Juutypɨk ikutson̈ba Jehová jeʼm tanan̈wejpadoʼoyiyaj

1, 2. ¿Tyi wɨap iga tanakwaʼktamtaap?

¿MINIKWAʼKNETA siiga Jehová ikutson̈ba jeʼm inin̈wejpadoʼoyi? Dyaʼ numaaj mich iññaskaneʼ jeempɨk. Jaʼyan̈ tɨwɨtam nawadayñeyajtatyim yɨʼp akwagoʼoyi, y maaj jesɨk sɨʼ iñaskayaj tan̈kapɨk kutɨʼɨchiyaj. Wɨapsɨ iga jesɨk sɨʼ tanyaʼachataʼm dyaʼ jobity tanaʼmpa juutypɨk Jehová ikutson̈ba jeʼm tanan̈wejpadoʼoyi.

² Yɨʼp kuyujijom, tan̈kɨʼpin̈taʼmpa tyiʼiga wɨap tan̈kupɨk iga Jehová ikutson̈aʼyba jeʼm iyooxakɨʼɨwiñyaj ian̈wejpadoʼoyiyaj (1 Juan 5:15). Tan̈kɨʼpin̈taʼmpatyim tyiʼiga a veces tanjɨɨspa iga Jehová keʼnam dyaʼ ikutson̈neʼ jeʼm tanan̈wejpadoʼoyi y tanaʼmtaʼmpatyim juutypɨk ikutson̈ba.

WƗAPSƗ IGA JEHOVÁ DYAʼ TAKUTSON̈BA JUUTYPƗGAM TANJƗƗSNEʼ IDYƗK

3. ¿Tyiʼiga ixunba Jehová iga tanan̈wejpaʼttaʼmiñ?

³ Jeʼm Biblia nɨmpa iga Jehová tsaam tatoytyaʼmpa y tatsoowaixtyaʼmpa (Ageo 2:7; 1 Juan 4:10). Jeʼyukmɨ tatɨʼppa iga tanan̈wejpaʼdyiñ y tan̈waʼgayiñtyim iyooxpadoʼoyi (1 Ped. 5:6, 7). Jehová tayooxpaʼttoʼoba iga odoy tanjagan̈tsaguiñ y wɨaiñ tanyaʼachɨy ityumpɨy jeʼm kutɨʼɨchiyaj tannaskapaʼap.

4. ¿Juutypɨk tanjoodon̈tam iga Jehová ikutson̈aʼyba jeʼm iyooxakɨʼɨwiñyaj ian̈wejpadoʼoyiyaj? (Aʼmɨtyim jeʼm imagen).

⁴ Jeʼm Bibliajom, tampaʼtpa jaʼyan̈ nasɨyoʼoyiyaj juuty in̈kejpa iga Jehová ikutson̈ay jeʼm iyooxakɨʼɨwiñyaj ian̈wejpadoʼoyiyaj. Wɨapsɨ iga tan̈kujɨɨspa jeʼm an̈jagoʼoyi David iakwiñkejoʼoyi. Jeʼm iityijom, David in̈an̈kamok jaʼyan̈ ienemigojyaj, y juchixkej iwaʼgaʼyba idyɨk Jehová iga iyooxpaʼdyiñ. Tun̈kɨy iñɨʼmay: «Oh, Jehová, kumaton̈ɨ anan̈wejpadoʼoyi; kumaton̈ɨ iga sɨʼ man̈wejwaʼgay iñyooxpadoʼoyi. Iga mich juchixkej inikkupakpa inin̈maatyi y in̈wɨwatpa, akumaton̈ɨ» (Sal. 143:1). Jehová ikutson̈ay jeʼm ian̈wejpadoʼoyi y ikɨakput (1 Sam. 19:10, 18-20; 2 Sam. 5:17-25). Jeʼyukmɨ David nɨm yɨʼpyaj an̈matyiyaj: «Jehová iniitypa toomi ityumpɨy jempɨk in̈wejpaʼtyajpa». Y taɨchtyam wɨaptyim tan̈kupɨktaʼm yɨʼpyaj an̈matyiyaj (Sal. 145:18).

5. ¿Juchixkej ikutson̈ay Jehová jeʼm iyooxakɨʼɨwiñyaj ian̈wejpadoʼoyi juutypɨgam jeʼeyaj ijɨɨsneyaj idyɨk? An̈maatɨ tuum akwiñkejoʼoyi. (Aʼmɨtyim jeʼm imagen).

⁵ Wɨapsɨ iga Jehová dyaʼ takutson̈ba juutypɨgam tanjɨɨsneʼ idyɨk. Jeʼam iñaskaʼ jeʼm apóstol Pablo. Jeʼ iniity idyɨk «tu̱m to̱ya juuts tu̱m apit́», y tukuteen veces iwaʼgay Dios iga ikkaʼyaʼyiñ. ¿Ikutson̈ay Jehová jeʼm ian̈wejpadoʼoyi? Jɨ, pero dyaʼ juutypɨk Pablo ikujɨɨsneʼ idyɨk. Dyaʼ ikkaʼyay jeʼm yaʼachaaji, Jehová ichiʼ jeʼm pɨɨmi ityogoyaywɨʼɨp iga duroj ikuyooxaiñ (2 Cor. 12:7-10).

6. ¿Tyiʼiga a veces wɨap tanjaam iga Jehová dyaʼ ikutson̈ba jeʼm tanan̈wejpadoʼoyiyaj?

⁶ Wɨap iga taɨchtyam takutson̈taʼmpatyim juutypɨgam dyaʼ tanjɨɨsneʼ idyɨk. Pero wɨap tan̈kupɨk iga Jehová ijoodon̈ jempɨk tatogoyaytyaʼm. Jeʼ «más pɨ̱mi tawɨ̱wadáypa [...] que juuts taŋwágáypa o juuts tanjɨ̱spa» (Efes. 3:20). Jeʼyukmɨ, wɨap takutson̈taʼm juchix y juutypɨgam dyaʼ tan̈kujɨɨsneʼ.

7. ¿Tyiʼigasɨ nasuntaap iga tan̈kaguiñ jempɨk tan̈waʼgayñeʼ Jehová? An̈maatɨ tuum akwiñkejoʼoyi.

⁷ Wɨapsɨ iga nasuntaap iga tan̈kaguiñ jempɨk tan̈waʼgayñeʼ Jehová jesɨk tan̈kutɨʼɨyɨʼyba jempɨk jeʼ ixunba. Tanaʼmtaʼmiñ jempɨk iñaskaʼ jeʼm tɨɨwɨ Martin Poetzinger. Usan̈ okmɨ iga an̈koʼmɨy, kutsatta tuum campo de concentración nazi. Wiñtyi, iwaʼgaʼyba idyɨk Jehová iga toptaiñ iga wɨaiñ iwaganaity iyoomoʼ y pudyiñ jeʼm an̈matkuyjom. Nas wɨsna semana y keʼnam Jehová dyaʼ idyɨk sɨʼ ityop. Jeʼyukmɨ jeʼm tɨɨwɨ Poetzinger iwaday tuum an̈wejpadoʼoyi y iñɨʼmay: «Ayooxpaʼatɨ iga an̈kutɨʼɨyɨʼyiñ jempɨk mich ixunba iga an̈wadyiñ». Y moj ijɨɨs ityumpɨy jempɨk sɨʼ iñaskayaj jeʼm tɨwɨtam iga ityyajtyim idyɨk jeem. Jaʼyan̈yaj tsaam idyɨk an̈yaʼkneyaj y ijɨɨsyajpa idyɨk jeʼm iyoomoʼ y jeʼm imanɨktam. Jeʼyukmɨ jeʼm tɨɨwɨ Poetzinger iñɨʼmay Jehová: «Yukwɨʼbam iga anchiʼ tuum joomipɨk yooxakuy. Ayooxpaʼatɨ iga ampɨɨmchiʼiñ y ananmajan̈chiʼiñ jeʼm antɨwɨtam». Y jeʼam iwat jeʼm nueve amtyɨy iga jaʼy ipajneta.

8. ¿Tyi tanjɨɨskupakneiñ jesɨk tan̈watpa jeʼm an̈wejpadoʼoyi?

⁸ Tan̈kujɨɨstaʼmiñ iga Jehová dyaʼ jaʼyñeʼ ikkupakpa jempɨk ijɨɨsneʼ iga iwatpa. Iktogoyba ityumpɨy jempɨk tayaʼachwatpa, juʼuts jeʼm desastres naturales, jeʼm mɨmneiyaj y dyam kaʼanɨɨmpa. Jehová ikuyukmɨ jeʼm iAn̈jagoʼoyi ikkupakpa jempɨk ijɨykamneʼ (Dan. 2:44; Apoc. 21:3, 4). Pero sɨɨ iaʼmchiʼiñeʼ iga jeʼm Wookkɨʼɨwiñ in̈jaguiñ yɨʼp nas (Juan 12:31; Apoc. 12:9).b Meʼega Jehová iktogoyba ityumpɨy jeʼm yaʼachaaji yɨʼp jaama, jesɨk keʼnam iga jeʼm Wookkɨʼɨwiñ tsaam wɨɨ ian̈jagoʼoyi. Mex iga sɨɨ tanan̈joʼktaʼmpa iga Jehová ikkupaguiñ ijɨykamoʼoyi, dyaʼ nɨmtoʼoba iga jeʼ dyaʼ tayooxpaʼtpa. Tanaʼmtaʼmiñ tyityam iwatpa Jehová por taɨchtyam.

JUUTYPƗK IKUTSON̈BA JEHOVÁ JEʼM TANAN̈WEJPADOʼOYIYAJ

9. ¿Juutypɨk tayooxpaʼtpa Jehová jesɨk tampɨktaʼmpa tuum jɨɨxi jeʼm tañityijom? An̈maatɨ tuum akwiñkejoʼoyi.

⁹ Tachiʼiba joodon̈oʼoyi. Jehová ijɨykamneʼ iga tachiʼiba jeʼm joodon̈oʼoyi iga wɨaiñ tampɨk wɨtampɨk jɨɨxiyaj. Tansuntaʼmpa jeʼm Jehová ijoodon̈oʼoyi jesɨk tampɨktaʼmpa jɨɨxiyaj iga wɨap ikukagay tañityi, juʼuts akwiñkejoʼoyi, jesɨk tampɨktaʼmpa jeʼm jɨɨxi siiga tan̈koʼmɨytyaʼmpa o dyaʼ (Sant. 1:5). Tanaʼmtaʼmiñ jempɨk iñaskaʼ tuum yoomtɨwɨ iñɨɨyipɨk María.c Jeʼ ikuyooxaap idyɨk Jehová juʼuts precursora regular jesɨk iixpɨk tuum tɨɨwɨ. Nɨmpa: «Maaj okmɨ aamigojataʼm y anakusuʼnɨytyamta. Anjoodon̈ idyɨk iga ampɨguiñ tuum jɨɨxi. Jeʼyukmɨ pɨɨmi anan̈wejpaʼt Jehová y anan̈maday jempɨk naspa idyɨk ixɨʼ. Ansunba idyɨk iga Jehová ajɨɨxian̈chiʼiñ, pero anjoodon̈ idyɨk iga ɨch jempɨk ampɨguiñ jeʼm jɨɨxi». María ijaam iga Jehová ikutson̈ay ian̈wejpadoʼoyi y ichiʼ joodon̈oʼoyi. ¿Juutypɨk? Ikuaʼm información en jeʼm totjaayijomyaj y ipaʼt waatyi an̈kejayoʼoyiyaj iga ikutson̈ayyaj jeʼm akwagoʼoyi iga iniity idyɨk. Iaapa iga jeʼ Testigo, ichiʼ wɨtampɨk an̈kiʼmayoʼoyiyaj iga iyooxpaʼttyim. Jeʼyukmɨ, María ipɨk tuum wɨbɨk jɨɨxi.

10. Juʼuts nɨmpa Filipenses 4:13, ¿juutypɨk iyooxpaʼtpa Jehová jeʼm iyooxakɨʼɨwiñyaj? An̈maatɨ tuum akwiñkejoʼoyi. (Aʼmɨtyim jeʼm imagen).

¹⁰ Tachiʼiba jeʼm pɨɨmi iga wɨaiñ tanyaʼachɨy. Juʼutstyim iwat kun jeʼm apóstol Pablo, Jehová tachiʼiba jeʼm pɨɨmi tatogoyaytyamwɨʼɨp iga wɨaiñ tanyaʼachɨy jeʼm kutɨʼɨchiyaj (maayɨʼ Filipenses 4:13). Tanaʼmiñ juutypɨk iyooxpaʼt tuum tɨɨwɨ iñɨɨyipɨk Benjamin. Dende jesɨk traytyiñam, jaʼyan̈ amtyɨy jaʼy ityi kun ifamilia en jeʼm campos de refugiados en África. Nɨmpa: «Juchixkej anan̈wejpaʼtpa idyɨk Jehová y an̈waʼgaʼyba iga achiʼiñ jeʼm pɨɨmi iga wɨaiñ an̈wɨwat. Jeʼ akutson̈ay jeʼm anan̈wejpadoʼoyi jesɨk achiʼ paz, ayooxpaʼt iga odoy akɨʼɨn̈iñ anan̈mat jeʼm in̈maatyi y achiʼ totjaayiyaj iga odoy akupoʼnakedyiñ espiritualmente». Y nɨmtyim: «Iga ammay jempɨk iñaskaneyaj iityijom tun̈gak Testigojyaj y anaʼm juutypɨk Jehová iyooxpaʼt iga iyaʼachɨyyajiñ, ayooxpaʼt iga seguido anyaʼachɨʼyiñ y akupɨgoʼyiñ».

11, 12. ¿Juutypɨk Jehová ikuyukmɨ jeʼm tanfamilia espiritual ikutson̈ba jeʼm tanan̈wejpadoʼoyi? (Aʼmɨtyim jeʼm imagen).

¹¹ Tayooxpaʼtpa ikuyukmɨ jeʼm tanfamilia espiritual. Jeʼm tsuʼu wiñtyi iga kaʼiñ, Jesús pɨɨmi in̈wejpaʼt iJaatun̈. Iwejwaʼgay iga odoy iaʼmchiʼiñ iga tun̈gakyaj ijɨɨsyajiñ iga jeʼ ikujɨyñeʼ Dios. Jehová iyooxpaʼt, ikutsat tuum sɨn̈yukmɨpɨk pɨɨxiñ iga ipɨɨmchiʼiñ (Luc. 22:42, 43). Jeempɨktyim Jehová wɨap tayooxpaʼt ikuyukmɨ jeʼm tantɨwɨtam jesɨk tajɨymiñayyajpa o jesɨk tajooyayyajpa. Tantumpɨytyam wɨap tannɨʼmayyaj «tuum wɨbɨk an̈maatyi» jeʼm tantɨwɨtam (Prov. 12:25).

¹² Tanaʼmiñ jempɨk iñaskaʼ tuum yoomtɨwɨ iñɨɨyipɨk Míriam. Jesɨgam yaguiñ kaʼaneʼ jeʼm iwɨdyaaya, ity idyɨk ikutyum ityɨkkɨʼɨm, dyaʼ wɨɨ in̈jaam y pɨɨmi an̈yaʼkneʼ idyɨk. Duroj wejpa y inimurutoʼoba idyɨk algun i. Nɨmpa: «Dyaʼ idyɨk anaity jeʼm pɨɨmi iga anjɨyñɨgaʼyba algun i, jeʼyukmɨ anan̈wejpaʼt Jehová. Iganam sɨʼ idyɨk anan̈wejpaʼt, an̈jɨy jeʼm teléfono. Ajɨymiñay tuum anciano, tuum wɨbɨk amigo». Jeʼ kun jeʼm iyoomoʼ ikpoʼksyaj a Míriam, y jeʼ iwɨkupɨkneʼ idyɨk iga Jehová jempɨk iwat iga yɨʼp tɨɨwɨ ijɨymiñaʼyiñ.

13. ¿Juutypɨk ikutson̈ba Jehová jeʼm tanan̈wejpadoʼoyityam ikuyukmɨ jempɨk dyaʼ ikuyooxayajpa? An̈maatɨ tuum akwiñkejoʼoyi.

¹³ Jehová wɨap tayooxpaʼt ikuyukmɨ jempɨk dyaʼ ikuyooxayajpa (Prov. 21:1). Jehová wɨaptyim ikutson̈ay jeʼm iyooxakɨʼɨwiñyaj ian̈wejpadoʼoyiyaj jesɨk iwatpa iga jempɨk dyaʼ ikuyooxayajpa iyooxpaʼtyajiñ. Juʼuts akwiñkejoʼoyi, jeʼm an̈jagoʼoyi Artajerjes iaʼmchiʼ Nehemías iga seedyiñ Jerusalén y yooxpadoʼyiñ iga wɨaiñ iwɨtsakseetta yɨʼp tɨgan̈juj (Neh. 2:3-6). Yɨʼp jaama Jehová iwatpa iga jempɨk dyaʼ jeʼ Testigojyaj tachiʼiyajiñ jeʼm yooxpadoʼoyi tatogoyaywɨʼɨp.

14. ¿Juutypɨk mianmajan̈chiʼiba jeʼm Soo Hing iñasɨyoʼoyi? (Aʼmɨtyim jeʼm imagen).

¹⁴ Tuum yoomtɨwɨ iñɨɨyipɨk Soo Hing ijaam iga Jehová iyooxpaʼt ikuyukmɨ jeʼm idoctor. Jeʼm imaanɨk iniity waatyi kaʼakuyyaj iga imɨswadaʼyba jeʼm ijɨɨxi y iñaskaʼ tuum accidente. Jeʼyukmɨ Soo Hing y jeʼm iwɨdyaaya ichakyaj iyooxakuyyaj iga wɨaiñ ikuixyaj. Yɨʼp nasɨyoʼoyi iwat iga tumiñ kuyajyajiñ. Tsaam tan̈kaʼa jeʼm iityiyaj, jeʼyukmɨ Soo Hing nɨm iga dyam idyɨk wɨap iyaʼachɨy. Iñɨʼmay Jehová juʼuts idyɨk in̈jaam y iwaʼgay iyooxpadoʼoyi. Jeʼm doctor tsaam ityegueda jempɨk sɨʼ idyɨk iñaskayaj, y iyooxpaʼt iga wɨaiñ ipaʼtyaj juuty ityyajpa y wɨaiñ iniityyaj tuum yooxpadoʼoyi iga chioʼyba jeʼm An̈jagoʼoyi. Okmɨ Soo Hing nɨm: «Anaʼmtaʼm iga Jehová pɨɨmi ayooxpaʼttaʼm. An̈wɨkupɨknetaʼm iga jeʼ imaton̈ba jeʼm an̈wejpadoʼoyi» (Sal. 65:2).

TATOGOYAYTYAʼM FE IGA TANAʼMTAʼMIÑ Y TAMPƗKTSON̈TAʼMIÑ JUUTYPƗK TAKUTSON̈BA JEHOVÁ

15. ¿Tyi iyooxpaʼt tuum yoomtɨwɨ iga wɨaiñ iaʼm juutypɨk Jehová ikutson̈ayñeʼ jeʼm ian̈wejpadoʼoyiyaj?

¹⁵ Jehová dyaʼ ikutson̈ba jeʼm tanan̈wejpadoʼoyiyaj de tuum manera iga tagaʼman̈jakpa. Pero juutypɨk takutson̈ba tanaʼmpa iga jeʼam jempɨk tatogoyay iga wɨaiñ tanyaʼachɨy. Jeʼyukmɨ tatogoyaytyaʼm fe iga wɨaiñ tanaʼm juutypɨk takutson̈ba jeʼm tanJaatun̈ sɨn̈yukmɨpɨk. Tuum yoomtɨwɨ iñɨɨyipɨk Yoko ijaampa idyɨk iga ken dyaʼ sɨʼ ikutson̈aytya jeʼm ian̈wejpadoʼoyi. Pero okmɨ moj ijaykunuʼk tyityam idyɨk iwaʼgayñeʼ Jehová. Maaj okmɨ, ikɨʼpin̈gak jempɨk ijaykunuʼkneʼ idyɨk y iaʼm iga Jehová ikutson̈ayñeʼ idyɨk jeʼm ian̈wejpadoʼoyiyaj, mex iga dyam idyɨk ityumpɨy ijɨɨspa tyityam iwaʼgayñeʼ. Jeʼyukmɨ wɨɨ iga tan̈kujɨɨstaʼmiñ juutypɨk Jehová sɨʼ ikutson̈ jeʼm tanan̈wejpadoʼoyiyaj (Sal. 66:19, 20).

16. ¿Juutypɨk tayooxpaʼtpa jeʼm fe jesɨk tan̈watpa jeʼm an̈wejpadoʼoyi? (Hebreos 11:6).

¹⁶ Dyaʼ numaaj iga tanaidyiñ fe iga tanan̈wejpaʼtpa Jehová, tampɨktson̈iñtyim juutypɨk takutson̈aʼyba jeʼm tanan̈wejpadoʼoyi (maayɨʼ Hebreos 11:6). Tanaʼmtaʼmiñ jempɨk iñaskayaj Mike y Chrissy, tuum an̈komɨʼɨyi iga ijɨɨsneyaj idyɨk iga kuyooxaoyyajpa Betel. Mike nɨmpa: «Watykɨy an̈kutsattaʼm ansolicitud y juchixkej anan̈wejpaʼttaʼmpa idyɨk Jehová, pero dyaʼ atɨʼptamta». Mike y Chrissy ikupɨkyaj iga Jehová ijoodon̈ idyɨk juuty maaj wɨap ikuyooxaoyyaj. Seguido ikuyooxayaj Jehová juʼtspɨyam wɨayaj: kuyooxaoyyaj juʼuts precursores regulares juuty nasuntaap idyɨk yooxpadoʼoyi y yooxpadoyyajtyim en proyectos de construcción. Sɨɨ kuyooxaoyyajpa juʼuts circuito. Mike nɨmpa: «Jehová dyaʼ juchixkej akutson̈ayñetaʼm jeʼm anan̈wejpadoʼoyityam juutypɨk ɨch an̈kujɨɨsnetaʼm idyɨk, pero akutson̈ayñetaʼm, y iwatneʼ de tuum manera iga maaj wɨɨ».

17, 18. Juʼuts nɨmpa Salmo 86:6, 7, ¿tyi tan̈wɨkupɨknetaʼm?

¹⁷ (Maayɨʼ Salmo 86:6, 7).d David iwɨkupɨkneʼ idyɨk iga Jehová ikumaton̈ba y ikutson̈ba ian̈wejpadoʼoyiyaj. Mich wɨaptyim in̈kupɨk jeempɨk. Jeʼm akwiñkejoʼoyiyaj tan̈kɨʼpin̈tamwɨʼɨp yɨʼp kuyujijom ikwiñkejpa iga Jehová wɨap tachiʼ joodon̈oʼoyi y jeʼm pɨɨmi tatogoyaytyamwɨʼɨp iga wɨaiñ tanyaʼachɨy. Tanaʼmtaʼmtyim iga Jehová tayooxpaʼttaʼmpa ikuyukmɨ jeʼm tanfamilia espiritual o wɨap ipɨk jempɨk dyaʼ ikuyooxayajpa iga tayooxpaʼttaʼmiñ.

¹⁸ Mex iga Jehová dyaʼ juchixkej ikutson̈ba jeʼm tanan̈wejpadoʼoyiyaj juutypɨgam taɨch tan̈kujɨɨsneʼ, tanjoodon̈tam iga ikutson̈ba. Tachiʼityaʼmpa jeʼm yooxpadoʼoyi jesɨk maaj tatogoyaytyaʼm. Jeʼyukmɨ seguido tanan̈wejpaʼdyiñ kun fe, tan̈kupɨktaʼmpa iga Jehová takuixtyaʼmpa yɨʼp jaama y jeʼm jomnaxyukmɨ tachiʼiba ityumpɨy tyityam tatogoyaytyaʼm (Sal. 145:16).