KUYUUJI 4
WAAÑI 18 Gracias por el rescate
¿Tyityam tan̈kejaʼyba jeʼm Jesús ikɨakpudoʼoyi?
«Dios taŋquejáy ju̱t́pɨc tatoypa» (1 JUAN 4:9).
AN̈KEJAYOʼOYI
Jeʼm kɨakpudoʼoyi tan̈kejaʼyba iga Jehová y Jesús iniityyaj wɨtampɨk cualidades.
1. ¿Juutypɨk tawɨwadaʼyba iga tumtum jaama tanjɨɨsaytyaʼmiñ jeʼm Jesús ikaʼiʼ?
JEHOVÁ tachiʼ tuum wɨbɨk xaaja jesɨgam ikutsat iMaanɨk iga kaʼiñ por taɨchtyam (2 Cor. 9:15). Jeʼyukmɨ wɨap tanamigojatam y wɨaptyim tanaity tuum ityi dyapɨk kuyajpa. Iwat yɨʼɨmpɨk iga tsaam tatoyba. Wɨɨ iga juchixkej tanakwiñkejaytyaʼmiñ iga pɨɨmi tantsoowaixtyaʼmpa yɨʼp xaaja (Rom. 5:8). Iga odoy tan̈kujaʼamaʼyiñ jempɨk Jehová iwat Jesús nɨm iga tumtum amtyɨy tanjɨɨsaytyaʼmiñ jeʼm ikaʼiʼ (Luc. 22:19, 20).
2. ¿Tyi tan̈kɨʼpintaʼmpa yɨʼp kuyujijom?
2 Yɨʼp amtyɨy jeʼm Jɨɨskimoʼoyi wattaap jeʼm jaama sábado 12 de abril de 2025. Tantumpɨytyam wɨap tannɨktaʼm, jeʼyukmɨ tantoptaʼmiñ tiempo iga tan̈kujɨɨstaʼmiña ityumpɨy jempɨk Jehová y Jesús iwatneyaj por taɨchtyam. Yɨʼp kuyujijom tanaʼmtaʼmpa tyi tan̈kejaʼyba de Jehová y Jesús jeʼm kɨakpudoʼoyi. Jeʼm tun̈gak kuyujijom tan̈kɨʼpin̈taʼmpa juutypɨk tawɨwadaʼyba y juutypɨk tanakwiñkejtaʼmpa iga tantsoowaixtyaʼmpa yɨʼp xaaja.
TYI TAN̈KEJAʼYBA DE JEHOVÁ JEʼM KƗAKPUDOʼOYI
3. ¿Juutypɨk jaʼyan̈yaj kɨakputyajtaap ikuyukmɨ tuum pɨɨxiñ? (Aʼmɨtyim jeʼm imagenyaj).
3 Jeʼm kɨakpudoʼoyi tan̈kejaʼyba iga Jehová iwɨwatpa (Deut. 32:4). Jesɨk Adán dyam kupɨgoy taknasaytyaʼm jeʼm tan̈kaʼ y jeʼm kaʼiʼ, jeʼyukmɨ Jehová ikutsat jeʼm iMaanɨk iga wɨaiñ takɨakputtaʼm (Rom. 5:12). ¿Pero juutypɨk jaʼyan̈yaj kɨakputyajtaap ikuyukmɨ tuum pɨɨxiñ? Jeʼm apóstol Pablo tawɨan̈maday jesɨk nɨm: «Tu̱m pɨ̱xiñ jém Adán d́a iwat juuts iñɨ́máy Dios. Jeeyucmɨ tsa̱m jáyaŋ jém pɨxiñt́am táŋcaɨyyaj. Jesa̱pt́im tu̱m pɨ̱xiñ jém Cristo iwat juuts iñɨ́máy Dios. Jeeyucmɨ tsa̱m jáyaŋ jém pɨxiñt́am wɨ̱pɨctsoŋyajta̱p jém Dios iwiñjo̱m» (Rom. 5:19; 1 Tim. 2:6). Takkutɨʼɨyɨʼyba iga ikuyukmɨ tuum pɨɨxiñ tantumpɨytyam tatan̈kaɨytyaʼm y takaʼataʼmpa, jesaptyim ikuyukmɨ tuum pɨɨxiñ iga Jehová ikutsat wɨap takɨakputtaʼm.
Tuum pɨɨxiñ taknasay jeʼm tan̈kaʼ y jeʼm kaʼiʼ y ikuyukmɨ tuum pɨɨxiñ takɨakputtamta. (Aʼmɨ jeʼm párrafo 3).
4. ¿Tyiʼiga Jehová dyaʼ iaʼmchiʼ iga jeʼm Adán imanɨktam kupɨgoyyajpaʼap ityyajiñ juchixkej?
4 ¿Nasuntaap idyɨk iga Jesús kaʼiñ iga wɨaiñ takɨakputtaʼm? Jehová wɨap idyɨk iaʼmchiʼ iga jeʼm Adán imanɨktam kupɨgoyyajpaʼap wɨaiñ iityyaj juchixkej. Pero tan̈kujɨɨstaʼmiñ iga Jehová juchixkej iwɨwatpa jeʼyukmɨ dyaʼ idyɨk wɨap iaʼmchiʼ iga jeempɨgam naxiñ, keʼnam jesɨk Adán ni keman tan̈kawat y ni keman taknasay jeʼm tan̈kaʼ.
5. ¿Tyiʼiga tan̈kupɨktaʼmpa iga Jehová juchixkej iwɨwatpa?
5 Meʼega Jehová dyaʼ idyɨk takɨakputtaʼm y iaʼmchiʼ iga jeʼm Adán imanɨktam ityyajiñ juchixkej mex iga tan̈kaɨyyaj ¿tyi idyɨk nas? Weeñiyaj mojpa idyɨk ijɨɨsyaj iga jeʼ ni keman iwɨwatpa, wɨap inikwaʼkyajta: «¿Ikkupakpanam ityumpɨy jeʼm ijɨykamoʼoyiyaj?» Pero dyaʼ jeempɨk nas, Jehová iwɨwat mex iga ityoyan̈jaampa idyɨk jesɨk akkaʼaytya jeʼm iMaanɨk, jeʼyukmɨ wɨap tan̈kupɨktaʼm iga Jehová juchixkej iwɨwatpa.
6. ¿Juutypɨk tayooxpaʼtpa jeʼm kɨakpudoʼoyi iga tantsoowaixtyaʼmiñ jeʼm Jehová ityoyoʼoyi? (1 Juan 4:9, 10).
6 Jeʼm kɨakpudoʼoyi dyaʼ numaaj in̈kejpa iga Jehová iwɨwatpa, in̈kejpatyim iga tsaam tatoyba (Juan 3:16; maayɨʼ 1 Juan 4:9, 10). Jeʼ iaʼmchiʼ iga akkaʼaytyaiñ jeʼm iMaanɨk iga ixunba iga taitytyaʼmiñ juchixkej y tatsɨʼytyaʼmiñ ifamiliajom. Tan̈kujɨɨstaʼmiñ jesɨk Adán tan̈kawat, dyam tsɨʼy juʼuts ifamilia jeʼyukmɨ dyam tanayba jeʼm Jehová ifamiliajom. Jehová oy takɨakput y siiga tanaitypa fe y tan̈kupɨkpa eybɨk tatsɨʼyba juʼuts ifamilia, tawadaʼyba perdón, wɨap tanamigoja y wɨaptyim tan̈wɨnanɨgayyaj tantɨwɨtam. ¡Kejpa iga Jehová tsaam tatoyba! (Rom. 5:10, 11).
7. ¿Tyi tayooxpaʼtpa tan̈kutɨʼɨyɨy juʼtspɨy tatoyba Jehová?
7 Tan̈kutɨʼɨyɨytyaʼmpa juʼtspɨy tatoyba Jehová jesɨk tan̈kujɨɨstaʼmpa juʼtspɨy iyaʼachɨy jesɨk takɨakputtaʼm. Jeʼm Wokkɨʼɨwiñ nɨmpa iga jesɨk tanan̈an̈kamoktaʼmpa kutɨʼɨchiyaj dyaʼ tanyaʼachɨytyaʼmpa (Job 2:1-5; 1 Ped. 2:21). Jeʼyukmɨ Jehová iaʼmchiʼ iga yaʼachaiñ jeʼm iMaanɨk jesɨk jeʼm ienemigojyaj sɨʼ idyɨk ikujɨyyaj, koʼtsta y kununta kuyyukmɨ. Jehová iaʼm ityumpɨy jempɨk naspa idyɨk ixɨʼ y ityoʼyan̈jaam iga sɨʼ idyɨk iyaʼachwadaytya jeʼm iMaanɨk (Mat. 27:28-31, 39). Jehová wɨa idyɨk mu ikɨakput jesɨk weeñiyaj iñɨʼmayyaj: «Sɨɨp wɨ̱ iga Dios icɨacpud́iñ siiga nu̱ma it́oypa» (Mat. 27:42, 43). Meʼega iwat jeempɨk dyaʼ idyɨk wɨa takuyojnas y dyatyim idyɨk tanaitypa tuum an̈jogoʼoyi, jeʼyukmɨ Jehová iaʼmchiʼ iga yaʼachwadaytyaiñ y akkaʼaytyaiñ jeʼm iMaanɨk.
8. ¿Juutypɨk tanjoodon̈tam iga Jehová pɨɨmi ityoʼyan̈jaam jesɨgam iaʼm iga sɨʼ idyɨk ikkaʼaytya jeʼm iMaanɨk? (Aʼmɨtyim jeʼm imagen).
8 Mex iga Jehová dyaʼ ipɨk ipɨɨmi iga ikɨakput iMaanɨk jesɨk akkaʼata dyaʼ nɨmtoʼoba iga dyaʼ ityoʼyan̈jaam. Jehová tawat kun jeʼm jɨɨxi iga tanaitytyaʼmiñ jaamoʼoyiyaj juʼutstyim jeʼ. Jeʼm Biblia nɨmpa iga jempɨk dyaʼ ikupɨkyaj «ikkoowaayyaj ianmaj y pɨɨmi an̈yaʼk» (Sal. 78:40, 41). Tan̈kujɨɨstaʼmiñ jempɨk Jehová iñɨʼmay Abrahán iga iwadyiñ, iwaʼgay iga ikɨan̈kodyiñ idyɨk jeʼm imaanɨk Isaac. Abrahán pɨɨmi ityoʼyan̈jaam iganam sɨʼ idyɨk iwɨtsak ityumpɨy iga ikkaʼaba idyɨk jeʼm imaanɨk (Gén. 22:9-12; Heb. 11:17-19). Tan̈kujɨɨstaʼmiñ juʼtspɨy Jehová ityoʼyan̈jaam jesɨgam iaʼm juutypɨk idyɨk sɨʼ ikkaʼaytya jeʼm iMaanɨk. (Aʼmɨ en jw.org jeʼm video Ejemplos de fe: Abrahán [parte 2]).
Jehová pɨɨmi ityoʼyan̈jaam jesɨk iaʼm iga jeʼm iMaanɨk pɨɨmi yaʼachaap idyɨk ixɨʼ. (Aʼmɨ jeʼm párrafo 8).
9. Juʼuts nɨmpa Romanos 8:32, 38, 39, ¿juutypɨk takwiñkejaʼyba Jehová jeʼm ityoyoʼoyi?
9 Jeʼm kɨakpudoʼoyi tan̈kejaʼyba iga Jehová pɨɨmi tatoyba, ni taɨch ni jeʼm tanamigo ni tuum tanfamilia jespɨy tatoyba (maayɨʼ Romanos 8:32, 38, 39). Kujɨɨsɨ, ¿miitytyoʼoba juchixkej? Jehová maaj ikusuʼnɨʼyba iga miidyiñ juchixkej. ¿Iñxunba iga miwadaytyaiñ perdón jeʼm iñtyan̈kaʼ? Jehová tsaam iktogoytyoʼoba jeʼm iñtyan̈kaʼ. Ixunbatyim iga tan̈kupɨguiñ y tanaidyiñ fe en jeʼm kɨakpudoʼoyi. Kun ityumpɨy jempɨk iwat ikwiñkejpa iga Jehová pɨɨmi tatoyba. Y jeʼm jomnaxyukmɨ majtyim tan̈kutɨʼɨyɨʼyba juʼtspɨy tatoyba (Ecl. 3:11).
TYI TAN̈KEJAʼYBA DE JESÚS JEʼM KƗAKPUDOʼOYI
10. a) ¿Tyiapaʼap jempɨk maaj idyɨk in̈yaʼkwatpa Jesús wiñtyi iga akkaʼataiñ? b) ¿Juutypɨk ikkuaʼyay Jesús jeʼm iJaatun̈ iñɨɨyi? (Aʼmɨtyim jeʼm recuadro «Jesús kupɨgoy y jeempɨgam ikkuaʼyay jeʼm iJaatun̈ iñɨɨyi»).
10 Jesús tsaam ityeguedaap idyɨk iga odoy kujɨyaytyaiñ iJaatun̈ (Juan 14:31). Jesús pɨɨmi idyɨk an̈yaʼkpa jesɨk ikujɨɨspa iga wɨap idyɨk ityuʼdɨyay jeʼm iJaatun̈ iñɨɨyi, iga kumɨgoyñeta iga in̈teeñkamokneʼ Dios. Jeʼyukmɨ nɨm: «ManJa̱tuŋ, siiga iŋwɨ̱aŋja̱m odoy jɨɨcɨ iga annascaaba yɨ́p mɨjpɨc yaacha̱ji» (Mat. 26:39). Pero Jesús ikupɨk Jehová, ikwiñkej iga jeʼm Wokkɨʼɨwiñ mɨgoʼyba. Jeempɨgam ikkuaʼayyay jeʼm iJaatun̈ iñɨɨyi.
11. ¿Juutypɨk ikwiñkej Jesús iga ityoyba tun̈gakyaj? (Juan 13:1).
11 Jeʼm kɨakpudoʼoyi tan̈kejaʼybatyim iga Jesús pɨɨmi ityeguedaap tun̈gakyaj y maaj jempɨk ityun̈ɨyyajpa (Prov. 8:31; maayɨʼ Juan 13:1). Jeʼ ijoodon̈am idyɨk iga yɨʼp naxyukmɨ pɨɨmi yaʼachwattaap y maaj jesɨk akkaʼataap idyɨk. Jeʼ dyaʼ ikkupak jeʼm iyooxakuy iga kun jeʼam jɨɨxi kutsatneta, iwat iga ityoyba tun̈gakyaj. Jeʼyukmɨ in̈kejay iyooxpaʼt tun̈gakyaj jesɨk putpa idyɨk jeʼm an̈matkuyjom y mex iga dyam jaʼyñeʼ akkaʼataap idyɨk ityop tiempo iga ikutseeayaʼyba jeʼm apóstolyaj ipuy, in̈kejay y ianmajan̈chiʼ (Juan 13:12-15). Jesɨk kununnetawum idyɨk jeʼm kuyyukmɨ tuum de jeʼm imalwatpaʼap iñɨʼmay iga itypa idyɨk jeʼm jomnaxyukmɨ y iñɨʼmay Juan iga ikuixaʼyiñ jeʼm iaapa María (Luc. 23:42, 43; Juan 19:26, 27). Jesús ikwiñkej iga ityoyba idyɨk tun̈gakyaj jesɨk in̈maday jeʼm Dios In̈maatyi y jesɨk ikɨan̈kot iityi.
12. ¿Juutypɨk Jesús seguido tayooxpaʼtnetaʼm?
12 Cristo tun̈kɨy kaʼ y seguido tayooxpaʼtnetaʼm (Rom. 6:10). Seguido yooxaneʼ iga tawɨwadayiñ jeʼm ikɨakpudoʼoyi. Tañkujɨɨstaʼmiñ juʼtspɨy yooxaneʼ juʼuts An̈jagoʼoyi, juʼuts Kobakpɨk Panij y juʼuts Kobakpɨk de jeʼm kumum (1 Cor. 15:25; Efes. 5:23; Heb. 2:17). In̈tuʼumawatpa jeʼm kupin̈neyajtawɨʼɨp y jeʼm tun̈gak ovejas wiñtyi iga kuyajiñ jeʼm mɨjpɨk yaʼachaajib (Mat. 25:32; Mar. 13:27). Ityeguedaptyim iga jempɨk ikuyooxayajpa Dios wɨwiʼkneyajiñ espiritualmente (Mat. 24:45). Y jesɨk In̈jakpa por Mil Amtyɨy seguido tayooxpaʼttaʼmpa. Jehová dyaʼ numaaj ikɨan̈kot jeʼm iMaanɨk iga takɨakputtaʼmpa, iwat iga seguido tayooxpaʼttaʼmiñ.
ODOY TSAAKƗ IGA IN̈KUYUJKAʼABA
13. ¿Juutypɨk tayooxpaʼtpa jesɨk tan̈kujɨɨspa juʼtspɨy tatoyba Jehová y Jesús?
13 Jesɨk in̈kujɨɨspa tyityam iwatneyaj majnam in̈kutɨʼɨyɨʼyba juʼtspɨy mityoyyajpa Jehová y Jesús. Wɨɨ iga in̈kɨʼpin̈iñ tuum o waatyi de jeʼm Evangelios jesɨk dyam jaʼyñeʼ wattaap jeʼm Jesús iJɨɨskimoʼoyi. Chokoy kɨʼpin̈ɨ iga wɨaiñ iñaʼm tyiʼiga wɨɨ iga tantoytyaʼmiñ Jehová y Jesús y odoy kujaʼamaʼyɨ, an̈madaʼayɨtyim tun̈gak tyityam in̈kuyujkaʼaneʼ.
14. Juʼuts nɨmpa Salmo 119:97 y jeʼm nota, ¿tyi tan̈wattaʼmiñ iga seguido tan̈kuyujkataʼmiñ jeʼm kɨakpudoʼoyi y tun̈gak an̈kejayoʼoyiyaj? (Aʼmɨtyim jeʼm imagen).
14 Wɨapsɨ iga agui pekam sɨʼ in̈kuyooxa Jehová y minikwaʼktaap siiga majnam wɨap in̈kuyujkaʼ jeʼm Jehová iwɨwadoʼoyi, ityoyoʼoyi y jeʼm kɨakpudoʼoyi. Jesɨk in̈watpa yɨʼɨmpɨk iñaʼmpa iga majnam in̈wɨkutɨʼɨyɨʼyba. Jeʼyukmɨ kɨʼpin̈ɨ jeʼm totjaayiyaj tanaitytyamwɨʼɨp. Siiga impaʼtpa tuum texto iga dyaʼ in̈kutɨʼɨyɨʼyba majnam wɨkɨʼpin̈ɨ. Y jesɨk yajum, kujɨɨsɨ tyi min̈kejay de Jehová, de Jesús y juʼtspɨy tatoyyajpa (maayɨʼ Salmo 119:97 y jeʼm nota).c
Mex iga dende pekam sɨʼ tan̈kuyooxa Jehová majnam wɨap tantsoowaix jeʼm kɨakpudoʼoyi. (Aʼmɨ jeʼm párrafo 14).
15. ¿Tyiʼiga wɨɨ iga seguido tan̈kuaʼmtaʼmiñ jeʼm an̈kejayoʼoyiyaj ityyajwɨʼɨp Bibliajom?
15 Odoy an̈yaʼakɨ siiga dyaʼ jobity in̈kutɨʼɨyɨʼyba jempɨk immayba o in̈kuyujkaʼaba jeʼm Biblia. Jesɨk in̈kuyujkaʼaba keʼnam jesɨk algun i iga ikuaʼmpa oro. Iga wɨaiñ ipaʼt jeʼm oro ininɨgaʼyba jaʼyan̈ tiempo. Pero seguido ikuaʼmpa, mex iga dyaʼ juʼchan̈ ipaʼtpa, tsaam ichoowaixpa. Jeʼm an̈kejayoʼoyiyaj tampaʼttampaʼap Bibliajom maaj tsoʼowɨyyaj que jeʼm oro (Sal. 119:127; Prov. 8:10). Jeʼyukmɨ odoy tsaakɨ iga immayba y in̈wɨkuyujkaʼaba jeʼm Biblia (Sal. 1:2).
16. ¿Juutypɨk wɨap tan̈watkiʼpstaʼm Jehová y Jesús?
16 Jesɨk mikuyujpa, kujɨɨsɨ juutypɨk in̈watkiʼpspa iñityijom. Wɨap in̈watkiʼpsay jeʼm Jehová ijusticia siiga dyaʼ miñeejaixoʼyba. In̈watkiʼpspa Jesús iga jeʼ pɨɨmi ityoy iJaatun̈ y tun̈gakyaj siiga iñyaʼachɨʼyba mex iga miyaʼachwattaap, siiga iñyooxpaʼtyajpa jeʼm tɨwɨtam y inin̈madayyajpa ityumpɨyyaj juutypɨk jeʼm kɨakpudoʼoyi iwɨwadayyajpa.
17. ¿Tyi tan̈kɨʼpin̈taʼmpa jeʼm tun̈gak kuyujijom?
17 Jesɨk maaj tan̈wɨkutɨʼɨyɨʼyba y tantsoowaixpa jeʼm kɨakpudoʼoyi majnam tantoyba Jehová y Jesús y jeʼeyaj majnam tatoyyajpa (Juan 14:21; Sant. 4:8). Jeʼyukmɨ tan̈wɨpɨktaʼmiñ ityumpɨy jempɨk Jehová tachiʼityaʼmpa iga majnam tan̈kutɨʼɨyɨytyaʼmiñ jeʼm kɨakpudoʼoyi. Jeʼm tun̈gak kuyujijom tan̈kɨʼpin̈taʼmpa juutypɨk tawɨwadaʼyba y juutypɨk tantsoowaixpa iga Jehová takwiñkejay jeʼm ityoyoʼoyi.
WAAÑI 107 Dios nos enseñó a amar
a TEGUEDAAJƗ YƗʼP JƗƗXI: «Kujɨɨsɨ» nɨmtoʼoba iga in̈wɨkɨʼpin̈ba algun tyi iga maaj in̈wɨkutɨʼɨyɨʼyiñ y juutypɨk miyooxpaʼtpa jempɨk sɨʼ in̈kuyujkaʼ.
b En Efesios 1:10 Pablo nɨm iga an̈tuʼumawattaap jeʼm ityyajwɨʼɨp sɨn̈yukmɨ. En Mateo 24:31 y Marcos 13:27 Jesús nɨm iga an̈tuʼumawattaap jeʼm kupin̈neyajtawɨʼɨp. Jesɨk Pablo y Jesús nɨmyaj iga in̈tuʼumawatyajpa dyaʼ tumtyi jɨɨxi sɨʼ idyɨk in̈kejyaj. Pablo sɨʼ idyɨk iñɨm jesɨk Jehová ikupin̈ba jeʼm imanɨktam espirituales kun iespíritu santo. Jesús sɨʼ idyɨk ijɨykiʼm jeʼm kupin̈neyajtawɨʼɨp iga ityyajpa yɨʼp Naxyukmɨ iga nanɨkyajtaap sɨn̈yukmɨ jesɨk itypa jeʼm mɨjpɨk yaʼachaaji.
c Salmo 119:97 ¡Tsaam pɨɨmi antoyba jeʼm inin̈kiʼmayoʼoyi! Muuma jaama an̈kujɨɨspa. Nota: O «Akuyujpa».