«It́t́aamɨ listo» jesɨk nuʼkpa jeʼm Jehová ijaama

1. ¿Tyi tan̈wadyiñ iga wɨaiñ tanakɨakputta jesɨk nuʼkpa jeʼm Jehová ijaama?

JESƗK jeʼm Biblia ipɨkpa jeʼm an̈maatyi «tánO̱mi ija̱ma» nɨmtoʼoba jesɨk jeʼ ikkutogoyaʼyba jeʼm ienemigojyaj y ikupujpa jeʼm ikumun. Wiñɨk jaama, jeempɨgam iwat Jehová kun weeñi tɨgan̈juj (Is. 13:1, 6; Ezeq. 13:5; Sof. 1:8). Jesɨk nuʼkpa jeʼm «tánO̱mi ija̱ma» mojpa iktogoytya jeʼm Mɨjpɨk Babilonia y kuyajpa kun Armagedón. Iga wɨaiñ tanakɨakputta peʼm «ja̱ma» dende sɨɨ wɨɨ iga taidyiñam listo. Jesús nɨm «it́t́aamɨ listo» jesɨk nuʼkpa jeʼm mɨjpɨk «yaacha̱ji», kun yɨʼpyaj an̈matyiyaj in̈kej iga juchixkej taitytyaʼmiñ listo (Luc. 12:40; Mat. 24:21).

2. ¿Tyiʼiga wɨɨ iga tan̈kɨʼpin̈taʼmiñ jeʼm Wiñtyipɨk Carta a jeʼm Tesalonicenses?

² En jeʼm Wiñtyipɨk Carta a jeʼm Tesalonicenses, jeʼm apóstol Pablo in̈mat waatyi akwiñkejoʼoyiyaj iga wɨaiñ iyooxpaʼt jeʼm cristianojyaj iga ityyajiñ listo jesɨk nuʼkpa jeʼm jaama ikupin̈newɨʼɨp Jehová. Pablo ijoodon̈ idyɨk iga jaʼyñenam jesɨk nuʼkpa peʼm jaama (2 Tes. 2:1-3). Pero tsaam importante idyɨk iga ityyajiñ listo keʼnam jesɨk jeʼm jaama toomianeum. Taɨchtyam wɨaptyim tan̈kupɨktaʼm yɨʼp an̈kiʼmayoʼoyi. Tanaʼmtaʼmiñ tyi nɨm jesɨgam in̈mat 1) jutsaap iñuʼk jeʼm jaama ikupin̈newɨʼɨp Jehová, 2) ityam aktogoyyajtaap y 3) tyi wɨap tan̈wattaʼm iga taitytyaʼmiñ listo.

¿JUTSAAP IÑUʼK JEʼM JAAMA IKUPIN̈NEWƗʼƗP JEHOVÁ?

3. ¿Tyiʼiga jeʼm jaama ikupin̈newɨʼɨp Jehová nuʼkpa juʼuts tuum nuʼmpaʼap tsuʼukɨʼɨm? (Aʼmɨtyim jeʼm imagenyaj).

³ «Juuts tu̱m númpaap miñpa tsuucɨɨm» (1 Tes. 5:2). Yɨʼbam jeʼm wiñtyipɨk akwiñkejoʼoyi iga ijɨykiʼmpa Pablo jesɨk in̈matpa jutsaap iñuʼk jeʼm jaama ikupin̈newɨʼɨp Jehová. Jeʼm nuʼmyajpaʼap nuʼkyajpa piʼichkɨʼɨm jesɨk ni i dyaʼ ikujɨɨsneʼ y jobity nuʼmyajpa. Jeempɨktyim naspa kun jeʼm jaama ikupin̈newɨʼɨp Jehová, jobity nuʼkpa y jaʼyan̈yaj ikupiʼichkaɨyyajpa. Wɨapsɨ iga jeʼm nuntapɨk cristianojyaj igaʼman̈jakyajpa iga tsaam jikskɨy naspa ityumpɨy. Pero taɨchtyam dyaʼ i taktogoytyaʼmpa, aktogoyyajtaap jempɨk imalwatyajpa.

4. ¿Tyiʼiga jeʼm jaama ikupin̈newɨʼɨp Jehová nuʼkpa juʼuts tuum yoomoʼ jesɨk toyba imaanɨk iga nayba?

⁴ «Juuts tu̱m yo̱mo [...] iga toypa ima̱nɨc iga naypa» (1 Tes. 5:3). Tuum yoomoʼ iga manɨkkomkaneʼ dyaʼ iwɨjoodon̈ juchix mojpa tooyiʼ jeʼm imaanɨk. Pero iwɨjoodon̈ iga jesɨk nuʼkpa jeʼm jaama iga nayba imaanɨk, pɨɨmi toyba y dyaʼ in̈joʼkpa. Jeempɨktyim naspa kun jeʼm jaama ikupin̈newɨʼɨp Jehová, mex iga dyaʼ tanjoodon̈tam juʼp jaama y juchix hora nuʼkpa, tan̈wɨkupɨknetaʼm iga nuʼkpa. Tanjoodon̈tam iga jeʼ ikkupakpa jempɨk nɨmneʼ y ikkutogoyaʼyba jempɨk imalwatyajpa.

5. ¿Tyiʼiga jeʼm mɨjpɨk yaʼachaaji jeex juʼuts jesɨk kukejiam ixɨʼ?

⁵ Juʼuts jesɨk kukejiam ixɨʼ. Jeʼm tukutenpɨk akwiñkejoʼoyi, Pablo eybɨk ijɨykiʼm jempɨk nuʼmyajpa piʼichkɨʼɨm, pero sɨɨ usan̈ kukakneʼ. Wɨapsɨ iga Pablo sɨʼ ikwiñkej jeʼm Jehová ijaama juʼuts jesɨk kukejiam ixɨʼ (1 Tes. 5:4). Wɨapsɨ iga jempɨk nuʼmyajpa pɨɨmi ityeguedayajpa jesɨk nuʼmpa ixɨʼyaj y dyaʼ iaʼmyajpa jutsaap iñɨk jeʼm tiempo. Y dyatyim iaʼmyajpa juchix mojpa kukeji y dyaʼ ijɨɨsyajpa iga wɨap ikupaʼdɨyyajta. Jeempɨktyim naspa jesɨk nuʼkpa jeʼm mɨjpɨk yaʼachaaji. Jempɨk imalwatyajpa keʼnam jesɨk ityyaj piʼichkɨʼɨm, juʼutstyim jeʼm nuʼmyajpaʼap pero wiñkukejayayajpa. Taɨchtyam dyaʼ tajeextyam, taɨchtyam tanakwiñkejtaʼmpa iga taitytyaʼmum listo jesɨk nuʼkpa jeʼm jaama ikupin̈newɨʼɨp Jehová. ¿Juutypɨk? Dyaʼ tan̈watpa jempɨk Jehová ijooyixpa y tanteguedaap iga tan̈wɨwatpa, tanuuman̈matpa y tanakwiñkejpa yaʼachan̈jamoʼoyi (Efes. 5:8-12). Okmɨ Pablo in̈matpa wɨsteen akwiñkejoʼoyiyaj juuty ijɨykiʼmpa jempɨk aktogoyyajtaap jesɨk nuʼkpa jeʼm jaama ikupin̈newɨʼɨp Jehová.

¿ITYAM AKTOGOYYAJTAAP JESƗK NUʼKPA JEʼM JEHOVÁ IJAAMA?

6. ¿Tyiʼiga jaʼyan̈yaj keʼnam mon̈yajpa? (1 Tesalonicenses 5:6, 7).

⁶ «Jém moŋyajpaap» (maayɨʼ 1 Tesalonicenses 5:6, 7). Pablo nɨm iga jempɨk mon̈yajpa jeʼam jempɨk aktogoyyajtaap jesɨk nuʼkpa jeʼm jaama ikupin̈newɨʼɨp Jehová. Jesɨk algun i mon̈ba dyaʼ iaʼmpa tyityam naspa, dyaʼ ityeguedaap weeñi tyidyin̈kej y dyaʼ iaʼmpa jutsaap iñas jeʼm tiempo. Jeempɨktyim naspa espiritualmente: jaʼyan̈yaj mon̈yajpa (Rom. 11:8). Dyaʼ ityeguedayajpa iga taitytyaʼmum jeʼm «íŋaŋpɨgam ja̱ma» y iga toomianeum jeʼm mɨjpɨk yaʼachaaji. Jesɨk itypa tan̈kapɨk nasɨyoʼoyiyaj yɨʼp naxyukmɨ, ity jempɨk yusyajpa uxan̈ y ityeguedayajpa jeʼm Dios In̈maatyi. Pero waatyiyaj ikujaʼamayyajpa y eybɨk mon̈an̈jakyajpa. Itytyim jempɨk ikupɨkyajpa iga nuʼkpa jeʼm jaama jesɨk Dios kɨʼpin̈oʼyba, pero ijɨɨsyajpa iga dyanam sɨʼ iñuʼk (2 Ped. 3:3, 4). Pero taɨchtyam tanjoodon̈tam iga sɨʼam maaj tanteguedataʼmiñ jeʼm an̈kiʼmayoʼoyi iga tayusnetaʼmiñ.

7. ¿Tyiʼiga jempɨk aktogoyyajtaap jeexyaj juʼuts jeʼm uukiyaj?

⁷ Jempɨk «u̱quia̱yajpa». Jeʼm apóstol Pablo nɨm iga jempɨk aktogoyyajtaap jeexyaj juʼuts jeʼm uukiyaj. Jempɨk uukiaap togoyba jeʼm ijɨɨxi y dyaʼ ijoodon̈ tyi iwatpa. Jeempɨktyim naspa kun jempɨk imalwatyajpa, dyaʼ ikupɨkyajpa jempɨk Dios iwatpa dyaʼ jaʼyñeʼ y dyaʼ ikakyajtoʼoba jeʼm iityi. Pero jeʼm apóstol ichiʼ jeʼm an̈kiʼmayoʼoyi a jeʼm cristianojyaj iga wɨjɨɨxiɨyyajiñ, y odoy ukneyajiñ (1 Tes. 5:6). Tuum biblista nɨmpa iga jesɨk algun i dyaʼ ukneʼ «iwɨjɨɨspa tyityam iwatpa y iwɨpɨkpa ijɨɨxi». Pero ¿tyiʼiga tan̈wɨjɨɨstaʼmiñ tyi tan̈watpa y tan̈wɨpɨktaʼmiñ tanjɨɨxi? Iga jeʼm política y tyityam naspa yɨʼp naxyukmɨ dyaʼ tan̈kaʼ takagay tanjɨɨxi. Sɨɨ iga majtyim toomianeʼ jeʼm Jehová ijaama, majnam tateguedɨytyaap iga tan̈kuyaʼgɨʼyiñ tuum an̈jagoʼoyi. Pero odoy takobakpijtyaʼmiñ tyi wɨap tan̈kutson̈taʼm, jeʼm Dios iespíritu tayooxpaʼtpa iga wɨaiñ tampɨk wɨtampɨk jɨɨxiyaj (Luc. 12:11, 12).

¿JUUTYPƗK WƗAP TAÑITYTYAʼM LISTO JESƗK NUʼKPA JEʼM JEHOVÁ IJAAMA?

8. Juʼuts nɨmpa 1 Tesalonicenses 5:8, ¿tyi tatogoyaytyaʼm iga tayusnetaʼmiñ y tanaitytyaʼmiñ tuum wɨbɨk jɨɨxi? (Aʼmɨtyim jeʼm imagen).

⁸ Tanakkaʼmtaʼmiñ jeʼm coraza y jeʼm casco. Pablo takwiñkejtaʼm juʼuts jeʼm soldados iga nakuixyajtaap y ikkaʼmneyaj iarmadura (maayɨʼ 1 Tesalonicenses 5:8). Jesɨk itypa tuum an̈aaji jeʼm soldado juchixkej idyiñ listo. Jeempɨktyim tan̈wattaʼmiñ. Siiga tanakkaʼmnetaʼmpa jeʼm coraza yɨʼp nɨmtoʼoba jeʼm fe y jeʼm toyoʼoyi, y jeʼm casco iga yɨʼp nɨmtoʼoba jeʼm an̈jogoʼoyi, tanakwiñkejtaʼmpa iga taitytyaʼm listo jesɨk nuʼkpa jeʼm Jehová ijaama. Yɨʼp pɨɨmi tayooxpaʼttaʼmpa.

9. ¿Juutypɨk takupujpa jeʼm fe?

⁹ Juʼutstyim jeʼm coraza ikupujaʼyba idyɨk jeʼm soldado ianmaj, jeʼm fe y jeʼm toyoʼoyi takupujaʼyba tananmaj simbólico. Yɨʼpyaj jɨɨxiyaj y jaamoʼoyiyaj tayooxpaʼttaʼmpa iga seguido tan̈kuyooxataʼmiñ Jehová y tantun̈ɨytyaʼmiñ Jesús. Iga tanaitytyaʼm fe, tan̈kupɨktaʼmpa iga Jehová ikumayketpa jempɨk dyaʼ ijagan̈tsakyajpa (Heb. 11:6). Y tayooxpaʼtpatyim iga tan̈kupɨguiñ jeʼm tanLíder, Jesús, dyaʼ tyi ijoo juʼp yaʼachaaji tanan̈an̈kamokpa. Iga tampɨɨmchiʼiñ jeʼm tanfe y wɨaiñ tanan̈an̈kamok jeʼm kobakpiijiyaj, tanteguedaiñ juutypɨk jeʼm tɨwɨtam kupɨgoyyajpa jesɨk yaʼachwatyajtaap o jesɨk tumiñ kuyajyajpa. Siiga dyaʼ tansunba iga mojiñ tanaity jeʼm kusuʼnɨyoʼoyi iga tanaitytyoʼoba jeʼm tyidyin̈kejyaj materiales, wɨap tantun̈ɨyayyaj jeʼm tɨwɨtam iakwiñkejoʼoyiyaj jempɨk maaj ityeguedayajpa iga ikuyooxayajpa Dios.b

10. ¿Juutypɨk tayooxpaʼttaʼmpa jeʼm toyoʼoyi tanaidyaytyamwɨʼɨp Dios y tun̈gakyaj?

¹⁰ Iga tayusnetaʼmiñ y tanaitytyaʼmiñ tuum wɨbɨk jɨɨxi, nasuntaap iga tanaitytyaʼmiñ toyoʼoyi (Mat. 22:37-39). Juʼuts akwiñkejoʼoyi, jesɨk tantoytyaʼmpa Dios tayooxpaʼttaʼmpa iga seguido tanan̈mattaʼmiñ jeʼm In̈maatyi mex iga tanan̈an̈kamoktaʼmpa kutɨʼɨchiyaj (2 Tim. 1:7, 8). Iga tantoyyajpatyim tun̈gakyaj, tan̈wattaʼmpa juʼtspɨyam tawɨap iga tanan̈kejaytyaʼmpa jeʼm Dios In̈maatyi, tan̈wattaʼmpa por teléfono o por carta, tansuntaʼmpa iga iixpɨkyajiñ Jehová. Y tanan̈joʼktaʼmpa iga ikakyajiñ jeʼm iityi y mojiñ iwɨwatyaj (Ezeq. 18:27, 28).

11. ¿Juutypɨk tayooxpaʼtpa jeʼm toyoʼoyi tanaidyaywɨʼɨp jeʼm tantɨwɨtam? (1 Tesalonicenses 5:11).

¹¹ Tantoytyaʼmpatyim jeʼm tantɨwɨtam y tanakwiñkejtaʼmpa jesɨk tanaanmajan̈chiʼityamtaap y tanapɨɨmchityamtaap (maayɨʼ 1 Tesalonicenses 5:11). Jeʼm soldados jempɨk nɨkpa an̈aajiyaj nayooxpaʼtyajtaap. Pero, jesɨk ityyajpa en tuum an̈aaji wɨapsɨ iga nakkoʼowayajtaap mex iga dyaʼ idyɨk iwatyajtoʼoba jeempɨk. Jeempɨktyim naspa kun taɨchtyam dyaʼ tammalwadaytyamtoʼoba jeʼm tantɨwɨtam (1 Tes. 5:13, 15). Tanakwiñkejpatyim iga tantoyyajpa jeʼm tɨwɨtam jesɨk tanaidyaʼyba respeto jempɨk ikuixyajpa jeʼm kumun (1 Tes. 5:12). Tan̈kujɨɨstaʼmiñ jeʼm kumun itywɨʼɨp idyɨk Tesalónica. Jesɨgam Pablo ijaʼyay yɨʼp carta toomiam tuum amtyɨy iga ity idyɨk yɨʼp kumun. Wɨapsɨ iga jeʼm ancianojyaj dyanam jaʼyan̈ tiempo ininɨkiyaj y jɨɨxtyogoyyajpatyim idyɨk, pero nasuntaap idyɨk iga akwiñkejayyajtaiñ respeto. Jesɨk majtyim toomianeum iga nuʼkpa jeʼm mɨjpɨk yaʼachaaji, wɨapsɨ iga jeʼm central mundial y jeʼm sucursal dyam wɨap tayooxpaʼtyaj, jesɨgam maaj tatogoyaytyaʼmpa jeʼm yooxpadoʼoyi tachiʼiyajpaʼap jeʼm ancianojyaj. Jeʼyukmɨ dende sɨɨ tantoyyajiñ y tanaidyayyajiñ respeto jeʼm ancianojyaj ityyajwɨʼɨp tan̈kumunjom. Naxiñ tyi naspa, tanaitytyaʼmiñ tuum wɨbɨk jɨɨxi y odoy tanteguedataʼmiñ jeʼm ityan̈kayaj. Tanjɨɨskupaknetaʼmiñ iga Jehová ichiʼiñeʼ jeʼm yooxakuy a Cristo iga ijɨɨxian̈chiʼiñ yɨʼpyaj pɨxiñtyam.

12. ¿Juutypɨk jeʼm an̈jogoʼoyi ikupujpa jeʼm tanjɨɨxi?

¹² Juʼutstyim jeʼm casco ikupujaʼyba idyɨk jeʼm soldado ikoobak, jeʼm an̈jogoʼoyi takupujaʼyba jeʼm tanjɨɨxi. Iga tanjɨɨskupaknetaʼmpa jeʼm an̈jogoʼoyi jeʼyukmɨ tanaʼmtaʼmpa iga ityumpɨy jempɨk ity yɨʼp naxyukmɨ dyaʼ tyi kumeskuy (Filip. 3:8). Jeʼm an̈jogoʼoyi tayooxpaʼtpatyim iga odoy pɨɨmi tan̈yaʼguiñ. Jeʼam jempɨk iñaskayaj Wallace y Laurinda, kuyooxaoyyajpa en África. Numaaj tukuteen semana nas iga tuum kaʼ jeʼm ijaatun̈ y tun̈gak kaʼ iaapa. Iga ity jeʼm pandemia del COVID-19 dyaʼ wɨa mu ixeetyaj jeʼm ipaís iga iwaganaityyajpa jeʼm ifamilia. Jeʼ nɨmpa: «Jeʼm an̈jogoʼoyi iga itypa tuum aktsukumoʼoyi, pɨɨmi ayooxpaʼt. Dyaʼ an̈kujɨɨspa juʼtspɨy yaʼachayaj jesɨgam kaʼayaj, an̈kujɨɨspa juʼutsam jeʼm iityiyaj jeʼm jomnaxyukmɨ. Iga anaity yɨʼp an̈jogoʼoyi, maaj wɨɨ anan̈jaam y dyaʼ jespɨy an̈yaʼkpa mex iga kaʼayaj».

13. ¿Tyi wɨap tan̈wattaʼm iga Jehová tachiʼityaʼmiñ jeʼm iespíritu santo?

¹³ «Odoy acpichaayɨ jém Dios [ipɨɨmi] ijuctɨ» (1 Tes. 5:19). Pablo nɨm iga jeʼm espíritu santo keʼnam tuum juktɨ iga yoʼtpa tanjojmɨʼ. Yɨʼp espíritu tayooxpaʼttaʼmpa iga tanaitytyaʼmiñ jeʼm maymayaaji y jeʼm pɨɨmi iga wɨaiñ tan̈wattaʼm jempɨk Jehová ikusuʼnɨʼyba y tan̈wɨkuyooxataʼmiñ (Rom. 12:11). ¿Tyi wɨap tan̈wattaʼm iga Jehová tachiʼityaʼmiñ jeʼm iespíritu santo? Tan̈waʼgaʼyiñ, tan̈kuyujkaaʼyiñ jeʼm In̈maatyi y odoy tantsaguiñ jeʼm iorganización. Siiga yɨʼɨmpɨgam tan̈watpa tanaitypa wɨtampɨk jɨɨxiyaj y jaamoʼoyiyaj (Gál. 5:22, 23).

14. ¿Tyi odoy tan̈wadyiñ siiga tansunba iga Dios tachiʼiñ jeʼm iespíritu? (Aʼmɨtyim jeʼm imagenyaj).

¹⁴ Jehová tachiʼiba jeʼm iespíritu, pero wɨɨ iga tanakuixtyaiñ. Dyaʼ tan̈wattoʼoba algun tyi iga wɨap ikpiʼchay jeʼm espíritu «ijuctɨ». Iga tachiʼiñ jeʼm iespíritu, tawɨsɨsɨoʼyiñ y kuaʼyñeiñ jeʼm tanjɨɨxi. Siiga tanaʼmchiʼiba iga jeʼm malojpɨk jɨɨxiyaj an̈pɨguiñ tananmajom y tammalwatpa, jesɨk takkaʼyaʼyba jeʼm iespíritu (1 Tes. 4:7, 8). ¿Tyiñam maaj tanjɨɨskupakneiñ? Pablo nɨm: «Odoy jooyiixɨʼ jeʼm jɨychagoʼoyiyaj» (1 Tes. 5:20, TNM). En yɨʼp versículo, jeʼm an̈maatyi «jɨychagoʼoyiyaj» nɨmtoʼoba ityumpɨy jempɨk Dios tan̈madaʼyba ikuyukmɨ jeʼm iespíritu. Yɨʼp tɨgɨykuʼmpatyim jeʼm an̈matyiyaj takjoodon̈apaʼap juchix nuʼkpa jeʼm aktogoyoʼoyi y juʼtspɨyñam jaʼyñeʼ. Taɨchtyam dyaʼ tanjɨɨstaʼmpa iga tsaam jaʼyñenam iga nuʼkpa jeʼm jaama jempɨk Jehová ikupin̈neʼ o iga dyaʼ tanaʼmpa jeʼm Armagedón. Majtyim tanjɨɨskupaknetaʼmpa iga dyam jaʼyñeʼ nuʼkpa jeʼm Jehová ijaama, jeʼyukmɨ tawɨsɨsɨoytyaʼmpa y «taŋwɨ̱wattámiñ juuts ixunpa Dios» tumtum jaama (2 Ped. 3:11, 12).

«ÁMCOÑWƗƗYƗ IT́U̱MPƗY JÉM JƗ̱XI»

15. ¿Tyi wɨap tan̈wattaʼm iga odoy i tamɨgoyaytyaʼmiñ? (1 Tesalonicenses 5:21).

¹⁵ Jeʼm tannɨgɨyoʼoyijom jeʼm Dios ienemigojyaj nɨmyajpa «D́a t́i id́ɨ́yɨ́y, d́a i jém tamalwadaypáppɨc» (1 Tes. 5:3). Juutykej wan̈ba jeʼm an̈matyiyaj ityopyajpaʼap jeʼm demonios iga imɨgoyayyajpa jaʼyan̈yaj (Apoc. 16:13, 14). ¿Y taɨchtyam? ¿Tanaʼmchityaʼmpa iga tamɨgoyaytyaʼmiñ? Dyaʼ tamɨgoyayyajpa siiga tan̈kupɨktaʼmpa yɨʼp an̈kiʼmayoʼoyi: «Ámcoñwɨɨyɨ it́u̱mpɨy jém jɨ̱xi» (maayɨʼ 1 Tesalonicenses 5:21). Jeʼm an̈maatyi griega jempɨk yɨʼɨm ipɨkpa «ámcoñwɨɨyɨ» pɨktaap idyɨk jesɨk algun i ikɨʼpin̈ba siiga jeʼm oro y jeʼm plata, nunta oro y nunta plata. Taɨchtyam jeempɨktyim tan̈wattaʼmiñ y tan̈wɨkɨʼpin̈taʼmiñ siiga jempɨk tan̈kumaton̈taʼmpa o tammaytyaʼmpa dyaʼ jeʼ mɨgoʼoyi. Tsaam importante idyɨk iga jeʼm tesalonicenses iwatyajiñ yɨʼɨmpɨk, pero taɨchtyam maaj tanteguedataʼmiñ iga tan̈wattaʼmiñ jeempɨk iga toomianeum jeʼm mɨjpɨk yaʼachaaji. Dyaʼ tan̈kupɨktaʼmpa ityumpɨy jempɨk tanɨʼmaytyamtaap, tan̈wɨpɨktaʼmpa jeʼm tanjɨɨxi jesɨk tan̈kɨʼpin̈taʼmpa jempɨk tammayba y jempɨk tan̈kumaton̈ba kun jempɨk nɨmpa jeʼm Biblia y jeʼm Jehová iorganización. Yɨʼɨmpɨgam ni tuum an̈maatyi jempɨk ityopyajpa jeʼm demonios dyaʼ tamɨgoyaʼyba (Prov. 14:15; 1 Tim. 4:1).

16. ¿Juʼp wɨbɨk an̈jogoʼoyi tanaitytyaʼm, y tyi wɨɨ iga tan̈wattaʼmiñ yɨʼp jaama?

¹⁶ Tanjoodon̈tam iga jeʼm Jehová iyooxakɨʼɨwiñyaj kɨakputyajtaap jesɨk nuʼkpa jeʼm mɨjpɨk yaʼachaaji, pero dyaʼ tanjoodon̈tam tyi wɨap iñas kun tumtum de taɨchtyam tannɨgɨyoʼoyijom (Sant. 4:14). Jehová tachiʼiba tuum ityi dyapɨk kuyajpa siiga takupɨgoʼyba, dyaʼ tyi ijoo siiga tavivojnam jesɨk nuʼkpa jeʼm mɨjpɨk yaʼachaaji o takaʼaneum. Jeʼm cristianojyaj kupin̈neyajtawɨʼɨp ityyajpa sɨn̈yukmɨ kun Cristo y jeʼm tun̈gak ovejajyaj ityyajpa yɨʼp Naxyukmɨ en tuum paraíso. Iganam tanan̈joʼktaʼmpa, tanjɨɨskupaknetaʼmiñ jeʼm wɨbɨk an̈jogoʼoyi y taitytyaʼmiñ listo jesɨk nuʼkpa jeʼm Jehová ijaama.