Esekiel

8 Oh ni keweneun sounpar, ni keweneun sounpwong, ni kelimaun rahn en sounpwongo, ni ahnsou me I mwomwohd nan imweio oh ohl mah kan en Suda wie mwomwohd mwohi, limen Kaun Wasa Lapalahpie Siohwa ahpw koliehdi wasao. 2 Ni ei kilikilang, I kilangada mwomwen aramas emen me duwehte kisiniei; mie kisiniei pahnangin wasa me mwomwen duwehte lukopeo,+ oh sang ni lukopeo kohda lingaling, duwehte mete lingaling.*+ 3 Ih eri ketin kapahla mehkot me likamwete mwomwen lime oh kolada ekei pitenmoangei kan, oh sang ni kaudiahl kan me pwilisang rehn Koht, ngehn sarawi* ahpw waiehla nanpwungen sampah oh nanleng oh waielahng nan Serusalem, ni ewen kehl me mi loaleo+ me sallahng paliepeng, wasa me dikedik me kin kahngiangihada Koht kesikesihnen ieo.+ 4 Oh kilang! lingan en Koht en Israel mihmi wasao,+ duwehte mwohmw me I kilangada nan wasa patapat en wahwo.+

5 Ih eri ketin mahsanihong ie: “Nein-aramas, menlau sarada oh kilenglahng paliepeng.” Ngehi eri sarada oh kilenglahng paliepeng, oh wasao, ni paliepeng en ewen kelen pei sarawio, ni ewen kehlo, mie dikedik ehu me kin kahrehda engieng. 6 Oh e ketin mahsanihong ie: “Nein-aramas, ke kilang soahng suwed, soahng kasaut kan me aramas en Israel kan wiewia wasaht,+ soahng kan me kin kadohwaniehsang ei wasa sarawio?+ Ahpw ke pahn kilang soahng kasaut kan me pil suwedsang douluhl met.”

7 Ih eri ketikiniehla ni wasahn pedolong en wasa me kelpeneo, oh ni ei kilengla, I kilangada pwoahr ehu ni kehlo. 8 Ih eri ketin mahsanihong ie: “Nein-aramas, menlau kalaudehla pwoahr en kehlen.” Ngehi eri kalaudehla pwoahr en kehlo, oh I kilangada ewen kehl ehu. 9 E ketin mahsanihong ie: “Kohlongala oh kilang soahng suwed oh kasaut kan me re wiewia wasaht.” 10 Ngehi eri kohlongala oh kilang, oh I kilangada soangsoangen kilel en mahn kerep oh kasaut koaros+ oh dikedik kasaut* koaros en aramas en Israel kan;+ re parada mepwukat pidakihpene dihdo pwon. 11 Oh ohl mah en Israel 70 wie kesikesihnen mwohn mepwukat, iangahki Saasanaia nein Sapan+ pil kesikesihnen nanpwungarail. Emenemen irail kolokol mehn isihs, oh ediniei warpwohmwahu kin kohkohda.+ 12 E ketin mahsanihong ie: “Nein-aramas, ke kilang dahme ohl mah kan en Israel wiewia nan roto, emenemen irail mi nan pere masloale kan wasa me eh dikedik kan mi ie? Pwe re ndinda, ‘Siohwa sohte ketin mahsanih kitail. Siohwa ketin keselahr sahpwet.’”+

13 Oh e ketin doula mahsanihong ie: “Ke pahn kilang soahng kasaut kan me pil uhdahn suwedsang me re wiewia.” 14 Ih eri ketikiniehla ni ewen kehl en paliepeng en tehnpesen Siohwa, oh wasao I kilangada lih ekei me wie mwomwohd oh sengisengki koht Dammus.

15 Oh e pil ketin doula mahsanihong ie: “Nein-aramas, ke kilang met? Ke pahn pil kilang soahng kasaut kan me pil uhdahn suwedsang mepwukat.”+ 16 Ih eri ketikiniehla wasa me kelpene masloalen tehnpesen Siohwa.+ Wasao, ni wasahn pedolong en tehnpas sarawi en Siohwa, nanpwungen palangko oh pei sarawio, mpen ohl 25 me sohpeisang tehnpas sarawi en Siohwa oh sohpeilahng palimese; re poarpoaridiong ketipin ni palimese.+

17 E ketin mahsanihong ie: “Nein-aramas, ke kilang met? E sou itarehr aramas en Suda kan ar wiewia soahng kasaut pwukat, en audehkihda sahpwet tiahk lemei+ oh kin kansensuwedih ie? Met re pil kihkiheng raho* ni ei keinuhnuet. 18 Eri I pahn mwekid ni ei engieng. I sohte pahn poakeirailla;* de pil nsenohkin irail.+ Mehnda ma re weriwer laudiong nan salengei kat, I sohte pahn karonge irail.”+