KUYUUJI 40
WAAÑI 30 Mi Amigo, mi Padre, mi Dios
Jehová «ikpoʼkspa jempɨk an̈yaʼkneyaj»
«Ikpoʼkspa jempɨk an̈yaʼkneʼ y ikpɨsaʼyba jeʼm ikoʼowaaji» (SAL. 147:3).
AN̈KEJAYOʼOYI
Jehová tsaam ityeguet jempɨk an̈yaʼkneyaj y yaʼachaap ixɨʼyaj. Yɨʼp kuyujijom tan̈kɨʼpin̈taʼmpa juutypɨk jeʼ takpoʼkstaʼmpa y juutypɨk wɨap tanakpoʼkstaʼm tun̈gakyaj.
1. ¿Tyi ijaampa Jehová por jeʼm iyooxakɨʼɨwiñyaj?
Jehová tsaam tawɨkuixtyaʼmpa, ijoodon̈ jempɨk tannaskataʼmpa, jesɨk tamaymaytyam y jesɨk tan̈yaʼknetaʼmpa (Salmo 37:18). Jehová tsaam imaymaywatpa jesɨk iaʼmpa iga duroj tan̈kuyooxataʼmpa mex iga sɨʼ tanyaʼachataʼm, jeʼyukmɨ jeʼ tayooxpaʼttaʼmpa y takpoʼkstaʼmpa.
2. Siiga tansunba iga Jehová takpoʼkxiñ, ¿tyi wɨɨ iga tan̈wattaʼmiñ?
2 Salmo 147:3 nɨmpa iga Jehová ikpoksayba ianmaj jempɨk an̈yakneyaj y ikpɨsaʼyba jeʼm ikoʼowaaji, yɨʼp texto in̈matpa juutypɨk Jehová ikuixpa kun toyoʼoyi jempɨk pɨɨmi an̈yaʼkneyaj. ¿Tyi tan̈wadyiñ iga tawɨwadaytyaʼmiñ jempɨk Jehová iwatpa por taɨchtyam? Kujɨɨsɨ iga algun i koʼowaneʼ y nanɨktaap kun tuum doctor, siiga pɨstoʼoba wɨɨ iga ikupɨguiñ jempɨk nɨʼmaytyaap. Yɨʼp kuyujijom tan̈kɨʼpin̈taʼmpa juutypɨk Jehová ikpoʼkspa jempɨk an̈yaʼkneyaj y juutypɨk wɨap iwatkipsyaj jeʼm jɨɨxian̈chioʼoyiyaj itywɨʼɨp Bibliajom.
JEHOVÁ TANƗMAYTYAʼMPA IGA TSAAM TATSOOWAIXTYAʼMPA
3. ¿Tyiʼiga weeñiyaj ijɨɨsyajpa iga dyam i ityoyyajpa?
3 Tsaam tan̈yaʼkwatpa iga yɨʼp jaama jaʼyan̈yaj dyam ityoyyajpa tun̈gakyaj y iyaʼachwatyajpa. Jeʼyukmɨ weeñiyaj ijɨɨsyajpa iga dyam tyi kumeskuyyaj. Jeʼm yoomtɨwɨ Helena nɨmpa: «Anjaatun̈ dyaʼ idyɨk atoyba tsaam ayaʼachwat y tumtum jaama anɨʼmaʼyba idyɨk iga dyaʼ tyi akumeskuy». Siiga miyaʼachwatneta, mimalnɨʼmayñeta, mijooyixñeta y miñɨʼmayñeta iga dyaʼ tyi mikumeskuy, jeʼyukmɨ iñjaampa iga ni i dyaʼ mityoyba.
4. Juʼuts nɨmpa Salmo 34:18, ¿juutypɨk takpoʼkspa Jehová?
4 Siiga miyaʼachwatneta, sɨɨ wɨɨ iga in̈kupɨguiñ iga Jehová pɨɨmi mityoyba y tsaam michoowaixpa. «Jehová dyaʼ ichakpa ikutyum jempɨk koʼowaneyaj ianmaj y iyooxpaʼtpa jempɨk tsaam pɨɨmi an̈yaʼkneyaj» (maayɨʼ Salmo 34:18).b Siiga min̈yaʼkneʼ kujɨɨsɨ iga Jehová «iyooxpaʼtpa jempɨk tsaam pɨɨmi an̈yaʼkneyaj». Jeʼ miaʼmay iñanmaj y ixunba idyɨk iga in̈kuyooxaiñ (Juan 6:44). Juchixkej miyooxpaʼtpa iga pɨɨmi mityoyba.
5. ¿Juutypɨk ikpoʼks Jesús jempɨk sɨʼ idyɨk iyaʼachayaj?
5 Jempɨk Jesús iwat tan̈kejaytyaʼmpa juʼuts Jehová. Jesɨk jeʼ oy ityi yɨʼp naxyukmɨ pɨɨmi ityegueda jempɨk jooyixyajtaap idyɨk y iyaʼachan̈jaam (Mateo 9:9-12). Jesɨk jeʼm yoomoʼ mɨmnewɨʼɨp ichɨʼgay jeʼm ipuʼktuuku iga wɨaiñ ipɨs, Jesús dyaʼ iwoʼgay, ikpoʼks y iñɨʼmay iga iniity tuum mɨjpɨk fe (Marcos 5:25-34). Jesús ikwiñkej juʼuts jeʼm ijaatun̈ (Juan 14:9). Kupɨɨkɨ iga Jehová michoowaixpa y iaʼmpa iga iñtyoyba, iaʼmpatyim iga sɨʼ inikwiñkej tuum mɨjpɨk fe.
6. Siiga tanjaamtaʼmpa iga dyaʼ tyi takumeskuytyaʼm ¿tyi tan̈wattaʼmiñ?
6 ¿Tyi wɨɨ iga in̈wadyiñ siiga iñjɨɨspa iga dyaʼ tyi mikumeskuy? Maayɨʼ weeñi textos itywɨʼɨp Bibliajom iga mikjɨɨxiñ iga Jehová tsaam pɨɨmi mityoyba (Salmo 94:19).c Odoy an̈yaʼakɨ siiga dyaʼ wɨaneʼ in̈kuyooxa Jehová juʼuts mich iñxunba idyɨk. Jeʼ mikutɨʼɨyɨʼyba, y dyaʼ miwaʼgaʼyba tuum tyi iga dyaʼ wɨap in̈wat (Salmo 103:13, 14). Siiga miyaʼachwatneta y mimalwadayñeta sexualmente odoy jɨɨsɨ iga mich in̈culpa jempɨk iññaskaʼ. Jɨɨsɨ iga Jehová ichiʼiba castigo jempɨk imalwatyajpa y dyaʼ jempɨk malwadayñeta (1 Pedro 3:12). Sandra, malwadaytya ixutyujom, jeʼ nɨmpa: «Juchixkej an̈waʼgaʼyba Jehová iga ayooxpaʼdyiñ iga odoy anjɨɨxiñ iga dyaʼ tyi akumeskuy».
7. Kun jempɨk iññaskaneʼ, ¿juutypɨk miyooxpaʼtpa iga wɨaiñ in̈kuyooxa Jehová?
7 Siiga tan̈kaʼ in̈kupɨk iga wɨap iñyooxpaʼtyaj tun̈gakyaj, Jehová miyooxpaʼtpa iga wɨaiñ inin̈kejayyaj jeʼm in̈maatyi (1 Corintios 3:9). Jempɨk iññaskaneʼ miyooxpaʼtpa iga wɨaiñ in̈kutɨʼɨyɨy juʼuts in̈jaamyaj tun̈gakyaj. Helen jɨykimtawɨʼɨp jeʼm párrafo 3, jeʼ yooxpaʼtta y sɨɨ wɨaptyim iyooxpaʼt tun̈gakyaj. Jeʼ nɨmpa: «Wiñtyi anjaampa idyɨk iga dyatyi akumeskuy pero sɨɨ anaʼmneʼ iga Jehová pɨɨmi atsoowaixpa». Sɨɨ Helen kuyooxaoʼyba juʼuts precursora y tsaam maymay.
KUPƗƗKƗ IGA JEHOVÁ MIWADAYÑEUM PERDÓN
8. Juʼuts nɨmpa Isaías 1:18, ¿tyi tajɨykamayñeʼ Jehová?
8 Weeñi Jehová iyooxakɨʼɨwiñyaj iga tan̈kawatneyaj hasta sɨɨ an̈yaʼkyajpanam. Pero tanjɨɨskupaktaʼmiñ iga Jehová takɨakputtaʼm iga tsaam tatoytyaʼmpa. Jeʼ tanɨʼmaʼyba: «Akunuʼktaʼamɨ y tawagamurutaʼmiñ».d Siiga tantsakpa iga tammalwatpa jeʼ tawadaʼyba perdón (maayɨʼ Isaías 1:18).e Tsaam tamaymaywatpa iga Jehová ikujaʼamayñeum jempɨk tan̈watneʼ wiñɨk, pero dyaʼ ikujamayba jempɨk sɨʼ tan̈wattam yɨʼp jaama juʼuts iyooxakɨʼɨwiñ (Sal. 103:9, 12; Heb. 6:10).
9. ¿Tyiʼiga tanteguedaiñ jempɨk sɨʼ tan̈wattaʼm sɨɨ y jempɨk wɨap tan̈wattaʼm tannɨgɨyyoʼoyijom?
9 ¿Tyi miyooxpaʼtpa siiga duroj iñjɨɨspa jempɨk in̈watneʼ? Kujɨɨsɨ jempɨk sɨʼ in̈wat sɨɨ y jempɨk wɨap in̈wat iññɨgɨyoʼoyijom. Jeʼm apóstol Pablo an̈yaʼkpatyim idyɨk iga imalwaday jeʼm ityɨwɨtam, pero iwɨjoodon̈ idyɨk iga Jehová iwadayñeum perdón (1 Tim. 1:12-15). Dyam maaj ijɨɨs jeʼm tan̈kaʼ iwatnewɨʼɨp jesɨk dyanam idyɨk jeʼ cristiano (Filip. 3:4-8, 13-15). Jeʼ juchixkej in̈mat jeʼm Dios in̈maatyi kun maymayaaji y ikujɨɨs jeʼm ikoñwɨyoʼoyi, juʼutstyim Pablo dyam wɨap tan̈kukagay jempɨk tannaskaneʼ, pero wɨap tan̈kujiʼp Jehová sɨɨ y jeʼm tannɨgɨyoʼoyijom.
10. Siiga tammalwadayñeʼ algun i, ¿tyi tan̈wadyiñ?
10 Siiga dyaʼ wɨɨ inin̈jaam iga immalwadayñeʼ algun i, ¿tyi wɨɨ iga in̈wadyiñ? Wagaʼayɨ perdón y akwiñkeejɨ iga in̈kakneum iñjɨɨxi (2 Cor. 7:11). Wagaʼayɨtyim Jehová iga miyooxpaʼttaʼmiñ iga eybɨktyim minijɨyaytyaʼmtaiñ y mimaymayataʼmiñ.
11. ¿Tyi tan̈kejaytyaʼmpa jempɨk iñaskaʼ Jonás? (Aʼmɨ jeʼm imagen itywɨʼɨp yɨʼp totyaaji iwiñjom)
11 Kujɨɨsɨ juʼuts miñɨgay jesɨk dyaʼ in̈wɨwat, tsaakɨ iga Jehová miyooxpaʼdyiñ iga duroj in̈wadyiñ juʼuts jeʼ ixunba. Wiñɨk jeʼm profeta Jonás jeempɨgam iñaskaʼ, jesɨk Jehová iñɨʼmay iga nɨguiñ idyɨk Nínive jeʼ nɨk Tarsis, Jehová iyooxpaʼt iga odoy kɨʼɨn̈iñ jesɨk nɨkpa Nínive y jeempɨgam iwat (Jon. 1:1-4, 15-17; 2:7-10). Jehová dyaʼ ikkaʼyay jeʼm iyooxakuy juʼuts profeta, iyooxpaʼt iga iwɨakkupaguiñ. Mex iga in̈yaʼkwat jempɨk iñaskaʼ jeʼ iwɨpɨktson̈ jeʼm Jehová iyooxpadoʼoyi (Jon. 3:1-3).
Jehová iaʼmchiʼ iga jeʼm tɨʼɨpɨ iɨʼtspudyiñ Jonás, eybɨktyim nɨʼmaytya iga nɨguiñ Nínive. (Aʼmɨ jeʼm párrafo 11).
JEHOVÁ TAKPOʼKSPA IKUYUKMƗ JEʼM IESPÍRITU SANTO
12. ¿Tyi tan̈wattaʼmiñ jesɨk tammalnaskataʼmpa? (Filipenses 4:6, 7)
12 Jesɨk tammalnaskataʼmpa y tan̈yaʼktaʼmpa Jehová ipɨkpa jeʼm iespíritu santo iga takpoʼkstaʼmpa. Jeempɨgam iñaskayaj Ron y Carol jesɨk jeʼm imanɨk nakkaʼata, jeʼeyaj nɨmyajpa: «Oybatyim idyɨk ammalnaskatam, pero yɨʼbam jempɨk maaj antoyan̈jaamtam y dyaʼ idyɨk awɨmon̈taʼmpa. Jeʼyukmɨ anan̈wejpaʼttam Jehová iga ayooxpaʼttaʼmiñ. Jeʼ achiʼityam jeʼm paz iga eybɨk amaymayataʼmiñ juʼuts nɨmpa Filipenses 4:6, 7» (maayɨʼ). Siiga sɨʼ immalnaskaʼ y iñjaampa iga dyam wɨap iñyaʼachɨy, wagaʼayɨ Jehová iga miyooxpaʼdyiñ iga iñyaʼachɨʼyiñ (Sal. 86:3; 88:1). Odoy tsaakɨ iga in̈wagaʼyba Jehová jeʼm iespíritu santo, kupɨɨkɨ iga jeʼ mikumaton̈aʼyba jeʼm inin̈wejpadoʼoyi (Luc. 11:9-13).
13. ¿Juutypɨk tayooxpaʼttaʼmpa jeʼm espíritu santo iga duroj tan̈kuyooxataʼmiñ Jehová? (Efesios 3:16)
13 ¿Sɨʼ immalnaskaʼ y iñjaampa iga dyam mipɨɨmiɨy? Jehová iespíritu santo michiʼiba jeʼm pɨɨmi mityogoyaywɨʼɨp iga duroj in̈kuyooxaiñ (maayɨʼ Efesios 3:16). Sɨɨ tanaʼmtaʼmiñ jempɨk iñaskaʼ jeʼm yoomtɨwɨ Flora, kuyooxaoyyajpa idyɨk juʼuts misioneros, pero okmɨ jeʼm iwɨdyaaya pejoy y natsakyajta. Jeʼ nɨmpa: «Pɨɨmi an̈yaʼkwat jempɨk annaskaʼ y dyaʼ idyɨk awɨmoon̈ba, duroj anjɨɨspa idyɨk tyiʼiga annaskaʼ jeempɨk. Jeʼyukmɨ an̈waʼgay Jehová iga odoy atsaguiñ an̈kutyum y ayooxpaʼdyiñ anyaʼachɨy». Sɨɨ Flora iñunta kupɨkpa iga Jehová juchixkej iyooxpaʼtpa y ni keman dyaʼ sɨʼ ijagan̈tsak naxiñ tyiam naspa. Jeʼyukmɨ nɨm yɨʼɨmpɨk: «Anaʼm iga Jehová ikkupak juʼuts nɨmpa jeʼm Salmo 119:32: Juchixkej an̈kupɨkpa jeʼm inin̈kiʼmayoʼoyiyaj iga ananmaj miniidyay confianza».
14. ¿Tyi tan̈wattaʼmiñ siiga tansuntaʼmpa iga Jehová tayooxpaʼttaʼmiñ kun jeʼm iespíritu santo?
14 Siiga in̈wagayñeum Jehová jeʼm iespíritu santo, ¿tyiñam wɨap in̈wat? Odoy tsaakɨ iga miputpa jeʼm an̈matkuyjom, nɨkɨ jeʼm an̈tuʼumaajijom y maayɨtyim jeʼm Biblia tuum tuum jaama. Ityumpɨy yɨʼp miyooxpaʼtpa iga in̈wɨkuyooxaiñ Jehová (Filip. 4:8, 9). Jesɨk immayba jeʼm Biblia, kujɨɨsɨ juutypɨk Jehová iyooxpatneʼ jeʼm wiñɨkpɨk iyooxakɨʼɨwiñyaj. Jeʼm párrafo 6 in̈mat iga Sandra iñaskatyim jaʼyan̈ yaʼachajiyaj, pero sɨɨ jeʼ nɨmpa: «Tsaam ayooxpaʼtneʼ jeʼm José iñasɨyoʼoyi, jeʼ dyaʼ iaʼmchiʼ iga jeʼm kutɨʼɨchiyaj y jeʼm yaʼachwadoʼoyiyaj imɨswadaʼyiñ jeʼm iwɨnanɨgoʼoyi kun Jehová» (Gén. 39:21-23).
JEHOVÁ TAKPOʼKSTAʼMPA IKUYUKMƗ JEʼM TANTƗWƗTAM
15. ¿Ityam wɨap taanmajan̈chiʼityaʼm, takpoʼkstaʼm y juutypɨk? (Aʼmɨtyim jeʼm imagen).
15 ¿Ityam wɨap takpoʼksyaj jesɨk tayaʼachataʼmpa? (Col. 4:11). Iga jeʼm tantɨwɨtam tatoyyajpa, tayooxpaʼtyajpa y takpoʼksyajpa, wɨap tanaʼmtam juʼtspɨy tatoytyaʼmpa Jehová. Kun jeʼm Biblia y jeʼm ian̈wejpadoʼoyiyaj taanmajan̈chiʼiyajpa (Rom. 15:4)f. Jesɨk tuum tɨɨwɨ tanɨʼmaytyaʼmpa iga Jehová ikutɨʼɨyɨʼyba y ijoodon̈ jempɨk sɨʼ tannaskataʼm, jesɨgam tanjaamtaʼmpa iga Jehová dyaʼ tajagan̈tsaknetam. Jeʼm tɨwɨtam tayooxpaʼtyajpatyim jesɨk tasajchiʼiyajpa algun tyi iga wɨap tan̈kɨʼɨs.
Jeʼm amigojyaj iga tan̈wɨnanɨgayyajpa y tanaidyayyajpa confianza tsaam tayooxpaʼtyajpa y takpoʼksyajpa. (Aʼmɨ jeʼm párrafo 15).
16. ¿Tyi tan̈wattaʼmiñ siiga tansuntaʼmpa yooxpadoʼoyi?
16 Odoy tatsaʼataʼmiñ tan̈waʼktaʼm yooxpadoʼoyi jesɨk tatogoyaytyaʼm y jeʼm tɨwɨtam tayooxpaʼtyajpa kun maymayaaji (Prov. 17:17). Jeʼeyaj dyaʼ wɨap ijoodon̈ayaj jempɨk sɨʼ iññaskaʼ siiga dyaʼ inin̈madayyajpa (Prov. 14:10). Jesɨk dyaʼ wɨɨ inin̈jaam an̈madaʼayɨ tuum anciano o tuum yoomtɨwɨ iga in̈wɨnanɨgaʼyba y in̈wɨixpɨkpa, jeʼeyaj miyooxpaʼtyajpa kun maymayaaji.
17. ¿Tyiʼiga odoy tantsagan̈putyajiñ jeʼm tantɨwɨtam?
17 Duroj tanan̈pɨtsyajiñ jeʼm tɨwɨtam, mex iga a veces tan̈nɨʼmaykuʼmyajpa, iga dyaʼ tawɨixpikyajpa, jeʼyukmɨ tanɨʼmayyajpa jeempɨk (Sant. 3:2). Mex iga nasneʼ jeempɨk, pɨktson̈ɨ jeʼm yooxpadoʼoyi iga michiʼiyajpa. Tuum anciano iga iñɨɨyi Gavin, iniity depresión. Jeʼ nɨmpa: «A veces dyaʼ an̈waganaityyajtoʼoba jeʼm anamigojyaj». Mex iga iñaskaʼaba idyɨk jeempɨk jeʼ duroj in̈pɨʼts jeʼm tɨwɨtam, yɨʼp iyooxpaʼt iga odom jespɨy an̈yaʼguiñ. Tun̈gak yoomtɨwɨ iga iñɨɨyi Amy nɨmpa: «Kun ityumpɨy jempɨk annaskaneʼ tsaam tan̈kaʼ anan̈pɨʼtsyaj tun̈gakyaj, pero Jehová an̈kejayñeʼ iga antoyyajiñ y anan̈pɨʼtsyajiñ ityumpɨy jeʼm tɨwɨtam, yɨʼp tsaam imaymaywatpa jeʼ y amaymaywatpatyim».
JEMPƗK IWATPA JEHOVÁ TANNƗGƗYOʼOYIJOM TAKPOʼKSTAʼMPA
18. ¿Juʼutspɨk ityi tanan̈joʼktaʼmpa tannɨgɨyoʼoyijom y tyi wɨɨ iga tan̈wattaʼmiñ sɨɨ?
18 Tsaam tamaymaywattaʼmpa tanjoodon̈ataʼm iga dyam jaʼyñeʼ kuyajpa ityumpɨy jempɨk tayaʼachwattaʼmpa y tan̈yaʼkwattaʼmpa (Apoc. 21:3, 4). Jeʼm jomnaxyukmɨ dyam maaj tan̈yaʼkwattaʼmpa jempɨk tannaskanetaʼm (Is. 65:17). Juʼuts tanaʼmnetaʼm Jehová takpoʼkstaʼmpa y ni keman tatsaktaʼmpa tan̈kutyum. ¡Aʼmchiɨʼ iga miyooxpaʼdyiñ! Odoy kujaʼamaʼayɨ iga Jehová tsaam mityoyba (1 Ped. 5:7).
WAAÑI 7 Jehová es mi fuerza y mi salvación
a Weeñi nɨɨyiyaj kukagayñeyajta.
b Salmo 34:18: Jehová dyaʼ ichakpa ikutyum jempɨk koʼowaneyaj ianmaj; iyooxpaʼtpa jempɨk tsaam pɨɨmi an̈yaʼkneyaj.
c Aʼmɨ jeʼm recuadro «Jehová pɨɨmi michoowaixpa».
d Siiga tanaitytyoʼoba tuum wɨbɨk nanɨgoʼoyi kun Jehová, tanaʼkwiñkejiñ iga tan̈kakneum tanjɨɨxi tan̈waʼgaʼyiñtyim perdón y odom maaj tammalwadyiñ. Siiga tatan̈kawatpa tanan̈madayyajiñ jeʼm ancianojyaj iga wɨaiñ tayooxpaʼtyaj (Sant. 5:14, 15).
e Isaías 1:18: Miñtyaʼamɨ y tawagamurutaʼmiñ, nɨmpa Jehová. Mex iga jeʼm iñtyan̈katam jeex juʼuts jeʼm escarlata, poopo tsɨʼyba juʼuts jeʼm nieve; mex iga pɨɨmi tsabats juʼuts jeʼm puʼktuuku carmesí, tsɨʼyba juʼuts jeʼm lana.
f Impaʼtpatyim tuum lista juuty kejpa weeñi versículos iga wɨap miyooxpaʼt. «Angustia, preocupación» y «consuelo» jeʼm totjaayijom Textos bíblicos para la vida cristiana.