¿Mikuyooxaoytyoʼoba juʼuts siervo ministerial?

1. ¿Juʼuts idyɨk iaʼm Pablo jeʼm siervos ministeriales?

JEʼM siervos ministeriales tsaam yooxpadoyyajpa jeʼm kumunjom. Jeʼm apóstol Pablo tsaam idyɨk ichoowaixpa yɨʼpyaj pɨxiñtyam iga tsaam kupɨgoyyajpa. Jeʼyukmɨ jesɨk ijaʼyay jeʼm cristianos de Filipos, idiuschiʼ jeʼm siervos ministeriales y jeʼm ancianos (Filip. 1:1).

2. ¿Juʼuts iaʼm Luis jeʼm iyooxakuy juʼuts siervo ministerial?

² Jaʼyan̈ tɨwɨtam chin̈neyajwɨʼbam iwatyajpa kun maymayaaji jeʼm iyooxakuy juʼuts siervos ministeriales, dyaʼ tyi ijoo siiga mañiyajnam o tsaamiyajam. Devan, iniity idyɨk 18 iamtyɨy jesɨk tsakta juʼuts siervo ministerial y Luis iniityum idyɨk maaj de cincuenta. Yɨʼp tɨɨwɨ in̈matpa juʼuts in̈jaamyaj jeʼm siervos ministeriales. Jeʼ nɨmpa: «Tsaam amaymay an̈wat yɨʼp yooxakuy y maaj jesɨk anjɨɨspa juʼtspɨy atoyyajpa jeʼm tɨwɨtam».

3. ¿Juʼptam akwagoʼoyiyaj tan̈kutson̈taʼmpa yɨʼp kuyujijom?

³ Siiga michin̈neum y dyanam sɨʼ in̈kuyooxaoy juʼuts siervo ministerial. ¿Dyaʼ mikuyooxaoytyoʼoba? ¿Kun juʼp jɨɨxi wɨɨ iga in̈wadyiñ? ¿Tyityam nasuntaap iga wɨaiñ inikkupak? Yɨʼp kuyujijom tan̈kutson̈taʼmpa yɨʼpyaj akwagoʼoyiyaj. Pero wiñtyi tan̈kɨʼpin̈taʼmpa juʼptam yooxakuy iwatpa tuum siervo ministerial.

¿JUPTAM YOOXAKUY IWATPA TUUM SIERVO MINISTERIAL?

4. ¿Juʼptam yooxakuy iwatpa tuum siervo ministerial? (Aʼmɨtyim jeʼm imagen).

⁴ Jeʼm siervos ministeriales jeʼ tɨwɨtam iga chin̈neyajum y kupin̈neyajta por espíritu santo iga iyooxpaʼtyajpa jeʼm ancianos, iga iwatyajiñ weeñi yooxakuy jeʼm kumunjom. Weeñi iñɨɨyɨyayyajpa jeʼm tɨwɨtam juuty nɨguiñ in̈matyaj y iniityyajiñ jeʼm totjaayiyaj jempɨk ityogoyayyajpa. Jaʼyan̈yaj yooxpadoyyajpa jesɨk akkuaytyaap y wɨtsakseettaap jeʼm An̈tuʼumayoʼytyɨkyaj. Tun̈gakyaj iyooxpaʼtyajpa jeʼm tɨwɨtam iga ipaʼtyajiñ juuty kooñyajpa y ikkamyajpa jeʼm audio y video jesɨk ityyajpa jeʼm an̈tuʼumaajiyaj. Tsaam wɨɨ jeʼm yooxakuy iwatyajpaʼap jeʼm siervos ministeriales, pero jempɨk maaj wɨɨ jeʼ iga ityoyyajpa Jehová, ikupɨgayyajpa jeʼm ian̈kiʼmayoʼoyiyaj y pɨɨmi ityoyyajpa jeʼm ityɨwɨtam (Mat. 22:​37-39). ¿Tyi iwadyiñ tuum tɨɨwɨ chin̈newɨʼbam iga wɨaiñ ikuyooxaoy juʼuts siervo ministerial?

5. ¿Tyi wɨap in̈wat iga wɨaiñ in̈kuyooxaoy juʼuts siervo ministerial?

⁵ Jeʼm Biblia iwɨan̈matpa tyityam nasuntaap iga iwadyiñ algun i iga wɨaiñ ikuyooxaoy juʼuts siervo ministerial (1 Tim. 3:​8-10, 12, 13). Siiga mikuyooxaoytyoʼoba juʼuts siervo ministerial, kɨʼpin̈ɨ tyityam nasuntaap y okmɨ akkupaakɨ. Wiñtyi kɨʼpin̈ɨ kun juʼp jɨɨxi in̈wattoʼoba.

¿KUN JUʼP JƗƗXI IN̈WATTOʼOBA?

6. ¿Kun juʼp jɨɨxi wɨɨ iga in̈kuyooxayajiñ jeʼm tɨwɨtam? (Mateo 20:28; aʼmɨtyim jeʼm imagen itywɨʼɨp jeʼm ).

⁶ Tan̈wattaʼmiñ juʼuts iwat Jesús, jeʼ ityoyba idyɨk ijaatun̈ y tun̈gakyaj. Yɨʼbam iyooxpaʼt iga iwadyiñ juʼtspɨyam wɨa iga iyooxpaʼt tun̈gakyaj (maayɨʼ Mateo 20:28; Juan 13:​5, 14, 15). Siiga mich mityoyoʼyba y iñtyoyba Jehová jeʼ mikumayketpa y miyooxpaʼtpa iga wɨaiñ in̈kuyooxaoy juʼuts siervo ministerial (1 Cor. 16:14; 1 Ped. 5:5).

7. ¿Tyiʼiga tuum tɨɨwɨ odoy iwadyiñ algun tyi numaaj iga kujiʼptaiñ?

⁷ Yɨʼp naxyukmɨ jaʼyan̈yaj nakujiʼpyajtaap iyaʼak, pero en jeʼm Jehová iorganización dyaʼ jeempɨk naspa. Siiga tuum tɨɨwɨ toyoʼyba juʼuts Jesús, dyaʼ ixunba iga tun̈gakyaj ikujiʼpyajiñ y dyatyim in̈jaktoʼoba tun̈gakyaj. Siiga algun i iga tsaam nakujiʼptaap chiʼityaap tuum yooxakuy jeʼm kumunjom, wɨapsɨ iga dyaʼ iwatpa jeʼm yooxakuyyaj xutyutaʼmpɨk iga nasuntaap iga wɨaiñ ikuix jeʼm Jehová iovejajyaj. Wɨap ijɨɨs iga siiga iwatpa yɨʼpyaj yooxakuy dyam i ikujiʼppa (Juan 10:12). Jehová ni keman ikumayketpa jempɨk iwatyajpa algun tyi iga numaaj ixunyajpa iga kujiʼpyajtaiñ (1 Cor. 10:​24, 33; 13:​4, 5).

8. ¿Tyi iñɨʼmay Jesús jeʼm iapóstoles?

⁸ A veces jeʼm Jesús iamigojyaj iwatyajtyim yooxakuyyaj numaaj iga kujiʼpyajtaiñ. Jeempɨgam iñaskayaj Santiago y Juan. Jeʼeyaj iñɨʼmayyaj Jesús iga tsɨʼyyajiñtyim juʼuts an̈jagoʼoyi kun jeʼ. Jesús dyaʼ iñɨʼmay iga wɨɨ jempɨk sɨʼ iwaʼkyaj. Iñɨʼmay jeʼm doce iapóstoles iga siiga tsɨyyajtoʼoba juʼuts tuum mɨjpɨk an̈jagoʼoyi, ikuyooxayajiñ jeʼm ityɨwɨtam, y siiga in̈jakyajtoʼoba tun̈gakyaj wɨɨ iga ikuyooxaiñ ityumpɨyyaj (Mar. 10:​35-37, 43, 44). Jesɨk jeʼm tɨwɨtam ikuyooxayajpa tun̈gakyaj kun tuum wɨbɨk jɨɨxi, jeʼm kumun tsaam maymayaap (1 Tes. 2:8).

¿TYI MIYOOXPAʼTPA IGA IN̈KUSUʼNƗʼYIÑ IÑYOOXPAʼT TUN̈GAKYAJ?

9. ¿Tyi miyooxpaʼtpa iga in̈kusuʼnɨʼyiñ in̈kuyooxa tun̈gakyaj?

⁹ Mich iñtyoyba Jehová y in̈kuyooxatoʼoba jeʼm iñtyɨwɨtam. Pero wɨapsɨ iga dyaʼ impɨktson̈toʼoba jeʼm yooxakuy iwatpaʼap tuum siervo ministerial. ¿Tyi miyooxpaʼtpa iga in̈kusuʼnɨʼyiñ in̈kuyooxaoy jeʼm kumunjom? Jɨɨsɨ juʼtspɨy wɨap immaymaya siiga in̈kuyooxaap jeʼm iñtyɨwɨtam. Jeex juʼuts nɨm Jesús: «Más tamaymay iga tachióypa que iga tachiit́a̱p» (Hech. 20:35). Iga jeʼ juchixkej ikupɨk yɨʼpyaj an̈matyiyaj, maymaya jesɨk ikuyooxa tun̈gakyaj y mich wɨaptyim immaymaya.

10. Iga Jesús maymaya jesɨk ikuyooxa tun̈gakyaj, ¿tyityam iwat? (Marcos 6:​31-34).

¹⁰ Jesɨk Jesús ikuyooxa tun̈gakyaj tsaam maymaya (maayɨʼ Marcos 6:​31-34). Tun̈kɨy jesɨk Jesús y jeʼm iapóstoles tsaam idyɨk soʼpsneyaj nɨk jeejiyaj tuum an̈eymɨ. Pero jaʼyan̈yaj jempɨk ikumaton̈yajtoʼoba idyɨk tyityam Jesús sɨʼ in̈kej, an̈jagoy mu iñukyaj juuty nɨkiyaj idyɨk Jesús. Jeʼ wɨa idyɨk mu iñɨm iga dyaʼ ikupaʼtneʼ, iga ni dyaʼ idyɨk ikupaʼtneʼ iwiʼkyaj. Jesús wɨa idyɨk iñɨʼmay iga in̈kejayba uxan̈ y okmɨ wɨabam idyɨk iñɨkyaj. Pero iga jeʼ tsaam toyoʼyba moj in̈kejay jaʼyan̈ tyidyin̈kej y jesɨk iaʼmtɨʼpnam tsuʼuyiam idyɨk (Mar. 6:35). Ni i dyaʼ ipɨɨmɨy iga an̈kejayoyiñ, iwat iga tsaam yaʼachan̈jamoʼyba y tsaam toyoʼyba. Pɨɨmi maymaya iga ikuyooxa tun̈gakyaj.

11. ¿Juutypɨk iyooxpaʼt Jesús jempɨk ikumaton̈yajpa idyɨk? (Aʼmɨtyim jeʼm imagen).

¹¹ Jesús dyaʼ numaaj an̈kejayoy ichiityim tyityam ityogoyayyaj jempɨk sɨʼ idyɨk ikumaton̈yaj, ijaʼyan̈wat jeʼm wiʼkkuy y okmɨ iñɨʼmay jeʼm ikuyujkɨʼɨwiñyaj iga iweʼkyajiñ (Mar. 6:41). Yɨʼɨmpɨgam in̈kej juutypɨk tan̈kuyooxaap tun̈gakyaj. In̈kejtyim iga jesɨk tanyooxpaʼtpa tun̈gakyaj juʼuts iwatyajpa jeʼm siervos ministeriales tsaam iwɨwadayyajpa. ¡Tsaam maymayayaj jeʼm apóstoles! Iga iyooxpaʼtyaj Jesús iga iweʼkyaj jeʼm wiʼkkuy hasta jesɨk ityumpɨyyaj wiʼkyaj y kusyaj (Mar. 6:42). Jesús dyaʼ numaaj tun̈kɨy iyooxpaʼt tun̈gakyaj y ichiʼ tyityam ityogoyayyaj. Juʼutsan̈aʼm tiempo jaʼy ityi Jesús yɨʼp naxyukmɨ iyooxpaʼt tun̈gakyaj (Mat. 4:23; 8:16). Tsaam idyɨk maymay iga in̈kejaʼyba tun̈gakyaj y ichiʼiba tyityam ityogoyayyaj. Mich jeempɨktyim wɨap in̈wat, mimaymayaap siiga in̈kuyooxaap tun̈gakyaj juʼuts siervo ministerial.

12. ¿Tyiʼiga odoy tanjɨɨstaʼmiñ iga dyaʼ tyi tajaayaʼ tan̈wat jeʼm kumunjom?

¹² ¿Mich iñjɨɨspa iga dyaʼ tyi mijaayaʼ in̈wat? Odoy an̈yaʼakɨʼ. Wɨapsɨ iga iniity wɨtampɨk cualidades iga wɨap iñyooxpadoy jeʼm kumunjom. Jempɨk wɨap miyooxpaʼt jeʼ iga wiñtyi waatɨ an̈wejpadoʼoyi y okmɨ maayɨʼ 1 Corintios 12:​12-30. Jeem Pablo iwɨan̈matpa iga Jehová tsaam michoowaixpa y wɨap iñyooxpadoy jeʼm kumunjom. Jeʼyukmɨ odoy soʼpsɨ siiga dyanam inikkapspa tyityam nasuntaap iga wɨaiñ in̈kuyooxaoy juʼuts siervo ministerial. Waatɨ tyityam miwɨap iga in̈kuyooxaap Jehová y jeʼm iñtyɨwɨtam. Wiñtyi iga jeʼm ancianos michiʼiyajpa tuum yooxakuy, iaʼmyajpa tyityam mijaayaʼ in̈wat (Rom. 12:​4-8).

13. ¿Tyi iwadyiñ tuum tɨɨwɨ iga ipɨktson̈toʼoba maaj yooxakuy jeʼm kumunjom?

¹³ Jempɨk mianmajan̈chiʼiba jeʼ iga iñjɨɨxiñ iga ityumpɨy jeʼm cristianos iga kuyooxaoyyajtoʼoba juʼuts siervo ministerial ikaʼpsyajiñ tyityam nasuntaap. Ityumpɨy jeʼm cristianos ikunuʼkyajiñ Jehová, ijaamyajiñ jeʼm maymayaaji iga ikuyooxayajpa tun̈gakyaj y iwatyajiñ juʼutsam in̈kejayñeʼ Jehová. Pero ¿tyi nasuntaap iga iwadyiñ jeʼm tɨɨwɨ jempɨk kuyooxaoytyoʼoba juʼuts siervo ministerial?

TYITYAM WƗƗ IGA IN̈WADYIÑ

14. ¿Tyi nɨmtoʼoba jeʼm an̈maatyi «serios»? (1 Timoteo 3:​8-10, 12).

¹⁴ (Maayɨʼ 1 Timoteo 3:​8-10, 12). Jeem in̈matpa tyityam nasuntaap. Jeʼm siervos ministeriales wɨɨ iga tsɨʼyyajiñ juʼuts tuum pɨɨxiñ «serios». ¿Tyi nɨmtoʼoba yɨʼp an̈maatyi? Nɨmtoʼoba iga iwɨakkupaguiñ iyooxakuy y iwɨwadyiñ iga tun̈gakyaj iniidyayyajiñ respeto. Dyaʼ nɨmtoʼoba iga dyaʼ wɨap ixiʼkyaj ni ijɨymɨɨchyaj (Ecl. 3:​1, 4). Pero, iwɨakkupakyajiñ iyooxakuy iga wɨaiñ iniidyaʼyyajta confianza jeʼm kumunjom.

15. ¿Tyi nɨmtoʼoba iga odoy mɨgoyyajiñ y odoy pɨɨmi ikusuʼnɨʼyyajiñ jeʼm tumiñ dyapɨk imɨʼɨchiʼ?

¹⁵ «Odoy mɨgoyyajiñ».Yɨp nɨmtoʼoba iga juchixkej nuuman̈matyjaiñ y ikkupakyajiñ jeʼm in̈maatyi (Prov. 3:32). «Odoy pɨɨmi ikusuʼnɨʼyiñ tumiñ dyapɨk imɨɨchiʼ». Yɨʼp nɨmtoʼoba iga odoy kunumayoʼyyajiñ siiga iniityyaj tuum negocio y odoy iñumyajiñ jeʼm tumiñ tumpaʼap jeʼm kumunjom. Dyatyim wɨɨ iga ikumoʼtsayyajpa jeʼm ityɨwɨtam iga ikooñwɨyyajpa maaj jaʼyan̈ tumiñ.

16. a) ¿Tyi nɨmtoʼoba iga odoy uukiʼayajiñ? b) ¿Tyi nɨmtoʼoba iga iniityyajiñ tuum jɨɨxi kuayñewɨʼɨp?

¹⁶ «Odoy uukɨʼayajiñ». Yɨʼp nɨmtoʼoba iga odoy ugan̈naxiñ y odoy ixpɨkyajtaiñ iga tsaam ukterojyaj. Iniityyajiñtyim tuum jɨɨxi kuayñewɨʼɨp iga ikupɨkyajpa jeʼm Jehová ian̈kiʼmayoʼoyiyaj. Ni i dyaʼ kukapsneʼ, pero wɨap tammaymayataʼm siiga tanaitytyaʼmpa tuum wɨnanɨgoʼoyi kun Dios.

17. ¿Juutypɨk wɨap tanaʼm siiga tuum tɨɨwɨ ikkupakpa iyooxakuy? (1 Timoteo 3:10; aʼmɨtyim jeʼm imagen).

¹⁷ Nasuntaptyim iga «wiñtyi aʼmtaiñ tyityam jaya iwat». Yɨʼp nɨmtoʼoba iga ikwiñkejneum iga wɨap iniidyaytya confianza y ikkupakpa iyooxakuy. Jeʼyukmɨ jesɨk jeʼm ancianos ichiʼiyajpa tuum yooxakuy, iwatyajiñ juutsam nɨʼmayñeyajta y juutypɨgam ixunba jeʼm organización. Iwɨkutɨʼɨyɨyñeyajiñ juutypɨk iwatyajpa iyooxakuy y juchix ikkupakyajpa. Jesɨk ikkupakyajpa iyooxakuy, jeʼm tɨwɨtam wɨap iaʼmyaj iga jeʼ tuum tɨɨwɨ iga wɨap iniidyaytya confianza. Miancianojtam, teguedataʼamɨ juʼptam tɨwɨtam chin̈neyajwɨʼbam wɨap inin̈kejaytyam (maayɨʼ 1 Timoteo 3:10). ¿Jeʼm in̈kumumjom ity tɨwɨtam mañipɨk iga chin̈neyajum? ¿Wɨkuyujyajpa iyaʼak? ¿Chioyyajpa kutson̈oʼoyiyaj jeʼm an̈tuʼumaajijom y putyajpa jeʼm an̈matkuyjom? Siiga jempɨgam sɨʼ iwatyaj, chiiyaʼajɨ yooxakuyyaj iga wɨap ikkupakyaj. Yɨʼɨmpɨgam wɨap iñaʼmtam juutypɨk ikkupakyajpa jeʼm iyooxakuy. Y jesɨk maaj okmɨ wɨap ikkupakyaj tyityam nasuntaap iga wɨaiñ ikuyooxaoyyaj juʼuts siervos ministeriales.

18. ¿Tyi nɨmtoʼoba iga odoy iwatyajiñ algun tyi iga wɨaiñ ikumɨgoyyajta?

¹⁸ Jeʼm siervos ministeriales «odoy iwatyajiñ algun tyi iga wɨaiñ ikumɨgoyyajta». A veces jeʼm cristianos wɨap iga tsoʼobɨy kumɨgoyyajtaap. Jeempɨgam iñaskaʼ Jesús y jeʼ nɨm iga jeʼm ikuyujkɨʼɨwiñ jempɨktyim idyɨk iñaskayajpa (Juan 15:20). Mex iga jeempɨgam naspa, siiga jeʼm tɨwɨtam iwɨwatyajpa juʼuts iwatpa idyɨk Jesús naidyayyajtaap respeto jeʼm kumunjom (Mat. 11:19).

19. ¿Tyi nɨmtoʼoba iga jeʼm cristiano numaaj iniidyiñ tuum iyoomoʼ?

¹⁹ Jempɨk kuyooxaoyyajtoʼoba juʼuts siervos ministeriales y an̈koʼmɨyñeyajum numaaj «iniityyajiñ tuum iyoomoʼ». Wɨɨ iga ikupɨkyajiñ jeʼm Jehová ian̈kiʼmayoʼoyi iga nɨmpa: Numaaj an̈koʼmɨyyajiñ tuum pɨɨxiñ y tuum yoomoʼ (Mat. 19:​3-9). Yɨʼp nɨmtoʼoba iga jeʼm cristiano ni keman odoy ipejiñ iyoomoʼ (Heb. 13:4). Wɨɨ iga ikwiñkejayiñ respeto jeʼm iyoomoʼ y odoy iaʼman̈taayaiñ tun̈gak yomtam iga ikusuʼnɨʼyñeʼ (Job 31:1).

20. ¿Juutypɨk tuum tɨɨwɨ iwɨkuixpa ifamilia?

²⁰ Nasuntaptyim iga jeʼm siervos ministeriales «iwɨan̈kejayyajiñ jeʼm imanɨktam y jeʼm iyoomoʼ». Jeʼm tɨɨwɨ iwɨakkupaguiñ jeʼm iyooxakuy jeʼm ifamiliajom. Tumtum semana iwaganakuyujiñ ifamilia. Iwaganapudyiñ iyoomoʼ y imanɨktam jeʼm an̈matkuyjom. Jeempɨgam iyooxpaʼtpa iga iniityyajiñ tuum wɨnanɨgoʼoyi kun Jehová (Efes. 6:4). Jeʼm tɨɨwɨ iga iwɨkuixpa ifamilia, ikwiñkejpa iga wɨaptyim ikuix jeʼm kumun (Aʼmɨtyim 1 Timoteo 3:5).

21. ¿Tyi wɨap in̈wat siiga dyanam sɨʼ in̈kuyooxaoy juʼuts siervo ministerial?

²¹ Siiga dyanam jeʼ mi siervo ministerial, mananmajan̈chiʼityaʼmpa iga an̈wejpaʼatɨ Jehová, kɨʼpin̈ɨ yɨʼp kuyuuji y tyityam nasuntaap iga wɨaiñ in̈kuyooxaoy juʼuts siervo ministerial y akkupaakɨ. Kujɨɨsɨ juʼtspɨy iñtyoyba Jehová y jeʼm iñtyɨwɨtam. Pɨɨmchiɨʼ jeʼm in̈kusuʼnɨyoʼoyi iga in̈kuyooxayajtoʼoba (1 Ped. 4:​8, 10). Yɨʼɨmpɨgam iñjaampa juʼtspɨy mimaymayaap siiga in̈kuyooxaap jeʼm iñtyɨwɨtam. ¡Jehová mikumaykedyiñ iga wɨaiñ in̈kuyooxaoy juʼuts siervo ministerial! (Filip. 2:13).