Esekiel

44 Ih eri kapwureielahng ni ewen kehl en maslikin wasa sarawio me sallahng palimese,+ ewen kehlo eri ritidi.+ 2 Siohwa eri ketin mahsanihong ie: “Ewen kehl wet pahn kin ritidi tohr. E sohte pahn ritida, oh sohte aramas emen pahn pedolong ni ewen kehl wet; pwe Siohwa, Koht en Israel ketilongehr ni ewen kehl wet,+ eri e pahn kin ritidi tohr. 3 Ahpw kaun emen pahn mwohd loaleo pwehn tungoale pilawa mwohn silangin Siohwa,+ pwe ih kaun emen. E pahn pedolongodo ni palangk en ewen kehlo oh e pahn pedoila wasao.”+

4 Ih eri kahreiehla ni ewen kelen paliepeng kolahng mwohn tehnpas sarawio. Ni ei kilengla, I kilangada lingan en Siohwa eh kadirelahr tehnpas sarawi en Siohwa.+ Ngehi eri poaridiong nanpwelo.+ 5 Siohwa eri ketin mahsanihong ie: “Nein-aramas, tehk kanahieng,* kilang oh rong kanahieng mehkoaros me I pahn mahsanihong uhk duwen koasoandi kan oh kosonned kan en tehnpas sarawi en Siohwa. Tehk kanahieng duwen wasahn pedolong en tehnpas sarawio oh wasahn pedoi koaros en wasa sarawio.+ 6 Ke pahn ndaiong aramas en Israel uhwong kan, ‘Iet me Kaun Wasa Lapalahpie Siohwa ketin mahsanih: “Aramas en Israel kan, e itarehr amwail wiewia kasaut kan. 7 Ni amwail wahdo mehn liki kan me sohte sirkumsaisla ni mohngiong oh uduk nan ei wasa sarawio, re kin kasaminehla ei tehnpas sarawio. Kumwail kin meirongki ei pilawa, wih oh nta, ni ei inou lapo eh ohla pwehki amwail wiewia kasaut kan koaros. 8 Kumwail sohte apwalih ei soahng sarawi kan.+ Ahpw, kumwail kilelehiong meteikan ren apwalih pwukoa kan nan ei wasa sarawio.”’

9 “‘Iet me Kaun Wasa Lapalahpie Siohwa ketin mahsanih: “Sohte mehn liki men me kousoan nan Israel me sohte sirkumsaisla ni mohngiong oh uduk pahn pedolong nan ei wasa sarawio.”’

10 “‘Ahpw mehn Lipai kan me dohlahsang ie+ ni ahnsou me Israel salongasang ie pwehn idawehn arail dikedik kasaut kan,* pahn weuwa imwilahn arail sapwung kan. 11 Oh re pahn wiahla sounpapah kan nan ei wasa sarawio pwehn apwalih ewen kehl kan en tehnpas sarawio+ oh papah ni tehnpas sarawio. Re pahn kemehla mahn en meirong isihs me pwonte isihsla oh meirong teikan ong aramas ako, oh re pahn kesihnen mwohn aramas ako pwe ren papah irail. 12 Pwehki re papah irail mwohn ar dikedik kasaut kan oh wiahla mehn kadipekelekel ehu me kahrehiong aramas en Israel kan en dipada,+ ihme kahrehda I kapadahr limeiet ong irail oh kahula, oh re pahn weuwa imwilahn arail sapwung kan,’ Kaun Wasa Lapalahpie Siohwa me ketin mahmahsen. 13 ‘Re sohte pahn kohdo pwehn papah ie nin duwen ei samworo kan de keila limwahn ei soahng sarawi de me keieu sarawi kan, oh re pahn namenekla pwehki soahng kasaut kan me re wiadahr. 14 Ahpw I pahn wiahkinirailla sounapwalih pwukoa kan en tehnpas sarawio, pwe ren apwalih doadoahk en tehnpas sarawio oh mehkoaros me anahne wiawi loale.’+

15 “Kaun Wasa Lapalahpie Siohwa ketin mahsanih, ‘A ong samworo mehn Lipai kan, kadaudok en Sadok kan+ me kin apwalih pwukoa kan en ei wasa sarawio ni ahnsou me mehn Israel ko salongasang ie,+ re pahn kohdo pwehn papah ie, oh re pahn kesihnen mwohi pwehn meirongkihong ie wih+ oh nta.+ 16 Irail me pahn pedolong nan ei wasa sarawio, oh re pahn kohdo ni ei tehpelo* pwehn papah ie+ oh re pahn apwalih arail pwukoa kan ong ie.+

17 “‘Ni ar pahn kohlongodo ni ewen kehl kan en wasa me kelpene masloaleo, re pahn anahne likawih likou linen kan.+ Re sohte pahn likawih likou wunen sihpw ehu ni ar papah ni ewen kehl kan en wasa me kelpene masloaleo de wasa kan loale. 18 Re pahn lisoaropki lisoarop linen kan pohn moangarail kan, oh lepin rausis linen kan pahn pwaindi lukoparail kan.+ Re sohte pahn likawih mehkot me pahn kahrehda pwudowarail en keredi. 19 Mwohn ar pahn kohieila wasa me kelpene maslikio—wasa me kelpene masliki me aramas ako mihmi ie—re pahn kihsang likou kan me re doadoahngki ni ar wie papah+ oh kihdiong mepwukat nan wasahn mwenge sarawi kan.*+ Mwurin mwo re pahn likawihada likou teikan, pwe ren dehr kadaur sarawi ong* aramas akan sang ni ar likou kan. 20 Re sohte pahn sihpih moangarail kan+ de mweidohng pitenmoangarail kan en reireila. Re pahn sehk pitenmoangarail kan. 21 Samworo kan sohte pahn nim wain ni ar pedolongala wasa me kelpene masloaleo.+ 22 Re sohte pahn pwoudikihda liohdi men de lih emen me mweisang eh pwoud;+ ahpw re kak pwoudikihda meipwon men sang aramas en Israel kan de liohdi en samworo men.’+

23 “‘Re pahn kaweidki nei aramas akan duwen wekpeseng en dahme sarawi oh dahme sohte sarawi; oh re pahn padahkihong irail wekpeseng en dahme samin oh dahme mwakelekel.+ 24 Re pahn apwalih repenpwung ehu nin duwen sounkopwung kei;+ re pahn kopwung repenpwungo pahrekiong ei kosonned kan.+ Re pahn kolokol ei kosonned kan oh ei koasoandi kan me pid ei kasarawi kan koaros+ oh kasarawihala ei sapad kan. 25 Re sohte pahn keiong mpen aramas mehla men pwe re pahn saminla. Ahpw, re kak kasaminehkihla pein irail arail pahpa, arail nohno, neirail pwutak, neirail serepein, riarail pwutak de riarail serepein me saikinte pwopwoudida.+ 26 Oh mwurin samworo men eh mwakelekelda, e pahn anahne awiheki rahn isuh. 27 Rahn me e pedolongala nan wasa sarawio, nan wasa me kelpene masloaleo, pwehn papah nan wasa sarawio, e pahn anahne wiahda eh meirong en dihp,’+ Kaun Wasa Lapalahpie Siohwa me ketin mahmahsen.

28 “‘Oh iei met me pahn wia ar sohso: Ngehi me ar sohso.+ Kumwail sohte pahn kihong irail sapwarail nan Israel, pwe ngehi me ar sohso. 29 Ih irail me pahn tungoale meirong en krein,+ meirong en dihp oh meirong en tomwki dihp,+ oh mehkoaros me koasoandier ong Koht nan Israel pahn wiahla pwaisarail.+ 30 Me keieu mwahu en tepin wahnsahpw koaros oh soangen sawas koaros sang rehmwail pahn kohieng samworo kan.+ Oh kumwail pahn kihla tepin kanamwail krein pisalap kan rehn samworo kan.+ Met pahn wahdo kapai ehu ong tohn amwail peneinei kan.+ 31 Samworo kan sohte pahn tungoale menpihr men de mahn emen me dierek mehla de me mahn emen tehrpeseng.’+