Nasɨyoʼoyiyaj y an̈kejayoʼoyiyaj iga an̈kuyooxaneʼ Jehová

Anjaatun̈yaj ichakyaj Estonia jesɨgam ity idyɨk jeʼm Wɨstenpɨk Guerra Mundial y nɨk ityiyaj Alemania, juuty ɨch anay. Okmɨ nɨk aityityam Canadá. Jeʼm antɨktam toomi idyɨk tsɨʼyba Ottawa. Ity idyɨk en tuum esquina iga kɨn̈neʼ kun jam. Dyaʼ atumiñɨytyaʼm idyɨk, pero itypa idyɨk kaʼnpuʼ iga an̈kɨʼɨstaʼmpa.

Tuum jaama, jeʼm Jehová itestigojyaj in̈kejayyaj anaapa jempɨk nɨmpa Apocalipsis 21:3, 4. Jempɨk ikumaton̈ tsaam ikusuʼnɨy y moj weeji. Anjaatun̈ y anaapa seguido ikuyujkayaj jeʼm Biblia, y dyaʼ jaʼy chin̈yaj.

Mex iga anjaatun̈yaj dyaʼ ijaya jɨyyajpa y dyaʼ iwɨkutɨʼɨyɨyyajpa idyɨk inglés, ikupɨkyaj tyityam ikuyujkayaj. Tumtum sábado ananɨktamtaap idyɨk jeʼm an̈matkuyjom kun anjaʼyuk Sylvia, mex iga anjaatun̈ yooxaneʼeba idyɨk muuma tsuʼu en tuum fábrica de níquel en Sudbury (Ontario). Y tumtum semana an̈wagakuyujkataʼmpa idyɨk jeʼm Totjaayi Takjoodon̈apaʼap. Anjaatun̈ y anaapa tsaam an̈kejayyaj iga antoʼyiñ Dios y jeʼyukmɨ en 1956, an̈kɨan̈koday añityi Jehová jesɨk anaity idyɨk 10 anamtyɨy. Jesɨk an̈kujɨɨspa juʼtspɨy ityoyyajpa idyɨk Jehová, tsaam ayooxpaʼtneʼ jeʼm añityijom.

Jesɨgam aput jeʼm secundaria, dyam idyɨk jespɨy anteguedaap iga an̈kuyooxaap Jehová. Anjɨɨspa idyɨk iga siiga atsɨʼyba juʼuts precursor dyaʼ keman aktsɨʼyaʼyba jeʼm tumiñ iga akiʼmpa aviónyuk y añixpɨkpa tun̈gak an̈eymɨyaj. Moj ayooxaaji en tuum estación de radio juuty anakkaʼmpa idyɨk discos y an̈kusuʼnɨʼyba idyɨk. Iga ayooxaap idyɨk jesɨk piʼichabam ixɨʼ, dyaʼ ajaya nɨkpa idyɨk jeʼm an̈tuʼumaajiyaj; y maaj anan̈pɨʼtspa jempɨk dyaʼ ityoyyajpa Dios. Pero jempɨk an̈kuyujkaneʼ idyɨk Bibliajom ayooxpaʼt iga an̈wadyiñ kukakiyaj jeʼm añityijom.

Nɨk aityi Oshawa (Ontario). Jeem añixpɨk Ray Norman, jeʼm iyoomtɨwɨ Lesli y tun̈gaknam precursoryaj. Ityumpɨyyaj tsaam ateguedayaj. Jesɨgam anaʼm iga tsaam maymayyaj idyɨk, ayooxpaʼt iga an̈kujɨɨxiñ tyi an̈wattoʼoba jeʼm añityijom. Jeʼeyaj aanmajan̈chiʼiyaj iga anaktsukumiñ jeʼm precursorado. Y jeempɨgam an̈wat en septiembre de 1966. Tsaam amaymay idyɨk kun jempɨk sɨʼ an̈wat, pero naspa idyɨk weeñi tyidyin̈kej jempɨk akukagayaʼyba jeʼm añityi.

SIIGA JEHOVÁ MIÑƗʼMAʼYBA IGA IN̈WADYIÑ ALGUN TYI, KUTƗʼTSKIʼPSƗ IGA IN̈WATPA

Jesɨgam sɨʼ idyɨk an̈kuyuj secundaria, an̈kutsat jeʼm solicitud iga akuyooxaoʼyba en jeʼm Betel de Toronto (Canadá). Y maaj okmɨ, jesɨk sɨʼbam idyɨk an̈kuyooxaoy juʼuts precursor, atɨʼpta iga nɨguiñ akuyooxaoʼoyi en Betel cuatro naamtyɨy. Pero an̈kusuʼnɨyñeʼ idyɨk Lesli y anjɨɨspa idyɨk iga dyam eybɨk anaʼmpa siiga ampɨktson̈ba jeʼm invitación. Pɨɨmi anan̈wejpaʼt Jehová y ampɨk anjɨɨxi iga anɨkpa Betel, pero tsaam an̈yaʼkwat iga dyam anaʼmpa idyɨk Lesli.

En Betel ayooxa juuty tseʼtseoyñɨɨmpa y okmɨ juʼuts secretario. Peʼm tiempo Lesli moj kuyooxaoʼoyi juʼuts precursora especial en Gatineau (Quebec). Watykɨy an̈kujɨɨspa idyɨk tyi sɨʼ iwat y anakwaʼktaap idyɨk siiga ampɨk tuum wɨbɨk jɨɨxi. Okmɨ nas tuum wɨbɨk nasɨyoʼoyi iga dyaʼ idyɨk anan̈joʼkneʼ jeʼm añityijom: jeʼm Lesli ityɨɨwɨ, Ray, tɨʼpta Betel, y atsaktamta tumtyi cuarto. Jeempɨgam eybɨk moj anamuru Lesli. An̈koʼmɨytyaʼm jeʼm 27 de febrero de 1971, jeʼm jaama jesɨgam kaʼps cuatro naamtyɨy iga akuyooxaoy Betel.

Aknɨktamta Quebec tuum kumunjom juuty jɨytyaap francés. Dyaʼ anan̈joʼkneʼ idyɨk iga anɨʼmaytyaiñ iga akuyooxaoʼyiñ juʼuts superintendente de circuito, pero anɨʼmaytya. Anaity idyɨk 28 anamtyɨy, jeʼyukmɨ anjɨɨspa idyɨk iga tsaam amañiñam y dyanam an̈kutɨʼɨyɨʼyba an̈wat weeñi yooxakuyyaj. Pero tsaam aanmajan̈chiʼ jeʼm an̈matyiyaj itywɨʼɨp en Jeremías 1:7, 8. Pero akkobakpijpa idyɨk jesɨk an̈kujɨɨspa juʼuts anɨʼgaytyaʼmpa jesɨk akuyooxaoʼyba juʼuts circuito iga Lesli iñaskaneʼ idyɨk waatyi accidentes automovilísticos y dyatyim idyɨk jaya tɨgɨyba imoon̈i. Pero jeʼ anɨʼmay: «Siiga Jehová miñɨʼmaʼyba iga in̈wadyiñ algun tyi, ¿dyaʼ maaj wɨɨ iga tan̈kutɨʼtskiʼpxiñ iga tan̈watpa?». Ampɨktson̈taʼm jeʼm yooxakuy y 17 naamtyɨy jaʼy akuyooxaoʼoyi juʼuts superintendente de circuito.

Jesɨgam jaʼy akuyooxaoʼoyi juʼuts circuito tsaam idyɨk jaʼyan̈ yooxakuy anaitypa, y dyaʼ idyɨk anjaya naitypa tiempo para Lesli. Jeʼyukmɨ an̈kuyujkaʼ tun̈gak an̈kejayoʼoyi. Tuum lunes ikukejakɨʼɨm, an̈jɨy jeʼm timbre. Jesɨk anan̈aʼy jeʼm puerta dyaʼ idyɨk i ity, numaaj ity tuum koʼon̈ kun tuum mantel, tɨmyaj, queso, pan, tuum botella de vino, copas y tuum nota iga nɨmpa: «Nanɨkɨ iñyoomoʼ de pícnic». Tsaam idyɨk wɨpijñeʼ jeʼm jaama. Pero an̈kuyujkaʼaba idyɨk weeñi najɨʼyoʼoyiyaj, jeʼyukmɨ annɨʼmay Lesli iga dyaʼ wɨap annɨk. Jeʼ iwɨkutɨʼɨyɨy, pero an̈yaʼk usan̈. Jesɨk moj an̈wat, jeʼm anjɨɨxi moj amoʼogɨy y an̈kujɨɨsɨy jempɨk nɨmpa Efesios 5:25, 28. ¿Akjɨɨspasɨ anasɨʼ Jehová iga anteguedaiñ tyityam ityogoyay anyoomoʼ? An̈wat tuum an̈wejpadoʼoyi, y annɨʼmay Lesli: «Taʼamum». Tsaam maymaya. Anɨktaʼm carrojyuk hasta tuum nɨʼan̈naakaʼ, tsaam wɨkoom idyɨk, antɨɨmtaʼm jeʼm mantel… y tsaam an̈kusuʼnɨytyaʼm iga anɨktaʼm. ¡Y wɨatyim mu an̈kuyujkaʼ jeʼm najɨʼyoʼoyiyaj!

Anjooyaytyaʼm waatyi circuitos, dende jeʼm Columbia Británica hasta Terranova, y an̈wattaʼm kun maymayaaji. ¡Jempɨk an̈wattoʼoba idyɨk, iga añixpɨktoʼoba tun̈gak an̈eymɨyaj kupakpam idyɨk ixɨʼ! Anjɨɨsneʼ idyɨk iga anɨktoʼoba en jeʼm Escuela de Galaad, pero dyaʼ anɨktoʼoba idyɨk juʼuts misionero en jeʼm extranjero. Anjɨɨspa idyɨk iga jeʼm misioneros tsaam ikutɨʼɨyɨyyajpa y ɨch anajaamtaap idyɨk iga dyaʼ wɨap anakkupak yɨʼp yooxakuy. Akɨɨn̈ba idyɨk iga aknɨktaiñ en tuum país africano juuty ity mɨmneiyaj y guerra. Amaymay idyɨk juuty sɨʼ an̈kuyooxaoy.

DYAʼ ANAN̈JOʼKNEʼ IDYƗK IGA ATƗʼPTAIÑ IGA AKUYOOXAOʼYIÑ EN ESTONIA Y TUN̈GAK PAÍSES BÁLTICOS

En 1992 jeʼm Testigojyaj eybɨktyim aʼmchiyajta iga ikuyooxayajiñ Jehová en weeñi an̈eymɨyaj de jeʼm antigua Unión Soviética. Jeʼyukmɨ akwaʼktamta siiga akuyooxaoytyamtoʼoba idyɨk en Estonia. Dyaʼ anan̈joʼknetaʼm idyɨk iga anɨʼmaytyamtaap, pero anan̈wejpaʼttaʼm Jehová. Eybɨk anjɨɨstaʼm: «Siiga Jehová tanɨʼmaʼyba iga tan̈wadyiñ algun tyi, ¿dyaʼ maaj wɨɨ iga tan̈kutɨʼtskiʼpxiñ iga tan̈watpa?». Ampɨktson̈taʼm iga akuyooxaoytyaʼmpa, y anjɨɨs: «Agui wɨɨ iga dyaʼ en África akutsattamtaap».

Jobitytyi moj an̈kuyujkataʼm estonio. Dyaʼ waatyña meses iga anuʼknetaʼm idyɨk peʼm país, atɨʼptamta iga akuyooxaoytyaʼmiñ juʼuts circuito. Anjooyaytyaʼmpa idyɨk 46 kumunyaj y waatyi grupos en tukuteen países bálticos y en Kaliningrado (Rusia). Jeʼyukmɨ an̈kuyujkataʼm letón, lituano y ruso. Tsaam idyɨk tan̈kaʼ. Pero jeʼm tɨwɨtam maymayyaj idyɨk iga sɨʼ an̈kuyujkaaytyaʼm jeʼm in̈maatyi y ayooxpaʼttaʼmpa idyɨk. En 1999 watta tuum sucursal en Estonia y anɨʼmaytya iga akuyooxaoʼyiñ kun jeʼm comité an̈tuumjom kun Toomas Edur, Lembit Reile y Tommi Kauko.

Añixpɨktaʼm waatyi Testigojyaj jempɨk jaʼy iknɨkneyajta Siberia. Mex iga tsaam yaʼachayaj cárcel y dyaʼ wɨap idyɨk iaʼmyaj jeʼm ifamilia, dyaʼ keman joʼyan̈jakyaj. Juchixkej maymayyaj y ikusuʼnɨyyajpa idyɨk iputyaj jeʼm an̈matkuy. Yɨʼp an̈kejaytyaʼm iga wɨap anyaʼachɨytyaʼm y ammaymayataʼm mex siiga anan̈an̈kamoktaʼmpa tan̈kapɨk nasɨyoʼoyiyaj.

Jaʼyan̈ amtyɨyyaj pɨɨmi ayooxataʼm y dyaʼ ajaya jejtaʼmpa idyɨk, jeʼyukmɨ Lesli tsaam pɨɨmiam kusoʼpsayñeʼ idyɨk. Dyaʼ jobity an̈kutɨʼɨyɨytyaʼm iga imatsneʼ idyɨk tuum mɨmneiʼ iñɨɨyipɨk fibromialgia, yɨʼbam iwatpa iga kusoʼpsayñeiñ. Jeʼyukmɨ moj anjɨɨstaʼm iga aseettaʼmpa Canadá. Y jesɨgam atɨʼptamta iga anɨktaʼmiñ Patterson (Nueva York) a tuum escuela para jempɨk kuyooxaoyyajpa kun jeʼm Comités de Sucursal, anjɨɨs iga dyaʼ wɨap anɨktaʼm. Pero, pɨɨmi anan̈wejpaʼt Jehová, y okmɨ anɨmtaʼm iga anɨktaʼmpa. Y Jehová ikumayket yɨʼp jɨɨxi. Iganam aity idyɨk en yɨʼp escuela, Lesli wɨa mu ipɨktson̈ jeʼm atención médica jempɨk ityogoyay idyɨk, jeʼyukmɨ eybɨktyim wɨa mu an̈wattaʼm jeʼm yooxakuyyaj.

TUN̈GAK NASƗYOʼOYI IGA DYAʼ ANAN̈JOʼKNETAʼM IDYƗK: TUN̈GAK CONTINENTE

Jeʼm amtyɨy 2008, tuum tsuʼu jesɨk aitytyaʼmum idyɨk en Estonia, ajɨymiñaytya dende jeʼm central mundial y akwaʼkta siiga ampɨktson̈taʼmpa idyɨk iga aknɨktamtaiñ en la República Democrática del Congo. Dyaʼ an̈kutɨʼɨyɨy tyi anɨmpa, y maaj iga juʼuts joymɨtyi idyɨk an̈kutson̈taʼmiñ tyi an̈wattaʼmpa. Dyaʼ tyi annɨʼmay Lesli iga tɨgɨyiñ imoon̈i. Pero ɨch muuma tsuʼu dyaʼ amon̈ y anan̈maday Jehová tyityam akkobakpijpa idyɨk iga dyaʼ anɨktoʼoba África.

Ikukejaama jesɨgam anan̈maday Lesli, anɨmtaʼm: «Jehová sɨʼ tatɨʼp iga tanɨguiñ África. ¿Jutsaap tanjoodon̈a iga dyaʼ wɨap tannɨk y tammaymaya siiga dyaʼ oyba tanɨki?». 16 amtyɨyam idyɨk aitytyaʼm en Estonia, y okmɨ anɨktaʼm Kinsasa, jeʼm capital de jeʼm país. Jeʼm sucursal iniity idyɨk tuum wɨbɨk jardín y tsaam idyɨk wɨkoom. Tuum de jeʼm wiñtyipɨk cosa jempɨk Lesli ikkaʼm jeʼm an̈cuartojtam jeʼ tuum tarjeta iga ikkaʼyñeʼ idyɨk dendepam antsaktaʼm Canadá. Nɨmpa: «Mooyɨʼ juuty miñiptaap». Okmɨ iga añixpɨktaʼm jeʼm tɨwɨtam, jeʼm kuyuujiyaj anaitytyamwɨʼɨp idyɨk y jeʼm maymayaaji iga akuyooxaoytyaʼmpa idyɨk juʼuts misioneros, ayooxpaʼttaʼm iga anaʼmtaʼmiñ iga wɨaptyim ammaymayataʼm. Maaj okmɨ, an̈wattaʼm jeʼm yooxakuy iga anjooyaytyaʼmpa jeʼm sucursales ityyajwɨʼɨp en 13 países africanos. Yɨʼp aaʼmchityaʼm iga añixpɨktaʼmiñ jaʼyan̈ tɨgan̈jujyaj y juʼtspɨy wɨɨ ikeejiyaj. Jeʼm kɨɨn̈i anaitywɨʼɨp idyɨk wiñtyityim togoy y anchiʼityaʼm gracias Jehová iga akutsattaʼm África.

En Congo-Kinsasa an̈kejaytyamtaap idyɨk jeʼm wiʼkkuy jempɨk ni keman anjɨɨstaʼm iga an̈kɨʼɨstaʼmpa, juʼuts jeʼm insectos. Pero, jesɨk anaʼmtaʼm iga jeʼm tɨwɨtam agui idyɨk ikusuʼnɨyyajpa, an̈kɨʼɨskiʼpstaʼm, y an̈kusuʼnɨytyaʼm.

Anɨktaʼm peʼm país ijaaman̈kiʼmmɨ iga wɨaiñ ananmajan̈chiʼityaʼm jeʼm tɨwɨtam, y ananɨgaytyaʼm tyityam ityogoyayyaj idyɨk, yɨʼpyaj an̈eymɨyaj jeʼm grupos de la guerrilla ikutɨgɨyyajpa idyɨk jeʼm tɨgan̈juj y imalwadayyajpa idyɨk jeʼm yomtam y jeʼm tsɨxtyam. Jaʼyan̈ jeʼm tɨwɨtam dyaʼ idyɨk tyi ijaya naityyaj. Pero agaʼman̈jaktaʼmpa idyɨk iga tsaam iwɨkupɨkneyaj iga itypa tuum aktsukumoʼoyi, ityoyyajpa Jehová y ikupɨkyajpa idyɨk jeʼm organización. Jeʼm iakwiñkejoʼoyiyaj akjɨɨstaʼm tyiʼiga an̈kuyooxataʼmpa Jehová y apɨɨmchiaytyaʼm jeʼm anfe. Weeñi tɨwɨtam ipatstogoyñeyaj idyɨk jeʼm ityɨk y jeʼm iñipñiboʼoyiyaj. Yɨʼp akjɨɨs iga jobity wɨap ityogoyyaj jeʼm tyidyin̈kejyaj materiales y jeʼm tan̈wɨnanɨgoʼoyi kun Jehová jeʼam jempɨk maaj importante. Mex iga tan̈kaʼ jeʼm iityiyaj, jeʼm tɨwɨtam dyaʼ idyɨk ijɨɨsjɨsneyajpa tyityam ipatstogoyñeyaj. Yɨʼp aanmajan̈chiʼityaʼm iga odoy akɨɨn̈taʼmiñ jesɨk anan̈an̈kamoktaʼmpa tan̈kapɨk nasɨyoʼoyiyaj y jeʼm mɨmneiyaj.

TUUM JOOMIPƗK AN̈EYMƗ: ASIA

Tun̈gak nasɨyoʼoyi iga dyaʼ anan̈joʼknetaʼm idyɨk. Anɨʼmaytyamta iga anɨktaʼmiñ en jeʼm sucursal de Hong Kong. Ni keman anjɨɨstaʼm iga nɨkpa idyɨk aityityam Asia. Jehová ayooxpaʼtnetaʼm idyɨk kun toyoʼoyi iga wɨaiñ anakkupaktaʼm jeʼm yooxakuyyaj y sɨɨ an̈kupɨktaʼmpa idyɨk iga jeempɨktyim iwatpa. Mex iga dyaʼ idyɨk anjoodon̈tam tyi wɨap iñas okmɨ, en 2013 tsaam an̈yaʼktaʼm iga antsaktaʼm jeʼm anamigojtam y ityumpɨy jempɨk annaskataʼm África.

Tuum mɨjpɨk kukaki para aɨchtyam jesɨgam nɨk aityityam Hong Kong, tuum an̈eymɨ juuty tsaam jaʼyan̈ ityñɨɨm, y jesɨk moj an̈kuyujkataʼm chino cantonés tsaam tan̈kaʼ idyɨk. Pero jeʼm tɨwɨtam tsaam awɨpɨktson̈taʼm y an̈kusuʼnɨytyaʼm jeʼm wiʼkkuy jempɨk kɨʼɨstaap jeem. Jeʼm an̈matkuy tsaam idyɨk sɨʼ iwɨnɨgay, pero jeʼm an̈kɨyaj tsaam idyɨk tsoʼowɨy tseʼkyajtaap, jeʼyukmɨ jeʼm Kumun Nayooxaoyyajpaʼap iwɨpɨkyaj ijɨɨxi y iknɨkyaj jeʼm sucursal tun̈gak an̈eymɨ y imaʼyayyaj jeʼm an̈kɨ iniityyajwɨʼɨp idyɨk. Dyaʼ maaj jaʼy, en jeʼm 2015, Lesli y aɨch nɨk aityityam en Corea del Sur, hasta yɨʼp jaama sɨʼ an̈kuyooxaoytyaʼm jeem. Tan̈katyim jeʼm an̈maatyi jɨytyapaʼap. Pero aanmajan̈chiʼityaʼmpa iga jeʼm tɨwɨtam anɨʼmaytyaʼmpa iga majtyim an̈wɨjɨytyaʼmpam yɨʼp an̈maatyi, mex iga dyanam ityumpɨy anjoodon̈tam.

JEMPƗK AN̈KEJAYÑETAʼM IGA AN̈KUYOOXATAʼMPA JEHOVÁ

Usan̈ tan̈kaʼ tanaity joomityampɨk tanamigo. Pero anaʼmnetaʼm iga jesɨk tanteguedayajpa y tantɨʼpyajpa tantɨkkɨʼɨm, maaj jobity tañixpɨkyajpa. Dende ianmajom jeʼm tɨwɨtam toomityim jeexyaj, y Jehová tsaam iwɨwatneʼ jeʼm tananmaj, jeʼyukmɨ wɨap tanaity joomityampɨk amigo y wɨap tantoyyaj ityumpɨyyaj (2 Cor. 6:11).

An̈kuyujkanetaʼm iga tan̈wɨixyajiñ tun̈gakyaj juutypɨgam iwatpa Jehová y tanaʼmiñ juutypɨk takwiñkejaʼyba jeʼm ityoyoʼoyi y tan̈kejaʼyba jeʼm tañityijom. Jesɨk an̈yaʼknetaʼmpa idyɨk o jesɨk anakwaʼktamtaap siiga tun̈gakyaj awɨixtyaʼmpa, eybɨk an̈kɨʼpin̈taʼmpa idyɨk jeʼm tarjetas y jeʼm cartas jempɨk akutsadayñetaʼm jeʼm anamigojtam. Anaʼmnetaʼm juutypɨk Jehová ikutson̈ jeʼm anan̈wejpadoʼoyityam y juutypɨk ayooxpaʼttaʼm y achiʼityaʼm jeʼm pɨɨmi jempɨk atogoyaytyaʼm.

Lesli y aɨch anaʼmnetaʼm iga dyaʼ tyi ijoo juʼp yooxakuy an̈wattaʼmpa, tsaam importante iga antoptaʼmiñ tiempo iga aitytyaʼmpa an̈tuumjom. Anaʼmnetaʼmtyim iga wɨɨ iga anxikkataʼmiñ jempɨk annaskataʼmpa, maaj jesɨk sɨʼ an̈kuyujkataʼm tun̈gak an̈maatyi. Y tumtum tsuʼu an̈kujɨɨstaʼmpa algun tyi iga tsaam an̈kusuʼnɨytyaʼm y anchiʼityaʼmpa gracias Jehová.

Ni keman anjɨɨs iga akuyooxaoʼyba juʼuts misionero o iga nɨkpa aityi tun̈gak países. Pero anaʼmneʼ juutypɨk kupakneʼ ityumpɨy kun jeʼm Jehová iyooxpadoʼoyi, y yɨʼp tsaam amaymaywatpa. Jeempɨktyim anjɨɨspa juʼuts jeʼm profeta Jeremías, jesɨgam nɨm: «Ammɨgoyayñeʼ, oh, Jehová» (Jer. 20:7). Jesaneum, jeʼ iwatneʼ iga jeʼm añityijom annaskataʼmiñ wɨtampɨk nasɨyoʼoyiyaj y kumaykedoʼoyiyaj dyapɨk anan̈joʼknetaʼm idyɨk. ¡Ikkupaknetyim jempɨk juchixkej anjɨɨsneʼ idyɨk, iga akiʼmpa aviónjom! Antsɨɨxjom añixpɨktoʼoba idyɨk tun̈gak an̈eymɨyaj, pero sɨɨ maaj jaʼyan̈ añixpɨknetaʼm. Anjooyayñetaʼm jeʼm sucursales de cinco continentes. Agui amaymay iga Lesli ayooxpaʼtneʼ iga wɨaiñ anakkupak ityumpɨy jeʼm yooxakuyyaj y ikwiñkejneʼ tuum wɨbɨk jɨɨxi.

Juchixkej anjɨɨstaʼmpa iapaʼap jempɨk an̈kuyooxataʼmpa y tyiʼiga. Ityumpɨy jeʼm kumaykedoʼoyiyaj jempɨk tampɨktson̈taʼmpa yɨʼp jaama, tan̈kejaytyaʼmpa juʼtspɨy tamaymayataʼmpa jesɨk tanaitytyaʼmum jeʼm ityi dyapɨk kuyajpa, jesɨk Jehová in̈aʼyba ikɨʼ y ichiʼiba «ityumpɨyyaj tyityam ixunyajpa» (Sal. 145:16).