Tawɨnɨgaytyaʼmpa siiga tanan̈pɨʼtstaʼmpa jeʼm tantɨwɨtam

1, 2. ¿Tyi jempɨk maaj ichoowaixpa Jehová, y tyi ixunba iga tan̈wattaʼmiñ?

JEHOVÁ tsaam ichoowaixpa juʼtspɨy tan̈wɨwadaytyaʼmpa tun̈gakyaj. Jesús in̈kej iga tantoytyaʼmiñ tun̈gakyaj juʼuts tanatoytyamtaap tanyaʼak (Mat. 22:​37-39). Yɨʼp nɨmtoʼoba iga tan̈wɨwadayyajiñtyim jempɨk dyaʼ ikoosteñayyajpa Jehová. Yɨʼɨmpɨgam tan̈watkiʼpstaʼmpa jeʼm tanJaatun̈ sɨn̈yukmɨpɨk, iga «icpijpa ja̱ma para jém malojpɨc y para jém wɨbɨc. […] Icchijóypa tuj para [ityumpɨyyaj]» (Mat. 5:45).

² Mex iga Jehová ityoyba tun̈gakyaj, maaj ityoyba jempɨk ikupɨkyajpa jeʼm ian̈kiʼmayoʼoyiyaj (Juan 14:21). Ixunba iga tan̈wattaʼmiñ juʼuts jeʼ, jeʼyukmɨ taanmajan̈chiʼityaʼmpa iga «tanatoyt́amta̱iñ» kun jeʼm tantɨwɨtam (1 Ped. 4:8; Rom. 12:10). Yɨʼp toyoʼoyi jeex juʼuts jempɨk tanakwiñkejayyajpa tanfamilia o tuum tanamigo.

3. ¿Tyiʼiga tanakwiñkejaytyamtaiñ toyoʼoyi?

³ Jeʼm toyoʼoyi jeex juʼuts tuum planta, ixunba iga tammujiñ y tan̈kuixiñ iga wɨaiñ imɨja. Jeʼm apóstol Pablo iñɨʼmay jeʼm cristianos: «Odoy tsa̱cɨ iga minitoyt́amta̱p con iñt́ɨ̱wɨtam» (Heb. 13:1). Jehová ixunba iga duroj tanakwiñkejaytyaʼmiñ toyoʼoyi tun̈gakyaj. Yɨʼp kuyujijom tan̈kɨʼpin̈taʼmpa tyiʼiga majnam tanan̈pɨʼtstaʼmiñ jeʼm tantɨwɨtam y juutypɨk tan̈wattaʼmpa.

TYIʼIGA TANAN̈PƗʼTSYAJIÑ JEʼM TANTƗWƗTAM

4. Juʼuts nɨmpa Salmo 133:​1, ¿tyiʼiga tantsoowaixtyaʼmiñ jeʼm tantɨwɨtam? (Aʼmɨtyim jeʼm imágenes).

⁴ (Maayɨʼ Salmo 133:1).a Juʼutstyim jeʼm salmista wɨap tannɨmtaʼm «tsaam wɨɨ» y «agui tamaymay» iga jeʼm tanamigos ityoyyajpa Jehová. Pero wɨɨ iga tanakuixtyamtaiñ. Wɨapsɨ tannaskataʼm juʼuts jesɨk algun i iaʼmpa tuum mɨjpɨk kuy, tsaam ikusuʼnɨʼyba y igaʼman̈jakpa, pero iga tumtum jaama iaʼmpa dyam jespɨy ikusuʼnɨʼyba. Jeempɨktyim wɨap tannaskataʼm kun jeʼm tantɨwɨtam, iga juchixkej tanaʼmyajpa, wɨapsɨ iga dyam jespɨy tantoyyajpa. ¿Tyi tayooxpaʼttaʼmpa iga tantsoowaixyajiñ? Tan̈kujɨɨxiñ tyiʼiga tantoyyajpa y tyiʼiga ityyaj jeʼm kumunjom.

5. ¿Tyi naspa jesɨk tun̈gakyaj iaʼmyajpa juʼtspɨy tanatoytyamtaap?

⁵ Jesɨk algun i mojpa nɨkɨ jeʼm an̈tuʼumaaji, tsaam igaʼman̈jakpa jeʼm toyoʼoyi jempɨk tanakwiñkejaytyamtaap y ikupɨkpa iga yɨʼbam jeʼ jeʼm nuntapɨk religión. Jesús nɨm: «Siiga minitoyt́amta̱p con jém iñt́ɨ̱wɨtam, jesɨc it́u̱mpɨy[yaj] […] ijo̱dóŋa̱yajpa iga ɨch maŋcuyujcɨɨwiñ» (Juan 13:35). Tanaʼmtaʼmiñ jempɨk iñaskaʼ Chaithra, okmɨ iga moj ikuyujkaʼ jeʼm Biblia jeʼm yoomtɨwɨ jempɨk sɨʼ idyɨk ikkuyuj ityɨʼp iga nɨguiñ jeʼm mɨjpɨk an̈tuʼumaaji. Jesɨk kuyaj jeʼm wiñtyipɨk jaama, jeʼ iñɨʼmay jeʼm yoomtɨwɨ: «Anjaatun̈yaj ni keman anuʼusneyaj. ¡Pero jeem jaʼyan̈yaj anuʼusyaj! Kun jempɨk iwatyaj anjaam jeʼm Jehová ityoyoʼoyi. Yɨʼmum aitytyoʼoba». Chaithra duroj ikuyujkaʼ jeʼm Biblia y chin̈ jeʼm amtyɨy 2024. Jesɨk jempɨk yaguiñ mojpa ikuyujkayaj jeʼm Biblia iaʼmyajpa juʼtspɨy tanatoytyamtaap, wɨap iwat iga jeʼeyaj ikuyooxayajiñtyim Jehová (Mat. 5:16).

6. ¿Juutypɨk takupujtaʼmpa siiga tanan̈pɨʼtstaʼmpa jeʼm tantɨwɨtam?

⁶ Iga majnam tanan̈pɨʼtstaʼmpa jeʼm tantɨwɨtam takupujtaʼmpa. Pablo iñɨʼmay jeʼm cristianos: «Naŋquímtamta̱jɨ con jém iñt́ɨ̱wɨtam […] iga odoy mimɨgóyáyiñ jém táŋca jém it́wɨɨp [iñanmajom]» (Heb. 3:13). Siiga takuponakettaʼmpa espiritualmente y tanjaamtaʼmpa iga tajɨɨxtyogoytyaʼmpam tansɨʼ, Jehová wɨap ipɨk tuum tɨɨwɨ iga tayooxpaʼttaʼmiñ (Sal. 73:​2, 17, 23). ¡Tsaam tamaymaytyam iga jeʼm tantɨwɨtam tayooxpaʼttaʼmpa!

7. ¿Juutypɨk tayooxpaʼttaʼmpa jeʼm toyoʼoyi iga taitytyaʼmiñ an̈tuumjom? (Colosenses 3:​13, 14).

⁷ Jempɨk tan̈kuyooxataʼmpa Jehová tanteguedataʼmpa iga tanakwiñkejaytyamtaap toyoʼoyi, jeʼyukmɨ tampɨktson̈netaʼm jaʼyan̈ kumaykedoʼoyiyaj (1 Juan 4:11). Jeʼm toyoʼoyi tayooxpaʼttaʼmpa iga duroj tanayaʼachɨytyamtaiñ, yɨʼp iwatpa iga seguido taitytyaʼmiñ an̈tuumjom kun jeʼm tantɨwɨtam (Efes. 4:​2-6; maayɨʼ Colosenses 3:​13, 14). Jeʼyukmɨ tsaam wɨɨ tanan̈jaamtaʼm jesɨk tanɨktaʼmpa jeʼm an̈tuʼumaajiyaj y yɨkxpɨk toyoʼoyi dyaʼ tanaʼmtaʼmpa tun̈gak an̈eymɨ.

TANATOYTYAMTAIÑ KUN JEʼM TANTƗWƗTAM

8. ¿Juutypɨk tayooxpaʼttaʼmpa Jehová iga odoy tanaweʼktamtaiñ?

⁸ Jehová tayooxpaʼtnetaʼm iga odoy tanaweʼktamtaiñ mex iga tatan̈kaɨytyaʼm (1 Cor. 12:25). Jeʼm Biblia nɨmpa: «Dios miŋquejáy ju̱t́pɨc minitoyt́amta̱p con jém iñt́ɨ̱wɨtam» (1 Tes. 4:9). ¿Juutypɨk iwatpa? Ikuyukmɨ jeʼm Biblia tanɨʼmaytyaʼmpa juutypɨk tanatoytyamtaiñ. Jesɨk tammaytyaʼmpa y tan̈watkiʼpstaʼmpa jempɨk tan̈kuyujkataʼmpa, sɨʼ tanaʼmchiʼityam iga Jehová tan̈kejaytyaʼmiñ (Heb. 4:12; Sant. 1:25).

9. Juuts nɨmpa Romanos 12:​9-13, ¿tyiʼiga wɨɨ iga tanawɨnanɨgaytyamtaiñ?

⁹ ¿Juutypɨk tayooxpaʼttaʼmpa jeʼm Dios In̈maatyi iga tantoyyajiñ jeʼm tantɨwɨtam? Tanaʼmtaʼmiñ jempɨk nɨm Pablo en Romanos 12:​9-13 (maayɨʼ). Jeʼ nɨm yɨʼɨmpɨk: «Wɨ̱ iga […] iñt́oyt́ámiñ jém iñt́ɨ̱wɨtam». ¿Tyi nɨmtoʼoba? Iga tanaʼmtaʼmiñ juutypɨk tanakwiñkejaytyamtaap toyoʼoyi, juʼuts jesɨk tan̈wadayyajpa perdón, tan̈wɨpɨktson̈yajpa y tanchiʼiyajpa tyityam tanaitytyaʼm (Efes. 4:32). Siiga mojpa tan̈wattaʼm jeempɨk, kupakpa jempɨk nɨm Jesús: «Más tamaymay iga tachióypa que iga tachiit́a̱p» (Hech. 20:35).

10. ¿Tyi tan̈wattaʼmiñ siiga tantoytyaʼmpa jeʼm tantɨwɨtam? (Aʼmɨtyim jeʼm imagen).

¹⁰ Okmɨ iga Pablo nɨm iga tantoytyaʼmiñ jeʼm tantɨwɨtam, nɨmtyim: «Odoy cut́iña̱taamɨ iga iŋwɨ̱wattámpa. Cuyo̱xataamɨ jém tánO̱mi con it́u̱mpɨy [iñanmaj]». Jempɨk wɨyooxaap maymay jesɨk ipɨktson̈ba tuum yooxakuy y jobitytyi ikkupakpa. Proverbios 3:​27, 28 nɨmpa: «Odoy tsaakɨ iga iñyooxpaʼtyajpa jempɨk wɨɨ iga iñyooxpaʼtyajiñ siiga wɨap in̈wat». Jeʼyukmɨ siiga tanaʼmtaʼmpa iga algun i ixunba yooxpadoʼoyi, tan̈wattaʼmiñ tyityam nasuntaap iga wɨaiñ tanyooxpaʼttaʼm. Odoy tanjɨɨstaʼmiñ iga tun̈gakyaj wɨap iyooxpaʼtyaj (1 Juan 3:​17, 18).

11. ¿Tyi tayooxpaʼttaʼmpa iga tan̈wɨnanɨgaytyaʼmiñ jeʼm tantɨwɨtam?

¹¹ Iga tantoytyaʼmpa jeʼm tantɨwɨtam wɨɨ iga tan̈wadayyajiñ perdón jesɨk iwatyajpa algun tyi iga tantoʼyan̈jaamtaʼmpa. Efesios 4:26 nɨmpa: «Odoy jɨɨcɨ iga mijóyñeeba hasta tɨgɨypa jém ja̱ma». ¿Tyiʼiga? Jeʼm versículo 27 nɨmpa: «Odoy chi̱ɨ lugar jém Woccɨɨwiñ iga micmalwatpa». Jehová juchixkej tanɨʼmaytyaʼmpa iga tan̈wadaytyaʼmiñ perdón tun̈gakyaj. Colosenses 3:13 nɨmpa: «Nawadayt́amta̱jɨ perdón con jém iñt́ɨ̱wɨtam». Jesɨk tan̈wadayyajpa perdón jeʼm tantɨwɨtam majtyim tan̈wɨnanɨgayyajpa y tanan̈pɨʼtsyajpa. Yɨʼp iwatpa iga «[tana]it́t́ámiñ tu̱mt́i jɨ̱xi con jém tantɨ̱wɨtam» (Efes. 4:3). Siiga tanawadaytyamtaap perdón, juchixkej tawagaitytyaʼmpa an̈tuumjom.

12. ¿Juutypɨk tayooxpaʼttaʼmpa Jehová iga tan̈wattaʼmiñ perdón?

¹² A veces tan̈kaʼ tan̈wadaytyaʼm perdón algun i iga tamalwadayñeʼ. Pero Dios kun jeʼm iespíritu santo tayooxpaʼttaʼmpa iga wɨaiñ tan̈wattaʼm perdón. Okmɨ iga tanɨʼmaytyaʼm juutypɨk tanatoytyamtaiñ y tayooxataʼmiñ jeʼm Biblia nɨm: «Cuyo̱xataamɨ jém tánO̱mi». Jeʼm espíritu santo wɨap tayooxpaʼttaʼm iga tanakwiñkejtaʼmiñ toyoʼoyi y tan̈wattaʼmiñ perdón (aʼmɨ jeʼm wɨstenpɨk nota de estudio de Romanos 12:11). Juchixkej tan̈waʼgaytyaʼmiñ Jehová iga tayooxpaʼttaʼmiñ (Luc. 11:13).

ODOY NAWEʼKTAMTAAJƗ

13. ¿Tyi wɨap iwat iga tanaweʼktamtaiñ?

¹³ Jeʼm kumunjom dyaʼ numaaj ityyaj tɨwɨtam de tumtyi an̈eymɨ (1 Tim. 2:​3, 4). Jeʼyukmɨ dyaʼ tumtyi jɨɨxi tampɨktaʼmpa iga juutypɨk tanapuʼktugɨytyamtaap, juʼp tratamiento tampɨktson̈taʼmpa jesɨk tanatsoʼyɨytyamtaap y tyi tan̈wattaʼmpa jesɨk dyaʼ tayooxataʼmpa. Siiga dyaʼ tanakuixtyamtaap yɨʼpyaj wɨap iwat iga tanaweʼktamtaiñ (Rom. 14:4; 1 Cor. 1:10). Pero Dios tan̈kejayñetaʼm iga tanatoytyamtaiñ, jeʼyukmɨ dyaʼ tannɨʼmayyajpa tun̈gakyaj iga jeʼm jɨɨxi tampɨktampaʼap maaj wɨɨ (Filip. 2:3).

14. ¿Tyi wɨɨ iga tan̈wattaʼmiñ, y tyiʼiga?

¹⁴ Jesɨk juchixkej tananmajan̈chiʼiyajpa y tanakpoʼksyajpa tun̈gakyaj, yooxpadoʼyba iga jeʼm kumun odoy naweʼktaiñ (1 Tes. 5:11). Dyanam maaj pekaʼ, jempɨk topneyajta idyɨk de jeʼm kumunjom y jempɨk ichagan̈putneyajum idyɨk Jehová ikuseetneyajum y tantumpɨytyam tan̈wɨpɨktson̈netaʼm (2 Cor. 2:8). Tuum yoomtɨwɨ iga 10 amtyɨyam dyam idyɨk an̈tuʼumaap nɨmpa: «Ityumpɨyyaj tsaam maymayyaj idyɨk y awɨpɨktson̈yaj» (Hech. 3:19). ¿Juutypɨk iwɨwaday? Jeʼ nɨmpa: «Anjaam iga Jehová sɨʼ idyɨk ayooxpaʼt iga eybɨk an̈kuseedyiñ y amaymayaiñ». Jesɨk tanteguedataʼmpa iga taanmajan̈chioytyaʼmpa Jesús wɨap tapɨktaʼm iga tanakpoʼksyajiñ tun̈gakyaj (Mat. 11:​28, 29).

15. ¿Juutypɨk tayooxpadoytyaʼmpa iga jeʼm kumun odoy naweʼktaiñ? (Aʼmɨtyim jeʼm imagen).

¹⁵ ¿Juutypɨk tayooxpadoytyaʼmpa iga jeʼm kumun odoy naweʼktaiñ? Tan̈kuixtyaʼmiñ tyityam tanɨmtaʼmpa y juutypɨk tanɨmtaʼmpa. Job 12:11 nɨmpa: «¿Dyaʼ ikumaton̈ba jeʼm taatsɨk jeʼm an̈matyiyaj juʼuts jeʼm toʼts ikkɨɨnba jeʼm wiʼkkuy?». Tuum wiʼkkuy watpaʼap ikɨʼɨskiʼpspa jeʼm wiʼkkuy wiñtyi iga ityoppa. Jeempɨktyim jesɨk tajɨytyaʼmpa tan̈kuixtyaʼmiñ tyityam tanɨmtaʼmpa y tan̈kɨʼpin̈taʼmiñ siiga jeʼm tanan̈matyiyaj anmajan̈chioʼyba y iwɨwadaʼyba tun̈gakyaj (Sal. 141:3; Efes. 4:29).

16. ¿Ityam ityeguedayajiñ ikuixyaj jempɨk nɨmyajpa?

¹⁶ Jempɨk an̈koʼmɨyñeyajum, jeʼm jaatun̈ y jeʼm aapa ityeguedayajiñ iga jeʼm in̈matyiyaj anmajan̈chioyyajiñ (Col. 3:​19, 21; Tito 2:4). Jeʼm ancianos ikuixyajpa jeʼm Jehová ikumun jesɨk ianmajan̈chiʼiyajpa y ikpoʼksyajpa (Is. 32:​1, 2; Gál. 6:1). Tuum proverbio nɨmpa: «¡Agui wɨɨ jempɨk nɨmpa wɨtampɨk an̈matyiyaj jesɨk nasuntaap!» (Prov. 15:23).

SIIGA TATOYOʼYBA TAYOOXPADOʼYBA

17. ¿Tyi tan̈wattaʼmiñ iga jeʼm tantɨwɨtam ijaamyajiñ iga tantoyyajpa?

¹⁷ Jeʼm apóstol Juan nɨm: «Mamma̱nɨctam, d́a wɨ̱ iga tannɨ́máypa jém tantɨ̱wɨ […], tsa̱m mantoypa, pero ocmɨ d́a tanyo̱xpátpa. Siiga […] it́ogóyáy algun t́i, jesɨc yo̱xpaatɨ, yaachaŋja̱mɨ» (1 Juan 3:18). ¿Tyi tan̈wattaʼmpa siiga tansuntaʼmpa iga jeʼm tantɨwɨtam ijaamyajiñ iga tantoyyajpa? Wɨɨ iga tanan̈pɨʼtsyajiñ, tan̈wɨixpɨkyajiñ y tan̈wɨnanɨgayyajiñ. Siiga jeempɨgam tan̈wattaʼmpa jesɨk tanɨktaʼmpa jeʼm an̈tuʼumaajiyaj y taputtaʼmpa jeʼm an̈matkuy sɨʼ tan̈watkiʼpstaʼm jempɨk nɨmpa jeʼm Biblia: «Porque tanJa̱tuŋ Dios [tan̈]quejáy ju̱t́pɨc [tana]toyt́amta̱p con jém [tantɨwɨtam]» (1 Tes. 4:9). Tanaʼmpatyim iga «tsaam wɨɨ y agui tamaymay iga jeʼm tɨwɨtam ityyajiñ an̈tuumjom» (Sal. 133:1).