Esekiel

48 “Iet akan eden keinek kan, tepisang wasa keieu doh ni paliepeng: Sapwen Dan+ tang limwahn ahl en Edlon kohla Lepo-amad*+ kohla Asar-enan, kohla limwahn irepen Damaskus me sallahng paliepeng, limwahn Amad;+ oh e douluhlla sang palimese kohla lel ni irepen palikapi. 2 Sapwen Aser+ mi ni irepen Dan, sang ni irepen palimese kohla lel ni irepen palikapi. 3 Sapwen Napdali+ mi ni irepen Aser, sang ni irepen palimese kohla lel ni irepen palikapi. 4 Sapwen Manase+ mi ni irepen Napdali, sang ni irepen palimese kohla lel ni irepen palikapi. 5 Sapwen Epraim mi ni irepen Manase,+ sang ni irepen palimese kohla lel ni irepen palikapi. 6 Sapwen Reupen mi ni irepen Epraim,+ sang ni irepen palimese kohla lel ni irepen palikapi. 7 Sapwen Suda mi ni irepen Reupen,+ sang ni irepen palimese kohla lel ni irepen palikapi. 8 Ni irepen Suda, sang ni irepen palimese kohla lel ni irepen palikapi, kisakis me kumwail pahn katohrehla pahn tehlapki kiupid* 25,000+ oh met pahn pahrekiong uwen reirei en sapwen keinek teiko sang ni irepen palimese kohla lel ni irepen palikapi. Tehnpas sarawio pahn mi nanwerengen met.

9 “Kisakis me kumwail pahn katohrehla ong Siohwa pahn reireiki kiupid 25,000 oh tehlapki kiupid 10,000. 10 Ih met me pahn wia kisakis sarawi ong samworo kan.+ E pahn reireiki kiupid 25,000 ni paliepeng, tehlapki kiupid 10,000 ni palikapi, 10,000 ni palimese oh 25,000 ni palieir. Tehnpas sarawi en Siohwa pahn mi nanwerengen met. 11 Met pahn kohieng samworo kan me sarawihla, me wia kadaudok en Sadok,+ irail me kin apwalih ar pwukoa kan ong ie oh sohte salongala ni ahnsou me mehn Israel kan oh mehn Lipai kan salongala.+ 12 Re pahn ahneki pwais ehu sang kisakis en sahpwo me katohrohrla nin duwen mehkot me keieu sarawi, ni irepen sapwen mehn Lipai kan.

13 “Limwahn sapwen samworo kan, mehn Lipai kan pahn ale pwais ehu me reireiki kiupid 25,000 oh tehlapki kiupid 10,000. (Uwen reirei pwon pahn kiupid 25,000 oh tehlapki kiupid 10,000.) 14 Re sohte pahn netikihla, wiliankihda de kihla ehu wasa me keieu mwahu sang pwais en sahpw wet, pwe met iei mehkot me sarawi ong Siohwa.

15 “Wasa me luhwehdio me tehlapki kiupid 5,000 iangahki irepe me reireiki kiupid 25,000 pahn wia wasa me sohte sarawi nan kahnimwo,+ oh e pahn wia wasahn kousoan oh mohs ehu. Kahnimwo pahn mi nanwerengen met.+ 16 Iet akan sosohng en kahnimwo: Irepen paliepeng reireiki kiupid 4,500, irepen palieir 4,500, irepen palimese 4,500 oh irepen palikapi 4,500. 17 Mohs en kahnimwo pahn tehlapki kiupid 250 kohla paliepeng, 250 kohla palieir, 250 kohla palimese oh 250 kohla palikapi.

18 “Uwen reirei en luhwen sahpwo pahn uwehte kisakis sarawio,+ kiupid 10,000 kohla palimese oh 10,000 kohla palikapi. E pahn uwehte kisakis sarawio, oh wahn sahpwo pahn kin kihda mwenge ong irail kan me kin doadoahk ong kahnimwo. 19 Irail me kin doadoahk ong kahnimwo sang keinek en Israel kan koaros pahn koadoahke sahpwo.+

20 “Kisakiso pwon reireiki kiupid 25,000 pali koaros en keimw pahieu. Kumwail pahn katohrehla met nin duwen kisakis sarawi iangahki pwais en kahnimwo.

21 “Dahme luhwehdi ni pali koaros en kisakis sarawio oh pwais en kahnimwo pahn kohieng kaun emen.+ E pahn mi limwahn irepe me reireiki kiupid 25,000 me mi ni palimese oh palikapi en kisakiso. E pahn uwehte sahpw ko me patehng wasao, oh met pahn ong kaun menet. Kisakis sarawio oh tehnpas sarawio pahn mi nanwerengen met.

22 “Pwaisen mehn Lipai kan oh pwais en kahnimwo pahn mi nanpwungen sapwen kaun menet. Sapwen kaun menet pahn mi nanpwungen irepen Suda+ oh irepen Pensamin.

23 “A duwen keinek ko me luhwehdi, sapwen Pensamin sang ni irepen palimese kohla lel ni irepen palikapi.+ 24 Sapwen Simion mi limwahn irepen Pensamin,+ sang ni irepen palimese kohla lel ni irepen palikapi. 25 Sapwen Isakar+ mi limwahn irepen Simion, sang ni irepen palimese kohla lel ni irepen palikapi. 26 Sapwen Sepulon mi limwahn irepen Isakar,+ sang ni irepen palimese kohla lel ni irepen palikapi.+ 27 Sapwen Kad mi limwahn irepen Sepulon,+ sang ni irepen palimese kohla lel ni irepen palikapi. 28 Irepen palieir limwahn irepen Kad pahn tangasang Damar+ kolahng ni pihl en Meripa-kades,+ kohla ni Wahwo*+ oh kohla ni Sehd Laud.*

29 “Ih sahpw wet me kumwail pahn kihpeseng nin duwen sohso ehu ong keinek en Israel kan,+ oh mepwukat pahn wia sapwarail,”+ Kaun Wasa Lapalahpie Siohwa me ketin mahmahsen.

30 “Mepwukat me pahn wia wasahn pedolong oh pedoi kan en kahnimwo: Paliepeng pahn sosohngdi kiupid 4,500.+

31 “Ewen kelen kahnimw kan pahn adasang keinek en Israel kan. Ni ewen kehl siluh ko en paliepeng, mie ehu ewen kehl ong Reupen, ehu ewen kehl ong Suda oh ehu ewen kehl ong Lipai.

32 “Palimese pahn reireiki kiupid 4,500, oh mie ewen kehl siluh: ehu ewen kehl ong Sosep, ehu ewen kehl ong Pensamin oh ehu ewen kehl ong Dan.

33 “Palieir pahn reireiki kiupid 4,500, oh mie ewen kehl siluh: ehu ewen kehl ong Simion, ehu ewen kehl ong Isakar oh ehu ewen kehl ong Sepulon.

34 “Palikapi pahn reireiki kiupid 4,500, oh mie ewen kehl siluh: ehu ewen kehl ong Kad, ehu ewen kehl ong Aser oh ehu ewen kehl ong Napdali.

35 “Uwen reirei en dihd me pidakihpene kahnimwo pahn reireiki kiupid 18,000. Oh sang rahno kohla kahnimwo pahn adaneki Siohwa Ketiket Wasao.”+