Tyi tan̈kejaytyaʼmpa jeʼm in̈an̈pɨgam 40 jaama iga jaʼyñam ityi Jesús

1, 2. Jesɨk nɨkyaj idyɨk Emaús, ¿tyi iñaskayaj jeʼm Jesús ikuyujkɨʼɨwiñyaj?

Jeʼm jaama 16 de nisán jeʼm amtyɨy 33 jeʼm Jesús ikuyujkɨʼɨwiñyaj tsaam pɨɨmi idyɨk an̈yaʼkneyaj y kɨɨn̈neyaj. Wɨsteen de jeʼeyaj nɨkyaj Jerusalén toomi juuty ity Emaús, tuum an̈eymɨ juuty tsɨʼyba tuumtsam 11 kilómetros. Tsaam pɨɨmi idyɨk an̈yaʼkneyaj iga jaʼy iwaganasɨʼɨyaj Jesús y sɨɨ akkaʼanetawum. Ityumpɨy jeʼm an̈jogoʼoyi iga iniityyaj idyɨk keʼnam dyam kupakpa. Pero jeʼeyaj dyaʼ ikujɨɨsyaj jempɨk dyam jaʼyñeʼ naspa.

² Tuum pɨɨxiñ iga dyaʼ iixpɨkyajpa idyɨk moj iwaganawiʼkyaj y jeʼm ikuyujkɨʼɨwiñyaj moj in̈madayyaj iga tsaam pɨɨmi an̈yaʼkneyaj iga Jesús yaʼachwatta y akkaʼata. Okmɨ yɨʼp pɨɨxiñ ijɨykiʼm «Moisés y jém wiñɨcpɨc profetayaj», nɨʼmayyajta tyiʼiga yaʼachwatta y akkaʼata Jesús, jempɨk an̈madayyajta tsaam ianmajan̈chiʼiyaj. Jesɨk nuʼkyaj Emaús jeʼm kuyujkɨʼɨwiñyaj ikutɨʼɨyɨyyaj iga jempɨk sɨʼ idyɨk inimuruyaj jeʼ Jesús. Pɨɨmi maymayayaj jesɨk ijoodon̈ayaj iga aktsukumnetawum idyɨk (Luc. 24:​13-35).

3, 4. a) ¿Tyi iñaskayaj jeʼm Jesús ikuyujkɨʼɨwiñyaj? (Hechos 1:3). b) ¿Tyi tan̈kɨʼpin̈taʼmpa yɨʼp kuyujijom?

³ Jesús iwiñkejay jeʼm ikuyujkɨʼɨwiñyaj jeʼm in̈an̈pɨgam 40 jaama yɨʼp Naxyukmɨ (maayɨʼ Hechos 1:3). Jesús pɨɨmi ianmajan̈chiʼ jeʼm ikuyujkɨʼɨwiñyaj, jeʼyukmɨ dyam an̈yaʼkyaj y dyamtyim kɨɨn̈yaj, pɨɨmi maymayayaj y ikwiñkejyaj confianza y dyam kɨɨn̈yaj iga in̈kejyajpa jeʼm Dios In̈maatyi y iga dyaʼ jaʼyñeʼ miñba jeʼm Dios iAn̈jagoʼoyi.a

⁴ Tsaam pɨɨmi tayooxpaʼttaʼmpa y tamaymaywattaʼmpa siiga tan̈kuyujkataʼmpa jeʼm 40 in̈an̈pɨgam jaama iga jaʼy ityi Jesús yɨʼp Naxyukmɨ. Yɨʼp kuyujijom tan̈kɨʼpin̈taʼmpa juutypɨk Jesús tsaam iwɨpɨk jeʼm itiempo 1) ianmajan̈chiʼ jeʼm ikuyujkɨʼɨwiñyaj, 2) iyooxpaʼt iga ikutɨʼɨyɨyyajiñ jeʼm jɨychagoʼoyiyaj y 3) an̈kejayyaj juutypɨknam maaj wɨap ikkupakyaj jeʼm iyooxakuyyaj. Tan̈kɨʼpin̈taʼmiñ juutypɨk wɨap tan̈watkiʼpstaʼm.

JUUTYPƗK TANANMAJAN̈CHIʼIYAJPA TUN̈GAKYAJ

5. ¿Tyiʼiga ityogoyayyaj idyɨk iga jeʼm Jesús ikuyujkɨʼɨwiñyaj anmajan̈chiʼiyajtaiñ?

⁵ Jeʼm Jesús ikuyujkɨʼɨwiñyaj ixunyajpa idyɨk iga anmajan̈chiʼiyajtaiñ. ¿Tyiʼiga? Weeñiyaj ichakneyaj idyɨk ityɨk, ifamilia, iyooxakuyyaj iga ikuyooxayajpa a tiempo completo (Mat. 19:27). Y tun̈gakyaj yaʼachwatneyajta idyɨk (Juan 9:22). Iwatyaj yɨʼɨmpɨk iga ikupɨkyajpa iga Jesús jeʼam jempɨk ikɨakputyajpa idyɨk (Mat. 16:16). Pero, jesɨgam akkaʼata pɨɨmi an̈yaʼkyaj, ijɨɨsyaj iga dyam idyɨk kupakpa jempɨk in̈joʼkneyaj.

6. ¿Tyi iwat Jesús jesɨgam aktsukumta?

⁶ Jesús ijoodon̈ idyɨk iga jesɨk kaʼaba, jeʼm ikuyujkɨʼɨwiñyaj an̈yaʼkyajpa. Ikutɨʼɨyɨy juʼuts idyɨk in̈jaamyaj, dyaʼ ijɨɨs iga ityogoyayyaj fe. Jeʼyukmɨ jeʼm jaama jesɨgam aktsukumta, moj ianmajan̈chiʼ jeʼm iamigojyaj. Iwiñkejay María Magdalena jesɨgam wejpa idyɨk ixɨʼ juuty kumneta (Juan 20:​11, 16). Okmɨ iwiñkejay wɨsteen jeʼm ikuyujkɨʼɨwiñ. Wiñkejaytyatyim jeʼm apóstol Pedro (Luc. 24:34). ¿Tyi tan̈kejaytyaʼmpa? Tan̈kɨʼpin̈taʼmiñ jempɨk nas jesɨgam iwiñkejay María Magdalena.

7. ¿Tyi iwat Jesús jesɨk iaʼm iga María wejpa idyɨk ixɨʼ? (Juan 20:​11-16; aʼmɨtyim jeʼm imagen).

⁷ (Maayɨʼ Juan 20:​11-16). Jeʼm jaama 16 de nisán, kukejakɨʼɨm weeñi yomtam iga ityun̈ɨyyajpa Jesús, nɨkyaj juuty kumneta idyɨk (Luc. 24:​1, 10). Tuum jeʼ María Magdalena. Jesɨk nuʼk jeʼm kumikɨɨm iaʼm iga dyam idyɨk tyidyɨʼyɨy, jeʼyukmɨ poyjiimɨ nɨk in̈maday Pedro y Juan jempɨk naspa idyɨk ixɨʼ. Ikwɨstɨkyaj poʼyan̈tsukumyaj y María nɨktyim. Jesɨgam nuʼkyaj iaʼmyaj iga dyam tyidyɨʼyɨy, okmɨ seetyajum ityɨkkɨʼɨm. Pero María tsɨʼy jeem y moj weeji. Dyaʼ idyɨk ijoodon̈ iga Jesús sɨʼ iaʼm. Pɨɨmi ityoʼyan̈jaam iga yɨʼp yoomoʼ wejpa idyɨk ixɨʼ, jeʼyukmɨ iwiñkejay y ianmajan̈chiʼ. Jɨʼyaytya y nɨmaytya iga nɨguiñ in̈madayiñ ityɨwɨtam iga Jesús aktsukunetawum idyɨk (Juan 20:​17, 18).

8. ¿Juutypɨk tan̈watkiʼpstaʼm Jesús?

⁸ ¿Juutypɨk wɨap tan̈watkiʼpstaʼm Jesús? Tananmjan̈chiʼiyajiñ jeʼm tɨwɨtam iga duroj ikuyooxayajiñ Jehová. Jeʼyukmɨ nasuntaap iga tanjoodon̈aiñ tyi sɨʼ iñaskayaj, tan̈kutɨʼɨyɨyyajiñ y tanjɨyayyajiñ kun toyoʼoyi. Tanaʼmiñ juʼuts idyɨk in̈jaam tuum yoomtɨwɨ iñɨɨyipɨk Jocelyn, iga kaʼ iyoomtɨwɨ en tuum accidente. Jeʼ nɨmpa: «Waatyña meses pɨɨmi idyɨk an̈yaʼkneʼ». Tuum an̈komɨʼɨyi ityɨʼp ityɨkkɨʼɨm, ikumaton̈yaj y ikutɨʼɨyɨyyaj juʼuts idyɨk in̈jaam, jeʼeyaj ikjɨɨsyaj iga Jehová tsaam ichoowaixpa. Jeʼ nɨmpa: «Dyaʼ idyɨk an̈kutɨʼɨyɨʼyba tyi an̈watpa, anjaampa iga keʼnam sɨʼ idyɨk anjiʼkkaʼ lamarjom. Pero Jehová ikuyukmɨ jeʼm tɨwɨtam akɨakput, keʼnam jesɨk atop juuty ajiʼkkaʼaba idyɨk ansɨʼ. Ayooxpaʼtyaj iga seguido an̈kuyooxaiñ Jehová». Siiga tananmajan̈chiʼiyajtoʼoba tun̈gakyaj, tan̈wɨkumaton̈yajiñ jesɨk tammadayyajpa jempɨk sɨʼ iñaskayaj, jesɨk wɨap tampɨɨmchiyaj iga duroj ikuyooxayajiñ Jehová (Rom. 12:15).

JUUTYPƗK TANYOOXPAʼTYAJPA TUN̈GAKYAJ IGA IKUTƗʼƗYƗYYAJIÑ JEʼM BIBLIA

9. ¿Juutypɨk iyooxpaʼt Jesús jeʼm ikuyujkɨʼɨwiñ?

⁹ Jeʼm Jesús ikuyujkɨʼɨwiñyaj ikupɨkyajpa idyɨk jeʼm Dios In̈maatyi y iwatkiʼpsyajpa (Juan 17:6). Pero dyaʼ iwɨkutɨʼɨyɨyñeyaj idyɨk tyiʼiga Jesús akkaʼata, juuts tuum imalwatnewɨʼɨp. Jesús ijoodon̈ iga jeʼm ikuyujkɨʼɨwiñyaj sɨʼ idyɨk iwɨwatyaj, pero dyanam iwɨkutɨʼɨyɨyñeyaj idyɨk jempɨk in̈kejpa jeʼm Dios In̈maatyi (Luc. 9:​44, 45; Juan 20:9). Jeʼyukmɨ yooxpaʼtyajta iga iwɨkutɨʼɨyɨyyajiñ jempɨk imayyajpa. Tan̈kɨʼpin̈taʼmiñ tyi iwat jesɨgam iwiñkejay jeʼm wɨsteen ikuyujkɨʼɨwiñyaj jempɨk nɨkiyaj idyɨk Emaús.

10. ¿Juutypɨk Jesús iyooxpaʼt jeʼm ikuyujkɨʼɨwiñyaj iga ikutɨʼɨyɨyyajiñ iga jeʼam jeʼm Mesías? (Lucas 24:​18-27).

¹⁰ (Maayɨʼ Lucas 24:​18-27). Jesús dyaʼ jobity iñɨʼmay jeʼm ikuyujkɨʼɨwiñ iapaʼap, iwaday akwagoʼoyiyaj. ¿Tyiʼiga? Iga in̈matyajiñ idyɨk juʼuts in̈jaamyaj y tyi ijɨɨsyajpa. Nɨmyaj iga in̈joʼkneyaj idyɨk iga Jesús tsɨʼyiñ juʼuts an̈jagoʼoyi en Israel y dyaʼ jeʼm romanos. Jesɨk ijoodon̈a jempɨk ijɨɨsyajpa idyɨk, yooxpaʼtyajta kun jeʼm Dios In̈maatyi iga ikutɨʼɨyɨyyajiñ iga kupakneyajum idyɨk waatyi jɨychagoʼoyiyaj.b Jeʼtyim tsuʼuʼ, Jesús ipaʼt tun̈gak ikuyujkɨʼɨwiñyaj y in̈madaytyim juutypɨk kupak jeʼm jɨychagoʼoyiyaj (Luc. 24:​33-48). ¿Tyi tan̈kejaytyaʼmpa?

11, 12. a) ¿Juutypɨk tan̈watkiʼpstaʼmpa Jesús siiga tanyooxpaʼtyajtoʼoba tun̈gakyaj? (Aʼmɨtyim jeʼm imagenyaj). b) ¿Juutypɨk yooxpaʼtta Nortey?

¹¹ ¿Juutypɨk tan̈watkiʼpstaʼmpa Jesús? Jesɨk tanakkuyujpa algun i tan̈wadyiñ akwagoʼoyiyaj iga wɨañ tanjoodon̈a tyi ijɨɨspa y tyi ijaampa (Prov. 20:5). Jesɨk tanjoodon̈awum, tanan̈kejayyajiñ juutypɨk wɨap ipaʼtyaj Bibliajom jeʼm an̈kiʼmayoʼoyi jempɨk wɨap iyooxpaʼtyaj. Odoy tannɨʼmayyajiñ tyi iwatyajiñ, tanakwaʼkyajiñ juutypɨk wɨap iwatkiʼps iityijom jeʼm an̈kiʼmayoʼoyi. Tanaʼmiñ tyi iñaskaʼ jeʼm tɨɨwɨ Nortey iga ity Ghana.

¹² Jesɨk Nortey 16 idyɨk iamtyɨy moj ikuyujkaʼ jeʼm Biblia. Jeʼyukmɨ jeʼm ifamilia moj ijooyix. ¿Tyi iyooxpaʼt iga wɨaiñ iyaʼachɨy? Jempɨk sɨʼ idyɨk ikkuyuj in̈kejay jempɨk nɨmpa jeʼm capítulo 10 de Mateo juuty in̈matpa iga jempɨk ikupɨkyajpa Jehová jooyixyajtaap. Nortey nɨmpa: «Jesɨk anfamilia moj ajooyix, an̈kutɨʼɨyɨy iga ampaʼtneum idyɨk jeʼm nuntapɨk an̈kejayoʼoyi». In̈kejaytyiñ jempɨk nɨmpa Mateo 10:​16, juuty nɨmpa iga tawɨjɨɨxiɨytyaʼmiñ yɨʼp iyooxpaʼt iga ikujɨɨxiñ juutypɨk wɨap in̈maday jeʼm ifamilia jempɨk sɨʼ ikuyujkaʼ. Okmɨ iga chin̈, Nortey kuyooxaoytyoʼoba idyɨk juʼuts precursor, pero ijaatun̈ ixunba idyɨk iga nɨguiñ jeʼm universidad. Jempɨk sɨʼ idyɨk ikkuyuj dyaʼ iñɨʼmay tyi idyɨk iwadyiñ, iwaday akwagoʼoyiyaj iga ikujɨɨxiñ juutypɨk wɨap ikupɨk jeʼm an̈kiʼmayoʼoyiyaj. ¿Tyi iwat? Nortey kuyooxaoy juʼuts precursor regular y jeʼm ijaatun̈ ikebakput. Jeʼ nɨm: «An̈wɨkupɨkneʼ iga ampɨk tuum wɨbɨk jɨɨxi». Jesɨk tanyooxpaʼtyajpa tun̈gakyaj iga ikutɨʼɨyɨyyajiñ jempɨk ity Bibliajom, tanyooxpaʼtyajpa iga mɨjayajiñ espiritualmente (Efes. 3:​16-19).

TANYOOXPAʼTYAJIÑ JEʼM TƗWƗTAM IGA IWƗWATYAJIÑ JEʼM YOOXAKUYYAJ

13. ¿Tyi iwat Jesús iga duruj wattaiñ jeʼm an̈matkuy mex iga nɨkpam idyɨk sɨn̈yukmɨ? (Efesios 4:8).

¹³ Jesɨgam Jesús jaʼy ityi yɨʼp Naxyukmɨ iwɨakkupak jeʼm yooxakuy ichiʼiwɨʼɨp iJaatun̈ (Juan 17:4). Pero dyaʼ keman ijɨɨs: «Siiga ansunba iga wɨpudyiñ jeʼm yooxakuy, an̈yaʼak an̈wadyiñ». Mex iga jeʼm iyooxakuy numaaj jaʼy tukuteen amtyɨy, iwɨan̈kejay tun̈gakyaj iga wɨañtyim iwatyaj. Jesús iniidyay idyɨk confianza jeʼm ikuyujkɨʼɨwiñyaj. Jeʼyukmɨ chiʼiyajta jeʼm yooxakuy ija in̈matyajiñ jeʼm wɨtampɨk an̈matyiyaj y ikuixyajiñtyim jeʼm Jehová ioveja, mex iga jeʼm ikuyujkɨʼɨwiñyaj dyanam idyɨk iniityyaj 30 iamtyɨyyaj (maayɨʼ Efesios 4:8). Yɨʼpyaj pɨxiñtyam tsaam idyɨk iwaganayooxaneyaj Jesús. Wiñtyi iga nɨguiñ sɨn̈yukmɨ iwɨan̈kejay jeʼm ikuyujkɨʼɨwiñ iga iwɨakkupakyajiñ iyooxakuyyaj. Tanaʼmiñ juutypɨk iwat.

14. ¿Juutypɨk iyooxpaʼt Jesús jeʼm ikuyujkɨʼɨwiñ iga mɨjayajiñ espiritualmente? (Aʼmɨtyim jeʼm imagen).

¹⁴ Jesús in̈kiʼm jeʼm ikuyujkɨʼɨwiñ kun toyoʼoyi. Iaʼm iga weeñiyaj tan̈kaʼ ikupɨkyaj idyɨk iga aktsukumtaap, jeʼyukmɨ nɨʼmayyajta iga ikupɨkyajiñ (Luc. 24:​25-27; Juan 20:27). Nɨʼmayyajtatyim iga iyooxpaʼtyajiñ jeʼm Jehová iyooxakɨʼɨwiñyaj y odoy pɨɨmi ityeguedayajiñ iga ikuaʼmyajpa tumiñ (Juan 21:15). Akjɨɨsyajtatyim iga odoy ikunaɨʼyyajiñ tun̈gakyaj jesɨk ipɨktson̈yajpa yooxakuyyaj jeʼm kumunjom (Juan 21:​20-22). Iga dyaʼ idyɨk iwɨkutɨʼɨyɨyñeyaj juchix miñba jeʼm Dios iAn̈jagoʼoyi, yooxpaʼtyajta iga ikutɨʼɨyɨyyajiñ y maaj ityeguedayajiñ jeʼm an̈matkuy (Hech. 1:​6-8). ¿Tyi in̈kejayyajpa jeʼm ancianojyaj kun jempɨk iwat Jesús?

15, 16. a) ¿Juutypɨk jeʼm ancianojyaj wɨap iwatkiʼpsyaj Jesús? b) ¿Juutypɨk iyooxpaʼt Patrick jesɨk an̈jɨyjakta?

¹⁵ ¿Juutypɨk jeʼm ancianojyaj wɨap iwatkiʼpsyaj Jesús? In̈kejayyajiñ y iyooxpaʼtyajiñ jeʼm tɨwɨtam y jeʼm traytyipɨxiñtyam iga wɨaiñ iyooxpadoy jeʼm kumunjom.c Jeʼm ancianojyaj odoy in̈joʼkyajiñ iga jeʼm tɨwɨtam juchixkej iwɨwatyajiñ. Jeʼm traytyipɨxiñtyam an̈kejayyajtaiñ kun toyoʼoyi iga wɨaiñ iwɨwatyaj iyooxakuy, iniityajiñ humildad, naidyayyajtaiñ confianza y ityeguedayajiñ tun̈gakyaj (1 Tim. 3:1; 2 Tim. 2:2; 1 Ped. 5:5).

¹⁶ Tanaʼmiñ jempɨk iñaskaʼ jeʼm tɨɨwɨ Patrick. Jesɨk traytyiñam idyɨk, dyaʼ ijɨyaʼyba kun toyoʼoyi tun̈gakyaj, tsotyjɨʼyba idyɨk. Jeʼyukmɨ tuum anciano in̈jɨyjak kun toyoʼoyi. Patrick nɨmpa: «Tsaam amaymay iga an̈jɨyjak, jesɨk anaʼmpa idyɨk iga tun̈gak tɨwɨtam chiʼiyajtaap yooxakuyyaj jeʼm kumunjom dyaʼ idyɨk wɨɨ anan̈jaam. Jempɨk anɨʼmay jeʼm tɨɨwɨ ayooxpaʼt iga maaj anteguedaiñ an̈kuyooxa jeʼm tɨwɨtam y dyaʼ iga ampɨktson̈iñ yooxakuyyaj jeʼm kumunjom». Iga ikak ijɨɨxi Patrick tsakta juʼuts anciano jesɨk iniity idyɨk 23 iamtyɨy (Prov. 27:9).

17. ¿Juutypɨk ikwiñkej Jesús iga iniidyay confianza jeʼm ikuyujkɨʼɨwiñ?

¹⁷ Jesús dyaʼ numaaj iñɨʼmay jeʼm ikuyujkɨʼɨwiñyaj iga putyajiñ jeʼm an̈matkuyjom, nɨʼmayyajtatyim iga iwɨan̈kejyajiñ (aʼmɨ jeʼm estudio «Enséñenles», de Mateo 28:20). Wɨapsɨ iga jeʼeyaj ijɨɨsyaj iga dyaʼ idyɨk wɨap ikkupakyaj yɨʼp yooxakuy. Pero Jesús ikupɨkpa iga wɨap idyɨk ikkupakyaj, jeʼyukmɨ nɨʼmayyajta: «Juuts jém anJa̱tuŋ Dios acutsat [...], je̱mpɨct́im maŋcutsattámpa mimicht́am iga iŋwattámiñ jém Dios iyo̱xacuy» (Juan 20:21).

18. ¿Juutypɨk jeʼm ancianojyaj wɨap iwatkiʼpsyaj Jesús?

¹⁸ ¿Juutypɨk wɨap iwatkiʼpsyaj Jesús jeʼm ancianojyaj? Jeʼm ancianojyaj iga pekam kuyooxaoyyajpa ixɨʼyaj in̈kejayyajiñ tun̈gakyaj iga majnam ipɨktson̈yaj yooxakuyyaj jeʼm kumunjom (Filip. 2:​19-22). Wɨap ikwaʼgayyaj jeʼm mañipɨkyaj iga yooxapdoyyajiñ jesɨk akkuaʼyyaap y wɨtsakseettaap jeʼm An̈tuʼumayoʼytɨkyaj. Jesɨk in̈kejayyajpa tun̈gakyaj iwatyaj tuum yooxakuy, ikupɨkyajpa iga wɨap iwɨwatyaj jeʼm yooxakuy. Tuum anciano iñɨɨyipɨk Matthew tsaam ichoowaixpa iga jeʼm tun̈gakyaj ancianojyaj in̈kejayyajpa juutypɨk wɨap iwɨakkupak iyooxakuy. Jeʼ nɨmpa: «Jesɨk anɨʼmayyajpa juutytyam ajɨɨxtyogoyñeʼ ayooxpaʼtpa iga majnam an̈wɨwadyiñ».d

19. ¿Juʼp jɨɨxi wɨɨ iga tampɨktaʼmiñ?

¹⁹ Jeʼm in̈an̈pɨgam 40 jaama iga jaʼy ityi Jesús yɨʼp Naxyukmɨ ianmajan̈chiʼ, in̈kejay y iyooxpaʼt tun̈gakyaj iwɨwatyaj iyooxakuyyaj. Tan̈watkiʼpstaʼmiñ jempɨk jeʼ iwat (1 Ped. 2:21). Jeʼ tayooxpaʼtpa iga wɨaiñ tanakkupak jeʼm yooxakuy, jeʼyukmɨ nɨm: «Jo̱dóŋa̱taamɨ iga ɨch maŋwaganait́pa it́u̱mpɨy ja̱ma» (Mat. 28:20).