Seguido tatoyoʼyiñ

1. ¿Tyityam iñjoodon̈a jesɨk moj in̈kuyujkaʼ jeʼm Biblia?

¿IÑJƗƗSPANAM tyityam iñjoodon̈a jesɨk moj in̈kuyujkaʼ jeʼm Biblia? Wɨapsɨ iga migaʼman̈jak iga Dios iniity iñɨɨyi. O mimaymaya jesɨk iñjoodon̈a iga dyaʼ i tuum infierno juuty Dios yaʼachwadoʼyba. Y siiga kaʼaneʼ algun i iga iñtyoyba, mimaymaya jesɨk iñjoodon̈a iga aktsukumtaap y wɨap in̈waganaity en jeʼm Paraíso.

2. ¿Juutypɨk inikwiñkej iga mimɨjaap idyɨk iñxɨʼ espiritualmente okmɨ iga in̈kutɨʼɨyɨy jeʼm an̈kejayoʼoyiyaj? (Efesios 5:1, 2).

² Jesɨgam in̈kuyujkaʼ jeʼm Dios In̈maatyi majtyim moj iñtyoy Jehová. Yɨʼp toyoʼoyi miyooxpaʼt iga inikkupaguiñ iñityijom jempɨk sɨʼ in̈kuyujkaʼ. In̈kaktyim jeʼm iñityi iga in̈wattoʼoba jempɨk Dios ikusuʼnɨʼyba. Juʼutstyim tuum tsɨɨxiʼ iga iwatkiʼpspa ijaatun̈ mich moj in̈watkiʼps iñJaatun̈ sɨn̈yukmɨpɨk (maayɨʼ Efesios 5:1, 2).

3. ¿Tyi wɨap tanakwaʼkta?

³ Tanakwaʼktaiñ: «Dende jesɨk achin̈, ¿sɨɨ majtyim antoyba Jehová? ¿Jeempɨktyim anjɨɨspa y an̈watpa juʼuts Jehová, y maaj jesɨk anakwiñkejaʼyba toyoʼoyi jeʼm tɨwɨtam?». Siiga dyam jespɨy tatoyoʼyba, odoy tan̈yaʼguiñ. Jeʼm cristianojyaj ityyajwɨʼɨp idyɨk en jeʼm wiñtyipɨk siglo jeʼam iñaskayaj. Pero Jesús dyaʼ ijɨɨs iga dyam idyɨk sɨʼ ikakyaj, y jeempɨktyim iwatpa kun taɨchtyam (Apoc. 2:4, 7). Ijoodon̈ iga wɨapnam tanaity jeʼm toyoʼoyi tanaitywɨʼɨp idyɨk wiñtyi.

4. ¿Tyi tan̈kɨʼpin̈taʼmpa yɨʼp kuyujijom?

⁴ Yɨʼp kuyujijom, wiñtyi tan̈kɨʼpin̈ba tyi tayooxpaʼtpa iga majnam tantoʼyiñ Jehová y tun̈gakyaj. Y okmɨ tan̈kɨʼpin̈ba juutypɨk tawɨwadaʼyba y juutypɨk iwɨwadaʼyba tun̈gakyaj.

TANTEGUEDAIÑ IGA MAJNAM TANTOʼYIÑ JEHOVÁ

5, 6. a) ¿Tyityam iñaskaʼ jeʼm apóstol Pablo jeʼm an̈matkuyjom? b) ¿Tyi iyooxpaʼt iga seguido ikuyooxaiñ Jehová?

⁵ Jeʼm apóstol Pablo tsaam idyɨk maymay jesɨk ikuyooxaap Jehová, pero in̈an̈kamoktyim kutɨʼɨchiyaj. Wity juʼumjom mex iga tan̈kaʼ idyɨk. A veces iñaskaʼ «peligro jém mɨjpɨc río» y jeʼm «peligro de jém númyajpaap». Y jeʼm ienemigojyaj iyaʼachwatyajtyim (2 Cor. 11:23-27). Y jeʼm tɨwɨtam dyaʼ juchixkej ichoowaixayyajpa idyɨk jeʼm iyooxakuy (2 Cor. 10:10; Filip. 4:15).

⁶ ¿Tyi iyooxpaʼt Pablo iga seguido ikuyooxaiñ Dios? Iga imayba idyɨk jeʼm Dios In̈maatyi y kun tyityam iñaskaneʼ, iixpɨkneʼ idyɨk juʼuts Jehová. Iwɨkupɨkneʼ idyɨk iga Jehová ityoyba (Rom. 8:38, 39; Efes. 2:4, 5). Jeʼyukmɨ Pablo pɨɨmityim ityoy. Jeempɨgam ikwiñkej jesɨgam ikuyooxa jeʼm ityɨwɨtam (Heb. 6:10).

7. ¿Tyi tayooxpaʼtpa iga majnam tantoʼyiñ Jehová?

⁷ Iga majnam tantoʼyiñ Dios, tan̈wɨkuyujkaaʼyiñ jeʼm In̈maatyi. Jesɨk tammayba jeʼm Biblia tanaʼmiñ tyi tan̈kejaʼyba de Jehová. Tanakwaʼktaiñ: «¿Juutypɨk ikwiñkejpa yɨʼpyaj versículos iga atoyba? ¿Y juutypɨk ayooxpaʼtpa iga majnam antoʼyiñ Jehová?».

8. ¿Juutypɨk tayooxpaʼtpa jeʼm an̈wejpadoʼoyi iga majnam tantoʼyiñ Dios?

⁸ Jesɨk tanan̈wejpaʼtpa Jehová tumtum jaama y tanan̈madaʼyba juʼuts tanan̈jaam, tayooxpaʼtpa iga majnam tantoʼyiñ (Sal. 25:4, 5). Y Jehová ikutson̈ba jeʼm tanan̈wejpadoʼoyi (1 Juan 3:21, 22). Khanh,b tuum yoomtɨwɨ itywɨʼɨp Asia, nɨmpa: «Wiñtyi numaaj antoyba idyɨk Jehová iga jeempɨgam an̈kuyujkaneʼ. Pero majtyim antoy jesɨk anaʼm juutypɨk ikutson̈ba jeʼm anan̈wejpadoʼoyiyaj, yɨʼp ayooxpaʼt iga an̈wadyiñ jempɨk jeʼ ikusuʼnɨʼyba».

TANTEGUEDAIÑ IGA MAJNAM TANTOʼYIÑ TUN̈GAKYAJ

9. ¿Juutypɨk ikwiñkej Timoteo iga ityoyba idyɨk jeʼm tɨwɨtam?

⁹ Maaj okmɨ iga tsɨʼy juʼuts cristiano, Pablo iixpɨk tuum traytyipɨxiñ iñɨɨyipɨk Timoteo. Tsaam idyɨk ityoyba Jehová y ityoybatyim idyɨk tun̈gakyaj. Pablo iñɨʼmay yɨʼɨmpɨk jeʼm filipenses: «D́a anai̱ yɨɨm ni tu̱m pɨ̱xiñ jexpɨct́im ijɨ̱xi juuts aɨch, jém tsa̱mpɨc mijɨ̱spa iga wɨ̱pud́iñ jém imvida» (Filip. 2:20). Pablo dyaʼ nɨm iga Timoteo tsaam idyɨk ikutɨʼɨyɨʼyba iwat tyidyin̈kej o agui wɨnajɨʼyoʼyba. Wɨap tan̈kujɨɨs iga igaʼman̈jakpa idyɨk jeʼm toyoʼoyi iniidyaywɨʼɨp jeʼm tɨwɨtam. Jeʼm kumunyaj pɨɨmi in̈joʼkneyajpa idyɨk iga Timoteo nɨguiñ ijooyayyaj (1 Cor. 4:17).

10. ¿Juutypɨk ikwiñkejyaj Anna y jeʼm iwɨdyaaya iga ityoyyajpa jeʼm tɨwɨtam?

¹⁰ Tan̈kujɨɨstaʼmpatyim juutypɨk wɨap tanyooxpaʼttaʼm jeʼm tɨwɨtam (Heb. 13:16). ¿Iñjɨɨspanam Anna jempɨk jɨykimta jeʼm kuyuuji nasnewɨʼɨp? Jesɨgam nas tuum tormenta, kun iwɨdyaaya oy ijooyayyaj tuum familia iga Testigojyajtyim y iaʼmyaj iga mɨsaneyaj jeʼm ityɨk. Jeʼyukmɨ jeʼm familia yaj kumujaʼayi jeʼm ipuʼktuukuyaj. Anna in̈matpa tyi iwatyaj: «Ananɨktaʼm jeʼm puʼktuuku, antseʼtaʼm y eybɨk anakseedaytyaʼm. Jempɨk an̈wattaʼm ayooxpaʼttaʼm iga anamigojataʼmiñ yɨʼp familia». Iga Anna y jeʼm iwɨdyaaya toyoyyajpa, iyooxpaʼtyaj yɨʼp tɨwɨtam (1 Juan 3:17, 18).

11. a) ¿Juutypɨk yooxpadoʼyba jesɨk tanakwiñkejpa toyoʼoyi? b) Juʼuts nɨmpa Proverbios 19:17, ¿juʼuts iaʼm Jehová jesɨk tanakwiñkejpa toyoʼoyi?

¹¹ Jesɨk tanakwiñkejpa toyoʼoyi y yaʼachan̈jamoʼoyi sɨʼ tan̈watkiʼps Jehová. Tun̈gakyaj iaʼmyajpa jempɨk tan̈watpa y wɨapsɨ iga dyaʼ tanjoodon̈aap juʼtspɨy ichoowaixyajpa. Khanh, jeʼm yoomtɨwɨ jɨykimtawɨʼɨp jeʼm párrafo 8, tsaam ijɨɨspa juʼtspɨy yooxpaʼtta: «Tsaam amaymay iga jeʼm yoomtɨwɨtam akwiñkejayyaj toyoʼoyi y ananɨkyajpa idyɨk jeʼm an̈matkuyjom. Nɨkpa idyɨk ameʼtsyaj, awaganawiʼkyajpa y okmɨ nɨkpa idyɨk atsakyaj antɨkkɨʼɨm. Sɨɨ an̈wɨkutɨʼɨyɨʼyba iga pɨɨmi ayooxpaʼtyaj, pero iwatyaj kun toyoʼoyi». Dyaʼ ityumpɨyyaj tachiʼiyajpa gracias por jeʼm yooxpadoʼoyi iga tanchiʼiyajpa. Khanh nɨmpa: «Tsaam idyɨk wɨɨ meʼega wɨap anakseedayyaj jeʼm yooxpadoʼoyi, pero weeñiyaj dyaʼ anjoodon̈ juuty ityyaj. Jehová ijoodon̈ y an̈waʼgaʼyba iga ikumayketyajiñ». Jehová iaʼmpa jesɨk tanakwiñkejpa yaʼachan̈jamoʼoyi. Dyaʼ numaaj iaʼmpa juʼuts tuum sacrificio, ijɨɨspa iga keʼnam tajaʼtsneʼ y jeʼyukmɨ tayojaytyoʼoba (maayɨʼ Proverbios 19:17).c

12. ¿Juutypɨk jeʼm tɨwɨtam chin̈neyajwɨʼbam wɨap ikwiñkejayyaj toyoʼoyi jeʼm kumun? (Aʼmɨtyim jeʼm imagenyaj).

¹² ¿Juutypɨk tuum tɨɨwɨ wɨap ikwiñkejay toyoʼoyi jeʼm kumun? Jesɨk yooxpadoʼyba. Tuum traytyipɨxiñ iñɨɨyipɨk Jordan ikwaʼk tuum anciano juutypɨknam maaj wɨap iyooxpaʼt jeʼm tɨwɨtam. Jeʼm anciano ianmajan̈chiʼ y iñɨʼmay tyityamnam wɨap iwat. Iñɨʼmay iga odoy kutsuʼuyaiñ iñuʼk jeʼm An̈tuʼumayoʼytyɨkjom y idiuschiʼiñ tun̈gakyaj, chioʼyiñ jeʼm ikutson̈oʼoyiyaj, pudyiñ jeʼm an̈matkuy kun jeʼm igrupo y ikujɨɨxiñ juutypɨk wɨap iyooxpaʼt jeʼm tɨwɨtam. Iga Jordan ikupɨk jeʼm an̈kiʼmayoʼoyiyaj dyaʼ numaaj iyooxpaʼt iga ipɨktson̈iñ jeʼm yooxakuyyaj jeʼm kumunjom. Iyooxpaʼttyim iga ityoʼyiñ jeʼm tɨwɨtam, ikutɨʼɨyɨytyim iga jesɨk tuum tɨɨwɨ tsɨʼyba juʼuts siervo ministerial dyaʼ jesɨknam mojpa iyooxpaʼt tun̈gakyaj, yooxpadoʼyba dende wiñtyityim (1 Tim. 3:8-10, 13).

13. ¿Tyi iyooxpaʼt Christian iga eybɨk tsɨʼyiñ juʼuts anciano?

¹³ ¿Mikuyooxaoʼyba idyɨk juʼuts anciano o siervo ministerial? Jehová dyaʼ ikujaʼamaʼyba jeʼm yooxakuy iga in̈wat kun toyoʼoyi (1 Cor. 15:58). Y tsaam ityeguedaap iga seguido inikwiñkejpa toyoʼoyi. Tuum tɨɨwɨ iñɨɨyipɨk Christian tsaam ityoʼyan̈jaam jesɨk dyam maaj kuyooxaoy juʼuts anciano. Jeʼ nɨmpa: «Mex iga dyam idyɨk akuyooxaoʼyba juʼuts anciano, ampɨk anjɨɨxi iga seguido an̈kuyooxaap Jehová iga antoyba». Maaj okmɨ eybɨk tsakta juʼuts anciano. Christian nɨmpa: «Akɨɨn̈neʼ idyɨk, pero anjɨɨs iga siiga Jehová ixunba iga eybɨk akuyooxaoʼyiñ juʼuts anciano, an̈watpa yɨʼp yooxakuy iga antoyba jeʼ y jeʼm tɨwɨtam».

14. ¿Tyi tan̈kejaʼyba jempɨk nɨm tuum yoomtɨwɨ?

¹⁴ Jeʼm Jehová iyooxakɨʼɨwiñyaj ikwiñkejayyajpatyim toyoʼoyi jempɨk dyaʼ jeʼ Testigojyaj (Mat. 22:37-39). Elena, tuum yoomtɨwɨ itywɨʼɨp en jeʼm república de Georgia, nɨmpa: «Wiñtyi numaaj aputpa idyɨk jeʼm an̈matkuyjom iga antoyba Jehová. Pero, jesɨk majtyim mɨja jeʼm antoyoʼoyi mojtyim antoy jempɨk dyaʼ ikuyooxayajpa Jehová. An̈kujɨɨspa idyɨk juʼutspɨk kobakpiijiyaj iniityyaj, y juʼp tema maaj ityeguedayajpa. Jesɨk moj anjɨɨs yɨʼɨmpɨk majtyim anyooxpaʼtyajtoʼoba idyɨk» (Rom. 10:13-15).

JESƗK TANAKWIÑKEJPA TOYOʼOYI IWƗWADAʼYBA TUN̈GAKYAJ

15, 16. Juʼuts kejpa en jeʼm imagenyaj, ¿juutypɨk iwɨwadaʼyba tun̈gakyaj jesɨk tanakwiñkejpa toyoʼoyi?

¹⁵ Jesɨk tanakwiñkejaʼyba toyoʼoyi jeʼm tantɨwɨtam, iwɨwadaʼybatyim tun̈gakyaj. Jesɨgam tsukum jeʼm pandemia del COVID-19, Paolo y jeʼm iyoomoʼ in̈kejayyaj jeʼm yoomtɨwɨtam tsaamipɨkyaj juutypɨk ipɨkyajpa jeʼm idispositivos electrónicos iga in̈matyajpa jeʼm Dios In̈maatyi. Tuum de jeʼeyaj dyaʼ ikutɨʼɨyɨʼyba idyɨk juutypɨk ipɨkpa jeʼm idispositivo, pero okmɨ ikuyujkaʼ y wɨa mu ityɨʼp jeʼm ifamiliares jesɨk watta jeʼm Jɨɨskimoʼoyi. An̈tuʼumaayaj 60 por videoconferencia. Jempɨk iwatyaj Paolo y jeʼm iyoomoʼ, iwɨwaday jeʼm yoomtɨwɨ y jeʼm ifamiliares. Jeʼm yoomtɨwɨ ijaʼyay Paolo: «Yukwɨpdius iga anan̈kejaytyaʼm, mex iga atsaamityamam. Ni keman an̈kujaʼamaʼyba iga Jehová tsaam ateguedataʼm, y mimichtyam anchokoyan̈kejaytyaʼm».

¹⁶ Kun yɨʼp nasɨyoʼoyi Paolo wɨa mu iaʼm iga maaj importante jeʼm toyoʼoyi y dyaʼ juʼtsan̈ ixpɨgoʼoyi tanaity o tyityam tan̈kutɨʼɨyɨʼyba tan̈wat. Jeʼ nɨm: «Jaʼy akuyooxaoʼoyi juʼuts superintendente de circuito. Jeʼm tɨwɨtam dyam ijɨɨsyajpa jeʼm najɨʼyoʼoyiyaj jempɨk jaʼy anaknas pero ijɨɨsyajpa jeʼm yooxpadoʼoyi jempɨk anchiʼiyaj».

17. ¿Iñam iwɨwadaʼyba jesɨk tanakwiñkejpa toyoʼoyi?

¹⁷ Jesɨk tanakwiñkejpa toyoʼoyi, tanawɨwadaytyaptyim taɨch. Tanaʼmtaʼmiñ jempɨk iñaskaʼ Jonathan itywɨʼɨp Nueva Zelanda. Tuum sábado, iaʼm iga tuum precursor sɨʼɨba idyɨk jeʼm an̈matkuy kugapaama y tsaam piijianeʼ idyɨk. Ipɨk ijɨɨxi iga iwaganaputpa tumtum sábado ikutsuʼuyaaji. Dyaʼ ijɨɨs juʼtspɨy idyɨk iwɨwadaʼyba iga sɨʼ ikwiñkej yaʼachan̈jamoʼoyi. «Peʼm tiempo —nɨmpa Jonathan— dyaʼ an̈kusuʼnɨʼyba idyɨk amput jeʼm an̈matkuy. Pero jesɨk anaʼm iga jeʼm precursor tsaam wɨan̈kejayoʼyba y juʼtspɨy iwɨnɨgayñeʼ idyɨk, moj an̈kusuʼnɨy jeʼm an̈matkuy. Y ampaʼttyim tuum anamigo iga ayooxpaʼtneʼ ammɨja espiritualmente, an̈kusuʼnɨʼyiñ jeʼm an̈matkuy y majtyim an̈kunuʼguiñ Jehová».

18. ¿Tyi ixunba Jehová iga tan̈wattaʼmiñ?

¹⁸ Jehová ixunba iga tantoʼyiñ y tantoʼyiñtyim tun̈gakyaj. Iga wɨaiñ tantoy Jehová nasuntaap iga tammayiñ jeʼm In̈maatyi, tan̈kujɨɨxiñ y tumtum jaama tanan̈wejpaʼdyiñ. Iga wɨaiñ tanakwiñkejayyaj toyoʼoyi tantɨwɨtam, wɨɨ iga tanyooxpaʼtyajiñ. Y jesɨk majnam tatoyoʼyba, majtyim tan̈wɨnanɨgaʼyba Jehová y jeʼm tanfamilia espiritual. ¡Y wɨap tanaitytyaʼm yɨʼp wɨbɨk nanɨgoʼoyi juchixkej!