Esekiel
27 Siohwa ketin pwurehng mahsanihong ie: 2 “A kowe, nein-aramas, koulkihong Dair koulen kedepwidepw pwoat,*+ 3 oh ndaiong Dair,
‘Kowe me kousoan ni ewen kehl kan en sehdo,
Sounnetinet ong aramas akan en deke tohto,
Iet me Kaun Wasa Lapalahpie Siohwa ketin mahsanih:
“Dair, pein kowe me nda, ‘Ngehi me uhdahn kaselel.’+
4 Iei sapwomw kan nanwerengen* sehdo,
Oh me wiaiukada kan kaunsekala omw lingan.
5 Re wiahda omw dinapw kan koaros sang tuhke suniper en Senir,+
Oh re ale tuhke sidar sang Lepanon pwe ren wiahda kehu pwoat ong uhk.
6 Re wiahda omw padil kan sang tuhke ohk* en Pasan,
Oh mwohn weromw sohpo wiawihkihda tuhke saipres me kapwatki aipori sang dekehn Kittim.+
7 Omw serek wiawihkihda likou linen me poh tohto me kohsang Isip,
Oh pweipwei ong omw tahto wiawihkihda dereht poh mei oh dereht ntahnmwel sang wunen sihpw* me kohsang dekehn Elisah.+
8 Tohn Saidon oh Arpahd+ iei noumw sounsei.
Dair, pein noumw ohl koahiek kan wia noumw sehla kan.+
9 Ohl mah oh koahiek en Kepal kan+ pinahla kisin wasa wehwe kan en weromw sohp.+
Sohp koaros nansed oh neirail tohn sohp kan kohdo rehmw pwe ren pesineski kepwehn net kan.
10 Ohl en Persia, Lud oh Pud+ iang noumw karis en sounpei, noumw ohl en mahwen.
Re langahda neirail mehn sansar oh lisoarop kan rehmw, oh re wahdo lingan rehmw.
11 Ohl en Arpahd kan me iang noumw karis en sounpei kin kesihnen pidakihpene pohn omw kehl kan,
Oh ohl kommwad kan kin mi ni omw imwen doulik kan.
Re langahda mehn sansar pwonopwon kan kapilpene omw kehl kan
Oh kaunsekala omw lingan.
12 “‘“Tarsis+ kin wia pesines rehmw pwehki omw kepwe tohto.+ Re wiliankihda silper, mete, dihn, oh leht ong omw kepwe kan.+ 13 Seipan, Tupal+ oh Mesek+ kin wia pesines rehmw, oh re kin wiliankihda lidu kan+ oh dipwisou prons kan omw kepwehn net kan. 14 Kadaudok en Dokarma kan+ wiliankihda oahs kan oh dongki kan ong omw kepwe kan. 15 Aramas en Dedan+ kin wia pesines rehmw; ke doadoahngki sounnetinet kan ni deke tohto; re kihong uhk aipori+ oh eponi* nin duwen kisakis.* 16 Edom kin wia pesines rehmw pwehki dipwisou tohto me ke wiahda. Re wiliankihda turkuois, dereht ntahnmwel sang wunen sihpw, likou deiad me soangsoangen poh, likou kaselel, rahr kaselel kan, oh rupi kan ong omw kepwe kan.
17 “‘“Suda oh sapwen Israel kin wia pesines rehmw, re wiliankihda wihd en Minnid,+ mwenge me keieu mwahu, sukehn loangalap,+ leh, oh palsam*+ ong omw kepwe kan.+
18 “‘“Damaskus+ kin wia pesines rehmw pwehki dipwisou tohto me ke wiahda oh pil omw kepwe tohto kan, re wiliankihda wain en Elpon oh wunen sihpw en Sahar.* 19 Pidan oh Seipan sang Usal wiliankihda dipwisou kan me wiawihkihda mete, kasia* oh ahlek pwohmwahu ong omw kepwe kan. 20 Dedan+ wiliankihda likou* mehn mwohd pohn mahn akan ong omw kepwe kan. 21 Ke doadoahngki mehn Arepia kan oh kaunen Kedar+ kan koaros, me wia sounnetinet en sihmpwul kan oh sihpw wol kan oh kuht kan.+ 22 Sounnetinet kan en Sipa oh Raama+ kin wia pesines rehmw; re wiliankihda soangsoangen leh me keieu pwohmwahu koaros, takai kesempwal koaros oh kohl ong omw kepwe kan.+ 23 Aran,+ Kanne, Ihden,+ sounnetinet en Sipa kan,+ Ahsur,+ oh Kilmad kin wia pesines rehmw. 24 Nan omw wasahn netinet re pesineski likou kaselel kan, likou puhp kan me wiawihkihda likou poh mei me kapwatki deiad ni soangsoangen poh, oh karped ni soangsoangen poh kan. Mepwukat koaros pirapirkihdi sahl kan.
25 Sohp en Tarsis kan+ me kin wa omw kepwehn net kan,
Kahrehda omw audauda oh dirala* nanwerengen madau.
26 Noumw sounsei kan waiukala nan sehd ilokin;
Kisinieng en palimese kauweiukala nanwerengen madau.
27 Omw dipwisou kesempwal kan, omw kepwe kan, omw kepwehn net kan, noumw tohn sohp kan, oh noumw sehla kan,
Irail me kin pinahla omw kisin wasa wehwe kan, irail me kin netikihla omw kepwehn net kan,+ oh ohl en mahwen koaros+
—Pokon* koaros me mi rehmw—
Irail koaros pahn kihrla nanwerengen madau ni rahn en omw pwupwudi.+
28 Ni noumw sehla kan ar weriwer, oaroahr kan pahn rerrer.
29 Sounsei kan koaros, tohn sohp kan oh sehla kan
Pahn doudihsang pohn wararail sohp kan oh kesihnen pohn sahpw.
30 Re pahn ngihl laudida oh sengisengkin uhk+
Ni ar kesedahng pwelpar pohn moangarail kan oh tapwurseli nan pehs.
31 Re pahn koimadihala pein irail oh pwuhriong nan likoun nsensuwed;*
Re pahn sengisengkin uhk kowahlap ni mwahiei laud.
32 Nan ar nsensuwed re pahn kouliki koulen kedepwidepw pwoat oh mwahieikin uhk:
‘Ihs me duwehte Dair, me ahnsou wet nennenlahr nanwerengen sehdo?+
33 Ni ahnsou me omw kepwe kan kohdo sang nanwerengen madau, ke kansenamwahwihala aramas tohto.+
Omw kepwe tohto oh omw kepwehn net kan kakepwehpwehla nanmwarkien sampah kan.+
34 Met ke ohlahr nan madau, nan kepin madau,+
Oh omw kepwehn net koaros oh noumw aramas akan iang uhk kihrla.+
35 Tohn deke kan koaros pahn kangkakil uhk ni pwuriamwei,+
Oh ar nanmwarki kan pahn rerrerki masak+—ar masepwehk pahn sansalda ni masarail kan.
36 Sounnetinet en wehi kan pahn kuwaiki dahme wiawihong uhko.
Omw imwi pahn mwadang oh kamasepwehk,
Oh ke pahn sohrala kohkohlahte.’”’”+