Esekiel
32 Oh ni kaeisek riaun sounpar, ni kaeisek riaun sounpwong, ni keieun rahn en sounpwongo, Siohwa ketin pwurehng mahsanihong ie: 2 Nein-aramas, kouliki koulen kedepwidepw pwoat* duwen Parao nanmwarkien Isip, oh ndaiong ih,
‘Ke duwehte laion pwulopwul kehlail men* en wehi kan,
Ahpw ke nennenla.
Ke duwehte mahn kalaimwun en nansed,+ pitipitirekseli nan omw pillap kan,
Kakiriedihkihda pihl kan nehmw kan oh kasaminehla pillap kan.’*
3 Iet me Kaun Wasa Lapalahpie Siohwa ketin mahsanih:
‘I pahn kesepeseng ei uhko pohmw ni ei doadoahngki wehi tohto,
Oh re pahn apihiukada nan ei uhko.
4 I pahn keseiukala nan sahpwo;
I pahn koskinuhkala nan mohso.
I pahn wiahiong menpihr en pahnlahng koaros ren soandi pohmw,
Oh I pahn wiahiong mahn lawalo kan en sampah pwon en medkihla udukomw.+
5 I pahn kesehla udukomw pohn nahna kan
Oh audehkihda wahu kan luhwen paliweromw kan me melahr.+
6 I pahn kawisekesekehkihla sahpwo nta me kusukus sang rehmw leldahla ni nahna kan,
Oh e pahn audehda piletik kan.’*
7 ‘Oh ni omw sohrala I pahn pwaindi nanleng oh karotorotihala usu kan.
I pahn pwainkihdi ketipin depwek kan,
Oh maram pahn sohla linge.+
8 I pahn karotorotihala marain lingaling kan en nanleng pwehki kowe,
Oh I pahn kipehkihdi sapwomw rotorot,’ Kaun Wasa Lapalahpie Siohwa me ketin mahmahsen.
9 ‘I pahn kapwunodehda mohngiong en aramas tohto ni ei kahrelahng noumw me selidi kan nan wehi teikan,
Ong sahpw kan me ke sehse.+
10 I pahn kahrehiong aramas tohto ren masepwehkada,
Oh arail nanmwarki kan pahn rerrerki ar masak pwehki kowe ni ei usada nei kedlahso mwohrail.
Irail pahn usehlahte rerrer ni emenemen eh pahn masak pwehki keper ong eh mour,
Ni rahn me ke pwupwudio.’
11 Pwe iet me Kaun Wasa Lapalahpie Siohwa ketin mahsanih:
‘Kedlahs en nanmwarkien Papilon pahn kodohng pohmw.+
12 I pahn kahrehiong pokon me iang uhk ren mehkihla kedlahs en sounpei kehlail kan,
Irail koaros, me keieu lemei en wehi kan.+
Irail pahn kauwehla pohnmwahso en Isip, oh pokon koaros me iang ih pahn mwomwla.+
13 I pahn kemehla nah pelinmen kan koaros me mi limwahn eh pihl tohto,+
Oh sohte nehn aramas emen de nehn pelinmen pahn pwurehng kakiriedihada pihl kan.’+
14 ‘Ni ahnsowo I pahn kamwakelehda arail pihl kan,
Oh I pahn wiahiong arail pillap kan en pwilipwilwei rasehng leh,’ Kaun Wasa Lapalahpie Siohwa me ketin mahmahsen.
15 ‘Ni ahnsou me I wiakihla Isip wasa tehn ehu, sahpw ehu me soahng koaros loale sohrasang,+
Ni ahnsou me I kemehla towe kan koaros loale,
Re pahn anahne ese me ngehi me Siohwa.+
16 Met iei koulen kedepwidepw pwoat, oh aramas akan uhdahn pahn koulki met;
Nein wehi kan serepein kan pahn koulki met.
Re pahn koulkihong Isip oh pokon koaros me iang ih,’ Kaun Wasa Lapalahpie Siohwa me ketin mahmahsen.”
17 Eri ni kaeisek riaun sounpar, ni kaeisek limaun rahn en sounpwongo, Siohwa ketin mahsanihong ie: 18 “Nein-aramas, mwahieiki pokon en aramas akan nan Isip oh wahdihla ih pahn sampah, ih oh aramas en wehi kehlail kan, iangahki irail me pahn kohdihla nan pwoahro.*
19 “‘Ia duwe, ke leme me ke lingan sang meteikan? Kohdihla nan sousou, oh wendi rehn me sohte sirkumsais kan!’
20 “‘Re pahn pwupwudi nanpwungen irail kan me kamakamkihla kedlahs.+ E* kamakamkihla kedlahs; wurahdekihla ih iangahki pokon koaros me iang ih.
21 “‘Sounpei me keieu kehlail kan me mi nan kepin Sousou* pahn koasoiong ih* oh irail me sewese ih kan. Irail pahn kamakamkihla kedlahs oh uhdahn pahn kohdihla oh wonohn duwehte me sohte sirkumsais kan. 22 Asiria oh nah sounpei pwon mi mwo. Arail sousou kin kapilpene ih, irail koaros kamakamkihla kedlahs.+ 23 Eh sousou kan mi wasa me keieu loal nan pwoahr,* oh nah sounpei kan kapilpene eh sousou, irail koaros kamakamkihla kedlahs, pwehki mahso re kamasakada sapwen me momour kan.
24 “‘Elam+ oh pokon koaros me iang ih mi mwo kapilpene eh sousou, irail koaros kamakamkihla kedlahs. Irail kohdilahr pahn sampah ni ar sohte sirkumsaisla, irail me mahso kamasakada sapwen me momour kan. Met re pahn namenekla iangahki irail me kohdihla nan pwoahr.* 25 Re pahn wiahda peht ong ih* nanpwungen me kamakamala kan, iangahki pokon koaros me iang ih kapilpene eh sousou kan. Irail koaros sohte sirkumsaisla oh kamakamkihla kedlahs, pwehki mahso re kamasakada sapwen me momour kan; oh re pahn namenekla iangahki irail me kohdihla nan pwoahr.* E mihmier nanpwungen me kamakamala kan.
26 “‘Ih wasao me Mesek oh Tupal+ oh pokon koaros me iang ira* mi ie. Arail* sousou kan kapilpene ih.* Irail koaros sohte sirkumsaisla oh dongkihdi kedlahs, pwehki mahso re kamasakada sapwen me momour kan. 27 Ia duwe, re sou pahn wendi rehn sounpei kehlail oh sohte sirkumsais kan me melahr, me kohdihla nan Sousou* iangahki neirail tehtehn mahwen kan? Oh re pahn kihdi neirail kedlahs pahn moangarail kan* oh diparail kan pohn tihrail kan, pwehki mahso sounpei kehlail pwukat kamasakada sapwen me momour kan. 28 Ahpw kowe, ke pahn mwutpene nanpwungen me sohte sirkumsais kan, oh ke pahn wendi rehn irail me kamakamkihla kedlahs.
29 “‘Edom+ mi mwo, eh nanmwarki kan oh eh kaun akan koaros. Mendahki irail kehlail, re wonohn nanpwungen irail kan me kamakamkihla kedlahs; irail pil pahn wendi rehn me sohte sirkumsais kan+ oh rehn irail me kohdihla nan pwoahr.*
30 “‘Kaun akan koaros en paliepeng mi mwo, iangahki mehn Saidon+ kan koaros. Mendahki ar kehlail eh kamasakada wasa, re kohdilahr ni ar namenekla iangahki me kamakamala kan. Re pahn wonohn ni ar sohte sirkumsaisla iangahki irail me kamakamkihla kedlahs oh pahn namenekla iangahki irail me kohdihla nan pwoahr.*
31 “‘Parao pahn kilang mepwukat koaros, oh e pahn nsenamwahula me pid mehkoaros me wiawihong pokon me iangiho;+ Parao oh nah karis en sounpei koaros pahn kamakamkihla kedlahs,’ Kaun Wasa Lapalahpie Siohwa me ketin mahmahsen.
32 “‘Pwehki mahso e kamasakada sapwen me momour kan, Parao oh pokon koaros me iang ih pahn wonohn kommoaldi rehn me sohte sirkumsais kan, rehn me kamakamkihla kedlahs,’ Kaun Wasa Lapalahpie Siohwa me ketin mahmahsen.”