¿Miityum listo jesɨk nuʼkpa jeʼm mɨjpɨk yaʼachaaji?

1. ¿Tyiʼiga taitytyaʼmiñ listo wiñtyi iga nuʼkpa tuum desastre?

JESƗK taitypa listo wɨap tan̈kupuj tañityi. Juʼuts akwiñkejoʼoyi, jesɨk naspa tuum desastre, jempɨk ityyaj listo maaj wɨap inikɨakputyajta y iyooxpaʼtyaj tun̈gakyaj. Tuum organización itywɨʼɨp Europa iga iyooxpaʼtpa tun̈gakyaj, nɨmpa iga «jesɨk taitypa listo maaj wɨap tanakɨakputta».

2. ¿Tyiʼiga taitytyaʼmiñ listo wiñtyi iga nuʼkpa jeʼm mɨjpɨk yaʼachaaji? (Mateo 24:44).

² Jeʼm mɨjpɨk «yaacha̱ji» jobity tsukumpa (Mat. 24:21). Pero dyaʼ jeex juʼuts tuum desastre iga dyaʼ i ijoodon̈ juchix nuʼkpa. Nɨkiam tuumtsam 2,000 amtyɨy iga Jesús iñɨʼmay jempɨk ityun̈ɨyyajpa iga ityyajiñ listo (maayɨʼ Mateo 24:44). Siiga tan̈kupɨkpa yɨʼp an̈kiʼmayoʼoyi, maaj dyaʼ tan̈kaʼap tanakɨakputta jesɨk nuʼkpa jeʼm mɨjpɨk yaʼachaaji y wɨaptyim tanyooxpaʼt tun̈gakyaj iga iwatyajiñtyim jeempɨk (Luc. 21:36).

3. ¿Tyiʼiga tanaidyiñ yaʼachɨyoʼoyi, yaʼachan̈jamoʼoyi y toyoʼoyi iga taidyiñ listo jesɨk nuʼkpa jeʼm mɨjpɨk yaʼachaaji?

³ Iga taidyiñ listo jesɨk nuʼkpa jeʼm mɨjpɨk yaʼachaaji, tanaidyiñ tukuteen jɨɨxiyaj y jaamoʼoyiyaj. ¿Tyi tan̈watpa siiga tawaʼgaytyaap iga nɨguiñ tanan̈madayyaj tyityam iñaskayajpa jempɨk imalwatyajpa y jempɨk tan̈teeñkamokyajpa? (Apoc. 16:21). Tatogoyaʼyba yaʼachɨyoʼoyi iga wɨaiñ tan̈kupɨk Jehová y tanaidyaʼyiñ confianza iga jeʼ takupujpa. ¿Tyi tan̈wattaʼmpa siiga jeʼm tantɨwɨtam ipatstogoyyajpa tyityam iniityyaj y dyam tyi initsɨʼyyajpa? (Hab. 3:17, 18). Nasuntaap iga tanaidyiñ yaʼachan̈jamoʼoyi iga wɨaiñ tanyooxpaʼtyaj. ¿Y tyi tan̈watpa jesɨk waatyi naciónyaj tan̈teeñkamoktaʼmpa, y siiga tatsaktamtaap an̈tuumjom kun jeʼm tantɨwɨtam tuum xutyu tɨkjom? (Ezeq. 38:10-12). Nasuntaap iga tanaidyaʼyiñ toyoʼoyi tanfamilia espiritual.

4. ¿Tyiʼiga tanteguedaiñ iga majnam tanaidyiñ, yaʼachɨyoʼoyi, yaʼachan̈jamoʼoyi y toyoʼoyi?

⁴ Jeʼm Dios In̈maatyi tanɨʼmaʼyba iga majnam tanaidyiñ yaʼachɨyoʼoyi, yaʼachan̈jamoʼoyi y toyoʼoyi. Lucas 21:19 nɨmpa: «Siiga iñyaachɨ́ypa [...] jesɨc [in̈kooñwɨʼyba] jém imvida». Colosenses 3:12 nɨmpa: «Yaachaŋja̱mɨ jém yaacha̱yajpáppɨc». Y 1 Tesalonicenses 4:9, 10 nɨmpa: «Porque tanJa̱tuŋ Dios miŋquejáy ju̱t́pɨc minitoyt́amta̱p con jém iñt́ɨ̱wɨtam. […] Maŋcunucsáypa mantɨ̱wɨtam iga más y más iñt́oyt́ámiñ». Yɨʼpyaj an̈matyiyaj nɨʼmayyajta jeʼm tɨwɨtam iga sɨʼbam idyɨk ikwiñkejyaj yaʼachɨyoʼoyi, yaʼachan̈jamoʼoyi y toyoʼoyi. Pero nasuntaap iga majnam ikwiñkejyajiñ idyɨk. Y taɨchtyam jeempɨktyim tan̈wattaʼmiñ. ¿Tyi tayooxpaʼttaʼmpa? Yɨʼp kuyujijom tan̈kɨʼpin̈taʼmpa tyityam iwatyaj jeʼm wiñtyipɨk cristianojyaj iga iniityyajiñ yɨʼpyaj jɨɨxiyaj y jaamoʼoyiyaj, y juutypɨk wɨap tan̈watkiʼpsyaj iga taitytyaʼmiñ listo jesɨk nuʼkpa jeʼm mɨjpɨk yaʼachaaji.

NAITYƗ YAʼACHƗYOʼOYI

5. ¿Tyi iwatyaj jeʼm wiñtyipɨk cristianojyaj iga wɨaiñ iyaʼachɨyyaj?

⁵ Nasuntaap idyɨk iga jeʼm wiñtyipɨk cristianojyaj iyaʼachɨyyajiñ (Heb. 10:36). Dyaʼ numaaj in̈an̈kamokyaj kobakpiijiyaj, in̈teeñkamokyajtyim kutɨʼɨchiyaj iga ikupɨkyajpa idyɨk Dios. Jeʼm líderes religiosos judíos y jeʼm an̈jagoʼoyiyaj romanas sɨʼ idyɨk iyaʼachwatyaj y jeʼm ifamilia sɨʼtyim idyɨk in̈teeñkamokyaj (Mat. 10:21). Y nakuixyajtaiñtyim idyɨk, iga jeʼm apóstatas kun jeʼm imɨgoy an̈kejayoʼoyiyaj iweʼkyajtoʼoba idyɨk jeʼm kumun (Hech. 20:29, 30). Pero yɨʼpyaj cristianojyaj iyaʼachɨyyaj (Apoc. 2:3). ¿Tyi iyooxpaʼtyaj? Ikujɨɨsyaj jeʼm akwiñkejoʼoyiyaj itywɨʼɨp en jeʼm Escrituras Hebreas, juʼuts Job iga tsaam iyaʼachɨy (Sant. 5:10, 11). In̈wejpaʼtyaj Jehová iga iyooxpaʼtyajiñ (Hech. 4:29-31). Y ikujɨɨsyaj jeʼm kumaykedoʼoyiyaj iga ipɨktson̈yajpa siiga iyaʼachɨyyajpa (Hech. 5:41).

6. ¿Tyi tan̈kejaʼyba jeʼm Merita iakwiñkejoʼoyi?

⁶ Taɨchtyam wɨaptyim tanyaʼachɨytyaʼm siiga juchixkej tan̈kujɨɨstaʼmpa jeʼm akwiñkejoʼoyiyaj ityyajwɨʼɨp Bibliajom y jempɨk tammaytyaʼmpa jeʼm totjaayijom. Jeʼam iyooxpaʼt tuum yoomtɨwɨ itywɨʼɨp Albania iñɨɨyipɨk Merita iga iyaʼachɨʼyiñ mex iga jeʼm ifamilia sɨʼ idyɨk iyaʼachwatyaj. Jeʼ nɨmpa: «Jesɨk an̈kuyujkaʼ Bibliajom jempɨk iñaskaʼ Job, tsaam ayooxpaʼt. Yɨʼp pɨɨxiñ tsaam yaʼacha…, y dyaʼ ijoodon̈ idyɨk iapaʼap jempɨk sɨʼ iyaʼachwat. Pero juʼuts jeʼ nɨm en Job 27:5, ‹¡Jexpam akaʼaba, dyaʼ antsakpa iga awɨsɨsɨoʼyba!›. Yɨʼp akjɨɨs iga jeʼm anyaʼachaajiyaj dyaʼ jeex juʼuts jempɨk jeʼ iñaskaʼ y ɨch anjoodon̈ juuty miñba jeʼm yaʼachaajiyaj».

7. ¿Tyi in̈wadyiñ dende sɨɨ mex iga dyaʼ sɨʼ inin̈an̈kamok tan̈kapɨk yaʼachaajiyaj?

⁷ Siiga juchixkej tanan̈wejpaʼtpa Jehová tayooxpaʼtpatyim iga tanyaʼachɨʼyiñ (Filip. 4:6; 1 Tes. 5:17). Wɨapsɨ iga yɨʼp jaama dyaʼ sɨʼ inin̈an̈kamok tan̈kapɨk yaʼachaajiyaj. Pero ¿tyi in̈watpa jesɨk algun tyi dyaʼ in̈kusuʼnɨʼyba, mikobakpijpa o dyaʼ in̈kutɨʼɨyɨʼyba tyi in̈watpa? ¿In̈kuaʼmpa jeʼm Jehová ijɨɨxian̈chioʼoyi? Siiga jeʼam in̈watpa jesɨk inin̈an̈kamokpa jeʼm kobakpiijiyaj, jeempɨktyim in̈watpa jeʼm iññɨgɨyoʼoyijom jesɨk maaj itypa yaʼachaajiyaj. In̈wɨkupɨkneʼeba iga jeʼ ijoodon̈ juchix y juutypɨk miyooxpaʼtpa (Sal. 27:1, 3).

8. ¿Tyi in̈kejpa jeʼm Mira iakwiñkejoʼoyi? (Santiago 1:2-4; aʼmɨtyim jeʼm imagen).

⁸ Siiga dende sɨɨ tanyaʼachɨʼyba jeʼm kutɨʼɨchiyaj wɨaptyim tanyaʼachɨy jesɨk nuʼkpa jeʼm mɨjpɨk yaʼachaaji (Rom. 5:3). ¿Tyiʼiga tanɨmpa jeempɨk? Jaʼyan̈ tɨwɨtam ijaamyajpa iga jesɨk iyaʼachɨyyajpa tuum kutɨʼɨchi, majtyim wɨap in̈an̈kamokyaj jempɨk iñaskayajpa okmɨ. Jesɨk iaʼmyajpa juutypɨk Jehová iyooxpaʼtyajpa, majtyim iniidyayyajpa confianza. Jeʼyukmɨ wɨap iyaʼachɨyyaj jeʼm kutɨʼɨchiyaj iñaskayajpaʼap okmɨ (maayɨʼ Santiago 1:2-4). Mira, tuum precursora itywɨʼɨp Albania a veces ijaampa iga ni i dyaʼ iniity kobakpiijiyaj juʼtspɨy jeʼ. Jesɨk ijaampa yɨʼɨmpɨk, mojpa ikujɨɨs juʼtspɨy Jehová iyooxpaʼtneʼ yɨʼpyaj 20 amtyɨy y nanɨʼmaytyaap iyaʼak: «Odoy tsaakɨ iga in̈kuyooxaap Jehová. Jeʼ pɨɨmi miyooxpaʼtneʼ iga wɨaiñ iyaʼachɨy tan̈kapɨk kutɨʼɨchiyaj». Mich wɨaptyim in̈kujɨɨs juutypɨk Jehová miyooxpaʼtneʼ iga wɨaiñ iñyaʼachɨy. Wɨkupɨɨkɨ iga jesɨk iñyaʼachɨʼyba tuum kutɨʼɨchi jeʼ iaʼmpa y mikumayketpa (Mat. 5:10-12). Y jesɨk nuʼkpa jeʼm mɨjpɨk yaʼachaaji mich wɨaptyim iñyaʼachɨy.

AKWIÑKEEJƗ YAʼACHAN̈JAMOʼOYI

9. ¿Juutypɨk ikwiñkej yaʼachan̈jamoʼoyi jeʼm kumun de Antioquía de Siria?

⁹ Tan̈kujɨɨstaʼmiñ jesɨk tsukum jeʼm yuʼuʼ en Judea. Jesɨk jeʼm tɨwɨtam de Antioquía de Siria ijoodon̈ayaj, tsaam iyaʼachan̈jaamyaj jeʼm tɨwɨtam. Y ikwiñkejyaj jempɨk ijaamyajpa kun tyityam iwatyaj: «Moj ijɨ̱syaj iga icutsadayyajpa tu̱m yo̱xpádooyi jém [tɨwɨtam] jém it́yajwɨɨp Judea. Ichiiyajpa cada tu̱mtu̱m jutsaŋ wɨa̱yajpa» (Hech. 11:27-30). Mex iga jeʼm tɨwɨtam jempɨk yaʼachaap idyɨk ixɨʼyaj ityyaj juʼumɨ, jeʼm tɨwɨtam de Antioquía ijɨɨsneyajum idyɨk iga iyooxpaʼtyajpa (1 Juan 3:17, 18).

10. ¿Juutypɨk tanakwiñkejaʼyba yaʼachan̈jamoʼoyi jeʼm tɨwɨtam jesɨk iñaskayajpa tuum emergencia? (Aʼmɨtyim jeʼm imagen).

¹⁰ Jesɨk tanjoodon̈aap iga jeʼm tantɨwɨtam sɨʼ iñaskayaj tuum emergencia wɨap tanakwiñkejaytyaʼm yaʼachan̈jamoʼoyi. Wɨap tanakwaʼk jeʼm ancianojyaj juutypɨk wɨap tanyooxpadoytyaʼm, tachioytyaʼmiñ tandonación y tanjɨykimyajiñ jeʼm tanan̈wejpadoʼoyijom (Prov. 17:17).b Jeʼm amtyɨy 2020, ikuwɨtyi yɨʼp naxyukmɨ ityum idyɨk maaj de 950 grupo de Tɨwɨtam Yooxpadoyyajpaʼap iga wɨaiñ iyooxpaʼtyajta jempɨk yaʼachaap idyɨk ixɨʼyaj por jeʼm COVID-19. Tsaam tantsoowaixtyaʼmpa jeʼm yooxakuy iwatyajpaʼap. Iga iyaʼachan̈jaamyajpa jeʼm ityɨwɨtam ichiʼiyajpa tyityam ityogoyayyaj y ianmajan̈chiʼiyajpa espiritualmente, y jesɨk nasuntaap, iwɨtsagayyajpa ityɨk y juuty an̈tuʼumaayajpa (aʼmɨtyim 2 Corintios 8:1-4).

11. ¿Juutypɨk tan̈kujiʼptaʼmpa tanJaatun̈ sɨn̈yukmɨpɨk jesɨk tanakwiñkejtaʼmpa yaʼachan̈jamoʼoyi?

¹¹ Tun̈gak iaʼmyajpa jesɨk tanakwiñkejtaʼmpa yaʼachan̈jamoʼoyi. Tanaʼmiñ jempɨk nas jeʼm amtyɨy 2019, jesɨgam jeʼm huracán Dorian imɨswat jeʼm An̈tuʼumayoʼytyɨk itywɨʼɨp Bahamas. Jesɨk iwɨtsakseetyajpam idyɨk ikwaʼkyaj tuum pɨɨxiñ juʼtsan̈ ipudayyajpa jeʼm yooxakuy iwatyajpaʼap. Jeʼ nɨm: «Tsaam agaʼman̈jakpa iga mimichtyam iñyooxpaʼttaʼmpa jeʼm iñamigojtam. Jeʼyukmɨ manchiʼityaʼmpa tyityam mityogoyaytyaʼm y dyaʼ mantseʼgaytyaʼmpa». Jaʼyan̈yaj dyaʼ iixpɨkyajpa Jehová, pero iaʼmyajpa jesɨk tanyooxpaʼtyajpa tun̈gakyaj. Tsaam tamaymaytyam iga kun tyityam tan̈watpa, tanyooxpaʼtpa tun̈gakyaj iga iixpɨkyajiñ jeʼm Dios iga «tsa̱m pɨ̱mi tayaachaŋja̱mpa» (Efes. 2:4).

12. Siiga sɨɨ tanakwiñkejpa yaʼachan̈jamoʼoyi, ¿juutypɨk tayooxpaʼtpa jesɨk itypa jeʼm mɨjpɨk yaʼachaaji? (Apocalipsis 13:16, 17).

¹² ¿Tyiʼiga nasuntaap iga tanakwiñkejtaʼmiñ yaʼachan̈jamoʼoyi jesɨk itypa jeʼm mɨjpɨk yaʼachaaji? Jeʼm Biblia nɨmpa iga jempɨk dyaʼ ikuyaʼgɨyyajpa jeʼm an̈jagoʼoyi yaʼachayajpa sɨɨ y jesɨk itypa jeʼm mɨjpɨk yaʼachaaji (maayɨʼ Apocalipsis 13:16, 17). Wɨapsɨ iga jeʼm tantɨwɨtam ityogoyayyajpa iga tanyooxpaʼtyajiñ. Jesɨk ikɨʼpin̈ba jempɨk ityyaj yɨʼp naxyukmɨ, tansuntaʼmpa iga jeʼm tanAn̈jagoʼoyi Jesucristo iaʼmiñ iga sɨʼ tanakwiñkej yaʼachan̈jamoʼoyi, jesɨk tanɨʼmaʼyba: «Mi̱ñɨ, pɨctsoŋtaamɨ jém lugar jém miwɨ̱tsagayñeta̱wɨɨp» (Mat. 25:34-40).

MAJNAM TOYYAAJƗ JEʼM TƗWƗTAM

13. ¿Tyi iyooxpaʼtyaj iga majnam natoyyajtaiñ jeʼm wiñtyipɨk cristianojyaj? (Romanos 15:7).

¹³ En jeʼm wiñtyipɨk siglo, ityumpɨyyaj ijoodon̈yaj idyɨk iga jeʼm cristianojyaj natoyyajtaap. ¿Tan̈kaʼ idyɨk inikwiñkejayyajta toyoʼoyi? Tan̈kujɨɨstaʼmiñ jeʼm kumun itywɨʼɨp idyɨk Roma, jeʼm tɨwɨtam dyaʼ tumtyiyaj idyɨk. Weeñi judíojyaj idyɨk, y iixpɨkyajpa jeʼm Moisés In̈kiʼmayoʼoyi. Tun̈gakyaj tsukumneyaj idyɨk tun̈gak an̈eymɨ, y dyaʼ tumtyi iityiyaj. Weeñi esclavojyaj idyɨk, y tun̈gakyaj dyaʼ y wɨapsɨ iga jeʼeyaj iniityyajtyim idyɨk iesclavo. ¿Tyi iyooxpaʼtyaj iga majnam natoyyajtaiñ? Jeʼm apóstol Pablo chioʼy yɨʼp an̈kiʼmayoʼoyi: «Nawɨ̱pɨctsoŋtamta̱jɨ» (maayɨʼ Romanos 15:7). ¿Tyi nɨmtoʼoba? Jeʼm an̈maatyi «Nawɨ̱pɨctsoŋtamta̱jɨ» nɨmtoʼoba iga tan̈wɨpɨktson̈iñ algun i iga nuʼkpa tantɨkkɨʼɨm y tanchiʼiñ tyityam ityogoyay o tanamigojataʼmiñ. Juʼuts akwiñkejoʼoyi, Pablo iñɨʼmay Filemón juutypɨk ipɨktson̈iñ jeʼm esclavo Onésimo iga poyñeʼ idyɨk, iñɨʼmay: «Wɨ̱pɨctso̱ŋɨ jém Onésimo» (Filem. 17). Mex iga Priscila y Áquila maaj ikutɨʼɨyɨyyajpa idyɨk jeʼm Dios In̈maatyi iwɨpɨktson̈yaj Apolos y iyooxpaʼtyaj (Hech. 18:26). Mex iga yɨʼpyaj cristianojyaj dyaʼ tumtyiyaj idyɨk, wɨnapɨktson̈yajta y nawɨnanɨgayyajta.

14. ¿Juutypɨk Anna y jeʼm iwɨdyaaya ikwiñkejyaj toyoʼoyi?

¹⁴ Taɨchtyam wɨaptyim tanakwiñkejayyaj toyoʼoyi jeʼm tantɨwɨtam jesɨk tan̈wɨpɨktson̈yajpa y tanamigojayajpa. Jesɨk jeʼeyaj wɨaptyim takwiñkejayyaj toyoʼoyi (2 Cor. 6:11-13). Jeʼam iñaskaʼ Anna y jeʼm iwɨdyaaya, kutsatyajta a África Occidental juʼuts misioneros. Jesɨk yaguiñ idyɨk nuʼkneyaj tsukum jeʼm pandemia del COVID-19, y dyam wɨa mu in̈tuʼumaayaj jeʼm kumunjom kun jeʼm tɨwɨtam. ¿Tyi iwatyaj iga wɨaiñ ikwiñkejyaj toyoʼoyi? Moj inimuruyaj jeʼm tɨwɨtam por videoconferencia y iñɨʼmay iga tsaam iwɨixpɨkyajtoʼoba. Jeʼm tɨwɨtam tsaam ikusuʼnɨyyaj iga iwatyaj jeempɨk, y moj ijɨyñɨgayyaj y ikutsadayyaj mensajes. ¿Tyiʼiga ityeguedayaj iga iixpɨkyajpa jeʼm tɨwɨtam? Anna nɨmpa: «Dyaʼ an̈kujaʼamaʼyba iga jeʼm tɨwɨtam juchixkej akwiñkejaytyaʼm toyoʼoyi anfamilia y aɨch, yɨʼp ayooxpaʼtpa iga anakwiñkejiñ toyoʼoyi».

15. ¿Tyi tan̈kejaytyaʼmpa jeʼm Vanessa iakwiñkejoʼoyi? (Aʼmɨtyim jeʼm imagen).

¹⁵ Jeʼm kumunjom ity tɨwɨtam y yoomtɨwɨtam iga tsaam kukakneyaj. ¿Tyi tayooxpaʼtpa iga majnam tantoyyajiñ? Tanaʼmayyajiñ jeʼm iwɨtampɨk jɨɨxiyaj y jaamoʼoyiyaj. Vanessa tuum yoomtɨwɨ iga ity Nueva Zelanda tan̈kaʼ idyɨk iwɨnanɨgay weeñi tɨwɨtam iga dyaʼ ikusuʼnɨʼyba weeñi jɨɨxiyaj ikwiñkejyajpaʼap. Pero ipɨk ijɨɨxi iga iwɨixpɨkpa yɨʼpyaj tɨwɨtam. Iga iwat yɨʼɨmpɨk iyooxpaʼt iga iaʼmiñ jeʼm tɨwɨtam juʼuts iaʼmpa Jehová. Jeʼ nɨmpa: «Iga an̈wɨdyaaya tsakta juʼuts superintendente de circuito, moj añixpɨktaʼm maaj tɨwɨtam y anaʼmnetaʼm iga dyaʼ tumtyiyaj. Sɨɨ majtyim an̈wɨnanɨgayyajpa, y tsaam an̈kusuʼnɨʼyba. Y an̈wɨkupɨkneʼ iga Jehová ikusuʼnɨʼybatyim, jeʼam jempɨk tanamiñba jeʼm ikumunjom mex iga dyaʼ tatumtyityam». Jesɨk, ¿juutypɨk wɨap tanakwiñkejtaʼm iga tantoyyajpa tantɨwɨtam? Tanaʼmyajiñ juutypɨgam Jehová iaʼmpa (2 Cor. 8:24).

16. ¿Tyiʼiga nasuntaap iga tanakwiñkejiñ toyoʼoyi jesɨk itypa jeʼm mɨjpɨk yaʼachaaji? (Aʼmɨtyim jeʼm imagen).

¹⁶ Jesɨk itypa jeʼm mɨjpɨk yaʼachaaji, nasuntaap iga tantoyyajiñ jeʼm tantɨwɨtam. ¿Juutypɨk takupujpa Jehová jesɨk nuʼkpa jeʼm mɨjpɨk yaʼachaaji? Tan̈kujɨɨstaʼmiñ jeʼm an̈kiʼmayoʼoyi ichiʼiwɨʼɨp Jehová jeʼm ikumun iga wɨaiñ inikɨakputyajta jesɨk kutɨgɨytyaap idyɨk Babilonia: «Akumaton̈tam, manyooxakɨʼɨwiñtyam, tɨgɨytyaʼamɨ iñtyɨkjom y an̈nuʼktaʼamɨ impuerta jesɨk mityɨgɨytyaʼmpa. Poyyamtaʼamɨ y an̈joʼktaʼamɨ iga kunajiñ jeʼm anjoʼoyaʼ» (Is. 26:20). Wɨapsɨ iga taɨchtyam yɨʼptyim an̈kiʼmayoʼoyi tachiʼityamtaap jesɨk itypa jeʼm mɨjpɨk yaʼachaaji. Jeʼm an̈maatyi «iñtyɨkjom» wɨapsɨ iga nɨmtoʼoba jeʼm kumunyaj. Siiga peʼm tiempo tan̈wɨnanɨgayyajpa tantɨwɨtam, Jehová takupujpa. Pero dyaʼ numaaj tanyaʼachɨyyajiñ jeʼm tantɨwɨtam, tannunta toyyajiñ. Siiga dyaʼ tatoyoʼyba wɨapsɨ iga dyaʼ tanakɨakputtaap.

ITYƗ LISTO

17. ¿Juutypɨk tayooxpaʼtpa jesɨk itypa jeʼm mɨjpɨk yaʼachaaji siiga dende sɨɨ taitytyaʼmum listo?

¹⁷ Jesɨk nuʼkpa jeʼm Jehová ijaama itypa jaʼyan̈ yaʼachaaji (Sof. 1:14, 15). Jeʼm Jehová iyooxakɨʼɨwiñyaj in̈an̈kamokyajpatyim kutɨʼɨchiyaj. Pero, siiga dende sɨɨ taitypa listo, dyaʼ jespɨy tan̈yaʼkpa y wɨap tanyooxpaʼtyaj tun̈gakyaj. Jeʼm yaʼachɨyoʼoyi tayooxpaʼtpa tanan̈an̈kamok juʼptyin̈kej kutɨʼɨchiyaj. Jeʼm yaʼachan̈jamoʼoyi iwatpa iga tanyooxpaʼtyajiñ jeʼm tantɨwɨtam y tanchiʼiyajiñ tyityam ityogoyayyaj. Y jeʼm toyoʼoyi tanaidyayyajwɨʼɨp tayooxpaʼtpa iga tan̈wɨnanɨgayyajiñ. Jehová takumayketpa kun tuum ityi dyapɨk kuyajpa en tuum naxyukmɨ juuty jeʼm desastres y jeʼm yaʼachaajiyaj dyam ityyajpa (Is. 65:17).