Sohp
22 Elipas+ mehn Demano ahpw sapengki:
2 “Aramas emen kak katapan ong Koht?
Emen me dehdehki mwahu soahng kan kak sewese ih?+
3 Ia duwe, me Keieu Manamano ketin nsenohki* omw kin wia aramas pwung,
De e kin ketin alehdi mehkot pwehki omw kin idawehn elen loalopwoat?+
4 E pahn ketin kalokeiuk oh lelekin uhk nan mwoalen kopwung
Pwehki omw kin lemmwiki ih?
5 Kaidehn pwehki omw suwed me nohn laud
Oh sohte imwin omw sapwung kan?+
6 Pwe ke kin adihasang kilelepen pweipwand ehu rehn riomw kan ni soh kahrepe,
Oh ke kin kapwuhrasang en aramas akan likou kan oh mweidala ren kilisou.*+
7 Ke sohte kin kanimpile me pwangada men,
Oh ke sohte kin kamwenge me duhpek kan.+
8 Aramas kehlail me kin sapweniki sahpw,+
Oh me keniken men me kin kousoan loale.
9 Ahpw ke kadarala liohdi kan kahiep,
Oh ke kamwutepene pehn me sepwoupwou kan.
10 Ihme kahrehda lidip kan* kapiluhkpene,+
Oh soahng keper kan mwadangete kamasakuhkada;
11 Ihme kahrehda e uhdahn rotorot me ke sohte kak kilangki,
Oh lapake en pihl ehu kipeiukedi.
12 Koht sou kin ketiket nanleng ileile?
Oh kilang uwen ileilehn usu kan koaros.
13 Ahpw ke nda: ‘Dahme Koht uhdahn ketin mwahngih?
E kak ketin wia kopwung nan rotorot mosul?
14 Depwek kan kin perehla ih pwe en dehr mahsanih wasa
Ni eh kin ketiketseli pohn pwonopwon en lahng.’
15 Ia duwe, ke pahn idawehn ahl en mahso
Ahl me me suwed kan kin keid ie,
16 Irail ako me wisiksang* mwohn ar ahnsou,
17 Re patohwanohng Koht mehlelo: ‘Piseksang kiht!’
Oh ‘Dahme me Keieu Manamano kak ketin wiahiong kiht?’
18 Ahpw, Ih me kin ketin audehkihda imwarail kan soahng mwahu kan.
(Soangen madamadau suwed wet kin dohsang ie.)
19 Me pwung kan pahn kilang met oh perenda,
Oh me soh dipe kan pahn kapailoke irail oh nda:
20 ‘Irail akan me kin pelian kiht mwomwlahr,
Oh kisiniei pahn isikala dahme arail me luhwehdi.’
21 Esehla Ih, oh ke pahn ahneki popohl;
Soahng mwahu kan ahpw pahn kodohng uhk.
22 Ale kosonned sang nan doauese,
Oh kolokol sapwellime mahsen kan nan mohngiongomw.+
23 Ma ke pwurodo rehn me Keieu Manamano, ke pahn mwahula;+
Ma ke kihsang suwed nan omw impwalo,
24 Ma ke pahn kesehla noumw kohl* nan pwelpar
Oh kesehla kohl en Opir+ nan wahu takain kan,
25 Eri me Keieu Manamano pahn ketin wiahla noumw kohl,*
Oh e pahn ketin wiahla noumw silper me keieu kaselel.
26 Eri ke ahpw pahn peren pwehki me Keieu Manamano,
Oh ke pahn kin saradalahng Koht.
27 Ke pahn pekipek reh, oh e pahn ketin karongeiuk;
Oh ke pahn kapwaiada omw inou kan me ke kahukihla.
28 Sohte lipilipil dahme ke pilada en wia, e pahn pweida,
Oh marain pahn daker nan alomw.
29 Pwe ke pahn namenekla ni omw koasoi en aklapalap,
Ahpw e pahn ketin doarehla me aktikitik.*
30 E pahn ketin kapitala irail kan me sohte diparail;
Eri ma pehmw kan mwakelekel, ke uhdahn pahn pitila.”