Esekiel

7 Siohwa ketin pwurehng mahsanihong ie: 2 “A kowe, nein-aramas, iet me Kaun Wasa Lapalahpie Siohwa ketin mahsanihong sapwen Israel: ‘Imwio leledohr! Imwio leledohr pohn keimw pahieu en sahpwo. 3 Imwio leledohr pohmw, oh I pahn kadarohng uhk ei engieng, oh I pahn kadeik uhk nin duwen omw wiewia kan oh kapwukoahkin uhk omw wiewia kasaut kan koaros. 4 I sohte pahn poakeiukala;* de pil nsenohkin uhk,+ pwe I pahn wadohng pohmw imwilahn omw wiewia kan, oh ke pahn lokolongki imwilahn omw wiewia kasaut kan.+ Oh kumwail pahn anahne ese me ngehi me Siohwa.’+

5 “Iet me Kaun Wasa Lapalahpie Siohwa ketin mahsanih: ‘Kilang! Kahpwal ehu, kahpwal tohrohr ehu kohkohdo.+ 6 Imwio kohkohdo; imwio pahn kohdo; e pahn mwadangete kohdo pohmw. Kilang! E kohkohdo. 7 Omw ahnsowo* leledohr, kowe me kin kousoan nan sahpwo. Ahnsowo kohkohdo, rahno kerendohr.+ Mie pingiping a kaidehn weriwer en peren pohn nahna kan.

8 “‘Kereniongehr I pahn wudekihdiong ei engieng pohmw,+ oh I uhdahn pahn kadarohng uhk ei engieng,+ oh I pahn kadeik uhk nin duwen omw wiewia kan oh kapwukoahkin uhk omw wiewia kasaut kan koaros. 9 I sohte pahn poakeiukala; de pil nsenohkin uhk.+ I pahn wadohng pohmw imwilahn omw wiewia kan, oh ke pahn lokolongki imwilahn omw wiewia kasaut kan. Oh kumwail pahn anahne ese me ngehi me Siohwa, me kalokalokeiuk.+

10 “‘Kilang, rahno! Kilang, e kohkohdo!+ Omw ahnsowo* leledohr; sokon en kalokoloko onopadahr I en doadoahngki oh aklapalap* en imwintihtio laudlahr. 11 Tiahk lemei keirda wiahla sokon pwoat mehn kaloke me suwed.*+ Irail de pil ar kepwe kan de pokon en ar aramas akan de pil ar ndand sohte pahn luhwehdi. 12 Ahnsowo pahn kohdo, rahno pahn leledo. Me pwaindao en dehr peren, oh me netikihlao en dehr mwahiei, pwe mie engieng ehu ong ar pokono pwon.*+ 13 Pwe me netikihlao sohte pahn pwuralahng dahme netilao, mehnda ma e momour, pwe kaudiahlo pahn uhwong pokono pwon. Sohte me pahn pwurala, oh pwehki eh sapwung, sohte me pahn doarehla pein eh mour.

14 “‘Re peukehr sowio,+ oh koaros onopadahr, ahpw sohte me pahn kohieilahng mahwen, pwehki ei engiengo kohwong pokono pwon.+ 15 Kedlahso mi likio,+ oh soumwahu lusulus oh lehk lapalap mi loale. Mehmen me mi nan mwahto pahn mehkihla kedlahs, oh lehk lapalap oh soumwahu lusulus pahn kadallehla irail me mi nan kahnimwo.+ 16 Irail me pitila oh momour pahn kohla ni nahna kan, oh duwehte mwuroi en wahu kan, emenemen irail pahn ingitingki eh sapwung.+ 17 Pehrail kan koaros pahn mwoatoredi, oh pihl pahn dingiding sang pwukiarail kan.*+ 18 Re likawihadahr likoun nsensuwed,*+ oh re rerrer. Koaros pahn namenekla, oh moahng koaros pahn koikoila.*+

19 “‘Re pahn kesehla neirail silper kan nanial akan, oh neirail kohl kan pahn wiahla mehkot kasaut ong irail. Neirail silper de kohl sohte pahn kak doareirailla ni rahnen engieng en Siohwa.+ Re sohte pahn nsenamwahula, de pil audehda kapehdirail kan, pwe met* wialahr mehn kerempwa ehu* me kahrehiong ar pwupwudi nan dihp. 20 Re kin suweiki lingan en ar kapwat kan, oh re kin wiahkihda mepwukat* ar sansal kasaut kan, arail dikedik kasaut kan.+ Ihme kahrehda I pahn wiahiong met en wiahla mehkot kasaut ehu ong irail. 21 I pahn kihla met* nan pehn mehn liki kan ren kulihasang oh rehn me suwed kan en sampah nin duwen ar dipwisou lohdi, oh re pahn kasaminehla.

22 “‘I pahn sohpeisang irail,+ oh re pahn kasaminehla ei wasa riro,* oh lipirap kan pahn pedolong oh kasaminehla.+

23 “‘Wiahda sein,*+ pwe sahpwo direkilahr nta sang ni kopwung sapahrek+ oh kahnimwo direkilahr tiahk lemei.+ 24 I pahn wahlongodo aramas keieu suwed en wehi kan,+ oh irail pahn adihasang imwarail kan,+ oh I pahn katokehdi pohnmwahso en me kehlail kan, oh arail wasa sarawi kan pahn saminla.+ 25 Ni ar lokolok eh leledo, re pahn rapahki popohl, ahpw re sohte pahn diar.+ 26 Ehu kahpwal pahn kohdo mwurinte ehu, oh ehu pakair mwurinte ehu, oh aramas akan pahn rapahki kaudiahl ehu sang soukohp men,+ ahpw kosonnedo* pahn sohrasang samworo men oh kaweid pahn sohrasang ohl mah kan.+ 27 Nanmwarkio pahn mwahiei,+ oh kaun men pahn sohla eh koapworopwor,* oh pehn aramas akan en sahpwo pahn rerrerki ar masepwehk. I pahn wiahiong irail nin duwen ar wiewia kan, oh I pahn kopwung irail nin duwen ar kin kopwung. Oh re pahn anahne ese me ngehi me Siohwa.’”+