Esekiel

42 Ih eri kahreielahng wasa me kelpene maslikio ni paliepeng.+ Oh e kahreiehla wasa me perehn mwenge kan mi ie, me mi limwahn wasa wehweo+ oh ni paliepeng en ihmw* me patehngete wasao.+ 2 Sang ni wasahn pedolong me mi paliepeng, e reireiki kiupid* 100 oh tehlapki kiupid 50. 3 E mi nanpwungen wasa me kelpene masloaleo me tehlapki kiupid 20+ oh tat takai en wasa me kelpene maslikio. Wasahn alu kan sohpeipene oh poasoake siluh. 4 Mwohn perehn mwenge ko,* mie wasahn alu ehu loaleo+ me tehlapki kiupid 10 oh reireiki kiupid 100* oh wasahn pedolong ko uhlahng paliepeng. 5 Perehn mwenge kan me mi powe en ihmw wet wetikitik sang me mi keieu pah oh me mi nanwerengeo, pwehki wasahn alu ko kihsang ar wasa. 6 Pwe perehn mwenge kan poasoake siluh, ahpw sohte uhr duwehte uhr kan en wasa me kelpene ko. Ihme kahrehda uwen laud en tahto tikitik sang taht me mi keieu paho oh me mi nanwerengeo.

7 Maslikin dihd takai me mi limwahn perehn mwenge ko me salieido wasa me kelpene maslikio oh sohpeilahng perehn mwenge teiko reireiki kiupid 50. 8 Perehn mwenge kan me sallahng wasa me kelpene maslikio reireiki kiupid 50, ahpw perehn mwenge ko me sallahng wasa sarawio reireiki kiupid 100. 9 Perehn mwenge ko mie wasahn pedolong ehu ni palimese me kolahng perehn mwenge ko sang wasa me kelpene maslikio.

10 Pil mie perehn mwenge kan ni palieir. Dihd takai en wasa me kelpeneo sallahng palimese. Pere ko mi limwahn wasa wehweo oh ihmwo.+ 11 Mie wasahn alu ehu mwohn pere ko duwehte perehn mwenge ko me mi paliepeng.+ Perehn mwenge ko reirei ehute oh tehlap ehute oh arail wasahn pedoi ko oh mwomwarail ko duwepenehte. Wasahn pedolong ko 12 duwehte wasahn pedolong en perehn mwenge ko me mi ni palieir. Mie wasahn pedolong ehu ni tepin wasahn aluwo, mwohn wasa me patpene ni dihd takaio me sallahng palimese, wasa me aramas kak pedolong ie.+

13 Ih eri ndaiong ie: “Perehn mwenge kan ni paliepeng oh perehn mwenge kan ni palieir me mi limwahn wasa wehweo+ wia wasahn mwenge sarawi kan. Ih wasao me samworo kan me kin patohla mwohn silangin Siohwa kin tungoale meirong me keieu sarawi kan.+ Wasao re kin kihdi meirong me keieu sarawi kan, meirong en krein, meirong en dihp oh meirong en tomwki dihp pwehki wasao me sarawi.+ 14 Ni ahnsou me samworo kan pedolongala, re sohte pahn pedoisang wasa sarawio kohla wasa me kelpene maslikio ni ar sohte kihsang mahs ar likou kan me re doadoahngki ni ar papah,+ pwe mepwukat me sarawi. Re pahn likawihada likou teikan pwe ren kohla wasa kan me mweimweiong aramas akan ren mi ie.”

15 Ni eh kaimwisekala eh sohngedi tehnpas sarawio pwon, e ahpw kahreiehla oh kohieila ni ewen kehl me sallahng palimese+ oh e sohngedi wasao pwon.

16 E sohngedi palimese ni eh doadoahngki ahlek mehn sosohng.* E reireiki ahlek 500 sang ehu pali lel pali teio.

17 E sohngedi paliepeng, oh e reireiki ahlek 500.

18 E sohngedi palieir, oh e reireiki ahlek 500.

19 E pidekla palikapi oh sohngedi. E reireiki ahlek 500.

20 E sohngedi ni pali pahieu ko. Mie dihd ehu me kapilpene wasao+ me reireiki ahlek 500 oh tehlapki ahlek 500,+ pwehn katohrepeseng nanpwungen dahme sarawi oh dahme sohte sarawi.+