Esekiel

4 “Oh kowe, nein-aramas, ale ehu prik* oh kihdi mwohmw. Parada kahnimw ehu powe—Serusalem. 2 Kapilpene kahnimw wet,+ kauwada dihd kan kapilpene,+ wiahda koasoakoasoak ehu ong kahnimw wet,+ kauwada impwal kan ong met, oh kapilkipene mehn kauwehla kehl kan.+ 3 Ale ehu pan mete oh kihdi nin duwen kehl mete nanpwungen kowe oh kahnimwo. Kowe eri sohpeiong kahnimwo, oh e pahn kapilpilpene; kowe me pahn kapilpene. Met kilel ehu ong aramas en Israel kan.+

4 “Mwuri ke pahn wendi keingihngla palimeingomw oh kihdi dipen aramas en Israel kan pohmw.*+ Ke pahn weuwa diparail erein rahn akan me ke wonohnki pali wet. 5 Oh ke pahn wia met erein rahn 390, me pahrekiong sounpar en diparail kan,+ oh ke pahn weuwa dipen aramas en Israel kan. 6 Oh ke pahn kanekehla mepwukat.

“Mwuri ke pahn pwurehng wendi keriapak ni palimaunomw, oh ke pahn weuwa dipen aramas en Suda kan+ erein rahn 40. Rahn ehu ong sounpar ehu, rahn ehu ong sounpar ehu, me I kihonguhkehr. 7 Ke pahn sohpeilahng Serusalem me kapilpilpene,+ ke pahn waikada pehn omw sehten, oh ke pahn wia kokohp ong kahnimwo.

8 “Kilang! I pahn pirehkinuhkedi sahl kei pwe ken sohte kak sohpeila ni omw pali teio lao ke kanekehla rahn akan me ke kapilpene kahnimwo.

9 “Oh ke pahn ale wihd, parli, pihns,* lendil, millet oh soangen wihd teikan* oh kihong mepwukat nan deudeu ehu oh wiahkihda mepwukat konomw pilawa. Pwe uwen tohtohn rahn akan me ke wonohnki pali wet, rahn 390, me ke pahn tungoalehki met.+ 10 Ke pahn paunihada oh tungoale sekel 20* en mwenge ehuehu rahn. Ke pahn tungoale ni ahnsou kan me koasoandi.

11 “Oh ke pahn nim pihl me sosohngdi, wenekis ehun ihn.* Ke pahn nim ni ahnsou kan me koasoandi.

12 “Ke pahn tungoale met duwehte omw pahn tungoale lopwon en pilawa parli pwonopwon; ke pahn umwunda mwohn masarail kan ni omw saunkihda kisiniei pwisehn aramas me madekenglahr.” 13 Siohwa eri ketin doula mahsanih: “Ih met mwomwen mehn Israel kan ar pahn tungoale kanarail pilawa samin nan wehi kan me I pahn kamwarakirailpeseng ie.”+

14 Ngehi eri patohwan: “Kaidehn met, Maing Kaun Wasa Lapalahpie Siohwa! Leledo met, I saikinte kasamineiehla ni ei tungoale uduk en mahn me dierek mehla de me mahn lawalo men tehrpeseng,+ oh sohte uduk samin me I kihong nan eweiet.”+

15 Ih eri ketin mahsanihong ie: “Eri me mwahu, I pahn mweidohng uhk ken doadoahngki pwisehn kou a kaidehn pwisehn aramas, oh ke pahn umwunda konomw pilawa powe.” 16 Ih eri ketin mahsanihong ie: “Nein-aramas, I pahn kauhdi mwenge me kin kohda* nan Serusalem,+ oh ni pwunod laud re pahn tungoale kanarail pilawa ni uwen me paundahr,+ oh ni masepwehk re pahn nim nimarail pihl ni uwen me sosohngdi.+ 17 Met pahn wiawi lao sohla pilawa oh pihl, ele re pahn pwuriamweila kilikilang emenemen oh tihtihla pwehki ar sapwung.