22 Ih eri mahsanihong sapwellime tohnpadahk ko: “Ihme kahrehda I ndaiong kumwail, uhdihsang pwunodki amwail mour* ong dahme kumwail pahn tungoale de duwen paliwaramwail ong dahme kumwail pahn likawih.+ 23 Pwe mour* kesempwal sang mwenge oh paliwar kesempwal sang likou. 24 Tehk mwahu reipen* kan: Re sohte kin kamwarak werentuhke de dolung; pil sohte arail imwen nahk; ahpw Koht kin ketin katungoale irail.+ Kumwail sou kesempwal sang menpihr kan?+ 25 Ihs rehmwail me kak ekiste* kareireila eh mour ni eh kin pwunod? 26 Eri ma kumwail sohte kak wia mehkot tikitik me duwehte met, a mehnda kumwail pwunodki soahng teikan?+ 27 Tehk duwen kiepw kan ar kin kekeirda: Re sohte kin doadoahk oh sohte kin wiahda likou; ahpw I ndaiong kumwail me Solomon ni eh kapwatkihda eh lingan koaros, e pil sohte kaselel duwehte apwoat irail.+ 28 A ma ih duwen Koht eh kin ketin kapwatahda dipwen nan mohs me mie rahnwet a lakapw e lekdekiong nan kisiniei, e uhdahn pahn ketin kalikawihkumwailda! Kumwail me pwoson tikitik!