Esekiel
35 Siohwa ketin pwurehng mahsanihong ie: 2 “Nein-aramas, sohpeilahng wasa nahnahn Seir,+ oh wia kokohp ong wasao.+ 3 Ndaiong wasao, ‘Iet me Kaun Wasa Lapalahpie Siohwa ketin mahsanih: “Wasa nahnahn Seir, I kin uhwong uhk, oh I pahn kapahwei limeiet oh wiahkinuhkala wasa tehn ehu.+ 4 I pahn wekidohng omw kahnimw kan ong ni mohn kahnimw kei, oh ke pahn wiahla wasa tehn ehu;+ oh ke pahn anahne ese me ngehi me Siohwa. 5 Pwe ke kasalehda omw kolokolete kailok,+ oh ke wiahiong mehn Israel kan ren kamakamkihla kedlahs ni ar ahnsou apwal, ni ahnsoun kaimwiseklahn arail kalokolok.”’+
6 “Kaun Wasa Lapalahpie Siohwa ketin mahsanih, ‘Ihme kahrehda, nin duwen ei ieias, I pahn kaunopuhkada ong kakerkerdien ntahmw, oh mehla* pahn pwakihiuk.+ Pwehki nta me ke kin kailongki, mehla pahn pwakihiuk.+ 7 I pahn wiahkihla wasa nahnahn Seir wasa tehn ehu,+ oh I pahn kamwomwala mehmen me keidido wasao oh me pwurasang wasao. 8 I pahn kadirehkihla nahna kan me kamakamala kan; oh irail me kamakamkihla kedlahs pahn pwupwudi pohn omw dohl kan, nan omw wahu kan oh nan omw piletik kan koaros. 9 I pahn wiahiong uhk ken tehnla kohkohlahte, oh omw kahnimw kan pahn sohla towe;+ oh kumwail pahn anahne ese me ngehi me Siohwa.’
10 “Pwehki ke nda, ‘Wehi riau pwukat oh sahpw riau pwukat pahn wiahla sapwei, oh kitail pahn sapwenikihla ira koaros,’+ mendahki Siohwa eh ketiket wasao, 11 ‘kahrehda nin duwen ei ieias,’ Kaun Wasa Lapalahpie Siohwa me ketin mahmahsen, ‘I pahn dupungkihong uhk soangen lingeringer oh luwak me ke kasalehda ni omw kailongki nei aramas akan;+ oh I pahn wiahiong irail ren ese ihs ngehi ni ei kadeikuhkada. 12 Eri ke pahn anahne ese me ngehi, Siohwa, me karongeier soahng loaumwohmw koaros me ke ndaiong nahnahn Israel kan ni omw nda, “Re tehnlahr oh kohiengkitailehr pwe kitail en kadallehla.”* 13 Oh kumwail koasoiong ie ni aklapalap, oh kumwail lokaia tohto ong ie.+ I karongeier mehkoaros.’
14 “Iet me Kaun Wasa Lapalahpie Siohwa ketin mahsanih: ‘Sampah pwon pahn perenda ni ei wiahkinuhkala wasa tehn ehu. 15 Duwehte omw perenkihda ni ahnsou me sohsohn wehin Israel tehnla, ih pil duwen me I pahn wiahiong uhk.+ Wasa nahnahn Seir, ke pahn wiahla wasa tehn ehu, ei, Edom pwon;+ oh re pahn anahne ese me ngehi me Siohwa.’”