KUYUUJI 34
WAAÑI 107 Dios nos enseñó a amar
Jeʼm ancianojyaj ikwiñkejayyajiñ toyoʼoyi y yaʼachan̈jamoʼoyi jempɨk tan̈kawatneyaj
«Tanja̱tuŋ Dios tsa̱m miyaachaŋja̱mpa porque ixunpa iga iŋcucaguiñ iñjɨ̱xi» (ROM. 2:4).
AN̈KEJAYOʼOYI
Juutypɨk jeʼm ancianojyaj iyooxpaʼtyajpa jempɨk pɨɨmi tan̈kawatneyaj.
1. ¿Juutypɨk iwɨwadaʼyba jempɨk pɨɨmi tan̈kawatneʼ jesɨk toptaap jeʼm kumunjom?
JEʼM kuyuuji nasnewɨʼɨp tan̈kɨʼpin̈taʼm iga jeʼm apóstol Pablo iñɨʼmay jeʼm kumun Corinto tyi iwatyajiñ jesɨk tuum pɨɨxiñ tan̈kawat y dyaʼ ikak ijɨɨxi, jeʼyukmɨ topta jeʼm kumunjom. Pero juʼuts nɨmpa jeʼm texto juuty topneta yɨʼp kuyuuji Dios iyooxpaʼtpa jempɨk tan̈kawatneʼ iga ikaguiñ ijɨɨxi, iwatpa ikuyukmɨ jeʼm ancianojyaj, ¿juutypɨk? (Rom. 2:4).
2, 3. ¿Tyi tan̈wadyiñ siiga tanjoodon̈aap iga tuum tɨɨwɨ tan̈kawatneʼ?
2 Siiga tanjoodon̈aap iga tuum tɨɨwɨ pɨɨmi tan̈kawatneʼ, tanamuruiñ y tananmajan̈chiʼiñ iga in̈madaʼyiñ jeʼm ancianojyaj jempɨk iwatneʼ. Jesɨk jeʼm ancianojyaj ijoodon̈ayajpa juutypɨk wɨap iyooxpaʼtyaj y siiga nasuntaap iga toptaiñ jeʼm kumunjom (Is. 1:18; Hech. 20:28; 1 Ped. 5:2).
3 Siiga jempɨk tan̈kawatneʼ dyaʼ in̈madaytyoʼoba jeʼm ancianojyaj, jesɨk taɨchtyam tanan̈madayyajiñ. Jeempɨgam tanakwiñkejaʼyba iga tantoyba, dyaʼ tansunba iga ipatstogoʼyiñ jeʼm wɨnanɨgoʼoyi iniitywɨʼɨp kun Jehová y ityudɨʼyiñ jeʼm kumun. Jeʼyukmɨ mex iga tan̈kaʼ, tanan̈madayajiñ jeʼm ancianojyaj jempɨk iwatneʼ iga tantoyba Jehová y tansunba iga yooxpaʼttaiñ yɨʼp tɨɨwɨ (Sal. 27:14).
JUUTYPƗK JEʼM ANCIANOJYAJ IYOOXPAʼTYAJPA JEMPƗK TAN̈KAWATNEʼ
4. ¿Tyiʼiga jeʼm ancianojyaj inimuruyajiñ jempɨk tan̈kawatneʼ?
4 Jesɨk tan̈kawatpa tuum tɨɨwɨ, jeʼm ancianojyaj ityyajwɨʼɨp jeʼm kumunjom ikupin̈yajpa tukuteen ancianojyaj iga inimuruyajiñ.a Jeʼeyaj dyaʼ nakujiʼpyajtaap mex iga iyooxpaʼtyajtoʼoba jempɨk tan̈kawatneʼ dyaʼ ityeguedɨyyajpa iga ikaguiñ ijɨɨxi (Deut. 30:19). Ijoodon̈yaj iga dyaʼ ityumpɨyyaj iwatyajpa juʼuts David (2 Sam. 12:13). Wɨapsɨ iga weeñiyaj dyaʼ ikupɨkyajpa jeʼm Jehová ian̈kiʼmayoʼoyiyaj (Gén. 4:6-8). Jeʼm ancianojyaj iwatyajpa juʼtspɨyam wɨayajpa iga jempɨk tan̈kawatneʼ ikaguiñ ijɨɨxi. Pero ¿juʼptam jɨɨxian̈chioʼoyiyaj iyooxpaʼtyajpa jesɨk inimuruyajpa?
5. ¿Juʼp an̈kiʼmayoʼoyi ijɨɨskupakneyajiñ jeʼm ancianojyaj jesɨk ikɨʼpin̈yajpa jempɨk tan̈kawatneʼ? (2 Timoteo 2:24-26; aʼmɨtyim jeʼm imagen).
5 Jeʼm ancianojyaj ijoodon̈yaj iga mex siiga algun i tan̈kawatpa Jehová ichoowaixpanam (Luc. 15:4, 6). Jeʼyukmɨ jesɨk inimuruyajpa dyaʼ ikamamjɨyayyajpa, dyaʼ numaaj iwadayyajpa akwagoʼoyiyaj iga ikɨʼpin̈yajtoʼoba. Iwatyajpa jempɨk nɨmpa 2 Timoteo 2:24-26. (maayɨʼ). Juchixkej iwɨjɨyayyajpa, yaʼachan̈jaamoyyajpa y ikwiñkejayyajpa toyoʼoyi iga iyooxpaʼtyajtoʼoba iga ikaguiñ ijɨɨxi.
Juʼutstyim iwatyaj jeʼm wiñɨkpɨk Dios iyooxakɨʼɨwiñyaj jeʼm ancianojyaj iyooxpaʼtyajpa ikak ijɨɨxi jempɨk tan̈kawatneyaj. (Aʼmɨ jeʼm párrafo 5).
6. ¿Tyi iwatyajpa jeʼm ancianojyaj wiñtyi iga inimuruyajiñ jempɨk tan̈kawatneʼ? (Romanos 2:4).
6 Jeʼm ancianojyaj iwɨkɨʼpin̈yajpa tyi ijɨɨspa Jehová. Jeʼyukmɨ ijɨɨskupakneyajpa jempɨk ijaykunuʼk Pablo: «Jém tanJa̱tuŋ Dios tsa̱m miyaachaŋja̱mpa porque ixunpa iga iŋcucaguiñ iñjɨ̱xi» (maayɨʼ Romanos 2:4). Iwatkiʼpsayyajpa jeʼm Jehová iyaʼachan̈jamoʼoyi jesɨk inimuruyajpa jempɨk tan̈kawatneʼ. Ijɨɨsyajpatyim iga jeʼeyaj ikuixyajpa jeʼm kumun, jeʼyukmɨ iwatkiʼpsyajpa Jesús (Is. 11:3, 4; Mat. 18:18-20). Jesɨk inimuruyajpa in̈wejpaʼtyajpa Jehová iga wɨaiñ iyooxpaʼtyaj ikak ijɨɨxi jempɨk tan̈kawatneyaj. Ikuaʼmyajpa an̈kiʼmayoʼoyiyaj Bibliajom, jeʼm totjaayijomyaj, iwaʼgayyajpatyim Jehová iga iyooxpaʼtyajiñ ikutɨʼɨyɨyyaj tyityam iwat iga tan̈kawadyiñ (Prov. 20:5).
7, 8. ¿Juutypɨk jeʼm ancianojyaj iwatkiʼpsyajpa Jehová jesɨk inimuruyajpa jempɨk tan̈kawatneʼ?
7 Jeʼm ancianojyaj iwatyajpatyim juʼuts Jehová iga dyaʼ jobity joʼyba. Tan̈kujɨɨstaʼmiñ jempɨk iwat wiñɨk jaama jesɨgam ijɨɨxian̈chiʼ Caín dyaʼ idyɨk joʼyñeʼ, iñɨʼmay siiga ikakpa idyɨk ijɨɨxi eybɨktyim iwɨixpa (Gén. 4:6, 7). Jesɨgam Jehová in̈jɨyjak jeʼm an̈jagoʼoyi David ikutsat jeʼm iprofeta Natán, jeʼ ipɨk tuum akwiñkejoʼoyi iga iyooxpaʼdyiñ ikak ijɨɨxi (2 Sam. 12:1-7). Jehová juchixkej ikutsat jeʼm iprofetajyaj iga in̈jɨyjaguiñ jeʼm israelitajyaj iga dyaʼ kupɨgoyyajpa idyɨk (Jer. 7:24, 25). Jehová juchixkej iyooxpaʼt jeʼm iyooxakɨʼɨwiñyaj mex iga tan̈kawatpanam idyɨk ixɨʼyaj.
8 ¿Juutypɨk jeʼm ancianojyaj iwatkiʼpsyajpa Jehová jesɨk inimuruyajpa jempɨk tan̈kawatneʼ? Juʼuts nɨmpa 2 Timoteo 4:2, odoy jobity joʼyyajiñ, siiga dyaʼ iwɨjɨyayyajpa y dyaʼ iwɨkumaton̈yajpa jempɨk tan̈kawatneʼ, wɨapsɨ iga ikamamwatpa ianmaj y dyaʼ ikakpa ijɨɨxi.
9, 10. ¿Juutypɨk jeʼm ancianojyaj iyooxpaʼtyajpa jempɨk tan̈kawatneʼ iga ikaguiñ ijɨɨxi?
9 Jeʼm ancianojyaj iwɨkɨʼpin̈yajpa tyiʼiga tan̈kawat jeʼm tɨɨwɨ. Wɨapsɨ iga nakwaʼkyajtaap: «¿Dyam idyɨk wɨkuyujpa iyaʼak y dyamtyim idyɨk putpa jeʼm an̈matkuyjom? ¿Dyam in̈wejpaʼtpa idyɨk Jehová? ¿Iaʼmchiʼ iga jeʼm malojpɨk jɨɨxiyaj tɨgɨyiñ ianmajom? ¿Iaʼmchiʼ iga jempɨk in̈pɨʼtspa o iaʼmpa ikagaʼyiñ ijɨɨxi? ¿Ikutɨʼɨyɨʼyba juʼtspɨy sɨʼ imalwaday jeʼm iwɨnanɨgoʼoyi kun Jehová kun jeʼm jɨɨxi ipɨknewɨʼɨp?».
10 Jeʼm ancianojyaj iwadayyajpa akwagoʼoyiyaj iga ikutɨʼɨyɨyyajiñ tyiʼiga tan̈kawatneʼ, dyaʼ iga kɨʼtykɨʼty an̈madayyajtaiñ ityumpɨy jempɨk iwatneʼ (Prov. 20:5). Wɨap iwatyaj juʼuts iwat Natán jesɨgam inimuru David, ipɨkyajiñ akwiñkejoʼoyiyaj iga iyooxpaʼtyajiñ jeʼm tɨɨwɨ ikutɨʼɨyɨy iga tan̈kawatneʼ. Wɨapsɨ iga jesɨk inimuruyaj an̈yaʼkpa y mojpa ikak ijɨɨxi.
11. ¿Juutypɨk jeʼm ancianojyaj iwatkiʼpsyajpa Jesús?
11 Jeʼm ancianojyaj iwatkiʼpsaypa Jesús. Tan̈kujɨɨstaʼmiñ tyi iñɨʼmay Jesús Saulo: «Saulo, Saulo, ¿t́iiga anacpoypa?». Iñɨʼmay yɨʼɨmpɨk iga ikkutɨʼɨyɨytyoʼoba iga sɨʼ idyɨk imalwat (Hech. 9:3-6). Y en Apocalipsis 2:20, 21 jɨykimtaap tuum yoomoʼ iga ixpɨktaap juʼuts Jezabel y nɨm iga iyooxpaʼttɨʼp iga ikaguiñ ijɨɨxi.
12, 13. ¿Tyi wɨap iwatyaj jeʼm ancianojyaj iga jeʼm tan̈kawatnewɨʼɨp ikaguiñ ijɨɨxi? (Aʼmɨtyim jeʼm imagenyaj).
12 Juʼutstyim Jesús jeʼm ancianojyaj dyaʼ jobity ijɨɨsyajpa iga jempɨk tan̈kawatneʼ dyaʼ ikaktoʼoba ijɨɨxi. Weeñiyaj jobity ikakyajpa ijɨɨxi y tun̈gakyaj ixunyajpa maaj tiempo. Jeʼyukmɨ jeʼm ancianojyaj dyaʼ tyun̈kɨy inimuruiñ jempɨk tan̈kawatneʼ, wɨapsɨ iga jesɨk inimuruyaj ikutɨʼɨyɨy iga tan̈kawatneʼ y iwaʼgay perdón Jehová (Sal. 32:5; 38:18). Jeʼyukmɨ jesɨk eybɨk inimuruyajpa wɨap iga jempɨk tan̈kawatneʼ ikakneum ijɨɨxi.
13 Iga jeʼm ancianojyaj wɨaiñ iyooxpaʼtyaj jempɨk tan̈kawatneʼ, ikwiñkejyajpa yaʼachan̈jamoʼoyi y ikutɨʼɨyɨyyajpa juʼuts in̈jaam. Iwaʼgayyajpatyim Jehová iga ikumaykedyiñ jempɨk sɨʼ iwatyaj iga wɨaiñ iyooxpaʼtyaj jempɨk tan̈kawatneʼ iga ikaguiñ ijɨɨxi (2 Tim. 2:25, 26).
Jeʼm ancianojyaj dyaʼ tyun̈kɨy inimuruyajpa jempɨk tan̈kawatneʼ iga ikaguiñ ijɨɨxi. ( Aʼmɨ jeʼm párrafo 12).
14. ¿Iapaʼap iyooxpaʼtpa ikak ijɨɨxi jempɨk tan̈kawatneʼ?
14 Siiga jempɨk tan̈kawatneʼ ikakpa ijɨɨxi tsaam tamaymayataʼmpa (Luc. 15:7, 10). Pero ¿iapaʼap iyooxpaʼt? Tan̈kujɨɨstaʼmiñ jempɨk nɨm Pablo iga Dios jempɨk iyooxpaʼtpa ikak ijɨɨxi jempɨk tan̈kawatneʼ (2 Tim. 2:25). Jeʼyukmɨ mex iga jeʼm ancianojyaj inimuruyajpa, Jehová jempɨk iwatpa iga ikaguiñ ijɨɨxi, Pablo nɨmtyim juʼtspɨy iwɨwadaʼyba jempɨk ikakpa ijɨɨxi, iyooxpaʼtpa iga majnam iniidyiñ ixpɨgoʼoyi, wɨjɨɨxiɨʼyba y dyaʼ kutɨn̈ba jeʼm Wookkɨʼɨwiñ ikɨʼjom (2 Tim. 2:26).
15. ¿Juutypɨknam maaj wɨap iyooxpaʼtyaj jeʼm ancianojyaj jempɨk ikakneum ijɨɨxi?
15 Jesɨk jempɨk tan̈kawatneʼ ikakpa ijɨɨxi, jeʼm ancianojyaj seguido ijooyayyajpa iga ipɨɨmchiayyajpa ife, iyooxpaʼtyajpatyim in̈an̈kamokyaj jeʼm kutɨʼɨchi iga seguido iwɨwadyiñ (Heb. 12:12, 13). Jeʼm ancianojyaj dyaʼ in̈madayyajpa jeʼm tun̈gak tɨwɨtam jempɨk iwatneʼ yɨʼp tɨɨwɨ, pero ¿tyisɨ wɨɨ iga ikjoodon̈ayajiñ?
AN̈JƗYJAAKƗ JEMPƗK TAN̈KAWATNEʼ TUN̈GAKYAJ IWIÑJOM
16. ¿Ityam sɨʼ idyɨk ijɨykiʼm Pablo en 1 Timoteo 5:20, jesɨgam nɨm iga an̈jɨyjaktaiñ jempɨk tan̈kawatneʼ tun̈gakyaj iwiñjom?
16 Maayɨʼ 1 Timoteo 5:20. Pablo iñɨʼmay Timoteo iga juʼuts anciano in̈jɨyjaguiñ jempɨk tan̈kawatneʼ tun̈gakyaj iwiñjom, ¿ityam? Dyaʼ ityumpɨy jeʼm tɨwɨtam iwiñjom, numaaj jempɨk ijoodon̈yaj o iixyaj iga jeʼm tɨɨwɨ tan̈kawatpa ixɨʼ. Jeʼyukmɨ jeʼm ancianojyaj iñɨʼmayyajpa yɨʼp tɨwɨtam iga kɨʼpin̈netawum jempɨk tan̈kawatneʼ.
17. ¿Tyi iwatyajpa jeʼm ancianojyaj jesɨk jeʼm kumun ijoodon̈ayajpa iga algun i tan̈kawatneʼ?
17 A veces jeʼm kumun ijoodon̈ayajpa iga algun i tan̈kawatneʼ, jeʼyukmɨ jeʼm ancianojyaj in̈matyajpa jeʼm kumunjom iga kɨʼpin̈netawum jempɨk tan̈kawat. Pablo nɨm iga yɨʼɨmpɨgam iyooxpaʼtyajpa tun̈gakyaj iga odoy tan̈kawatyajiñ.
18. ¿Tyi iwatyajiñ jeʼm ancianojyaj siiga jempɨk tan̈kawatpa dyanam ikkaʼpsneʼ 18 iamtyɨy? (Aʼmɨtyim jeʼm imagen).
18 Siiga jempɨk tan̈kawatneʼ dyanam ikkaʼpsneʼ 18 iamtyɨy, jesɨk jeʼm ancianojyaj inimuruyajpa kun ijaatun̈yaj.b Jeʼeyaj ikwaʼkyajpa jeʼm ijaatun̈yaj juutypɨk iyooxpaʼtneyaj jeʼm imaanɨk iga ikaguiñ ijɨɨxi. Siiga jempɨk tan̈kawatneʼ sɨʼ iwɨpɨktson̈ jeʼm yooxpadoʼoyi, jesɨk jeʼm ancianojyaj dyam iwadayyajpa tuum comité. Jehová nɨmpa iga jeʼm jaatun̈yaj in̈jɨyjakyajiñ jeʼm imanɨktam kun toyoʼoyi (Deut. 6:6, 7; Prov. 6:20; 22:6; Efes. 6:2-4). Okmɨ jeʼm ancianojyaj eybɨk inimuruyajpa jeʼm ijaatun̈ iga iaʼmyajiñ siiga seguido sɨʼ iyooxpaʼtyaj jeʼm imaanɨk, siiga jempɨk tan̈kawatneʼ dyaʼ ikaktoʼoba jɨɨxi jesɨk jeʼm comité de ancianos inimuruyajpa kun ijaatun̈yaj.
Siiga jempɨk tan̈kawatneʼ dyanam ikaʼpsneʼ 18 iamtyɨy wɨsteen ancianojyaj inimuruyajpa kun jeʼm ijaatun̈yaj. (Amɨ jeʼm párrafo 18).
JEHOVÁ TSAAM TOYOʼYBA Y YAʼACHAN̈JAMOʼYBA
19. ¿Juutypɨk jeʼm ancianojyaj iwatkiʼpsyajpa Jehová jesɨk algun i pɨɨmi tan̈kawatpa?
19 Jehová ichiʼiñeʼ jeʼm yooxakuyyaj jeʼm ancianojyaj kuyooxaoyyajpaʼap en jeʼm comité iga kuaʼyñeiñ jeʼm kumun (1 Cor. 5:7). Pero iyooxpaʼtyajpatyim iga ikaguiñ ijɨɨxi jempɨk tan̈kawatneʼ, ni keman ijɨɨsyajpa iga dyam ikakyajpa ijɨɨxi, jeempɨgam iwatkiʼpsaypa Jehová iga tsaam toyoʼyba y yaʼachan̈jamoʼyba (Sant. 5:11). Tan̈kujɨɨstaʼmiñ jempɨk ijaykunuʼk jeʼm apóstol Juan jesɨk tsaamiam idyɨk, nɨm: «Mammanɨktam manjaʼyaytyaʼmpa yɨʼpyaj an̈matyiyaj iga odom maaj mityan̈kawattaʼmiñ, pero siiga algun i tan̈kawatpa tanaitytyaʼm tuum yooxpadoʼoyi iga ity kun iJaatun̈ jeʼ Jesucristo y ni keman imalwatneʼ» (1 Juan 2:1).
20. ¿Tyi tan̈kɨʼpin̈taʼmpa jeʼm tun̈gak kuyujijom?
20 Watykɨy jempɨk tan̈kawatneʼ dyaʼ ikaktoʼoba ijɨɨxi, jeʼyukmɨ wɨap iga dyam tsɨʼyba juʼuts Testigo. Pero, ¿juutypɨk ikɨʼpin̈yajpa jeʼm ancianojyaj? Tan̈kɨʼpin̈taʼmpa jeʼm tun̈gak kuyujijom.
WAAÑI 103 Nuestros pastores son un regalo de Dios
a Yɨʼpyaj tukuteen ancianojyaj pekaʼ ixpɨkyajtaap idyɨk juʼuts comités judiciales, pero sɨɨ ixpɨkyajtaap juʼuts comités de ancianos iga jeʼm iyooxakuyyaj dyaʼ numaaj jeʼ iga ikɨʼpin̈yajpa jempɨk tan̈kawatneʼ.
b Siiga jeʼm ijaatun̈yaj dyaʼ jeʼ Testigo, jesɨk tuum ifamiliar jaʼamoyñewɨʼɨbam o jempɨk ikkuyujpa o tun̈gak tɨɨwɨ iga iniidyay confianza idyiñ jesɨk jeʼm ancianojyaj inimuruyajpa.