Rongamwahu en Madiu
8 Mwurin eh ketidihsang pohn nahnao, lapalahn pokon ehu ahpw idawehnla ih. 2 A kilang! me tokutok men ahpw patohdo reh, poaridi mwowe oh patohwanohng: “Maing Kaun, ma komw kupwurki, komw kak ketin kamwakeleiehda.”+ 3 Ih eri ketin kapahla nin limeo oh doahke oh mahsanih: “I men! Nna, mwakelekelda.”+ Ni ahnsowohte eh tokutok pa mwakelekelda.+ 4 Sises eri mahsanihong: “Kilang, ke dehr ndaiong emen,+ ahpw kohla kasalehiong samworo pein kowe,+ oh wiahda meirong me Moses koasoanehdi,+ pwehn wia kadehde ehu ong irail.”
5 Ni eh ketilong nan Kapernaum, kaunen sounpei* men ahpw patohdo peki reh+ 6 oh patohwanohng: “Maing, ei ladu men mwoatorala oh wonohn ni ihmwo, oh e kin uhdahn weiweirek.” 7 Sises eri mahsanihong ih: “Ni ahnsou me I pahn lel mwo, I pahn kamwahwihala.” 8 Kaunen sounpeio eri sapeng, patohwan: “Maing, I sohte warohng komwi en ketilong nan imweio, ahpw komw mahsente, a ei laduwo pahn mwahula. 9 Pwe ngehi pil mi pahn manaman, oh mie nei sounpei kan, oh ni ei kin ndaiong emen ‘Kohla!’ a e kin kohla, oh pil ong emen, ‘Kohdo!’ a e kin kohdo, oh ni ei ndaiong ei ladu, ‘Wia met!’ a e kin wia.” 10 Ni Sises eh karongehda met, e ketin pwuriamweikihla oh mahsanihong irail ko me ideidawehn: “I ndaiong kumwail ni mehlel, sohte emen nan Israel me I diarada me ahneki soangen pwoson laud me uwe met.+ 11 Ahpw I ndaiong kumwail me aramas tohto sang palimese oh palikapi pahn kohdo oh iang Eipraam, Aisek oh Seikop mwohdehng* tehpel nan Wehin nanleng;+ 12 ahpw serien Wehio pahn lekdekla likio nan rotorot. Ih wasa me re pahn sengiseng oh ngihrail kan tehtehrek.”+ 13 Sises eri mahsanihong kaunen sounpeio: “Kohwei. Pwehki omw kasaledahr pwoson, dahme ke pekien pahn pweida.”+ Oh ni awaohte nah laduwo mwahula.+
14 Oh ni Sises eh ketilong nan imwen Piter, e ahpw mahsanihada inen ahn Piter pwoudo+ eh wonohnki eh soumwahu karakar.+ 15 Ih eri ketin sair pehn liho+ oh karakaro sarasang reh, e ahpw pwourda oh tepida papah Sises. 16 Ahpw ni eh soutikpene, aramas akan wapenehng reh aramas tohto me ngehn suwed tiada pohrail; oh e ketin kauskihsang ngehn ko sapwellime mahsen oh e ketin kamwahwihala koaros me lokolok, 17 pwe en ketin kapwaiada dahme soukohp Aiseia koasoia: “Pein ih ketikihsang atail soumwahu oh medek.”+
18 Ni Sises eh mahsanihada pokon ehu eh kapilpene ih, e ahpw ketin ruwese tohnpadahk ko ren iangih kotehla sehdo kohla pali teio.+ 19 Sounkawehwehn Kosonnedo men ahpw patohdo reh oh patohwanohng: “Maing Sounpadahk, I pahn idawehn komwi wasa koaros me komw pahn ketila ie.”+ 20 Ahpw Sises mahsanihong: “Kidien wel kan* mie dewerail oh menpihr en pahnlahng kan mie pasarail, ahpw Nein-aramas sohte wasa en kaulewei ie tapwi.”+ 21 Eri, emen tohnpadahk ko patohwanohng ih: “Maing Kaun, komw ketin mweidohng ie mahs I en kohla oh sarepedi semeio.”+ 22 Sises mahsanihong: “Ideidawehn ie, oh mweidohng irail kan me melahr en sarepedi arail mehla.”+
23 Oh ni eh ketidahng pohn pwoht ehu, sapwellime tohnpadahk ko ahpw iangada.+ 24 A kilang! lapalahn melimel ehu pa pwarada nansedo, kahrehda ilok ko koaduhpwalihdi pwohto; ahpw e seiseimwok.+ 25 Re ahpw keiong mpe oh pangenda ih, patohwanohng: “Maing Kaun, komw ketin doareikitailla, kitail pahn melahr!” 26 Ahpw e mahsanihong irail: “Dahme kumwail nohn masepwehngki,* kumwail me pwoson tikitik?”+ Ih eri ketida oh ketin lipwoarehda kisiniengo oh sehdo, e ahpw meleileidi kowahlap.+ 27 Kahrehda ohl ako pwuriamweikihla oh nda: “Soangen aramas dah men met? Kisinieng oh sehd pil kin peikiong.”
28 Ni eh ketin lel pali teio, nan sapwen mehn Kadara, aramas riemen me ngehn suwed tiada pohra kohdo sang nanpwungen sousou kan* oh tuhwong ih.+ Ira uhdahn lemei, iei me sohte me kin eimah en keid nanialo. 29 A kilang! ira weriwer oh patohwan: “Sapwellimen Koht,+ dahme se pahn kak ehukihong komwi? Komw ketido wasaht pwe komwi en ketin kalokei kiht+ mwohn ahnsou me kileldi?”+ 30 Mie pelin pwihk ehu me wie mwengemwenge+ wasa ieu me dohsang irail. 31 Ngehn suwed ko eri tepida peki reh oh patohwan: “Ma komw pahn ketin kauskitala, a komw kadarkitalahng nan pelin pwihko.”+ 32 Ih eri mahsanihong irail: “Kohla!” Irail ahpw pedoisang ohl riemeno oh pedolong nan pwihk ko, a kilang! pelin pwihko pwonte tang oh pwupwudihla nansedo sang wasa ile oh mehla. 33 Ahpw silepen pwihk ko tangdoaui oh ni arail lel nan kahnimwo, re ahpw koasoiahda soahng koaros iangahki duwen ohl ako me ngehn suwed tiadahr pohra. 34 A kilang! tohn kahnimwo pwonte patohdo tuhwong Sises, oh ni arail kilangada ih, re ahpw peki en ketin mweselsang sapwarailo.+