Odoy tantsaguiñ iga tanatoytyamtaap

1, 2. a) ¿Tyiʼiga nɨm jeʼm apóstol Pablo iga maaj wɨɨ jeʼm toyoʼoyi? b) ¿Juʼptam akwagoʼoyiyaj tan̈kɨʼpin̈taʼmpa?

JESƗGAM jeʼm apóstol Pablo ijɨykiʼm jeʼm fe, jeʼm an̈jogoʼoyi y jeʼm toyoʼoyi, nɨm: «Pɨ̱mi wɨ̱ jém tóyooyi» (1 Cor. 13:13). ¿Tyiʼiga nɨm jeempɨk? Jesɨk taitytyaʼmum jeʼm jomnaxyukmɨ dyam nasuntaap iga tanaidyiñ fe iga kupaguiñ jeʼm Dios ijɨykamoʼoyiyaj, jesɨk ityumpɨy kupakneyajum. Pero juchixkej tantoyyajpa Jehová y tun̈gakyaj. Y yɨʼp toyoʼoyi dyaʼ keman kuyajpa.

² Iga juchixkej tanakwiñkejtaʼmiñ toyoʼoyi, tan̈kɨʼpin̈taʼmiñ tukuteen akwagoʼoyiyaj. Wiñtyipɨk, ¿tyiʼiga tanatoytyamtaiñ? Wɨstenpɨk, ¿juutypɨk wɨap tanakwiñkej iga tanatoytyamtaap? Y tukutenpɨk, ¿tyiʼiga odoy tantsaguiñ iga tanatoytyamtaap?

¿TYIʼIGA TANATOYTYAMTAIÑ?

3. ¿Tyiʼiga wɨɨ iga tanatoytyamtaiñ?

³ ¿Tyiʼiga tanatoytyamtaiñ? Yɨʼɨmpɨgam tanakwiñkejpa iga tanunta cristianojtam. Jesús iñɨʼmay jeʼm iapóstolyaj: «Siiga minitoyt́amta̱p con jém iñt́ɨ̱wɨtam, jesɨc it́u̱mpɨy jém it́yajwɨɨp yɨ́p naxyucmɨ ijo̱dóŋa̱yajpa iga ɨch maŋcuyujcɨɨwiñ» (Juan 13:35). Y Pablo nɨm iga jeʼm toyoʼoyi iwatpa iga tanaitytyaʼmiñ «tu̱mt́i jɨ̱xi» (Col. 3:14). Jeʼm apóstol Juan iñɨʼmay jeʼm cristianojyaj: «Siiga iñt́oypa Dios, jesɨc to̱yɨt́im mex jém iñt́ɨ̱wɨtam». Jeʼyukmɨ wɨɨ iga tanatoytyamtaiñ (1 Juan 4:21). Jesɨk tantoyyajpa jeʼm tantɨwɨtam, tanakwiñkejpa iga tantoybatyim Jehová.

4, 5. ¿Juutypɨk tɨgɨykuʼmpa jeʼm toyoʼoyi tanaidyaywɨʼɨp Dios kun jeʼm toyoʼoyi tanakwiñkejaypaʼap tantɨwɨtam? An̈maatɨ tuum akwiñkejoʼoyi.

⁴ ¿Juutypɨk tɨgɨykuʼmpa jeʼm toyoʼoyi tanaidyaywɨʼɨp Dios kun jeʼm toyoʼoyi tanakwiñkejaypaʼap tantɨwɨtam? Iga tan̈wɨkutɨʼɨyɨʼyiñ, tan̈kujɨɨstaʼmiñ juutypɨk jeʼm tananmaj iyooxpaʼtpa jeʼm tammɨjtaay. Tuum doctor wɨap ijoodon̈a siiga algun i wɨɨ in̈jaam ianmaj jesɨk ikɨʼpin̈aʼyba juʼtspɨy witypa iñɨʼɨpiñ. ¿Tyi tan̈kejaʼyba yɨʼp akwiñkejoʼoyi?

⁵ Juʼutstyim tuum doctor iga wɨap ijoodon̈a siiga algun i mɨmneʼ ianmaj jesɨk ikɨʼpin̈aʼyba juʼtspɨy witypa iñɨʼɨpiñ, taɨchtyam wɨaptyim tanjoodon̈ataʼm juʼtspɨy tantoyba Jehová jesɨk tanakwiñkejayyajpa toyoʼoyi tun̈gakyaj. Siiga dyam jespɨy tantoyyajpa jeʼm tantɨwɨtam, wɨapsɨ iga dyam pɨɨmi tantoyba Jehová. Pero, siiga juchixkej tanakwiñkejayyajpa toyoʼoyi, yɨʼp nɨmtoʼoba iga majtyim tantoyba Jehová.

6. ¿Tyiʼiga tanteguedaiñ siiga dyam pɨɨmi tantoyyajpa jeʼm tantɨwɨtam? (1 Juan 4:7-9, 11).

⁶ ¿Tyiʼiga tanteguedaiñ siiga dyam pɨɨmi tantoyyajpa jeʼm tantɨwɨtam? Iga yɨʼp wɨap imalwaday jeʼm tan̈wɨnanɨgoʼoyi kun Jehová. Jeʼam ikwiñkejpa jeʼm an̈matyiyaj nɨmwɨʼɨp jeʼm apóstol Juan: «Porque siiga d́a it́oypa it́ɨ̱wɨ jém iixñewɨɨp, jesɨc d́at́im wɨa̱p it́oy jém Dios jém d́apɨc tánixpa» (1 Juan 4:20). ¿Tyi tan̈kejaytyaʼmpa? Dyaʼ wɨap tanaitytyaʼm tuum wɨbɨk nanɨgoʼoyi kun Jehová siiga dyaʼ tanatoytyamtaap (maayɨʼ 1 Juan 4:7-9, 11).

¿JUUTYPƗK TANAKWIÑKEJAYTYAMTAAP TOYOʼOYI?

7, 8. ¿Juutypɨk wɨap tanakwiñkejtaʼm iga tanatoytyamtaap?

⁷ Watykɨy tampaʼtpa jeʼm Bibliajom yɨʼp an̈kiʼmayoʼoyi: «Natoyt́amta̱jɨ con iñt́ɨ̱wɨtam» (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pero jeʼm toyoʼoyi tanjaampa tananmajom y dyaʼ i wɨap iaʼm. Jesɨk, ¿juutypɨk iaʼmyajpa tun̈gakyaj iga tatoyoʼytyaʼmpa? Kun tyityam tanɨmpa y tan̈watpa.

⁸ Ity waatyi maneras iga tanakwiñkejayyajpa tantɨwɨtam iga tantoyyajpa. Jeʼm Biblia tan̈madaʼyba juutypɨk. «Odoy namɨgoyajtyamtaajɨ kun tun̈gak iñtyɨwɨtam» (Zac. 8:16). «Odoy áŋa̱taamɨ [...], nawɨ̱nanɨgayt́amta̱jɨ» (Mar. 9:50). «Wɨ̱ iga más iñt́oyt́ámiñ jém iñt́ɨ̱wɨtam que iga minitoyt́a̱p iñyaac» (Rom. 12:10). «Nawɨ̱pɨctsoŋtamta̱jɨ» (Rom. 15:7). «Nawadayt́amta̱jɨ perdón» (Col. 3:13). «Nayo̱xpáttamta̱jɨ con jém tantɨ̱wɨtam iga iñyaachɨyt́ámiñ» (Gál. 6:2). «Naŋmadayt́amta̱jɨ yɨ́p wɨbɨc aŋma̱t́i [...] iga odoy miŋyáctámiñ» (1 Tes. 4:18). «Nacamamwadayt́amta̱jɨ jém» iñanmaj (1 Tes. 5:11). «Naŋwejpádayt́amta̱jɨ Dios» (Sant. 5:16).

9. ¿Tyiʼiga tanɨmpa iga jesɨk tanakpoʼksyajpa tun̈gakyaj sɨʼ tanakwiñkejayyaj toyoʼoyi? (Aʼmɨtyim jeʼm imagenyaj).

⁹ Tan̈kɨʼpin̈taʼmiñ tuum manera iga wɨap tanakwiñkejayyaj toyoʼoyi tun̈gakyaj. Pablo nɨm: «Naŋmadayt́amta̱jɨ yɨ́p wɨbɨc aŋma̱t́i [...] iga odoy miŋyáctámiñ». ¿Tyiʼiga tanɨmpa iga jesɨk tan̈watpa jeempɨk sɨʼ tanakwiñkej toyoʼoyi? Tuum obra de consulta in̈matpa iga jeʼm an̈maatyi griega jempɨk yɨʼɨm ipɨk Pablo iga nɨmtoʼoba akpoʼksoʼoyi takkutɨʼɨyɨʼyba iga «tan̈waganateeñiñ algun i y tananmajan̈chiʼiba jesɨk yaʼachaap ixɨʼ». Jeʼyukmɨ jesɨk tanakpoʼkspa tuum tɨɨwɨ iga yaʼachaap ixɨʼ, sɨʼ tanyooxpaʼt iga seguido sɨʼiñ jeʼm tun̈jom iyooxpaʼtpaʼap ipɨktson̈ jeʼm wɨbɨk ityi. Jesɨk tanakpoʼkspa tuum tɨɨwɨ o tuum yoomtɨwɨ, sɨʼ tanakwiñkejay iga tantoyba (2 Cor. 7:6, 7, 13).

10. ¿Tyiʼiga jeʼm yaʼachan̈jamoʼoyi tayooxpaʼtpa tanakpoʼks tun̈gakyaj?

¹⁰ ¿Tyiʼiga jeʼm yaʼachan̈jamoʼoyi tayooxpaʼtpa tanakpoʼks tun̈gakyaj? Iga jesɨk algun i iyaʼachan̈jaampa jempɨk yaʼachaap ixɨʼ, ikpoʼkstoʼoba y iyooxpaʼttoʼobatyim. Jeʼyukmɨ jesɨk tanjaampa yaʼachan̈jamoʼoyi tayooxpaʼtpa tanakpoʼksyaj tun̈gakyaj. Jeʼtyim iwatpa Jehová. Pablo nɨm iga jeʼm «tanJa̱tuŋ Dios [...] tsa̱m tayaachaŋja̱mpa tacpocsáypa» tananmaj (2 Cor. 1:3). Jesɨgam Pablo ijaykunuʼk yɨʼp an̈maatyi sɨʼ idyɨk ikwiñkej iga Jehová tsaam yaʼachan̈jaamoʼyba. Y nɨmtyim iga Jehová jeʼam «tanJa̱tuŋ» iga jeʼ iniity y tachiʼiñeʼ yɨʼp wɨbɨk jaamoʼoyi. Y yɨʼbam iwatpa iga takpoʼksaʼyiñ tananmaj «jesɨc pɨ̱mi tayaachwatta̱p» (2 Cor. 1:4). Juʼutstyim jeʼm nɨʼ iga iknɨʼktɨtskooñba jempɨk nɨʼktɨtsneʼ, Jehová ikkunajaʼyba ianmaj y ikpoʼkspa jempɨk yaʼachaap ixɨʼ. ¿Tyi tayooxpaʼtpa iga wɨaiñ tan̈watkiʼps? Tanaidyiñ jaamoʼoyiyaj iga tayooxpaʼtyajpa tanakpoʼksyaj tun̈gakyaj. Tanaʼmiñ juʼptam.

11. Juʼuts nɨmpa Colosenses 3:12 y 1 Pedro 3:8, ¿tyi tayooxpaʼtpa iga tantoyyajiñ y tanakpoʼksyajiñ tun̈gakyaj?

¹¹ ¿Tyi tayooxpaʼtpa iga duroj tanatoytyamtaiñ y tanakpoʼkstamtaiñ tumtum jaama? Tan̈kutɨʼɨyɨʼyiñ juʼuts in̈jaamyaj tun̈gakyaj, tanatoytyamtaiñ juʼuts tɨwɨtam y tan̈wɨnanɨgaʼyiñ ikej (maayɨʼ Colosenses 3:12; 1 Pedro 3:8). Jesɨk tanakwiñkejtaʼmpa yɨʼp wɨtampɨk jaamoʼoyiyaj, tayooxpaʼtpa iga tanakpoʼksyajiñ jempɨk yaʼachaap ixɨʼyaj. Jesús nɨm: «Jém aŋma̱t́i jém iñt́oppáppɨc iñjɨpjo̱m, tsucumpa [iñanmajom]. Jém wɨbɨc pɨ̱xiñ iŋmatpa jém wɨ̱tampɨc cosa porque comne [ianmajom] con jém wɨbɨc jɨ̱xi» (Mat. 12:34, 35). Jeʼyukmɨ jesɨk tanakpoʼkspa jeʼm tantɨwɨtam sɨʼ tanakwiñkejayyaj iga tantoyyajpa.

¿TYI TAYOOXPAʼTPA IGA ODOY TANTSAGUIÑ IGA TANATOYTYAMTAAP?

12. a) ¿Tyiʼiga tanakuixtyamtaiñ? b) ¿Juʼp akwagoʼoyi tan̈kutson̈taʼmpa?

¹² Tantumpɨytyam tan̈kupɨktamtoʼoba yɨʼp an̈kiʼmayoʼoyi: «Tanatoyt́amta̱iñ con jém tantɨ̱wɨtam» (1 Juan 4:7). Pero odoy tan̈kujaʼamaytyaʼmiñ jempɨk nɨm Jesús: «Ichacyajpa iga it́oypa jém it́ɨ̱wɨtam» (Mat. 24:12). Kun yɨʼpyaj an̈matyiyaj, Jesús dyaʼ nɨmpa ixɨʼ iga jaʼyan̈yaj jempɨk ityun̈ɨyyajpa ichakyajpa iga natoyyajtaap. Pero tanakuixtyaiñ iga odoy tan̈wadyiñ juʼuts iwatyajpa jempɨk dyaʼ ikuyooxayajpa Dios iga dyaʼ natoyyajtaap. Sɨɨ tan̈kutson̈taʼmiñ yɨʼp akwagoʼoyi: ¿juutypɨk wɨap tanjoodon̈a iga tantoyyajpanam jeʼm tantɨwɨtam?

13. ¿Tyi tayooxpaʼtpa tanjoodon̈a siiga pɨɨmiñam tantoyyajpa tantɨwɨtam?

¹³ Jempɨk tayooxpaʼtpa tanjoodon̈a siiga pɨɨmiñam tantoyba jeʼm tantɨwɨtam, jeʼ jeʼm jɨɨxi tanakwiñkejpaʼap jesɨk tanan̈an̈kamokpa tuum nasɨyoʼoyi (2 Cor. 8:8). Jeʼm apóstol Pedro nɨm: «Más ixunpa Dios iga tanatoyt́amta̱iñ con jém tantɨ̱wɨtam. Porque siiga nu̱ma tantoypa [...], wɨa̱p taŋwadáy perdón jáyaŋ jém it́áŋca» (1 Ped. 4:8). Jesɨk jeʼm tantɨwɨtam jɨɨxtyogoyyajpa o tamalwadayyajpa, tayooxpaʼtpa tanjoodon̈a siiga pɨɨmiñam tantoyyajpa.

14. Juʼuts nɨmpa 1 Pedro 4:8, ¿juʼutspɨk toyoʼoyi tanakwiñkejtaʼmiñ? An̈maatɨ tuum akwiñkejoʼoyi.

¹⁴ Tan̈wɨkɨʼpin̈taʼmiñ jeʼm an̈matyiyaj nɨmwɨʼɨp Pedro. Jeʼm wiñtyipɨk jaakaʼ de jeʼm versículo 8 nɨmpa iga «más ixunpa Dios iga tanatoyt́amta̱iñ». Jeʼm an̈maatyi griega iga ipɨk Pedro «más ixunpa» nɨmtoʼoba iga jeʼm «tantoyoʼoyi jaʼyan̈aap». Jeʼm wɨstenpɨk jaakaʼ de jeʼm versículo in̈matpa iga jesɨk tatoyoʼyba, tan̈wadaʼyba perdón jeʼm tantɨwɨtam. Kujɨɨsɨ iga tuum mesa dyaʼ wɨɨ ikeeji y tsaam jɨɨtneʼ, nasuntaap iga tan̈kujɨɨmkedyiñ kun tuum puʼktuuku y jesɨk wɨam ikeeji, jeempɨktyim wɨap tan̈wat kun jeʼm tantɨwɨtam. Siiga tantoyyajpa keʼnam jesɨk tan̈kujɨɨmpa, yɨʼp nɨmtoʼoba iga dyaʼ tyun̈kɨy tan̈wadayyajiñ perdón.

15. ¿Tyi tan̈watpa jesɨk pɨɨmi tatoyoʼyba? (Colosenses 3:13).

¹⁵ Siiga pɨɨmi tantoyyajpa jeʼm tantɨwɨtam tan̈wadayyajpa perdón, mex iga tan̈kaʼ tan̈wat jeempɨk (maayɨʼ Colosenses 3:13). Jesɨk tan̈watpa perdón, tanakwiñkejpa iga pɨɨmiñam tatoyoʼyba y yɨʼp tsaam ikusuʼnɨʼyba Jehová. ¿Tyiñam tayooxpaʼtpa iga odoy tanteguedaiñ jesɨk tun̈gakyaj jɨɨxtyogoyyajpa o nɨmyajpa algun tyi iga dyaʼ tan̈kusuʼnɨʼyba?

16, 17. ¿Tyi tayooxpaʼtpa iga odoy tanteguedaiñ jesɨk jeʼm tantɨwɨtam jɨɨxtyogoyyajpa? An̈maatɨ tuum akwiñkejoʼoyi. (Aʼmɨtyim jeʼm imagenyaj).

¹⁶ Tanaʼmiñ jeʼm wɨtampɨk jɨɨxiyaj iniityyajwɨʼɨp. Kujɨɨsɨ iga in̈waganaity tun̈gak tɨwɨtam y iñtyoptaʼmpa iñfoto. Iga dyaʼ in̈kujaʼamaytyoʼoba peʼm jaama, iñtyoppa tukuteen fotos. Pero iñaʼmpa iga tuum dyaʼ wɨput. ¿Tyi in̈watpa kun jeʼm foto? Iniktogoyba y initsɨʼybanam wɨsteen iga jeem miwɨputtaʼm y mixikpa iñxɨʼtaʼm.

¹⁷ Jeʼm foto tanakkaʼytyampaʼap takjɨɨsyajpa tyityam tan̈watneʼ kun jeʼm tɨwɨtam y juutytyam taoyñetaʼm. Wɨapsɨ iga tuum tɨɨwɨ nɨm o iwat algun tyi iga dyaʼ tan̈kusuʼnɨy. ¿Tyi in̈watpa? ¿In̈kujaʼamaʼyba jempɨk iwat y iniktogoyba juʼuts in̈watpa kun jeʼm foto? (Prov. 19:11; Efes. 4:32). Dyaʼ tanteguedaap tyi nɨm o iwat iga maaj wɨtampɨk tyidyin̈kej iwatneʼ. Odoy tan̈kujaʼamaʼyiñ jeʼm wɨtampɨk jɨɨxiyaj y jaamoʼoyiyaj ikwiñkejnewɨʼɨp iga jeex juʼuts jeʼm «foto wɨputnewɨʼɨp».

¿TYIʼIGA TSAAM IMPORTANTE IGA TANATOYTYAMTAIÑ YƗʼP JAAMA?

18. ¿Juʼptam jɨɨxiyaj ijɨykiʼm yɨʼp kuyuuji?

¹⁸ ¿Tyiʼiga odoy tantsaguiñ iga tanatoytyamtaap? Juʼuts tan̈kɨʼpin̈netaʼm, jesɨk tantoyyajpa tantɨwɨtam tanakwiñkejtaʼmpa iga tantoyba Jehová. ¿Juutypɨk wɨap tanakwiñkej iga tantoyyajpa jeʼm tanfamilia espiritual? Jesɨk tanakpoʼksyajpa. Jeʼyukmɨ nasuntaap iga tanakwiñkejiñ yaʼachan̈jamoʼoyi. ¿Tyi tayooxpaʼtpa iga odoy tantsaguiñ iga tanatoytyamtaap? Tan̈wadayyajiñ perdón tantɨwɨtam mex siiga tan̈kaʼ.

19. ¿Tyiʼiga nasuntaap iga tanatoytyamtaiñ yɨʼp jaama?

¹⁹ ¿Tyiʼiga tsaam importante iga tanatoytyamtaiñ yɨʼp jaama? Tanaʼmtaʼmiñ jempɨk nɨm Pedro: «Sɨɨp núctooba jém íŋaŋpɨc ja̱ma cuando cuyajpa it́u̱mpɨy cosa. Wɨ̱ iga, […] tanatoyt́amta̱iñ con jém tantɨ̱wɨtam» (1 Ped. 4:7, 8). ¿Tyi naspa wiñtyi iga nuʼguiñ jeʼm aktogoyoʼoyi? Jesús nɨm: «Icuwɨ̱t́i yɨ́p naxyucmɨ tsa̱m mijóyixyajpa ɨch aŋcuyucmɨ» (Mat. 24:9). Siiga tanawɨnanɨgaytyamtaap tayooxpaʼtpa iga seguido tan̈kuyooxaiñ Jehová mex iga tajooyixtyamtaap. Jeʼm Wookkɨʼɨwiñ ixunba iga tanaweʼktamtaiñ, pero dyaʼ iwɨpudaʼyba jeʼm ijɨɨxi siiga tanatoytyamtaap, iga jeʼm toyoʼoyi tayooxpaʼtpa tanaitytyaʼm «tu̱mt́i jɨ̱xi» (Col. 3:14; Filip. 2:1, 2).