Melkahka kan
En Depit melkahka.
141 Maing Siohwa, I patohwan likweriong komwi.+
Komw ketin mwadangodo sewese ie.+
Komw ketin karonge ie ni ei patohwan likweriong komwi.+
2 Komw ketin kupwurehla ei kapakap duwehte warpwohmwahu,+
Pehi kat me I kapahdawei en duwehte meirong en krein en nin soutik.+
3 Maing Siohwa, komw ketikihong silepen eweiet,
Oh ketikihong silepen wenihmw en kilin eweiet.+
4 Komw dehr ketin mweidohng ei mohngiong en uhlahng mehkot suwed,+
En iang aramas suwed kan nan ar wiewia suwed;
I en dehr iang kang kanarail mwenge kaselel kan.
5 Ma me pwung men pahn kaloke ie, met pahn wia mwekid en limpoak loalopwoat ehu;+
Ma e pahn panawih ie, met pahn duwehte leh me wudekdiong pohn moangei,+
Me I sohte pahn soikala.+
I pahn pousehlahte kapakap pil ni ahnsou me re mi nan apwal.
6 Mendahki ar sounkopwung kan ar lekdekdihsang pohn kumwukumwo,
Aramas akan pahn rong ei lokaia kan, pwe mepwukat me kansenamwahu.
7 Duwehte aramas emen eh kin deipwel oh kamwerepeseng pwehl,
Ih duwen at tih kan eh kin mwerpeseng nan ewen Sousou.*
8 Ahpw Maing Kaun Wasa Lapalahpie Siohwa, mesei kat kin kilengwohng komwi.+
I diaradahr wasahn ruk rehmwi.
Komw dehr ketikihsang ei mour.
9 Komw ketin pereiehsang ewen lidip kan me re wiahiong ie,
Lidip en me suwed kan.
10 Me suwed koaros pahn pwupwudiong nan ar uhk kan+
Ahpw I pahn pitsang mepwukat.