Esekiel

3 Ih eri ketin mahsanihong ie: “Nein-aramas, tungoale dahme mi mwohmwen.* Tungoale doaropwe limilimpene wet oh kohwei lokaiaiong aramas en Israel kan.”+

2 Ngehi eri sarapeseng, e ahpw ketikihong ie doaropwe limilimpene wet pwe I en tungoale. 3 Ih eri ketin doula mahsanihong ie: “Nein-aramas, tungoale doaropwe limilimpene wet me I kihwei, oh kadirehkihla kapehdomwen.” Ngehi eri tepida tungoale, oh e mem duwehte sukehn loangalap nan eweiet.+

4 Ih eri ketin mahsanihong ie: “Nein-aramas, kohlongala nanpwungen aramas en Israel kan oh koasoiaiong irail ei mahsen kan. 5 Pwe ke sohte pahn pekederwei rehn pwihnen aramas ehu me ar koasoi kan apwal en wehwehki de ke sehse ar lokaia kan, ahpw ong aramas en Israel kan. 6 Ke sohte pahn pekederwei rehn aramas tohto me ar koasoi kan apwal en wehwehki de ke sehse ar lokaia kan, me ar lokaia kan ke sohte kak wehwehki. Ma I pahn kadaruhkewei rehrail, re pahn rong uhk.+ 7 Ahpw aramas en Israel kan pahn kahng rong uhk, pwe re sohte men rong ie.+ Aramas en Israel koaruhsie keptakai oh kahngohdi.+ 8 Kilang! I wiahiong mesomwen en kekeluwakala duwehte masarail kan oh temwomwen en kekeluwakala duwehte temwarail kan.+ 9 I wiahiong temwomwen en duwehte daimon ehu, me kekeluwaksang takai kekeluwak.+ Ke dehpa masak irail de masakada masarail kan,+ pwe irail aramas uhwong kei.”

10 Ih eri ketin doula mahsanihong ie: “Nein-aramas, rong ei mahsen kan koaros me I padahkihong uhk oh katengehdiong mepwukat nan omw mohngiong. 11 Kohlongala nanpwungen omw aramas akan* me kalipilipala+ oh koasoiong irail. Ndaiong irail, ‘Iet me Kaun Wasa Lapalahpie Siohwa ketin mahsanih,’ mehnda ma re rong de re kahng rong.”+

12 Ngehn sarawi* eri waiehda+ oh I rongada ngilen ngirisek laud ehu mwuri me nda: “Kaping en kohwong lingan en Siohwa sang wasa me e kin ketiket ie.” 13 Mie ngilen pehnpihr en menmour ko ni pehnpihr ko ar kin sair ehuehu pehnpihr,+ oh mie ngilen daia ko me mi limwahrail,+ oh ngilen ngirisek laud ehu. 14 Oh ngehn sarawi* ahpw pwekiehda oh waiehda, oh I kohkohla ni nsensuwed oh lingeringer, oh limen Siohwa ahpw kohdiong pohi ni kehlail. 15 Ngehi eri kohla rehn aramas kalipilipala ko nan Tel-apip, me koukousoan limwahn pillap Kihpar,+ oh I mihmi wasa me re koukousoan ieo; oh I mihmihki rehrail erein rahn isuh, oh I kin pwuriamweila erein ahnsowo.+

16 Ni imwin rahn isuhwo Siohwa ketin mahsanihong ie:

17 “Nein-aramas, I idihiukada ken wia sounsilasil ong wehin Israel;+ oh ni omw pahn rong mahsen ehu sang nin doauesei, ke pahn kihong irail kehkehlik ehu sang ngehi.+ 18 Ni ei pahn mahsanihong aramas suwed men, ‘Ke uhdahn pahn mehla,’ ahpw ke sohte panawih, oh ke sohte koasoi pwehn panawih me suwedo en sohpeisang elen eh mour suwed pwe en kak momourte,+ e pahn mehkihla eh sapwung pwehki ih aramas suwed,+ ahpw I pahn kapwukoahkin uhk eh nta.+ 19 Ahpw ma ke panawih aramas suwed men oh e sohte sohpeisang eh suwed oh elen eh mour suwed, e pahn mehkihla eh sapwung, ahpw ke uhdahn pahn doarehla pein omw mour.*+ 20 Ahpw ni aramas pwung men eh pahn kesehla eh wiewia pwung kan oh wia dahme sapwung,* I pahn kihdi mehn kadipekelekel ehu mwowe oh e pahn mehla.+ Ma ke sohte panawih, e pahn mehkihla dipe oh I sohte pahn tamataman eh wiewia pwung kan, ahpw I pahn kapwukoahkin uhk eh nta.+ 21 Ahpw ma ke panawih aramas pwung men en dehr wiahda dihp, oh e sohte dipada, e uhdahn pahn momourte pwehki e ale kehkehlik,+ oh ke pahn doarehla pein omw mour.”*

22 Limen Siohwa eri kohdiong pohi wasao, oh e ketin mahsanihong ie: “Uhda, kohla wasa patapat en wahwo, oh I pahn mahseniong uhk wasao.” 23 Ngehi eri uhda oh kohla wasa patapat en wahwo, oh kilang! lingan en Siohwa mihmi wasao,+ duwehte lingan me I kilangada limwahn pillap en Kihpar,+ ngehi eri poaridiong nanpwelo. 24 Ngehn sarawi* eri kohlong rehi oh kasihnenihiehda,+ ih eri ketin mahsanihong ie:

“Kohla ritinguhkedi nan imwomwo. 25 A kowe, nein-aramas, irail pahn pirehkinuhkedi sahl kei pwe ken sohte kak pedoila rehrail. 26 Oh I pahn wiahiong lowomwen en pasdahng pahn ngatangatomw, oh ke sohla pahn kak lokaia, oh ke sohla pahn kak panawih irail, pwehki irail aramas uhwong kei. 27 Ahpw ni ei pahn mahseniong uhk, I pahn kihpeseng ewomwen, oh ke pahn ndaiong irail,+ ‘Iet me Kaun Wasa Lapalahpie Siohwa ketin mahsanih.’ Irail me rongorong ren rong,+ oh irail me kahng rong ren dehr rong, pwehki irail aramas uhwong kei.+