KUYUUJI 15
WAAÑI 30 Mi Amigo, mi Padre, mi Dios
Tawɨnɨgaytyaʼmpa siiga tan̈kunuʼktaʼmpa Dios
«Ɨch, maaj awɨnɨgaʼyba siiga an̈kunuʼkpa Dios» (SAL. 73:28).
AN̈KEJAYOʼOYI
Tyi tan̈wattaʼmiñ iga tan̈kunuʼktaʼmiñ Jehová y juutypɨk tawɨwadaytyaʼmpa.
1, 2. a) ¿Tyi tan̈wattaʼmiñ siiga tanamigojatoʼoba algun i? b) ¿Tyi tan̈kɨʼpin̈taʼmpa yɨʼp kuyujijom?
JƗƗSƗ jeʼm iñamigo iniitywɨʼɨp. ¿Iñjɨɨspanam jutsa iga iñamigoja? Wɨapsɨ iga moj inin̈pɨʼts, inimuru y min̈maday tyityam iñaskaneʼ, iñjoodon̈a tyityam ikusuʼnɨʼyba y tyityam dyaʼ. Iñaʼm iga iniity wɨtampɨk cualidades iga in̈watkiʼpstoʼoba. Jesɨk majtyim in̈wɨixpɨk, yɨʼp iwat iga majtyim iñtyoʼyiñ.
2 Iga wɨaiñ tanamigoja algun i nasuntaap tiempo iga tan̈wɨixpɨguiñ. Siiga tanamigojatoʼoba Dios nasuntaptyim tiempo. Yɨʼp kuyujijom tan̈kɨʼpin̈taʼmpa juutypɨk wɨap tan̈kunuʼktaʼm Jehová, jeʼm maaj wɨbɨk amigo iga tanaitytyaʼm. Wiñtyi tan̈kɨʼpin̈taʼmpa tyiʼiga wɨɨ iga tan̈kunuʼktaʼmiñ.
3. ¿Tyiʼiga tan̈kujɨɨstaʼmiñ juutypɨk tawɨwadaytyaʼmpa siiga tanamigojaap Jehová? An̈maatɨ tuum akwiñkejoʼoyi.
3 Juchixkej tan̈kujɨɨstaʼmiñ tyiʼiga wɨɨ iga tan̈kunuʼktaʼmiñ Jehová (Sal. 63:6-8). ¿Tyiʼiga? Tantumpɨytyam tanjoodon̈tam iga tawɨwadaytyaʼmpa siiga tawɨwiʼktaʼmpa, tan̈wattaʼmpa ejercicio, tawɨmon̈taʼmpa y tanuktaʼmpa nɨʼ. Pero jaʼyan̈yaj dyaʼ iwatyajpa jeempɨk, jeʼyukmɨ dyaʼ iniityyaj tuum wɨbɨk salud. Jesɨk algun i ikujɨɨspa juʼtspɨy iwɨwadaʼyba siiga iwatpa jeempɨk wɨapsɨ iga majnam ityeguedaap ikuix imɨjtaay. Tanjoodon̈tam iga wɨɨ iga tan̈kunuktaʼmiñ Jehová, pero siiga tumtum jaama tan̈kujɨɨstaʼmpa juʼtspɨy tawɨwadaytyaʼmpa jesɨk majtyim tan̈kunuʼktamtoʼoba (Sal. 119:27-30).
4. ¿Tyi nɨm jeʼm salmista en Salmo 73:28?
4 (Maayɨʼ Salmo 73:28).a Jempɨk ijaykunuʼk jeʼm Salmo 73 miññeʼ de jeʼm tribu de Leví y músico idyɨk en jeʼm templo. Wɨapsɨ iga jaʼyan̈am amtyɨy sɨʼ idyɨk ikuyooxa Jehová, pero ikutɨʼɨyɨy iga juchixkej ikujɨɨxiñ idyɨk iga tsaam iwɨwadaʼyba iga ikunuʼkpa Dios. Y ixunba idyɨk iga tun̈gakyaj iaʼmyajiñ juʼtspɨy tawɨwadaytyaʼmpa iga tanamigojataʼmpa Jehová. Tan̈kɨʼpin̈taʼmiñ juutypɨk.
JESƗK TAN̈KUNUʼKTAʼMPA DIOS TAMAYMAYATAʼMPA
5. a) ¿Tyiʼiga tamaymaywattaʼmpa jesɨk tan̈kunuʼktaʼmpa Jehová? b) ¿Juutypɨk tayooxpaʼttaʼmpa y takupujtaʼmpa jeʼm Jehová ijoodon̈oʼoyi? (Proverbios 2:6-16).
5 Jesɨk majnam tan̈kunuʼktaʼmpa Jehová, maaj tamaymayataʼmpa (Sal. 65:4). ¿Tyiʼiga? Jesɨk tan̈kupɨgaytyaʼmpa jeʼm ian̈kiʼmayoʼoyiyaj tachiʼipaʼap jeʼm In̈matyijom tsaam tawɨnɨgaytyaʼmpa. Jeʼm joodon̈oʼoyi tayooxpaʼttaʼmpa iga odoy tajɨɨxtyogoytyaʼmiñ y odoy pɨɨmi tatan̈kawattaʼmiñ (maayɨʼ Proverbios 2:6-16).b Jeʼyukmɨ jeʼm Biblia nɨmpa: «Maymay jeʼm pɨɨxiñ jempɨk ipaʼtpa joodon̈oʼoyi y jempɨk iniitypa kutɨʼɨyɨyoʼoyi» (Prov. 3:13).
6. ¿Tyiʼiga dyam idyɨk maymay jeʼm salmista?
6 Pero yɨʼp dyaʼ nɨmtoʼoba iga jeʼm Jehová iamigos ni keman dyaʼ an̈yaʼkyajpa. Jempɨk ijaʼy jeʼm Salmo 73 an̈yaʼk jesɨk moj ijɨɨs iga jempɨk dyaʼ ikupɨkyajpa Dios keʼnam maaj iwɨnɨgayyajpa idyɨk y moj ikunaʼɨy. Ikupɨkpa idyɨk iga jempɨk nakujiʼpyajtaap y jempɨk imalwatyajpa maaj tumiñɨyyaj y ni keman an̈yaʼkyajpa, pero jɨɨxtyogoʼyba idyɨk ixɨʼ (Sal. 73:3-7, 12). Jeʼyukmɨ nakwaʼkta siiga Jehová ichoowaixpa idyɨk jempɨk sɨʼ iwat. Jeʼ nɨm: «Dyaʼ tyi kumeskuy iga anakkuaʼyñeʼ ananmaj y dyatyim tyi kumeskuy iga jeʼm an̈kɨʼ iwɨwatneʼ» (Sal. 73:13).
7. ¿Tyi tayooxpaʼtpa iga eybɨk tamaymayaiñ jesɨk tan̈yaʼkneʼeba? (Aʼmɨtyim jeʼm imagen).
7 Iga jeʼm salmista ikaguiñ ijɨɨxi y odom maaj an̈yaʼguiñ tɨgɨy «jeʼm templojom», y jeem Jehová iyooxpaʼt iga iaʼmiñ tyi idyɨk iñaskayajpa jempɨk imalwatyajpa (Sal. 73:17-19). Iga Jehová tanamigo, ijoodon̈ jesɨk tan̈yaʼkneʼeba. Jeʼyukmɨ tan̈waʼgaʼyiñ iga tajɨɨxian̈chiʼiñ y tampɨktson̈iñ jeʼm iyooxpadoʼoyi tachiʼipaʼap ikuyukmɨ jeʼm In̈maatyi y jeʼm ikumun. Yɨʼbam tayooxpaʼtpa iga odom jespɨy tan̈yaʼguiñ. Mex iga pɨɨmi takobakpijpa, Jehová tayooxpaʼtpa y takpoʼkspa (Sal. 94:19).c
Jeʼm Levita ijaykunuʼk jeʼm Salmo 73 jesɨk tɨgɨy «jeʼm templojom». (Aʼmɨ jeʼm párrafo 7).
JESƗK TAN̈KUNUʼKTAʼMPA DIOS TAWƗITYTYAʼMPA Y TANAITYTYAʼMPA AN̈JOGOʼOYI
8. ¿Juutypɨknam tawɨwadaʼyba siiga tan̈kunuʼkpa Dios?
8 Jesɨk tan̈kunuʼktaʼmpa Dios tsaam tawɨwadaytyaʼmpa. Wiñtyi, tayooxpaʼttaʼmpa iga tawɨitytyaʼmiñ. Y tachiʼityaʼmpa tuum an̈jogoʼoyi jeʼm tannɨgɨyoʼoyijom (Jer. 29:11). Tan̈kɨʼpin̈taʼmiñ yɨʼpyaj jɨɨxi.
9. ¿Tyiʼiga jesɨk tan̈kunuʼktaʼmpa Jehová tayooxpaʼttaʼmpa iga tawɨitytyaʼmiñ?
9 Jesɨk tan̈kunuʼktaʼmpa Jehová tayooxpaʼttaʼmpa iga tawɨitytyaʼmiñ. Yɨʼp jaama, jaʼyan̈yaj nɨmyajpa iga dyaʼ i Dios. Jeʼeyaj dyaʼ ijoodon̈yaj juʼutspɨk ityi tachiʼityaʼmpa Jehová, jeʼyukmɨ ijɨɨsyajpa iga dyaʼ jaʼyñeʼ takkutogoyaytyamtaap. Pero iga tan̈kuyujkanetaʼm jeʼm Dios In̈maatyi, tan̈wɨkupɨktaʼmpa iga nunta ity Dios y «ichiiba jém wɨbɨc coñwɨyooyi jém pɨxiñt́am jém imétsyajpáppɨc» (Heb. 11:6). Jehová tawattaʼm kun jeʼm jɨɨxi iga tan̈koosteñaytyaʼmiñ. Jeʼyukmɨ jesɨk tan̈kuyooxataʼmpa tamaymaytyam y tsaam tawɨitytyaʼmpa (Deut. 10:12, 13).
10. Juʼuts nɨmpa Salmo 37:29, ¿juʼp an̈jogoʼoyi iniityyaj jempɨk ikupɨkyajpa Jehová?
10 Jaʼyan̈yaj dyaʼ iniityyaj tuum an̈jogoʼoyi. Jeʼyukmɨ numaaj yooxayajpa, ikmɨjayajpa imanɨktam y iktuʼmyajpa tumiñ iga wɨaiñ inimatspakyajta jesɨk tsaamiyajam. Ijɨɨsyajpa iga dyaʼ i Dios. Pero taɨchtyam tanaitytyaʼm tuum an̈jogoʼoyi (Sal. 25:3-5; 1 Tim. 6:17). Tan̈kupɨktaʼmpa iga tanDios y tanamigo, Jehová, ikkupakpa ityumpɨy jempɨk ijɨykamneʼ. Tampɨktson̈taʼmpa jaʼyan̈ kumaykedoʼoyiyaj jeʼm tannɨgɨyoʼoyijom, tuum de jeʼ iga en jeʼm Paraíso juchixkej tan̈kuyooxataʼmpa Jehová (maayɨʼ Salmo 37:29).d
11. ¿Juutypɨk tawɨwadaytyaʼmpa iga tan̈kunuʼktaʼmpa Dios, y juʼuts in̈jaam jeʼ?
11 Tsaam tawɨwadaytyaʼmpa siiga tan̈kunuʼktaʼmpa Dios. Jehová ijɨykamneʼ iga tawadaytyaʼmpa perdón siiga dyam maaj tatan̈kawattaʼmpa (Is. 1:18). Yɨʼp nɨmtoʼoba iga jeʼm tanjɨɨxi dyam tamogɨʼyba por jeʼm tan̈kaʼ tan̈watnewɨʼɨp (Sal. 32:1-5). Jehová maymay jesɨk iaʼmpa iga tan̈kunuʼktaʼmpa (Prov. 23:15). Iga iñamigojaneʼ Jehová impɨktson̈neʼ jaʼyan̈ kumaykedoʼoyiyaj. Pero, ¿tyiñam wɨap tan̈wattaʼm iga majnam tan̈kunuʼktaʼmiñ?
TYI TAN̈WATTAʼMIÑ IGA MAJNAM TAN̈KUNUʼKTAʼMIÑ DIOS
12. ¿Tyi wɨɨ iga in̈wadyiñ iga majnam in̈kunuʼguiñ Dios?
12 Siiga mich michin̈neum juʼuts Jehová itestigo nɨmtoʼoba iga majtyim iñixpɨkpa Jehová y Jesucristo, in̈kakneum iñjɨɨxi, inikwiñkejneum fe en Dios y in̈watneʼ juʼtspɨyam miwɨap iga in̈kupɨgaʼyba jeʼm ian̈kiʼmayoʼoyiyaj. Pero wɨɨ iga juchixkej tan̈wattaʼmiñ jeempɨk iga majnam tan̈kunuʼktaʼmiñ (Col. 2:6).
13. ¿Tyi tayooxpaʼttaʼmpa iga majnam tan̈kunuʼktaʼmiñ Jehová?
13 ¿Tyi tayooxpʼattaʼmpa iga majnam tan̈kunuʼktaʼmiñ Jehová? 1) Tammaytyaʼmiñ y tan̈kuyujkataʼmiñ jeʼm Biblia. Odoy numaaj tatsɨʼytyaʼmiñ kun jempɨk tan̈joodon̈tamam. Tan̈wɨkutɨʼɨyɨytyaʼmiñ tyi jempɨk ixunba iga tan̈wattaʼmiñ y tan̈watkiʼpstaʼmiñ tañityijom (Efes. 5:15-17). 2) Tan̈kujɨɨstaʼmiñ tyityam iwatneʼ Jehová por taɨchtyam iga tsaam tatoytyaʼmpa, yɨʼbam ipɨɨmchiʼiba tanfe. 3) Tanjooyixtyaʼmiñ ityumpɨy jempɨk Jehová ijooyixpa y odoy tanan̈pɨʼtsyajiñ jempɨk tsaam imalwatyajpa (Sal. 1:1; 101:3).
14. Iga tammaymaywattaʼmtoʼoba Jehová ¿tyi wɨɨ iga tan̈wattaʼmiñ? (1 Corintios 10:31; aʼmɨtyim jeʼm imágenes).
14 (Maayɨʼ 1 Corintios 10:31). Juchixkej tanteguedataʼmiñ tan̈wattaʼm jempɨk imaymaywatpa Jehová. Dyaʼ numaaj jesɨk taputtaʼmpa jeʼm an̈matkuy o iga tanɨktaʼmpa jeʼm an̈tuʼumaajiyaj. Juchixkej tan̈wattaʼmiñ jempɨk ikusuʼnɨʼyba Jehová. Jeʼ ixunba iga tan̈wɨwattaʼmiñ y tachioytyaʼmiñ jempɨk tanaitytyaʼm (2 Cor. 8:21; 9:7). Ixunbatyim iga tanakwiñkejtaʼmiñ iga tantsoowaixtyaʼmpa jeʼm ityi tachiʼiñetamwɨʼɨp. Jeʼyukmɨ tan̈kuixtyaʼmpa tyityam tankɨʼɨstaʼmpa y tyityam tanuktaʼmpa iga yɨʼɨmpɨgam majnam wɨap tanakuixtyamta. Jehová tsaam ichoowaixpa y majnam tatoytyaʼmpa siiga tanteguedataʼmpa iga tanakuixtyamtaap (Luc. 16:10).
Jesɨk tan̈kuixpa juutypɨk tanakwitypa tan̈carro, tan̈watpa ejercicio, tawɨwiʼkpa y tachioytyaʼmpa tyityam tanaitytyam tammaymaywattaʼmpa Jehová. (Aʼmɨ jeʼm párrafo 14).
15. ¿Tyiʼiga ixunba Jehová iga tanawɨnanɨgaytyamtaiñ?
15 Jehová tsaam tawɨwadaytyaʼmpa dyaʼ tyi ijoo siiga tan̈kuyooxataʼmpa o dyaʼ (Mat. 5:45). Jeʼ in̈joʼkpa iga jeempɨktyim tan̈wattaʼmiñ. Ixunba iga jempɨk sɨʼ ikuyooxayaj «odoy i̱ imalnɨ́máyiñ», «odoy áŋa̱yajiñ» y «iwɨ̱nanɨgáyiñ it́u̱mpɨy[yaj]» (Tito 3:2). Jeʼyukmɨ odoy tanjɨɨstaʼmiñ iga maaj tan̈wɨwattaʼmpa que jempɨk dyaʼ ikuyooxayajpa Jehová (2 Tim. 2:23-25). Siiga juchixkej tan̈wɨnanɨgayyajpa tun̈gakyaj majtyim tan̈kunuʼktaʼmpa Jehová.
JESƗK TAN̈YAʼKNETAʼM TAN̈KUNUʼKTAʼMIÑ JEHOVÁ
16. ¿Juʼuts idyɨk in̈jaam jempɨk ijaykaʼm jeʼm Salmo 73?
16 A veces wɨapsɨ iñjɨɨs iga Jehová mijagan̈tsakneum. Jeempɨgam ijaam jeʼm salmista jempɨk ijay jeʼm Salmo 73. Jeʼ nɨm: «Ɨch awidyan̈puttɨʼp, jeʼm ampuy neban̈nastɨʼp» (Sal. 73:2). Jeʼ nɨm iga tsaam idyɨk «joʼyan̈jakneʼ», dyaʼ idyɨk sɨʼ «iwɨpɨk ijɨɨxi» y Jehová iwiñjom jeex idyɨk «juʼuts tuum animat» (Sal. 73:21, 22). Iga tan̈kaɨykɨʼɨwiñ dyaʼ iwɨpɨk ijɨɨxi, ¿ijɨɨssɨ iga Jehová dyam idyɨk ityoyba?
17. a) ¿Tyi iwat jeʼm salmista jesɨk tsaam an̈yaʼk? b) ¿Juutypɨk tayooxpaʼttaʼmpa jempɨk iñaskaʼ? (Aʼmɨtyim jeʼm imágenes).
17 Jeʼm salmista ijɨɨs iga Jehová dyam idyɨk ityoyba. Pero tsaam pɨɨmi an̈yaʼk ikutɨʼɨyɨy iga maaj wɨɨ iga ikunuʼguiñ Jehová. Wɨap tannɨmtaʼm jeempɨk iga jeʼ nɨm: «Pero sɨɨ juchixkej man̈waganaitypa; mich ammatsayñeʼ jeʼm anan̈wɨɨmɨ. Anjɨɨxian̈chiʼiba y okmɨ ananɨkpa jeʼm an̈eymɨ iga agui wɨkom» (Sal. 73:23, 24). Jesɨk tan̈yaʼktaʼmpa tan̈kupɨktaʼmiñ iga Jehová tayooxpaʼttaʼmpa (Sal. 73:26; 94:18). ¿Y siiga nuʼkpa jaama iga jeʼm tampuy neban̈naspa? Wɨap tan̈kuseettaʼm Jehová iga jeʼ tawadaytyaʼmpa perdón (Sal. 86:5). Jesɨk tan̈yaʼktaʼmpa jesɨgam majnam tan̈kunuʼktaʼmiñ Jehová (Sal. 103:13, 14).
Jesɨk takuponaketnetaʼm espiritualmente wɨɨ iga majtyim tan̈kunuʼktaʼmiñ Jehová. (Aʼmɨ jeʼm párrafo 17).
JUCHIXKEJ TAN̈KUNUʼKTAʼMIÑ JEHOVÁ
18. ¿Tyiʼiga dyaʼ yajpa tañixpɨktaʼm Jehová?
18 Jesɨk tan̈kunuʼktaʼmpa Jehová dyaʼ yajpa tañixpɨktaʼm. Jeʼm Biblia nɨmpa iga jeʼm ijoodon̈oʼoyi, jeʼm iixpɨgoʼoyi y jeʼm ityun̈ dyaʼ wɨap tan̈kutɨʼɨyɨytyaʼm (Rom. 11:33).
19. ¿Tyi takkupɨktaʼmpa yɨʼpyaj Salmo?
19 Salmo 79:13 nɨmpa: «Jesɨk aɨchtyam, jempɨk man̈kuyooxataʼmpa, juchixkej manchiʼityaʼmpa gracias y anan̈madaytyaʼmpa ityumpɨy jempɨk in̈watneʼ jempɨk nayyajpanam okmɨ». Odoy kujaʼamaʼayɨ: siiga duroj in̈kunuʼkpa Jehová jeʼ mikumayketpa y juʼutstyim jeʼm salmista wɨap iññɨm: «Dios jeʼam jempɨk ipɨɨmchiʼiba ananmaj y jeʼam jempɨk achiʼiñeta» (Sal. 73:26).
WAAÑI 32 ¡Ponte de parte de Dios!
a Salmo 73:28 Pero, ɨch maaj awɨnɨgaʼyba siiga an̈kunuʼkpa Dios. Jeʼm anOmi An̈jagoʼoyi Jehová akupujpa iga wɨaiñ anan̈mat ityumpɨy jempɨk iwatneʼ.
b Proverbios 2:6-16 6 Iga Jehová jeʼam jempɨk chioʼyba joodon̈oʼoyi; jeʼm ijɨpjom putpa ixpɨgoʼoyi y kutɨʼɨyɨyoʼoyi. 7Jeʼ ichiʼiba joodon̈oʼoyi jempɨk iwɨwatyajpa; ikupujpa jempɨk numsɨsɨoyyajpa. 8 Jeʼ ikuixpa jeʼm tun̈ iga iniity justicia y ikupujaʼyba ityun̈ jempɨk dyaʼ ijagan̈tsakyajpa. 9 Jesɨk mich in̈kutɨʼɨyɨʼyba jeʼm wɨwadoʼoyi, jeʼm numsɨsɨoʼoyi, jeʼm neejaixoʼoyi y ityumpɨy jempɨk wɨɨ. 10 Jesɨk jeʼm joodon̈oʼoyi tɨgɨʼyba iñanmajom y jeʼm ixpɨgoʼoyi iwɨwadaʼyba jeʼm iñityi, 11 jempɨk in̈kujɨɨspa mikuixpa y jeʼm kutɨʼɨyɨyoʼoyi mikupujpa 12 iga odoy immalwadyiñ, odoy inin̈pɨʼchiñ jempɨk imalwatpa, 13 jempɨk ichakyajpa iga iwɨwatyajpa iga nɨkyajpa jeʼm tun̈ iga piʼichkɨʼɨm,14 jempɨk maymayyaj iga imalwatyajpa, maymayyaj kun jeʼm malwadoʼoyi, 15 jempɨk dyaʼ iwɨpɨkyajpa ijɨɨxi y duroj imalwatyajpa. 16 Jeʼm joodon̈oʼoyi mikupujpa de jeʼm yoomoʼ imalwatpaʼap, de jeʼm an̈matyiyaj iga wɨap miktan̈kawat.
c Jempɨk ijaamyajpa iga iniityyaj ansiedad y an̈yaʼkyajpa nasuntaap iga ikuaʼmyajiñ yooxpadoʼoyi kun tuum doctor. Impaʼtpa maaj información en La Atalaya número 1 del 2023.
d Salmo 37:29 Jeʼm ikupɨkyajpaʼap Dios initsɨʼyyajpa yɨʼp nas y jeʼeyaj iitykayajpa ityumpɨy jaama.