Keieun Kronikel
18 Ahnsou ehu mwuhr, Depit kalowehdi douluhl mehn Pilisdia kan oh kihsang nan pehn mehn Pilisdia kan Kahd+ oh kisin kahnimw kan me kapilpene.+ 2 Ih eri kalowehdi Mohap+ oh mehn Mohap kan wiahla nein Depit ladu oh kin wadohng ih kisakis kan.+
3 Depit kalowehdi Nanmwarki Adadeser+ en Sohpa+ limwahn Amad+ ni eh kohkolahng kalaudehla eh manaman ni Pillap Iupreitis.+ 4 Depit kalowehdi kurumahn mahwen 1,000 oh soundak oahs 7,000 oh sounpei alu 20,000.+ Depit eri kauwehla nehn oahs en kuruma koaros likin meh 100.+ 5 Ni ahnsou me mehn Siria kan sang Damaskus kohla pwe ren sewese Nanmwarki Adadeser en Sohpa, Depit ahpw kemehla mehn Siria 22,000.+ 6 Depit eri koasoanehdi pwihn en sounpei kan nan Damaskus en Siria, oh mehn Siria kan wiahla nein Depit ladu oh kin wadohng kisakis kan. Siohwa kin ketikihong Depit kana* wasa koaros me e kin kohla ie.+ 7 Depit pil kihsang mehn sansar kohl me pwonopwon ko rehn nein Adadeser ladu kan oh wahla Serusalem. 8 Nanmwarki Depit alehsang Tipad oh Kun, kahnimw kan en Adadeser, uwen prons me inenen laud. Solomon ahpw doadoahngki prons wet oh wiahda Sehd pronso,+ uhr ko oh dipwisou prons ko.+
9 Ni Nanmwarki Tou en Amad eh rongada me Depit kalowedier karis en sounpei koaros en Nanmwarki Adadeser+ en Sohpa,+ 10 e mwadangete kadarala nah pwutak Adoram rehn Nanmwarki Depit pwehn esehda ia ire oh kapingahki eh mahweniong oh kalowehdi Adadeser (pwe Adadeser kin kalapw mahweniong Tou), oh Adoram wa kohla soangen dipwisou koaros me wiawihkihda kohl, silper oh prons. 11 Nanmwarki Depit kasarawihong Siohwa+ mepwukat iangahki silper oh kohl kan me e wahsang wehi kan koaros: sang Edom oh Mohap, sang mehn Ammon kan,+ mehn Pilisdia kan+ oh mehn Amalek kan.+
12 Apisai+ nein Seruaia+ kemehla mehn Edom 18,000 nan Wahun Soahl.+ 13 E koasoanehdi pwihn en sounpei kan nan Edom, oh mehn Edom kan koaros wiahla nein Depit ladu kan.+ Siohwa ketikihong Depit kana* wasa koaros me e kin kohla ie.+ 14 Depit kin kakaun Israel pwon,+ oh e kin wia kopwung ni pwung pahrek oh kaunda ni pwung nah aramas akan koaros.+ 15 Sohap nein Seruaia me wia kaunen karis en sounpei ko,+ oh Seosopat+ nein Ahilud me wia sounnting. 16 Sadok nein Ahidup oh Ahimelek nein Apaiadar me wia samworo, oh Sapsa me wia sekteri. 17 Penaia nein Sehoiada me kaunen mehn Kered kan+ oh mehn Peled kan.+ Oh nein Depit pwutak kan me mi nan dehu keieu kesempwal kan mi limwahn nanmwarkio.