Senesis
48 Mwurin mepwukat, Sosep ahpw rongada: “Kilang, semomwo luhluwetla.” Ih eri kahrehda nah pwutak riemeno Manase oh Epraim.+ 2 Seikop eri rongada: “Noumw pwutako Sosep kohdo rehmw.” Israel eri tihnainda oh mwohdada pohn eh pehto. 3 Seikop eri ndaiong Sosep:
“Koht me Keieu Manaman ketin pwarohng ie nan Lus nan sapwen Kenan oh ketin kapaiaiehda.+ 4 Oh e ketin mahsanihong ie, ‘I pahn kahrehiong uhk ken kaparaparala, oh I pahn katohtohweiukala, oh I pahn wiahiong uhk ken wiahla mwomwohdisohn aramas ehu,+ oh I pahn kihong kadaudokomw en sapwenikihla sahpwet kohkohlahte.’+ 5 Noumw pwutak riemeno me ipwidiong uhk nan sapwen Isip mwohn ei kohdo rehmw nan Isip iei nei.+ Epraim oh Manase pahn wiahla nei duwehte Reupen oh Simion ara wia nei.+ 6 Ahpw seri kan me pahn ipwidiong uhk mwurira pahn wia noumw. Irail pahn iang ale pelien sahpw me riarail pwutak riemeno sohsohki.+ 7 A ngehi, ni ei kohkohdo sang Paddan, Resel pa mehla+ limwahi nan sapwen Kenan. Pwehki wasao eh dohsang Eprat, I sarepedi ih wasao ni ei kohkodohng Eprat,+ me iei Pedleem.”+
8 Israel eri kilangada nein Sosep pwutak ko oh idek: “Ihs men kan?” 9 Sosep eri ndaiong eh pahpao: “Ih nei pwutak kan met, me Koht ketikihong ie nan sahpwet.”+ Israel eri nda: “Menlau wairahdo rehi, pwe I en kapaiairahda.”+ 10 Mesen Israel ko wie ediedla pwehki eh likeilapalahr, oh e sohla kak kilang mwahu wasa. Sosep eri kahreirahla limwah, oh e metik ira oh pwoaleirahdi. 11 Israel eri ndaiong Sosep: “I sohte medewe me I pahn pwurehng kilang mesomwen,+ ahpw iet Koht ketin mweidohng ie I en pil kilang kadaudokomw.” 12 Sosep eri kihsang ira ni pwukien Israel ko oh poaridiong nanpwel.
13 Sosep eri kolekihdi peh palimaun Epraim+ oh peh palimeing Manase.+ Ih eri kahreirahla limwahn Israel. E kihdi Epraim ni palimeing en Israel a Manase ni palimaun en Israel. 14 Ahpw, Israel kihdi peh palimaun pohn moangen Epraim, mendahki ih me tikitik, oh e kihdi peh palimeing pohn moangen Manase. Ih me pein kihdi peh ko ni ahl wet, mendahki Manase me mesenih.+ 15 Ih eri kapaiahda Sosep oh nda:+
“Koht mehlelo me semei ko Eipraam oh Aisek kin idawehn,*+
Koht mehlelo me kin ketin apwalih ie* erein ei mour leledo rahnwet,+
16 Tohnlengo me kin kapitiesang nan kahpwal koaros,+ en kapaiahda pwutak kat.+
Edeiet en kin mihmihte rehra oh pil eden semei ko, Eipraam oh Aisek,
Kadaudokara kan en ngederla nin sampah.”+
17 Ni Sosep eh kilang me semeo kihdiong peh palimauno pohn moangen Epraimo, e ahpw nsensuwedkihla. Ih eri song kihsang pehn semeo pohn moangen Epraimo oh kidahng pohn moangen Manaseo. 18 Sosep eri ndaiong semeo: “Ipa, kaidehkin ih pahn duwe men, pwe iet meseniho.+ Kihdiong pehmw palimaunen pohn moange.” 19 Ahpw semeo sohte men oh nda: “I ese samwa, I ese. E pil pahn wiahla pwihnen aramas ehu, oh e pil pahn lapalapala. Ahpw, rie me tikitiket pahn lapalapasang ih,+ oh kadaudoke kan pahn tohtohla oh itar en wiahla wehi kan.”+ 20 Ih eri doulahte kapaiairahda rahno,+ nda:
“Mehn Israel kan en koasoia duwen kowe ni ar kin kapaia emenemen oh nda,
‘Koht en ketin wiahiong uhk ken duwehte Epraim oh duwehte Manase.’”
Ih eri mwohnkihla Epraim sang Manase ni eh kapaiairahda.
21 Israel eri ndaiong Sosep: “Kilang, I pahn melahr,+ ahpw Koht uhdahn pahn kin ketin ieiang kumwail oh kapwureikumwaillahng nan sapwen samamwail mehn mahs ako.+ 22 A ngehi, I pahn kihong uhk pelien sahpw ehu* laudsang riomw ko, me I kihsang rehn mehn Amor kan sang ni nei kedlahs oh nei kesik ketieu.”