KUYUUJI 20
Tan̈wɨwattaʼmiñ tanan̈wejpadoʼoyiyaj
«Nɨʼmaytyaʼamɨ ityumpɨy tyityam iniitytyaʼm iñanmajom» (SAL. 62:8).
WAAÑI 45 “La meditación de mi corazón”
JEʼM JƗƗXI TAN̈KUYUJKAPAʼAPa
Juchixkej wɨap tanan̈wejpaʼt Jehová y wɨap tan̈waʼgay jɨɨxian̈chioʼoyiyaj iga tayooxpaʼdyiñ jeʼm tañityijom. (Aʼmɨ jeʼm párrafo 1).
1. ¿Tyi tatɨʼppa Jehová iga tan̈wadyiñ? (Aʼmɨtyim jeʼm imagenyaj).
¿IAPAʼAP wɨap tan̈waʼgaytyaʼm yooxpadoʼoyi jesɨk tansuntaʼmpa akpoʼksoʼoyi y jɨɨxian̈chioʼoyi? Taɨchtyam tanjoodon̈tam: wɨap tanan̈wejpaʼttaʼm Jehová. Y tatɨʼptaʼmpa iga jeempɨgam tan̈wattaʼmiñ. Tanjoodon̈tam iga jeʼ ixunba iga tanan̈wejpaʼttaʼmiñ, jeʼyukmɨ jeʼm In̈matyijom nɨmpa: «Odoy tsa̱cɨ iga iniŋwejpáttámpa Dios» (1 Tes. 5:17). Wɨap tanan̈wejpaʼttaʼm y wɨap tan̈waʼgaytyaʼm iga tajɨɨxian̈chiʼityaʼmiñ jeʼm tañityijom (Prov. 3:5, 6). Y Jehová iga tsaam toyoʼyba, taaʼmchiʼiba iga juchixkej tanan̈wejpaʼttaʼmiñ.
2. ¿Tyi tanaʼmtaʼmpa yɨʼp kuyujijom?
2 Jeʼm an̈wejpadoʼoyi jeʼ tuum xaaja iga tsaam tantsoowaixtyaʼmpa. Pero iga itypa tyidyin̈kej iga tan̈watpa usan̈ tan̈kaʼ iga tantoppa tiempo iga tanan̈wejpaʼtpa Jehová. Wɨapsɨ iga tanjɨɨspatyim iga nasuntaap iga tan̈wɨwadyiñ jeʼm tanan̈wejpadoʼoyiyaj. Pero jeʼm Biblia tachiʼiba jeʼm yooxpadoʼoyi. Yɨʼp kuyujijom tanaʼmtaʼmpa jeʼm Jesús iakwiñkejoʼoyi y tan̈kuyujkataʼmpa juutypɨk wɨap tantoptaʼm tiempo iga tanan̈wejpaʼttaʼmpa Dios. Tanaʼmtaʼmpatyim juutypɨk wɨap tan̈wɨwattaʼm jeʼm tanan̈wejpadoʼoyityam siiga tanjɨɨskupaknetaʼmpa jeʼm cinco jɨɨxiyaj iga ity yɨʼp kuyujijom.
JESÚS ITYOP TIEMPO IGA WƗAIÑ IN̈WEJPAʼT DIOS
3. ¿Tyi ijoodon̈ idyɨk Jesús?
3 Jesús ijoodon̈ idyɨk iga Jehová ixunba iga an̈wejpaʼttaiñ. Wiñtyi iga miñba yɨʼp Naxyukmɨ, iaʼm juutypɨk jeʼm iJaatun̈ ikutson̈aʼyba jeʼm iyooxakɨʼɨwiñyaj ian̈wejpadoʼoyiyaj. Juʼuts akwiñkejoʼoyi, Jesús iwaganaity idyɨk jesɨgam ikutson̈ay jeʼm an̈wejpadoʼoyiyaj iwatwɨʼɨp Ana, David, Elías y tun̈gakyajnam (1 Sam. 1:10, 11, 20; 1 Rey. 19:4-6; Sal. 32:5). Jeʼyukmɨ Jesús iñɨʼmay jeʼm ikuyujkɨʼɨwiñyaj iga duroj iwatyajiñ an̈wejpadoʼoyiyaj y ikupɨkyajiñ iga kumaton̈yajtaap (Mat. 7:7-11).
4. ¿Juʼp akwiñkejoʼoyi tatsagaytyaʼm Jesús?
4 Jesús ichiʼ tuum wɨbɨk akwiñkejoʼoyi jeʼm ikuyujkɨʼɨwiñyaj. Jesɨgam jaʼy iwat jeʼm iyooxakuy jeʼm an̈matkuyjom watykɨy in̈wejpaʼt Dios. Mex iga tsaam idyɨk iniity tyidyin̈kej iga iwatpa y jaʼyan̈yaj nɨkpa idyɨk iaʼmyaj, jeʼ ityop jeʼm tiempo iga iwatpa jeʼm an̈wejpadoʼoyiyaj (Mar. 6:31, 45, 46). Tsuʼuytyiñam yuspa idyɨk iga in̈wejpaʼtpa jeʼm iJaatun̈ (Mar. 1:35). Tun̈kɨy in̈wejpaʼt muuma tsuʼu iga wɨaiñ ipɨk tuum wɨbɨk jɨɨxi (Luc. 6:12, 13). Jeʼm tsuʼu wiñtyi iga kaʼaba, Jesús pɨɨmi in̈wejpaʼt Jehová iga ijoodon̈ idyɨk juʼtspɨy tan̈kaʼ iga ikkupaguiñ jempɨk nɨʼmayñeta (Mat. 26:39, 42, 44).
5. ¿Juutypɨk wɨap tan̈watkiʼpstaʼm Jesús?
5 Jeʼm Jesús iakwiñkejoʼoyi tan̈kejaytyaʼmpa iga mex siiga itypa tyidyin̈kej iga tan̈wattaʼmpa, wɨɨ iga tantoptaʼmiñ tiempo iga tanan̈wejpaʼttaʼmpa Jehová. Juʼutstyim iwat Jesús, wɨapsɨ iga nasuntaap iga tan̈kupin̈iñ juchix tan̈watpa jeʼm an̈wejpadoʼoyi: wɨapsɨ iga tayuspa tsuʼuytyiñam o wɨap tanan̈wejpaʼt piʼichkɨʼɨm wiñtyi iga nɨguiñ tamoon̈i. Yɨʼɨmpɨgam tanakwiñkejaʼyba Jehová juʼtspɨy tantsoowaixpa yɨʼp xaaja. Tuum yoomtɨwɨ iñɨɨyipɨk Lynne ijɨɨspa juʼtspɨy maymaya jesɨgam ijoodon̈a iga wɨap inimuru Jehová ikuyukmɨ jeʼm an̈wejpadoʼoyi. Jeʼ nɨmpa: «Jesɨgam an̈kuyujkaʼ iga Jehová juchixkej akumaton̈ba, moj anaʼm juʼuts tuum anamigo y ampɨk anjɨɨxi iga majtyim an̈wɨwatpa jeʼm anan̈wejpadoʼoyiyaj». Wɨapsɨ iga taɨchtyam jeextyim tanan̈jaamtaʼm. Sɨɨ tanaʼmtaʼmiñ cinco jɨɨxiyaj iga tanjɨɨskupaknetaʼmiñ jesɨk tan̈wattaʼmpa jeʼm an̈wejpadoʼoyiyaj.
CINCO JƗƗXIYAJ IGA TANJƗƗSKUPAKNETAʼMIÑ JESƗK TAN̈WATTAʼMPA AN̈WEJPADOʼOYIYAJ
6. Juʼuts nɨmpa Apocalipsis 4:10, 11, ¿tyi wɨɨ iga ipɨktson̈iñ Jehová?
6 Tan̈kujiʼptaʼmiñ Jehová. En tuum pooñ, jeʼm apóstol Juan iix 24 ancianos iga sɨʼ ikoosteñayyaj Jehová jemɨk sɨn̈yukmɨ. Jeʼeyaj sɨʼ idyɨk ikujiʼpyaj Dios y nɨmyajpa «Wɨ̱ iga maŋcujíptámpa […] iga tsa̱m miwɨa̱p y tsa̱m iniit́ impɨ̱mi» (maayɨʼ Apocalipsis 4:10, 11). Jeʼm sɨn̈pɨxiñtyam ijoodon̈yajtyim tyiʼiga ikujiʼpyajiñ Jehová. Jeʼeyaj iwaganaityyaj sɨn̈yukmɨ y iwɨixpɨkyajpa. Wɨap iaʼmayyaj jeʼm ijɨɨxiyaj y jeʼm ijaamoʼoyiyaj iga iniity por tyityam iwatpa, jeʼyukmɨ ikujiʼpyajpa (Job 38:4-7).
7. ¿Juutypɨk tan̈kujiʼppa Jehová jeʼm tanan̈wejpadoʼoyijom?
7 Taɨchtyam wɨaptyim tan̈kujiʼptaʼm Jehová jesɨk tanamurutaʼmpa. Tan̈watpa yɨʼɨmpɨk jesɨk tannɨʼmaʼyba juʼp jɨɨxi o jaamoʼoyi iniitywɨʼɨp tan̈kusuʼnɨʼyba. Jesɨk tammayba y tan̈kuyujkaʼaba jeʼm Biblia, tanteguedaiñ juʼptam jɨɨxiyaj y jaamoʼoyiyaj ikwiñkejpa Jehová (Job 37:23; Rom. 11:33). Okmɨ tanan̈madaʼyiñ juʼuts tanan̈jaam jesɨk tan̈kujɨɨspa jeʼm jɨɨxiyaj y jaamoʼoyiyaj ikwiñkejpaʼap. Wɨaptyim tan̈kujiʼp Jehová jesɨk tayooxpaʼtpa taɨch y jesɨk iyooxpaʼtpa ityumpɨy jeʼm tɨwɨtam. Jeʼ juchixkej tateguedataʼmpa y takuixtyaʼmpa (1 Sam. 1:27; 2:1, 2).
8. ¿Tyityam wɨap tanjɨykiʼm jesɨk tanchiʼiba gracias Jehová? (1 Tesalonicenses 5:18).
8 Tanchiʼiñ gracias Jehová. Jeʼm tanan̈wejpadoʼoyijom wɨap tanan̈maday juʼtspɨy tamaymay por ityumpɨy jempɨk iwatneʼ (maayɨʼ 1 Tesalonicenses 5:18). Tanchiʼiñ gracias por ityumpɨy jempɨk tachiʼiñeʼ. Tanjoodon̈tam iga ityumpɨy jeʼm wɨtampɨk xaaja jeʼam tachiʼiñetaʼm (Sant. 1:17). Juʼuts akwiñkejoʼoyi, wɨap tanchiʼ gracias iga tsaam iwɨwatneʼ yɨʼp nas, ityumpɨy jempɨk tanaʼmpa, jeʼm tañityi, tanfamilia, tanamigojyaj y tanan̈jogoʼoyi. Wɨaptyim tanchiʼ gracias iga taaʼmchiñeʼ iga tanamigojaiñ.
9. ¿Tyiʼiga usan̈ tan̈kaʼ iga tanchiʼiñ gracias Jehová?
9 Tumtum de taɨchtyam wɨɨ iga tanjɨɨskupaknetaʼmiñ tyiʼiga tanchiʼityaʼmiñ gracias Jehová. Wɨapsɨ iga usan̈ tan̈kaʼ iga jaʼyan̈yaj dyaʼ iwatyajpa yɨʼɨmpɨk. Jeʼeyaj numaaj ijɨɨskupakneyajpa tyityam iniityyajtoʼoba y dyaʼ chioyyajpa gracias por tyityam iniityyaj. Siiga tanaitypa yɨkxpɨk jɨɨxi, wɨapsɨ iga jeʼm tanan̈wejpadoʼoyijom numaaj tan̈waʼkpa tyityam tanaitytyoʼoba. Jeʼyukmɨ iga odoy tannaskaiñ jeempɨk, tanaidyiñ jeʼm jɨɨxi iga juchixkej tanchiʼiñ gracias Jehová por ityumpɨy jempɨk tachiʼiba (Luc. 6:45).
Jesɨk tanchiʼiba gracias Jehová tayooxpaʼtpa iga tanyaʼachɨʼyiñ. (Aʼmɨ jeʼm párrafo 10).
10. ¿Juutypɨk iyooxpaʼt tuum yoomtɨwɨ iga juchixkej ichiʼiba idyɨk gracias Jehová? (Aʼmɨtyim jeʼm imagen).
10 Jesɨk tanjɨɨskupakneʼeba tyityam tachiʼiñeʼ Dios tayooxpaʼtpa iga tanyaʼachɨʼyiñ jeʼm kutɨʼɨchiyaj. Tan̈kɨʼpin̈aytyaʼmiñ tuum yoomtɨwɨ iakwiñkejoʼoyi iñɨɨyipɨk Kyung-sook, iga tampaʼtpa en jeʼm Totjaayi Takjoodon̈apaʼap del 15 de enero de 2015, en español. Jeʼ padaytya cáncer de pulmón y pɨɨmiam idyɨk ityɨgɨyayñeʼ. Nɨmpa: «Jesɨk anjoodon̈a iga amɨmneʼ, anjaam iga dyam idyɨk tyi wɨap an̈wat y pɨɨmi akɨɨn̈». ¿Tyi iyooxpaʼt iga wɨaiñ iyaʼachɨy? Jeʼ in̈mat iga tumtum tsuʼu wiñtyi iga nɨkpa moon̈i, in̈wejpaʼtpa idyɨk Jehová y in̈madaʼyba cinco cosas wɨtampɨk iga iñaskaʼ peʼm jaama. Yɨʼp iyooxpaʼtpa idyɨk y ianmajan̈chiʼiba iga iñɨʼmaʼyiñ Jehová juʼtspɨy ityoyba. Jeʼ iaʼm jeʼm iityijom juʼtspɨy Jehová iyooxpaʼtpa jeʼm iyooxakɨʼɨwiñyaj jesɨk iñaskayajpa tan̈kapɨk nasɨyoʼoyiyaj y iaʼm iga mex iga tannaskaʼaba yaʼachaajiyaj maaj jaʼyan̈ kumaykedoʼoyiyaj tampɨktson̈ba. Juʼutstyim Kyung-sook, wɨɨ iga juchixkej tanchiʼiñ gracias Jehová mex iga tannaskaʼaba kutɨʼɨchiyaj. Jesɨk tan̈watpa yɨʼɨmpɨk Jehová tayooxpaʼtpa iga tanyaʼachɨʼyiñ y odoy pɨɨmi tan̈yaʼguiñ.
11. ¿Tyiʼiga odoy idyɨk kɨɨn̈yajiñ jeʼm Jesús ikuyujkɨʼɨwiñyaj?
11 Tan̈waʼgaʼyiñ Jehová iga odoy takɨʼɨn̈iñ tanan̈mat jeʼm in̈maatyi. Wiñtyi iga nɨguiñ sɨn̈yukmɨ, Jesús ikjɨɨs jeʼm ikuyujkɨʼɨwiñyaj iga tyityam jeʼ iixyaj iga iwat in̈matyajiñ «Jerusalén, icuwɨ̱t́i jém naxyucmɨ de Judea, hasta jém naxyucmɨ de Samaria, y hasta más juumɨ, icuwɨ̱t́i de yɨ́p naxyucmɨ» (Hech. 1:8; Luc. 24:46-48). Maaj okmɨ jeʼm líderes judíos imatsyaj Pedro y Juan, y nanɨkyajta jeʼm Sanedrín. Jeem pɨʼɨmɨyyajta iga ichakyajiñ jempɨk sɨʼ in̈matyaj y otyɨʼmayyajta (Hech. 4:18, 21). ¿Tyi iwatyaj yɨʼpyaj apóstolyaj?
12. Juʼuts nɨmpa Hechos 4:29, 31, ¿tyi iwatyaj jeʼm Jesús ikuyujkɨʼɨwiñyaj?
12 Kun jempɨk nɨʼmayyajta Pedro y Juan ikutson̈yaj: «Jɨ̱staamɨ micht́am iñyaac siiga más wɨ̱ iga maŋcupɨcpa mimicht́am o iga aŋcupɨcpa Dios. Aɨcht́am d́a wɨa̱p antsacta iga anaŋmattámpa t́i ánixñe y t́i ammatoŋne» (Hech. 4:19, 20). Jesɨgam jeʼm líderes religiosos judíos ikutsɨgayyaj jeʼm apóstolyaj jeʼ nɨk iaʼmyaj jeʼm ityɨwɨtam. An̈tuumjom in̈wejpaʼtyaj Jehová iga yooxpaʼtyajtaiñ iga wɨaiñ iwatyaj juʼuts jeʼ ixunba. Nɨmyaj: «Ayo̱xpáttaamɨ iga wɨa̱p anaŋmat iniŋma̱t́i. Acamamwadaayɨ [ananmaj] iga odoy acɨɨŋiñ». Y Jehová ikutson̈ yɨʼp an̈wejpadoʼoyi (maayɨʼ Hechos 4:29, 31).
13. ¿Tyi tan̈kejaytyaʼmpa jeʼm Jin-hyuk iakwiñkejoʼoyi?
13 Wɨap tantun̈ɨyaytyaʼm jeʼm apóstolyaj iakwiñkejoʼoyi y seguido tanan̈matpa jeʼm Dios In̈maatyi mex siiga jeʼm an̈jagoʼoyiyaj dyaʼ taaʼmchityaʼmpa. Jeʼam jempɨk iwat Jin-hyuk, tuum tɨɨwɨ iga pajneta idyɨk iga dyaʼ kuyooxaoy en jeʼm ejército. Jeem nɨʼmaytya iga iyooxpaʼdyiñ jempɨk pajan̈togoyñeyajta. Numaaj wɨap idyɨk ikwaʼk tyityam ityogoyayyaj. Y pɨʼɨmɨyñeta idyɨk iga odoy in̈madyiñ jempɨk nɨmpa jeʼm Biblia. Pero iwaʼgay Jehová iga iyooxpaʼdyiñ iga odoy kɨʼɨn̈iñ y wɨaiñ iwɨjɨʼyay jempɨk pajneyajta jesɨk in̈madaʼyba jeʼm Dios In̈maatyi (Hech. 5:29). Jeʼ nɨmpa: «Jehová ikutson̈ jeʼm anan̈wejpadoʼoyiyaj, ayooxpaʼt iga odoy akɨʼɨn̈iñ y achiʼ jeʼm joodon̈oʼoyi iga atogoyay. Waatyiyaj moj anakkuyujyaj jeʼm puerta an̈naakaʼ y numaaj anan̈madayyajpa idyɨk cinco minuto. Y tsuʼukɨʼɨm anjaʼyayyajpa idyɨk cartas iga wɨaiñ anchiʼiyaj ikukejaama». Juʼutstyim Jin-hyuk, wɨap tan̈waʼgay Jehová iga tayooxpaʼdyiñ iga wɨaiñ tanakkupak jeʼm an̈matkuy y tayooxpaʼdyiñtyim iga odoy takɨʼɨn̈iñ y tachiʼiñ jeʼm joodon̈oʼoyi.
14. ¿Tyi miyooxpaʼtpa iga wɨaiñ inin̈an̈kamok jeʼm kobakpiijiyaj? (Salmo 37:3, 5).
14 Tan̈waʼgaʼyiñ Jehová iga wɨaiñ tanan̈an̈kamok jeʼm kobakpiijiyaj. Jaʼyan̈ de taɨchtyam sɨʼ tanyaʼachataʼm iga kaʼaneʼ algun i iga tantoytyaʼmpa, tayaʼachwattamtaap iga tan̈kupɨktaʼmpa Dios, jesɨk tamatspa mɨmneiyaj, jesɨk tan̈yaʼkpa o jesɨk tanaitypa kobakpiijiyaj jeʼm tanfamiliajom. Y jeʼm pandemias y jeʼm guerras majtyim inimiññeyaj yaʼachaaji. Jeʼyukmɨ an̈madaʼayɨ Jehová juʼuts inin̈jaam juutypɨktyim in̈watpa kun tuum iñamigo. Wɨap in̈kupɨk iga Jehová miyooxpaʼtpa (maayɨʼ Salmo 37:3, 5).b
15. ¿Juutypɨk tayooxpaʼtpa jeʼm an̈wejpadoʼoyi jesɨk tanan̈an̈kamokpa tan̈kapɨk nasɨyoʼoyiyaj? An̈maatɨ tuum akwiñkejoʼoyi.
15 Jesɨk dyaʼ tantsakpa iga tanan̈wejpaʼtpa Dios tayooxpaʼtpa iga wɨaiñ tanyaʼachɨy tan̈kapɨk nasɨyoʼoyiyaj (Rom. 12:12). Jehová ijoodon̈ jempɨk iñaskaʼaba jeʼm iyooxakɨʼɨwiñyaj y «ikumaton̈ba jesɨk iwejwaʼkyajpa yooxpadoʼoyi» (Sal. 145:18, 19). Jeʼam iaʼm tuum precursora iñɨɨyipɨk Kristie iga iniity 29 iamtyɨy. Jobity mɨmneaktɨn̈ y pɨɨmi an̈yaʼk. Maaj okmɨ iaapa imats tuum kaʼakuy y dyam idyɨk pɨspa. Kristie nɨmpa: «Pɨɨmi an̈waʼgay Jehová iga ayooxpaʼdyiñ anyaʼachɨy yɨʼp nasɨyoʼoyi. Antegueda iga juchixkej anɨkpa jeʼm an̈tuʼumaajiyaj y awɨkuyujpa idyɨk anyaʼak». Jeʼ nɨmtyim: «Jeʼm an̈wejpadoʼoyi pɨɨmi ayooxpaʼt jesɨk tan̈kaʼaneʼ idyɨk añityi. Iga anjoodon̈ idyɨk iga Jehová juchixkej ayooxpaʼtpa, pɨɨmi akpoʼks. Mex iga dyaʼ jobity apɨs, Jehová akutson̈ay jeʼm anan̈wejpadoʼoyiyaj, achiʼ paz jeʼm ananmajom». Odoy tan̈kujaʼamaytyaʼmiñ iga Jehová «ijo̱doŋ jutsa̱p icɨacput [...] jém icupɨcneyajwɨɨp, cuando cutɨ́tsta̱p» (2 Ped. 2:9).
Iga wɨaiñ tanyaʼachɨy jeʼm kutɨʼɨchiyaj, 1) tan̈waʼgaʼyiñ jeʼm Jehová iyooxpadoʼoyi, 2) tan̈wadyiñ juutypɨgam tan̈waʼkneʼ y 3) tampɨɨmchiʼiñ jeʼm tan̈wɨnanɨgoʼoyi kun Jehová. (Aʼmɨ jeʼm párrafojyaj 16 y 17).
16. ¿Tyiʼiga tansuntaʼmpa jeʼm Jehová iyooxpadoʼoyi iga wɨaiñ tanyaʼachɨytyaʼm jeʼm kutɨʼɨchiyaj?
16 Tan̈waʼgaʼyiñ Jehová iga tayooxpaʼdyiñ tanyaʼachɨy jeʼm kutɨʼɨchiyaj. Iga tatan̈kaɨykɨʼɨwiñtyam, juchixkej tanan̈an̈kamoktaʼmpa jeʼm kutɨʼɨchi iga takmalwattamtoʼoba. Y jeʼm Wookkɨʼɨwiñ iwatpa iga majtyim tan̈kaʼaiñ tanyaʼachɨy. Juʼuts akwiñkejoʼoyi, imalwadaytyoʼoba jeʼm tanjɨɨxi kun jeʼm entretenimiento dyapɨk wɨtam. Yɨkxpɨk entretenimiento ikukomaʼyba jeʼm tanjɨɨxi malojpɨk kusuʼnɨyoʼoyiyaj jempɨk Jehová dyaʼ iwɨixpa y yɨkxpɨk jɨɨxiyaj wɨap taktan̈kawat (Mar. 7:21-23; Sant. 1:14, 15).
17. ¿Tyityam wɨap tan̈wat iga wɨaiñ tanyaʼachɨy jeʼm kutɨʼɨchiyaj? (Aʼmɨtyim jeʼm imagenyaj).
17 Tan̈kutyum dyaʼ wɨap tanan̈an̈kamoktaʼm jeʼm kutɨʼɨchiyaj; tatogoyaytyaʼm jeʼm Jehová iyooxpadoʼoyi. Jesɨgam Jesús in̈kej juutypɨk wattaiñ jeʼm an̈wejpadoʼoyi, nɨm yɨʼɨmpɨk: «Awattaamɨ cuenta iga odoy i̱ wɨa̱iñ acutɨ́tsta iga acmalwattámpa» (Mat. 6:13). Jehová tayooxpaʼttoʼoba, pero wɨɨ iga tan̈waʼgaytyaʼmiñ. Pero dyaʼ numaaj tanan̈wejpaʼdyiñ. Wɨɨ iga tan̈wadyiñ ityumpɨy juʼtspɨyam tawɨap iga odoy tanaidyiñ jeʼm malojpɨk jɨɨxiyaj iga ikwiñkejyajpa jempɨk dyaʼ ikuyooxayajpa Dios (Sal. 97:10). Iga wɨaiñ tanaity wɨtampɨk jɨɨxiyaj, nasuntaap iga tammayiñ y tan̈kuyujkaiñ jeʼm Biblia, tanɨguiñ jeʼm an̈tuʼumaajiyaj y tapudyiñ jeʼm an̈matkuyjom. Y Jehová ijɨykamneʼ iga dyaʼ iaʼmchiʼiba iga takutɨʼtstaiñ juʼtspɨyam dyam wɨap tanyaʼachɨy (1 Cor. 10:12, 13).
18. ¿Tyi wɨɨ iga tan̈wattaʼmiñ tantumpɨytyam?
18 Iga wɨaiñ tanyaʼachɨy jeʼm kutɨʼɨchiyaj yɨʼp in̈an̈pɨgam jaama majnam nasuntaap iga tan̈wadyiñ an̈wejpadoʼoyiyaj. Jehová ixunba iga tanan̈madaʼyiñ ityumpɨy tyityam tanaity tananmajom (Sal. 62:8). Jeʼyukmɨ toopɨ tiempo iga inin̈wejpaʼdyiñ tumtum jaama. Kujiʼpɨ y chiɨʼ gracias por ityumpɨy jempɨk iwatpa. Waʼgaʼayɨ iga miyooxpaʼdyiñ y odoy mikɨʼɨn̈iñ inin̈mat jeʼm In̈maatyi y miyooxpaʼdyiñtyim inin̈an̈kamok jeʼm kobakpiijiyaj y wɨaiñ iñyaʼachɨy juʼptyin̈kej kutɨʼɨchiyaj. Odoy aʼmchiɨʼ iga ni tyi miktsaguiñ iga inin̈wejpaʼtpa Jehová. Pero ¿juutypɨk ikutson̈ba jeʼm tanan̈wejpadoʼoyiyaj? Jeʼm tun̈gak kuyuuji tan̈madaʼyba.
WAAÑI 42 La oración del siervo de Dios
a Tanan̈wejpaʼttamtoʼoba Jehová dende tananmajom, keʼnam jesɨk tanjaʼyaʼyba tuum carta tuum wɨbɨk tanamigo. Pero, dyaʼ juchixkej wɨap tantop tiempo iga tanan̈wejpaʼtpa y wɨapsɨ iga dyaʼ tanjoodon̈ tyi tannɨʼmaʼyba. Yɨʼp kuyuuji tajɨɨxian̈chiʼiba tyityam wɨap tan̈wat.
b Salmo 37:3, 5: 3 Kupɨɨkɨ Jehová y wɨwaatɨ; ityɨ yɨʼp naxyukmɨ y juchixkej kupɨgoʼoyɨ. 5 Tyityam in̈watpa tsaakɨ Jehová ikɨʼjom; kupɨɨkɨ y jeʼ miyooxpaʼtpa.