Esekiel

39 “Oh kowe, nein-aramas, wia kokohp ong Kok,+ oh ndaiong ih, ‘Iet me Kaun Wasa Lapalahpie Siohwa ketin mahsanih: “Kok, kaunen kaun akan en Mesek oh Tupal,+ I kin uhwong uhk. 2 I pahn kasohpeiukala oh kahreiuk oh wiahiong uhk en kohdahdo sang wasa me keieu doh kan ni paliepeng+ oh waiukodo pohn nahna kan en Israel. 3 I pahn poakihasang noumw kesik ketieuwen nan pehmw palimeing oh wiahiong noumw arep kan en pwupwudihsang nan pehmw palimaun. 4 Ke pahn pwupwudi pohn nahna kan en Israel,+ kowe oh noumw pwihnen sounpei kan koaros oh aramas akan me pahn iang uhk. I pahn kihiukala nin duwen kenen menpihr kan me kin kang uduk oh mahn lawalo kan en nansapw.”’+

5 “‘Ke pahn pwupwudi nan mohso,+ pwe ngehi me mahmahsen,’ Kaun Wasa Lapalahpie Siohwa me ketin mahmahsen.

6 “‘Oh I pahn kadarala kisiniei ong Makok oh ong irail me kin kousoan nan deke kan ni ar sohte perki mehkot,+ oh re pahn anahne ese me ngehi me Siohwa. 7 I pahn wiahiong mwarei sarawi en sansalda nanpwungen nei aramas en Israel kan, oh I sohla pahn mweidohng mwarei sarawi en saminla; oh wehi kan pahn anahne ese me ngehi me Siohwa,+ Koht Sarawi nan Israel.’+

8 “Kaun Wasa Lapalahpie Siohwa ketin mahsanih, ‘Ei, met kohkohdo, oh e pahn pweida. Ih rahno met me I mahmahsanih duwe. 9 Tohn kahnimw en Israel kan pahn kohieila oh saunkihda kisiniei tehtehn mahwen kan—mehn sansar tikitik kan oh mehn sansar laud kan, kesik ketieu kan oh arep kan, tuhkehn wowoki kan* oh ketieu kan. Oh re pahn doadoahngki mepwukat pwehn saunda kisiniei+ erein sounpar isuh. 10 Re sohte pahn anahne ale tuhke sang nan mohso de weseituwi sang nanwel kan pwehki re pahn doadoahngki tehtehn mahwen kan pwehn saunda kisiniei.’

“‘Re pahn kihsang dipwisou lohdi kan sang rehn irail me kin adihasang arail dipwisou kan oh kulihasang irail kan me kin kulih irail,’ Kaun Wasa Lapalahpie Siohwa me ketin mahmahsen.

11 “Rahno I pahn kihong Kok+ wasahn seridi ehu nan Israel, nan wahu en irail me kin seiloakla palimesehn sehdo, oh e pahn perehla ahl en irail me kin keid wasao. Ih wasao me irail pahn sarepedi Kok oh pokon koaros me iang ih, oh irail pahn kahdaneki wasao Wahun Amon-Kok.*+ 12 Aramas en Israel kan pahn sarepiraildi erein sounpwong isuh pwe ren kamwakelehda sahpwo.+ 13 Aramas koaros en sahpwo pahn doadoahk pwehn sarepiraildi, oh met pahn kahrehiong irail en ndandla ni rahn me I pahn kalinganeiehla,’+ Kaun Wasa Lapalahpie Siohwa me ketin mahmahsen.

14 “‘Ohl akan pahn pilipilda pwe ren kin kaukaule kohseli nan sahpwo oh sarepedi paliwar kan me luhwehdi pohn pwelen sampah, pwe ren kamwakelehda sahpwo. Re pahn usehlahte raparapahki erein sounpwong isuh. 15 Ni ahnsou me irail me kohkohseli nan sahpwo diar tihn aramas emen, irail pahn kauwada kilel ehu limwahn tiho. Eri irail me pilipilda pwehn sarepedi pahn sarepedi tiho nan Wahun Amon-Kok.+ 16 Oh e pahn pil mie kahnimw ehu wasao me adaneki Amohna.* Oh re pahn kamwakelehda sahpwo.’+

17 “A kowe, nein-aramas, iet me Kaun Wasa Lapalahpie Siohwa ketin mahsanih: ‘Ndaiong soangsoangen menpihr koaros oh mahn lawalo koaros en nansapw, “Kumwail kohpene oh kohdo. Kumwail pokonpene limwahn ei meirong me I kaukaunop ong kumwail, lapalahn kamadipw en meirong ehu pohn nahna kan en Israel.+ Kumwail pahn kang uduk oh nim nta.+ 18 Kumwail pahn kang uduk en aramas kehlail kan oh nim ntahn kaunen sampah kan. Irail iei sihpw wol kan, sihmpwul kan, kuht kan oh kouwol kan, mahn mworourou koaros en Pasan. 19 Kumwail pahn kang wih lao kumwail medla oh nim nta lao kumwail sakaula sang ni meirong me I kaunopada ong kumwail.”’

20 “‘Ni ei tehpelo, kumwail pahn medkihla oahs kan oh soundak kuruma kan, aramas kehlail kan oh soangsoangen sounpei koaros,’+ Kaun Wasa Lapalahpie Siohwa me ketin mahmahsen.

21 “‘I pahn kasalehda ei lingan nan wehi kan, oh wehi kan koaros pahn kilang kadeik me I wiadahr oh manaman* me I kasalehda nanpwungarail.+ 22 Sang rahno kohla aramas en Israel kan pahn anahne ese me ngehi me Siohwa ar Koht. 23 Oh wehi kan pahn anahne ese me aramas en Israel kan kalipilipala pwehki arail sapwung kan, pwehki re sohte lelepek ong ie.+ Eri I ekihsang irail silangiet+ oh kihirailla rehn arail imwintihti kan,+ oh irail koaros mehkihla kedlahs. 24 I wiahiong irail nin duwen arail samin oh arail kauwehla kosonned kan, oh I ekihsang irail silangiet.’

25 “Kahrehda iet me Kaun Wasa Lapalahpie Siohwa ketin mahsanih: ‘I pahn kapwurehdo me kalipilipala kan en Seikop+ oh I pahn kasalehiong aramas en Israel kan koaros kadek kalahngan;+ oh I pahn ngoangki pere mwarei sarawi.*+ 26 Mwurin ar namenengkihla salelepek koaros me re wiahiong ie,+ re pahn kousoan nan sapwarailo ni ar sohte perki mehkot, sohte me pahn kamasak irail.+ 27 Ni ei kapwureiraildo sang rehn aramas akan oh kihirailpene sang sapwen arail imwintihti kan,+ I pil pahn kasarawihala pein ngehi nanpwungarail mwohn mesen tohnwehi tohto.’+

28 “‘Re pahn anahne ese me ngehi me Siohwa ar Koht ni ei kalipeirailla nan wehi kan oh mwuri kapwureiraildo nan sapwarailo, sohte emen irail me luhwehdi.+ 29 I sohla pahn ekihsang irail silangiet,+ pwe I pahn wudekihdi ei ngehn sarawi* pohn aramas en Israel kan,’+ Kaun Wasa Lapalahpie Siohwa me ketin mahmahsen.”