Esekiel

45 “‘Ni amwail pahn nehkpeseng sahpwo nin duwen sohso,+ kumwail pahn meirongkihla pwais sarawi ehu sang sahpwo nin duwen kisakis ehu ong Siohwa.+ E pahn reireiki kiupid* 25,000 oh tehlapki kiupid 10,000.+ Wasao pwon* pahn wia pwais sarawi ehu. 2 Nanpwungen wasaht e pahn mie wasa ehu me keimw pahieu ong tehnpas sarawio me reireiki kiupid 500 oh tehlapki kiupid 500,+ oh wasao e pahn mie mohs kan me tehlapki kiupid 50 ni pali koaros.+ 3 Sang wasa me ke sohngedio ke pahn sohngedi uwen reirei en 25,000 oh tehlap en 10,000 oh tehnpas sarawio pahn mi nanwerengen met, met me keieu sarawi. 4 Met pahn wia pwais sarawi ehu sang sahpwo ong samworo kan,+ me iei sounpapah kan en tehnpas sarawio me kin patohla mwohn silangin Siohwa pwe ren papah ih.+ Met pahn wia wasa ehu ong imwarail kan oh wasa sarawi ehu ong tehnpas sarawio.

5 “‘Ong mehn Lipai kan, me iei sounpapah kan en tehnpas sarawio, e pahn mie kisin pelien sahpw ehu me reireiki kiupid 25,000 oh tehlapki kiupid 10,000,+ oh re pahn ahneki perehn mwenge 20*+ nin duwen pwaisarail.

6 “‘Kumwail pahn kihla wasa ehu nin duwen pwaisen kahnimwo me reireiki kiupid 25,000 (pahrekiong kisakis sarawio) oh tehlapki kiupid 5,000.+ Met pahn kohieng wehin Israel pwon.

7 “‘Oh e pahn mie sahpw ni pali koaros en kisakis sarawio oh wasa me katohrohrla ong kahnimwo ong kaun emen. Met pahn mi limwahn kisakis sarawio oh pwaisen kahnimwo. E pahn mi ni palikapi oh palimese. Uwen reirei sang ni irepe me mi palikapi lel ni irepe me mi palimese pahn uwehte sapwen keinek ko me e mi limwah.+ 8 E pahn sapwenikihla sahpwet nan Israel. Nei kaun akan sohla pahn wiakauwe nei aramas akan,+ oh re pahn kihla luhwen sahpwo rehn aramas en Israel kan nin duwen arail keinek kan.’+

9 “Iet me Kaun Wasa Lapalahpie Siohwa ketin mahsanih: ‘Kaunen Israel kan, kumwail nohn daulihala!’

“‘Kumwail uhdihsang amwail tiahk lemei oh kalokolok kan, oh wia dahme pwung oh pahrek.+ Kumwail tokedihsang amwail kin adihasang sapwen nei aramas akan,’+ Kaun Wasa Lapalahpie Siohwa me ketin mahmahsen. 10 ‘Kumwail pahn doadoahngki mehn tenek pwung, sosohng en ihpah* ehu me pwung oh sosohng en pahd* ehu me pwung.+ 11 E pahn anahne mie sosohng ehu me koasoandier ong sosohng en ihpah oh sosohng en pahd. Sosohng en pahd iei eisek kis ehun ohmer,* oh sosohng en ihpah iei eisek kis ehun ohmer. Ohmer me pahn wia koasoandi ong sosohng. 12 Sekel*+ pahn wia kera* 20. Oh sekel 20 patehng sekel 25 patehng sekel 15 pahn wiahda maneh* ehu ong kumwail.’

13 “‘Iet kisakis me kumwail pahn meirongki: wenekis ehun ihpah sang ehuehu ohmer en wihd oh wenekis ehun ihpah sang ehuehu ohmer en parli. 14 Uwen laud en leho pahn poahsoankihda sosohng en pahd. Pahd iei eisek kis ehun kor,* oh pahd eisek iei ohmer ehu, pwe pahd eisek pahrekiong ohmer ehu. 15 Oh sang pelin sihpw en pelinmen en Israel, kumwail pahn kihda emen sihpw sang sihpw 200. Mepwukat pahn ong meirong en krein,+ meirong isihs me pwonte isihsla+ oh meirong en kaminimin,+ pwehn wiahda tomw ong aramas akan,’+ Kaun Wasa Lapalahpie Siohwa me ketin mahmahsen.

16 “‘Aramas koaros en sahpwo pahn wiahda kisakis wet+ ong kaunen Israel. 17 Ahpw kaun menet me pahn pwukoahki meirong isihs kan me pwonte isihsla,+ meirong en krein+ oh meirong en wain erein kasarawi kan,+ maram pwul kan, Sapad kan+ oh kasarawi koaros me koasoandi ong aramas en Israel kan.+ Ih me pahn kaunopada meirong en dihp, meirong en krein, meirong isihs me pwonte isihsla oh meirong en kaminimin kan, pwehn wiahda tomw ong aramas en Israel kan.’

18 “Iet me Kaun Wasa Lapalahpie Siohwa ketin mahsanih: ‘Ni tepin sounpwong, ni keieun rahn en sounpwongo, ke pahn ale koupwul wol men me roson mwahu sang pelin kou kan, oh ke pahn kasarawihala wasa sarawio sang dihp.+ 19 Samworo pahn ale ekei ntahn meirong en dihpo oh kihdiong pohn uhren wenihmwen tehnpas sarawio,+ pohn keimw pahieu me mi ni keilen pasapas en pei sarawio, oh pohn uhren wenihmwen en ewen kehl en wasa me kelpene masloaleo. 20 Ih met me ke pahn wia ni keisuhwen rahn en sounpwongo pwehki aramas emen me dipada ni eh sapwungala de e sehse;+ oh kumwail pahn wiahda tomw ong tehnpas sarawio.+

21 “‘Ni keieun sounpwong, ni 14 en sounpwongo, kumwail pahn wia kasarawien Pahsohpa.+ Erein rahn isuh kumwail pahn tungoale pilawa me sohte doal ihs.+ 22 Rahno kaun menet pahn kaunopada koupwul wol men nin duwen meirong en dihp ong pein ih oh ong aramas koaros en sahpwo.+ 23 Erein rahn isuh en kasarawio, e pahn kaunopada koupwul wol roson mwahu isimen oh sihpw wol roson mwahu isimen ni ehuehu rahn isuh ko nin duwen meirong isihs ehu me pwonte isihsla ong Siohwa,+ iangahki kuht wol men ehuehu rahn nin duwen meirong en dihp. 24 E pil pahn kaunopada meirong en krein ihpah ehu ong emenemen koupwul wol oh ihpah ehu ong emenemen sihpw wol, iangahki ihn* en leh ehu ong ehuehu ihpah.

25 “‘Ni keisuhwen sounpwong, ni 15 en sounpwongo, erein rahn isuh en kasarawio,+ e pahn kaunopada soangen meirong kohte, meirong en dihp, meirong isihs me pwonte isihsla, meirong en krein oh leh.’”