Keieun Kronikel
16 Irail eri wahdo Kohpwahn inou lap en Koht mehlelo oh pwilikihdi nan impwal me Depit kauwadahro;+ oh irail wiahda meirong isihs oh meirong en kaminimin mwohn silangin Koht mehlelo.+ 2 Ni Depit eh kanekehla meirong isihs+ oh meirong en kaminimin ko,+ e ahpw kapaiahda aramas ako ni mwaren Siohwa. 3 Ih eri nehkohng mehn Israel kan koaros, ong emenemen ohl oh lih, ehu pilawa pwonopwon, ehu keik deid,* oh ehu keik reisin. 4 E ahpw idihada ekei mehn Lipai kan ren papah mwohn kohpwahn inou lap en Siohwa,+ pwe ren wauneki,* kalahnganki oh kapinga Siohwa, Koht en Israel. 5 Asap+ me kaun, oh Sekaraia me wia sawasepe; oh Seiel,+ Semiramod, Seheiel, Mattidaia, Eliap, Penaia, Oped-edom oh Seiel kin kesengki keseng sahl kan oh arp kan;+ oh Asap kin kesengki simpal,*+ 6 oh samworo Penaia oh Sahasiel kin kaukaule peuk sowi mwohn kohpwahn inou lap en Koht mehlelo.
7 Ih rahno me Depit tepin wiahda koul en kapingkalahngan ong Siohwa oh kaweid Asap+ oh rie kan en koulki, ndinda:
8 “Kumwail kapingkalahngan ong Siohwa,+ likweriong mware,
Kumwail kehsehki aramas akan sapwellime wiewia kan!+
9 Kumwail kouliong ih, kumwail koulkihong ih koulen kaping kan,*+
Kumwail medemedewe* sapwellime wiewia kapwuriamwei kan koaros.+
10 Kumwail suweiki mware sarawi.+
Mohngiong en irail akan me kin raparapahki Siohwa en perenda.+
11 Kumwail sohpeiong Siohwa+ oh likih sapwellime manaman.
Kumwail rapahki silangi ahnsou koaros.+
12 Kumwail tamanda wiewia kapwuriamwei kan me e ketin wiadahr,+
Sapwellime manaman kapwuriamwei kan, oh kadeik kan me e ketin lohkidahr,
13 Kumwail kadaudok en Israel, sapwellime ladu,+
Kumwail nein Seikop, sapwellime aramas pilipildahr kan.+
14 Ih me Siohwa atail Koht.+
Sapwellime kadeik kan kin mi wasa koaros nin sampah.+
15 Kumwail tamataman sapwellime inou lapo kohkohlahte,
Kumwail en dehr manokehla inou me e ketin wiadahr,*+
16 Inou lap me e ketin wiahiong Eipraam,+
Oh inou me e ketin kahukihong Aisek,+
17 Me e ketin wiahda nin duwen koasoandi ehu ong Seikop+
Oh nin duwen inou lap poatopoat ehu ong Israel,
18 Oh e ketin mahsanih, ‘I pahn kihong uhk sapwen Kenan+
Nin duwen omw sohso.’+
19 Iei ahnsowo me kumwail malaulau
Ei, kumwail uhdahn malaulau, oh kumwail wia mehn liki kei nan sahpwo.+
20 Re ahpw kin kakahnseli sang nan ehu sahpw lel ehu sahpw,
Sang ehu wehi lel ehu wehi.+
21 E sohte kin ketin mweidohng aramas emen en kaloke irail,+
Ahpw e kin ketin panawih nanmwarki kan pwehki irail,+
22 Oh e ketin mahsanih, ‘Kumwail dehpa sair nei me keidi kan,
Oh kumwail dehpa wiahiong nei soukohp kan mehkot suwed.’+
23 Kumwail aramas koaros nin sampah, kumwail kouliong Siohwa!
Kumwail lohkiseli sapwellime komour ehuehu rahn!+
24 Kumwail lohkiseli sapwellime lingan nan wehi kan,
Oh sapwellime wiewia kapwuriamwei kan rehn aramas koaros.
25 Pwe Siohwa me ketin lapalap oh me keieu warohng ale kaping.
E me lemmwin kowahlap sang koht teikan koaros.+
28 Kumwail kapinga Siohwa, kumwail peneinei en aramas koaros,
Kumwail kapinga Siohwa pwehki sapwellime lingan oh kehl.+
29 Kumwail kapinga Siohwa pwehki mwareo warohng linganla;+
Kumwail patohwando kisakis oh patohla mwohn silangi.+
Kumwail poaridiong* Siohwa ni amwail likawih likou sarawi kan.*+
30 Kumwail aramas koaros nin sampah, kumwail rerrer mwohn silangi!
Sampah* koasoansoandi teng; e sohte kak mwekid.*+
31 Nanleng en perenda, oh sampah en pereperen;+
Lohkihong wehi kan: ‘Siohwa ketin wialahr Nanmwarki!’+
32 Sehd oh audepe kan koaros en ngirisek;
Mohs akan oh audepahr kan koaros en perenda.
33 Ni ahnsowohte tuhkehn nanwel kan en weriwerki peren mwohn silangin Siohwa,
Pwe e ketiket kohdo* pwe en ketin kadeikada sampah.
34 Kumwail kapingkalahngan ong Siohwa, pwehki ih me kupwur mwahu;+
Sapwellime limpoak loalopwoat me poatopoat.+
35 Oh kumwail patohwan, ‘Maing Koht sounkomourpat, komw ketin kapitkitala,+
Komw ketin kapwureikitodo oh doareikitala sang nan wehi kan,
Pwe sen kin kapingkalahngan ong mwaromwi sarawi+
Oh perenda ni at kapinga komwi.+
36 Kaping en kohwong Siohwa, Koht en Israel,
Kohkohlahte.’”
Oh aramas ako koaros ahpw patohwan, “Amen!”* oh re kapinga Siohwa.
37 Depit eri pwilikihdi Asap+ oh rie kan wasao mwohn kohpwahn inou lap en Siohwa, pwe ren usehlahte papah mwohn Kohpwahn inou lapo+ nin duwen koasoandien ehuehu rahn.+ 38 Oped-edom oh rie kan, meh 68, oh Oped-edom nein Sedudun oh Osa me wia silepen ewen kehl kan; 39 oh samworo Sadok+ oh ienge samworo kan kin mi mwohn impwal sarawi en Siohwa ni wasa ileo nan Kipeon+ 40 pwe ren kaukaule wiahda meirong isihs ong Siohwa pohn pei sarawi en meirong isihso, nimenseng oh nin soutik, oh wia mehkoaros me ntingdi nan Kosonned en Siohwa me e ketin kehkehlingkihong Israel.+ 41 Me mi rehrail iei Eman oh Sedudun+ oh meteikan me pilipildahr pwe ren kapingkalahngan ong Siohwa,+ pwehki “sapwellime limpoak loalopwoat me poatopoat”;+ 42 oh me mi rehrail iei Eman+ oh Sedudun me kin doadoahngki sowi, simpal* oh mehn keseng kan me kadoadoahk ong kapinga* Koht mehlelo; oh nein Sedudun+ pwutak kan kin mi ni ewen kehlo. 43 Aramas akan koaros eri pwuralahng ni imwarail kan, oh Depit pil pwurala pwehn kapaia tohnimwe kan.