Rongamwahu en Luk
15 Sounrik daksis oh me dipan kan koaros ahpw kin pokondohng reh oh kapilpene pwe ren rong ih.+ 2 Parisi ko oh sounkawehwehn Kosonnedo ko ahpw kin lipilipahnede, ndinda: “Ohl menet kin kasamwo me dipan akan oh kin iang irail mwenge.” 3 Ih eri mahsanihong irail karasaras pwoatet: 4 “Ma ohl emen nanpwungamwail naineki sihpw 100, a emen rehrail ahpw salongala, e sou pahn kihdi meh 99 nan sapwtehn oh kohla rapahki me salongalao lao e diar?+ 5 Oh ni eh diarada, e ahpw perenda oh kidahng pohn pwopwe. 6 Oh ni eh lella ni imweo, e ekerpene kompoakepah ko oh mehn mpe ko oh ndaiong irail, ‘Kumwail iang ie perenda pwe I diaradahr nei sihpw me salongalahro.’+ 7 I ndaiong kumwail, ih pil duwen nanleng eh perenkihda me dipan emen me koluhla+ laudsang me pwung 99 me sohte anahne koluhla.
8 “De ma lih emen naineki mwohni drakma* eisek, oh e kasalongehla ehu drakma* ko, e sou pahn isikada lamp ehu oh koahkoa nan imwe oh rapahki mwahu lao e diar? 9 Oh ni eh diarada, e ekerpene kompoakepah ko* oh mehn mpe ko oh nda, ‘Kumwail iang ie perenda pwe I diaradahr nei drakma* me I kasalongehlao.’ 10 I ndaiong kumwail, ih pil duwen sapwellimen Koht tohnleng kan ar perenkihda me dipan men eh koluhla.”+
11 Ih eri mahsanih: “Ohl emen naineki pwutak riemen. 12 A me tikitiko ndaiong semeo, ‘Ipa, kihongiehla pwaisei sang omw dipwisou kan me pahn kohieng ie.’ Ih eri pwalangpeseng eh dipwisou ko nanpwungara. 13 A mwurin rahn ekei, pwutak tikitiko ahpw kihpene eh kepwe koaros oh seiloakla sahpw doh ehu oh ih wasa me e kesehla mwahl eh dipwisou ko sang ni eh mourki mour suwed. 14 Ni eh doadoahngkihla nah mwohni koaros, lehk lapalap ehu ahpw wiawi wasa koaros nan sahpwo, e ahpw apwalada. 15 Ih eri kohla rehn emen pwilidak en sahpwo oh wiahla nah tohndoadoahk, ohlo ahpw kadarala ih nan eh mwaht pwe en apwalih nah pelin pwihko.+ 16 Oh e kin men kangada mwenge me pwihk ko kin kangkang, ahpw sohte emen kihong ih mehkot.
17 “Ih eri pwuralahng eh madamadau pwung oh nda, ‘Ia uwen reken kenen nein pahpa tohndoadoahk ko pilawa, a I ahpw mehkilahr ei men mwenge! 18 I pahn uhda oh pwurala rehn semeio oh ndaiong: “Ipa, I dipadahr rehn Koht* oh rehmw. 19 I solahr warohng adaneki noumw pwutak. Wiahkiniehla emen noumw tohndoadoahk kan.”’ 20 Ih eri mweselda oh kohla rehn semeo. Ni eh mihmihte wasa doh, semeo ahpw kilangada ih oh poakehla kowahlap, e ahpw tangalahte pwoalehdi* oh metik. 21 Pwutako ahpw ndaiong ih: ‘Ipa, I dipadahr rehn Koht oh rehmw.+ I solahr warohng adaneki noumw pwutak.’ 22 A semeo ahpw ndaiong eh ladu ko, ‘Kumwail pitipit wahdo likou reirei me keieu kaselel oh kalikawihkihda oh kihong rihng ni sendin peh oh suht ni neh kan. 23 Pil wahdo kou pwul mworourou, kemehla, oh kitail en mwengemwenge oh kamakamadipw, 24 pwehki nei pwutaket melahr ahpw pwurehng mourda;+ e salongalahr ahpw dierek.’ Irail eri tepida pereperen.
25 “Ni ahnsowo, nah pwutak laudo mihmi nan mwahto oh ni eh pwurodo oh kerendohng ni ihmwo, e rongada ngilen keseng oh kahlek. 26 Ih eri ekerodo emen sounpapah ko reh oh idek dahme wiewiawi. 27 E ahpw ndaiong, ‘Riomwo leledohr oh semomwo kemelahr kou pwul mworourouwo pwehki eh pwurodo reh kehlail.’* 28 Ahpw e lingeringerda oh sohte men pedolong. Semeo eri kohieila oh tepida pekipek reh. 29 E ahpw sapeng semeo nda, ‘Kilang! Sounpar tohto I kin doadoahkohng uhk duwehte lidu oh sohte pak ehu me I sapeikiong omw koasoandi kan, ahpw sohte pak ehu ke kihong ie kuht pwulopwul men pwe I en pereperenki rehn kompoakepahi kan. 30 Ahpw ni ahnsowohte me noumw pwutaken me kauwehla mwahl* omw dipwisou kan rehn lihen netiki paliwararail kan leledo, ke kemehiong kou pwul mworourouwo.’ 31 Ih eri ndaiong, ‘Nei pwutak, ke kin mihmi rehi ahnsou koaros oh mehkoaros me ahi iei ahmw. 32 Ahpw kitail anahne kamadipw oh pereperen pwe riomw pwutako melahr ahpw pwurehng mourda; e salongalahr ahpw dierekda.’”