Esekiel

6 Siohwa ketin pwurehng mahsanihong ie: 2 “Nein-aramas, sohpeilahng nahna kan en Israel oh wia kokohp ong irail. 3 Ke pahn nda, ‘Nahna kan en Israel, rong mahsen en Kaun Wasa Lapalahpie Siohwa: Iet me Kaun Wasa Lapalahpie Siohwa ketin mahsanihong nahna kan, dohl kan, piletik kan oh wahu kan: “Kilang! I pahn wadohng kumwail kedlahs pwoat oh I pahn kauwehla amwail wasa ile kan. 4 Amwail pei sarawi kan pahn rengkidi, amwail dewen warpwohmwahu kan pahn ohla+ oh I pahn kesehdi noumwail me kamakamala kan mwohn amwail dikedik kasaut kan.*+ 5 I pahn kesehla paliweren aramas en Israel kan me melahr mwohn ar dikedik kasaut kan, oh I pahn kamwarakpeseng tihmwail kan kapilpene amwail pei sarawi kan.+ 6 Wasa koaros me kumwail kin kousoan ie, kahnimw kan pahn mwomwla+ oh wasa ile kan pahn rengkidi oh pahn tehnla.+ Amwail pei sarawi kan pahn rengkidi oh mwerpeseng, amwail dikedik kasaut kan pahn sohrala, amwail dewen warpwohmwahu kan pahn lopdi oh amwail doadoahk kan pahn sohrala. 7 Oh irail me kamakamala kan pahn pwupwudi nanpwungamwail,+ oh kumwail pahn anahne ese me ngehi me Siohwa.+

8 “‘“Ahpw I pahn luhwehkihdi ekei, pwe ekei kumwail pahn pitsang kedlahs ni amwail mi nan wehi kan oh ni amwail mwarahkpeseng nan sahpw akan.+ 9 Oh irail me pitila kan pahn tamataman ie nan wehi kan me re selidi ie.+ Re pahn esehda me kupwurei ohkihla ar mohngiong salelepek* eh sohpeisang ie+ oh masarail kan eh kin inangih ar dikedik kasaut kan.+ Re pahn namenengkihla oh kasautkihla soahng suwed oh kasaut koaros me re wiahda.+ 10 Irail pahn anahne ese me ngehi me Siohwa oh ei mahsen kan kaidehn mahsen mwahl kei ni ei kamasakin irail me I pahn wahdo kahpwal pohrail.”’+

11 “Iet me Kaun Wasa Lapalahpie Siohwa ketin mahsanih: ‘Lopw oh tomki nehmw kan oh pahtouki soahng suwed oh kasaut koaros me aramas en Israel kan wiahda, pwe irail pahn mehkihla kedlahs, lehk lapalap oh soumwahu lusulus.+ 12 Me mi wasa doh pahn mehkihla soumwahu lusulus, me mi wasa keren pahn mehkihla kedlahs oh mehmen me pitsang mepwukat oh luhwedi pahn mehkihla lehk lapalap; oh I uhdahn pahn kadarohng irail ei engieng.+ 13 Oh kumwail pahn anahne ese me ngehi me Siohwa,+ ni neirail me kamakamala kan ar wonohn nanpwungen ar dikedik kasaut kan, kapilpene ar pei sarawi kan,+ pohn dohl ile koaros, pohn kadoken nahna koaros, pahn tuhke losolos koaros oh pahn rahn tuhke laud kan wasa me re wiahda meirong en warpwohmwahu kan* pwehn kansenamwahwih ar dikedik kasaut kan koaros.+ 14 I pahn kapahwei limeiet oh wiahiong sahpwo en tehnla, oh arail wasahn kousoan kan koaros pahn tehnla sang sapwtehn me mi limwahn Dipla. Oh irail pahn anahne ese me ngehi me Siohwa.’”