iga iknasyajpa wɨtampɨk najɨʼyoʼoyi. Pero, tsaam iwɨan̈kejyajpa jempɨk nɨmpa jeʼm Biblia jesɨk putyajpa jeʼm an̈matkuyjom y jesɨk nɨkpa ianmajan̈chiʼiyaj tun̈gakyaj (aʼmɨtyim jempɨk nɨmpa 1 Corintios 12:​28, 29 y Efesios 4:11). Pero jempɨk tsɨʼytyoʼoba juʼuts anciano, wɨɨ iga seguido ityeguedaiñ iwɨan̈kejayoy, ¿juutypɨk iwatpa?

16. ¿Juutypɨk jeʼm ancianojyaj iwɨan̈kejayyajpa tun̈gakyaj? (Aʼmɨtyim jeʼm imagen).

¹⁶ «Ikupɨguiñ jeʼm Dios In̈maatyi». Jeʼm anciano juchixkej ipɨguiñ jeʼm Biblia, jesɨk in̈kejaʼyba tun̈gakyaj jeʼm an̈tuʼumaajijom y jesɨk ijɨɨxian̈chiʼiba algun i, jeʼyukmɨ iwɨkuyujkaiñ jeʼm Biblia y jeʼm totjaayiyaj (Prov. 15:28; 16:23). Jesɨk kuyujpa, iwɨkɨʼpin̈ba tyi nɨmtoʼoba jempɨk ikuyujkaʼ. Y jesɨk in̈kejaʼyba tun̈gakyaj, iyooxpaʼtpa iga majnam ityoyyajiñ Jehová. Jeʼyukmɨ iwaʼgayiñ yooxpadoʼoyi jempɨk dende pekam sɨʼ ikuyooxaoyyaj juʼuts anciano (1 Tim. 5:17). Nasuntaptyim iga jeʼm ancianojyaj «ianmajan̈chiʼiyaj» jeʼm ityɨwɨtam. Jesɨk nasuntaap iga «in̈jɨyjakyajiñ» algun i iwatyajpa kun toyoʼoyi, yaʼachan̈jamoʼoyi y iwɨjɨʼyayyajpa, iwatyajpa juʼuts iwat Jesús (Mat. 11:​28-30; 2 Tim. 2:24).

WAATƗ TYITYAM NASUNTAAP SIIGA MIKUYOOXAOYTYOʼOBA JUʼUTS ANCIANO

17. a) ¿Tyiʼiga jeʼm siervos ministeriales odoy ijɨɨsyajiñ iga dyaʼ wɨap ichɨʼyyaj juʼuts anciano? b) ¿Tyi ijɨɨskupakneyajiñ jeʼm ancianojyaj jesɨk ikɨʼpin̈yajpa siiga tuum tɨɨwɨ wɨabam ichɨʼy juʼuts anciano? (Aʼmɨtyim jeʼm recuadro «Miancianojtam wɨpɨktaʼamɨ iñjɨɨxi jesɨk in̈kɨʼpin̈taʼmpa siiga tuum tɨɨwɨ wɨabam ichɨʼy juʼuts anciano»).

¹⁷ Sɨɨ iga tan̈kɨʼpin̈netaʼmum tyityam nasuntaap iga algun i kuyooxaoʼyiñ juʼuts anciano, wɨapsɨ iga jeʼm siervos ministeriales ijɨɨsyajpa iga ni keman wɨap iwatyaj yɨʼp yooxakuy. Pero ijɨɨsyajiñ iga Jehová y jeʼm iorganización dyaʼ in̈joʼkyajpa iga jempɨk kuyooxaoyyajpa juʼuts anciano kukapsneyajiñ (1 Ped. 2:21). Jehová ichiʼiba jeʼm iespíritu santo iga ikkupakyajiñ jeʼm yooxakuy (Filip. 2:13). Siiga mikuyooxaoytyoʼoba juʼuts anciano, an̈wejpaʼatɨ Jehová, wɨkɨʼpin̈ɨ tyityam nasuntaap y waʼgaʼayɨtyim jeʼm ancianojyaj iga miyooxpaʼtyajiñ.

18. ¿Tyi iwatyajiñ ityumpɨy jeʼm siervos ministeriales?

¹⁸ Ityumpɨy jeʼm tɨwɨtam wɨɨ iga ikkupakyajiñ jempɨk tan̈kɨʼpin̈netaʼm yɨʼp kuyujijom, dyaʼ tyi ijoo siiga ancianojyajam o dyanam (Filip. 3:16). Siiga sɨʼ in̈kuyooxaoy juʼuts siervo ministerial, seguido teguedaajɨ inikkupak tyityam nasuntaap iga wɨaiñ iñchɨʼy juʼuts anciano. Waʼgaʼayɨ Jehová iga miyooxpaʼdyiñ iga majnam wɨaiñ in̈kuyooxaoy jeʼm kumunjom (Is. 64:8). Y jeʼ ikumayketpa ityumpɨy jeʼm yooxakuy in̈watpaʼap.