Mich wɨap inikkupak jeʼm immetas espirituales

1. ¿Tyi wɨap iga tan̈kaʼaneʼ tan̈wat?

¿MINIKKAʼMAYÑETA tuum meta espiritual y tan̈kaʼaneʼ inikkupak?b Siiga jesaneum, dyaʼ numaaj mich iññaskaneʼ jeempɨk. Juʼuts akwiñkejoʼoyi, Philip iwattoʼoba idyɨk majnam an̈wejpadoʼoyiyaj y iwattoʼoba kun an̈matyiyaj putpaʼap dende ianmajom, pero dyaʼ idyɨk ijaya paʼtpa tiempo juchix wɨap inimuru Jehová. Erika ijɨɨsneʼ idyɨk iga odom maaj kutsuʼuyaiñ iñuʼk jeʼm an̈tuʼumaaji wattapaʼap para jeʼm an̈matkuy. Pero kutsuʼuyaap idyɨk. Tomáš watykɨy ijɨɨstɨʼp iga imayba ikumuuma jeʼm Biblia. Nɨmpa: «Dyaʼ idyɨk an̈kusuʼnɨʼyba ammay jeʼm Biblia. Tukuteen veces an̈wattɨʼp, y numaaj anuʼk hasta Levítico».

2. ¿Tyiʼiga odoy tan̈yaʼguiñ siiga dyanam tanakkupakneʼ jeʼm meta espiritual tanjɨɨsnewɨʼɨp?

² Siiga mich inikkupaktoʼoba tuum meta pero dyanam inikkupakneʼ, odoy an̈yaʼakɨ. Iga wɨaiñ tanakkupak tuum meta dyaʼ numaaj nasuntaap tiempo, nasuntaptyim iga tanteguedaiñ. Jeʼyukmɨ jesɨk mich inikkupaktoʼoba tuum meta inikwiñkejpa iga tsaam iñchoowaixpa jeʼm in̈wɨnanɨgoʼoyi kun Jehová. Y Jehová iaʼmpa iga mich in̈kuyooxatoʼoba juʼtspɨyam miwɨap, jeʼ dyaʼ miwaʼgaʼyba iga in̈wadyiñ algun tyi iga dyaʼ wɨap in̈wat (Sal. 103:14; Miq. 6:8). Jeʼyukmɨ kɨʼpin̈ɨ siiga jeʼm meta iñjɨɨsnewɨʼɨp iga in̈watpa nunta wɨap inikkupak. Siiga jesaneum, ¿tyi wɨap in̈wat iga wɨaiñ inikkupak? Tanaʼmiñ weeñi jɨɨxian̈chioʼoyiyaj.

AKWIÑKEEJƗ MAYMAYAAJI KUN JEMPƗK IÑJƗƗSNEʼ IGA IN̈WATPA

3. ¿Tyiʼiga tsaam importante jeʼm maymayaaji?

³ Iga wɨaiñ tanakkupak jeʼm metas espirituales, tsaam importante jeʼm maymayaaji. ¿Tyiʼiga? Iga jesɨk tanjɨɨsneʼ iga tan̈watpa algun tyi, tanteguedaap iga tanakkupakpa. Jeʼm maymayaaji jeex juʼuts jeʼm saawa iga ixujnɨkpa jeʼm lancha. Siiga seguido sujoʼyba jeʼm saawa, wɨapsɨ iga jeʼm lancha nuʼkpa juuty nɨki. Y siiga pɨɨmi sujoʼyba jeʼm saawa, dyaʼ chokoyaap jobitytyi nuʼkpa. Jeempɨktyim naspa kun jeʼm maymayaaji, tayooxpaʼtpa iga tanakkupaguiñ jeʼm tammetas. Tuum tɨɨwɨ de El Salvador iñɨɨyipɨk David nɨmpa: «Jesɨk mimaymayaneʼeba, maaj iñtyeguedaap iga inikkupakpa jempɨk iñjɨɨsneʼ iga in̈watpa». Jesɨk, ¿tyi miyooxpaʼtpa iga maaj mimaymayaneiñ?

4. ¿Tyi wɨap tan̈waʼgay Jehová? (Filipenses 2:13; aʼmɨtyim jeʼm imagen).

⁴ Waʼgaʼayɨ Jehová iga miyooxpaʼdyiñ iniity maymayaaji. Ikuyukmɨ jeʼm iespíritu, Jehová wɨap michiʼ jeʼm maymayaaji nasuntapaʼap iga wɨaiñ inikkupak jeʼm immeta (maayɨʼ Filipenses 2:13). A veces tanakkupaktoʼoba algun tyi iga tanjoodon̈ iga jeempɨgam tan̈wadyiñ y yɨʼp jɨɨxi dyaʼ maloj. Pero wɨapsɨ iga dende tananmajom dyaʼ jeempɨk tan̈wattoʼoba. Jeʼam iñaskaʼ Norina, tuum yoomtɨwɨ itywɨʼɨp Uganda. Jeʼ iniitytyoʼoba idyɨk tuum kuyuuji, pero ijɨɨspa idyɨk iga dyaʼ wɨakkuyujoʼyba. ¿Tyi iyooxpaʼt? Jeʼ nɨmpa: «Tumtum jaama moj an̈waʼgay Jehová iga ayooxpaʼdyiñ iga an̈kusuʼnɨʼyiñ anakkuyujoy. Dyaʼ numaaj an̈waʼgay jeʼm iyooxpadoʼoyi, anteguedatyim iga maaj an̈wɨan̈kejiñ jeʼm in̈maatyi. Jutteen meses okmɨ, majtyim idyɨk amaymay kun jeʼm jɨɨxi ampɨknewɨʼɨp. Jeʼtyi amtyɨy, anaktsukum wɨsteen kuyuuji».

5. ¿Tyi tayooxpaʼtpa iga wɨaiñ tanakkupak jempɨk tanjɨɨsneʼ iga tan̈watpa?

⁵ Kujɨɨsɨ juutypɨk Jehová miyooxpaʼtneʼ (Sal. 143:5). Jeʼm apóstol Pablo ikujɨɨs juutypɨk Jehová ikwiñkejayñeʼ jeʼm ityoyoʼoyi, yɨʼbam ianmajan̈chiʼ iga iwɨkuyooxaiñ (1 Cor. 15:9, 10; 1 Tim. 1:12-14). Jeempɨktyim naspa kun mimich, jesɨk in̈kujɨɨspa juutypɨk Jehová miyooxpaʼtneʼ, mianmajan̈chiʼiba iga wɨaiñ inikkupak jeʼm immeta (Sal. 116:12). Aʼmɨ tyi iyooxpaʼt tuum yoomtɨwɨ itywɨʼɨp Honduras iga tsɨʼyiñ juʼuts precursora regular. Jeʼ nɨmpa: «Moj anjɨɨs juʼtspɨy atoyba Jehová. Anamiñ jeʼm ikumunjom, akuixpa y akupujpa. Jesɨk an̈kujɨɨs ityumpɨy yɨʼp, majtyim antoy Jehová, y majtyim an̈kusuʼnɨy iga atsɨʼyba juʼuts precursora».

6. ¿Tyiñam tayooxpaʼtpa iga wɨaiñ tanakkupak jempɨk tanjɨɨsneʼ iga tan̈watpa?

⁶ Jɨɨskupakneɨʼ juutypɨk miwɨwadaʼyba jesɨk inikkupakpa immeta. Eybɨk tanaʼmtaʼmiñ jeʼm Erika iakwiñkejoʼoyi jɨykimtawɨʼɨp en jeʼm párrafo 1. ¿Tyi iyooxpaʼt iga odoy kutsuʼuyaiñ? Jeʼ nɨmpa: «Anaʼm iga jesɨk tsuʼuyiam idyɨk anuʼkpa jesɨk putnɨɨmpa jeʼm an̈matkuyjom, ampatstogoʼyba idyɨk jaʼyan̈ tyidyin̈kej. Pero jesɨk dyaʼ idyɨk akutsuʼuyaap wɨap idyɨk andiuschiyaj jeʼm tɨwɨtam y anamuruyaj. Wɨaptyim idyɨk an̈kumaton̈ jɨɨxian̈chioʼoyiyaj iga ayooxpaʼtyajpa iga majtyim idyɨk amaymayaiñ jeʼm an̈matkuyjom». Iga Erika ikujɨɨs juutypɨk idyɨk iwɨwadaʼyba jesɨk dyaʼ kutsuʼuyaap iñuʼk jeʼm an̈matkuyjom, ikkupak jempɨk ijɨɨsneʼ idyɨk iga iwatpa. Jɨɨskupakneɨʼ juutypɨk miwɨwadaʼyba jempɨk iñjɨɨsneʼ iga in̈watpa. Siiga mich minikkaʼmayñeta jeʼm meta iga tumtum jaama immayba jeʼm Biblia o in̈watpa an̈wejpadoʼoyiyaj, kujɨɨsɨ juutypɨk ipɨɨmchiʼiba jeʼm in̈wɨnanɨgoʼoyi kun Jehová (Sal. 145:18, 19). Siiga jempɨk iñjɨɨsneʼ iga in̈watpa jeʼ iga iniitytyoʼoba tuum wɨbɨk jɨɨxi o jaamoʼoyi, jɨɨskupakneɨʼ juutypɨk miyooxpaʼtpa iga in̈wɨnanɨgayyajiñ tun̈gakyaj (Col. 3:14). ¿Tyiñam maaj wɨap in̈wat? Jaykaʼamɨ tyiʼiga inikkupaktoʼoba yɨʼp meta y kɨʼpin̈ɨ jesɨk miwɨap. Tomáš, jɨykimtawɨʼɨp wiñtyityim nɨmpa: «Siiga anaʼmpa iga tsaam awɨwadaʼyba jeʼm meta anakkaʼmnewɨʼɨp maaj dyaʼ tan̈kaʼap iga anakkupakpa».

7. ¿Tyi iwatyaj Julio y jeʼm iyoomoʼ iga wɨaiñ ikkupakyaj jeʼm imeta?

⁷ An̈pɨʼɨtsɨ jempɨk mianmajan̈chiʼiyajpa (Prov. 13:20). Julio y jeʼm iyoomoʼ nɨkyajtoʼoba idyɨk juuty nasuntaap yooxpadoʼoyi. Jeʼ in̈matpa jempɨk iwatyaj iga wɨaiñ ikkupakyaj yɨʼp jɨɨxi: «Anan̈pɨʼtstaʼm amigojyaj iga ayooxpaʼttaʼmpa idyɨk y anan̈madaytyaʼm jempɨk anjɨɨsnetaʼm iga an̈wattaʼmpa. Iga waatyi jeʼm anamigojyaj ikkupakneyajum idyɨk juʼutsam ijɨɨsneyaj, wɨap idyɨk ajɨɨxian̈chiʼityaʼm. Akwaʼktaʼmpatyim idyɨk tyityamnam atogoyaytyaʼm y aanmajan̈chiʼityaʼmpa idyɨk iga wɨaiñ anakkupaktaʼm jempɨk anjɨɨsnetaʼm iga an̈wattaʼmpa».

JESƗK DYAʼ TANJAAMPA MAYMAYAAJI KUN JEMPƗK TANJƗƗSNEʼ IGA TAN̈WATPA

8. ¿Tyi wɨap iñas siiga numaaj tanteguedaap jempɨk tanjɨɨsneʼ iga tan̈watpa jesɨk tamaymayaneʼeba? (Aʼmɨtyim jeʼm imagen).

⁸ Tantumpɨytyam tannaskanetaʼm iga ity jaamayaj jesɨk dyaʼ tan̈wattoʼoba jempɨk tanjɨɨsneʼ. ¿Nɨmtoʼoba yɨʼp iga dyaʼ wɨap tanakkupak jeʼm tammeta? Dyaʼ. Tanjɨɨstaʼmiñ eybɨk jeʼm saawa y jeʼm lancha. Mex iga jeʼm saawa wɨap ixuj jeʼm lancha iga nuʼguiñ juuty nɨki, dyaʼ juchixkej jespɨy sujoʼyba y weeñi jaamayaj dyaʼ sujoʼyba jeʼm saawa. ¿Nɨmtoʼoba yɨʼp iga jeʼm lancha dyam wɨap iñuʼk juuty nɨki? Dyaʼ jesaneʼ. Juʼuts akwiñkejoʼoyi, weeñi lanchajyaj iniityyaj tuum motor, y tun̈gakyaj iniityyaj remos. Yɨʼbam iyooxpaʼtpa jeʼm marinero iga wɨaiñ iñuʼk juuty nɨki. Jeempɨktyim naspa kun taɨchtyam, wɨapsɨ iga dyaʼ juchixkej tanjaampa maymayaaji. Y dyatyim tan̈wattoʼoba jempɨk tanjɨɨsneʼ iga tan̈watpa. Pero meʼega tanan̈joʼkneʼeba numaaj jesɨk tamaymayaneʼeba, dyaʼ wɨap tanakkupak jempɨk tanjɨɨsneʼ. Pero, juʼutstyim jeʼm marinero iga wɨap iñɨk mex iga dyaʼ sujoʼyba jeʼm saawa, taɨchtyam wɨaptyim tanakkupak jeʼm tammeta jesɨk tatogoyay jeʼm maymayaaji. Pero nasuntaap iga tanteguedaiñ iga wɨaiñ tanakkupak. Wiñtyi iga tan̈kɨʼpin̈iñ tyi tayooxpaʼtpa jesɨk tannaskaʼaba yɨʼɨmpɨk, tan̈kutson̈taʼmiñ tuum akwagoʼoyi iga weeñiyaj nawadayyajtaap.

9. ¿Wɨaneʼ siiga tanteguedaap iga tanakkupakpa tuum meta mex iga dyaʼ tan̈wattoʼoba?

⁹ Jehová ixunba iga tan̈kuyooxaiñ kun maymayaaji y kun ityumpɨy tananmaj (Sal. 100:2; 2 Cor. 9:7). Jesɨk, ¿tyiʼiga tanteguedaap iga tanakkupaguiñ tuum meta espiritual siiga tananmajom dyaʼ tan̈wattoʼoba? Tan̈kujɨɨstaʼmiñ jeʼm apóstol Pablo iakwiñkejoʼoyi. Jeʼ nɨmpa: «Ampɨɨmɨ́ypa ammɨjta̱y iga iwɨ̱wad́iñ» (1 Cor. 9:25-27). Pablo napɨʼɨmɨytya iga iwatpa jempɨk Jehová ixunba, mex iga dyaʼ juchixkej iwattoʼoba idyɨk. ¿Maymaya Jehová kun jeʼm yooxakuy iwatpaʼap idyɨk Pablo? Maymay idyɨk. Jeʼyukmɨ ikumayket por jeʼm iyooxakuy (2 Tim. 4:7, 8).

10. ¿Juutypɨk tawɨwadaʼyba jesɨk tanteguedaap iga tanakkupakpa tuum meta mex iga dyaʼ idyɨk tan̈wattoʼoba?

¹⁰ Jehová tsaam maymaytyim jesɨk iaʼmpa iga tanteguedaap iga tanakkupakpa tuum meta mex siiga dyaʼ tan̈wattoʼoba. ¿Tyiʼiga? Iga tan̈watpa por jeʼm toyoʼoyi iga tanaidyay mex iga dyaʼ juchixkej tan̈kusuʼnɨʼyba jempɨk tanjɨɨsneʼ iga tan̈watpa. Jehová ikumayket Pablo y takumayketpatyim siiga tanteguedaap iga tanakkupakpa jeʼm tammeta (Sal. 126:5). Y jesɨk tanaʼmpa juutypɨk Jehová sɨʼ takumayket wɨapsɨ iga majtyim tanakkupaktoʼoba jempɨk tanjɨɨsneʼ iga tan̈watpa. Tuum yoomtɨwɨ itywɨʼɨp Polonia iñɨɨyipɨk Lucyna nɨmpa: «Ity jaamayaj jesɨk dyaʼ aputtoʼoba jeʼm an̈matkuy, y maaj jesɨk asoʼpsneʼ. Pero jesɨk aseetpa antɨkkɨʼɨm anjaampa maymayaaji, yɨʼp jeʼ tuum wɨbɨk xaaja». Sɨɨ tanaʼmiñ tyi wɨap tan̈wat jesɨk dyaʼ tanaity jeʼm maymayaaji.

11. ¿Juutypɨk tayooxpaʼtpa Jehová iga wɨaiñ tanan̈jakta?

¹¹ Waʼgaʼayɨ Jehová iga miyooxpaʼdyiñ iga wɨaiñ inin̈jakta. Jesɨk algun i iniity yɨʼp jɨɨxi wɨap in̈jak jempɨk ijaampa y tyityam iwatpa. Yɨʼp dyaʼ numaaj tayooxpaʼtpa iga odoy tammalwadyiñ. Tayooxpaʼtpatyim iga tan̈wɨwadyiñ, maaj jesɨk tan̈kaʼ iga tan̈watpa jeempɨk o jesɨk dyaʼ tan̈wattoʼoba. Odoy tan̈kujaʼamaytyaʼmiñ iga Jehová ikuyukmɨ jeʼm iespíritu tayooxpaʼtpa iga wɨaiñ tanan̈jakta. Jeʼyukmɨ seguido tan̈waʼgaʼyiñ jeʼm iespíritu santo iga wɨaiñ tanaity yɨʼp jɨɨxi (Luc. 11:13; Gál. 5:22, 23). David, jɨykimtawɨʼɨp en jeʼm párrafo 3, ipɨk jeʼm ijɨɨxi iga majnam wɨkuyujpa iyaʼak. Jeʼ pɨɨmi iyooxpaʼt jeʼm an̈wejpadoʼoyi. Nɨmpa: «An̈waʼgay Jehová iga wɨaiñ anan̈jakta. Y jeʼ ayooxpaʼt. Anaktsukum iga awɨkuyujpa anyaʼak y duroj sɨʼ an̈wat jeempɨk».

12. ¿Juutypɨk tayooxpaʼtpa Eclesiastés 11:4 iga wɨaiñ tanakkupak jeʼm metas espirituales?

¹² Odoy an̈joʼokɨ hasta jesɨk tsaam miwɨnɨgayñeʼ. Yɨʼp naxyukmɨ wɨapsɨ iga dyaʼ naspa jeempɨk. Siiga tanan̈joʼkpa hasta jesɨk tawɨnɨgaʼyiñ, wɨapsɨ iga ni keman tanakkupakpa jeʼm meta (maayɨʼ Eclesiastés 11:4).c Tuum tɨɨwɨ iñɨɨyipɨk Dayniel nɨmpa yɨʼɨmpɨk: «Iga algun i iwɨnɨgaʼyiñ dyaʼ keman naspa jeempɨk. Jeʼyukmɨ dyaʼ nasuntaap iga tanan̈joʼguiñ, tan̈wadyiñ jempɨk tanjɨɨsneʼ». Paul, tuum tɨɨwɨ itywɨʼɨp Uganda, in̈matpatyim tyiʼiga wɨɨ iga tanakkupaguiñ jeʼm tammetas: «Jesɨk in̈watpa jempɨk iñjɨɨsneʼ mex iga tan̈kaʼ Jehová mikumayketpa» (Mal. 3:10).

13. ¿Juutypɨk tayooxpaʼtpa siiga ustam ustam tanakkupakpa tananɨk jempɨk tanjɨɨsneʼ iga tan̈watpa?

¹³ Akkupaakɨ ustam ustam. Wɨapsɨ iga ity jaamayaj jesɨk dyaʼ tanaitypa maymayaaji iga tanjɨɨspa iga jeʼm tammeta dyaʼ wɨap tanakkupak. Siiga jeʼam sɨʼ iññaskaʼ, ¿tyiʼiga dyaʼ inikkupakpa ustam ustam? Juʼuts akwiñkejoʼoyi, siiga maaj inikwiñkejtoʼoba tuum wɨbɨk jɨɨxi y jaamoʼoyi, ¿tyiʼiga dyaʼ inikwiñkejpa ininɨk ustam ustam? Siiga iñjɨɨsneʼ iga immayba ikumuuma jeʼm Biblia, ¿tyiʼiga dyaʼ immayba ustam ustam? Tomáš, jɨykimtawɨʼɨp wiñtyityim, tsaam idyɨk tan̈kaʼap ikkupak jempɨk ijɨɨsneʼ, imaytyoʼoba idyɨk jeʼm Biblia en tuum amtyɨy. Jeʼ nɨmpa: «Anaʼm iga dyaʼ idyɨk wɨap anakkupak iga ammayba jeʼm Biblia en tuum amtyɨy. Jeʼyukmɨ eybɨk anaktsukum, y moj ammay ustam ustam. Tumtum jaama ammayba idyɨk jutteen párrafo y an̈kujɨɨspa idyɨk jempɨk an̈kejay. Y majtyim an̈kusuʼnɨʼyba idyɨk jempɨk ammayba». Iga Tomáš majtyim idyɨk maymay, majnam ityop tiempo iga imayba jeʼm Biblia. Y yaj mu imay ikumuuma.d

ODOY AN̈YAʼAKƗ SIIGA KEN DYAʼ WƗAP INIKKUPAK JEMPƗK IÑJƗƗSNEʼ

14. ¿Tyityam dyaʼ taaʼmchiʼiba iga tanakkupaguiñ jempɨk tanjɨɨsneʼ iga tan̈watpa?

¹⁴ Mex iga tanaitytyaʼm jeʼm maymayaaji iga tanakkupaktoʼoba jempɨk tanjɨɨsneʼ, wɨapsɨ iga algun tyi dyaʼ taaʼmchiʼiba iga tanakkupaguiñ. Juʼuts akwiñkejoʼoyi, iga «ni i dyaʼ ijoodon̈ tyi wɨap iñas» wɨapsɨ iga yɨʼp takkaʼyaʼyba jeʼm tiempo tantopnewɨʼɨp iga tanakkupakpa jempɨk tanjɨɨsneʼ iga tan̈watpa (Ecl. 9:11). Wɨaptyim tannaskaʼ tuum kobakpiiji iga tan̈yaʼkwatpa y dyam tyi tan̈wattoʼoba (Prov. 24:10). Wɨapsɨ iga dyaʼ tanakkupakpa jempɨk tanjɨɨsneʼ iga tan̈watpa iga tatan̈kaɨykɨʼɨwiñtyam (Rom. 7:23). O wɨaptyim iga dyaʼ tanakkupakpa iga pɨɨmi tasoʼpsneʼ (Mat. 26:43). ¿Tyi wɨap tayooxpaʼttaʼm siiga tannaskataʼmpa jeempɨk?

15. ¿Tyiʼiga seguido tanteguedaiñ iga tanakkupakpa jeʼm tammeta? (Salmo 145:14).

¹⁵ Kujɨɨsɨ siiga tun̈kɨy dyaʼ wɨa mu in̈wat dyaʼ nɨmtoʼoba iga dyaʼ wɨap inikkupak. Juʼuts nɨmpa jeʼm Biblia, wɨapsɨ iga tannaskataʼmpa jaʼyan̈ kobakpiijiyaj. Pero tanɨʼmaʼybatyim iga Jehová tayooxpaʼtpa iga wɨaiñ tanakkupak jeʼm tammeta (maayɨʼ Salmo 145:14).e Philip, jɨykimtawɨʼɨp en jeʼm wiñtyipɨk párrafo, nɨmpa: «Dyaʼ anjɨɨskupakneʼeba juchix dyaʼ wɨa mu anakkupak jeʼm ammeta, anjɨɨskupakneʼeba juutypɨk wɨap anakkupak». Tanjɨɨsaytyaʼmiñ eybɨk jeʼm David iakwiñkejoʼoyi. Jeʼ nɨmpa: «Jesɨk algun tyi dyaʼ awɨpudaʼyba o dyaʼ awɨnɨgaʼyba dyaʼ anjɨɨspa iga yɨʼpyaj nasɨyoʼoyiyaj dyaʼ aaʼmchiʼiba iga anakkupakpa jempɨk anjɨɨsneʼ iga an̈watpa. Yɨʼɨmpɨgam wɨap anakwiñkejay Jehová juʼtspɨy antoyba». Jeʼyukmɨ jesɨk tanteguedaap iga tanakkupakpa jempɨk tanjɨɨsneʼ iga tan̈watpa mex iga tanaity kobakpiijiyaj, tanakwiñkejaʼyba Jehová iga tan̈wattoʼoba jempɨk jeʼ ikusuʼnɨʼyba. ¿Wɨap inin̈jɨɨsjak juʼtspɨy maymayaap Jehová jesɨk iaʼmpa iga in̈watpa ityumpɨy juʼtspɨyam miwɨap iga inikkupakpa immeta?

16. ¿Juutypɨk tayooxpaʼtpa jesɨk algun tyi dyaʼ taaʼmchiʼiba iga tanakkupaguiñ jempɨk tanjɨɨsneʼ iga tan̈watpa?

¹⁶ Kujɨɨsɨ juutypɨk miyooxpaʼtpa jesɨk algun tyi dyaʼ miaʼmchiʼiba iga inikkupaguiñ jeʼm immeta. Kɨʼpin̈ɨ tyi jeʼ jempɨk dyaʼ miaʼmchiʼiba y nakwaʼktaajɨ: «¿Juʼp kukaki nasuntaap iga wɨaiñ anakkupak jempɨk anjɨɨsneʼ iga an̈watpa?» (Prov. 27:12). Pero siiga watykɨyam tanteguedaneʼ iga tanakkupakpa tuum meta y dyaʼ wɨaneʼ tanakkupak, ¿dyasɨ nasuntaap iga tan̈kukagaʼyiñ jeʼm tammeta? Kujɨɨsɨ siiga jempɨk miñɨm iga in̈watpa nunta wɨap inikkupak.f Jehová dyaʼ ijɨɨspa iga dyam tyi mikumeskuy siiga dyaʼ wɨaneʼ inikkupak tuum meta (2 Cor. 8:12).

17. ¿Tyiʼiga wɨɨ iga tanjɨɨskupakneiñ jeʼm metas jempɨk tanakkupakneyajum?

¹⁷ Kujɨɨsɨ jeʼm meta jempɨk inikkupakneum. Jeʼm Biblia nɨmpa iga «nu̱mcɨɨpíŋóypa jém tanJa̱tuŋ Dios. Jeeyucmɨ d́a ijaamaŋnotpa t́it́am iŋwatneta» (Heb. 6:10). Jeʼyukmɨ mimich odoytyim kujaʼamaʼayɨ. Kujɨɨsɨ jeʼm meta jempɨk inikkupakneum, juʼuts iga iñamigojaneʼ Jehová, miputpa jeʼm an̈matkuyjom o michin̈neum. Jeʼm metas espirituales iga inikkupakneyajum ikwiñkejpa iga sɨɨ wɨaptyim inikkupak jempɨk iñjɨɨsneʼ iga in̈watpa (Filip. 3:16).

18. ¿Tyi in̈wadyiñ iganam ustam ustam inikkupakpa jeʼm immeta? (Aʼmɨtyim jeʼm imagen).

¹⁸ Kun jeʼm Jehová iyooxpadoʼoyi, mich wɨap inikkupak jeʼm immeta, juʼutstyim jeʼm marinero iga nuʼkpa juuty nɨki y tsaam maymayaap. Jaʼyan̈ marineros maymayyaj mex iga dyanam nuʼkneyaj juuty nɨkiyaj. Mich wɨaptyim immaymaya siiga iñaʼmpa juutypɨk Jehová sɨʼ miyooxpaʼt y mikumayketpa iganam ustam ustam inikkupakpa jeʼm immeta (2 Cor. 4:7). Siiga duroj iñtyeguedaap iga inikkupakpa jempɨk iñjɨɨsneʼ iga in̈watpa, impɨktson̈ba jaʼyan̈ kumaykedoʼoyiyaj (Gál. 6:9).