Wiewia

2 Eri ni rahnen Kasarawien Pendekos eh wiawi, irail koaros ahpw pokonpene wasatehkis. 2 Ni ahnsowohte, ngihl ehu peidihdo sang nanleng me duwehte kisinieng kehlail ehu me ipido, oh e kadirehla nan ihmwo pwon, wasa re mwomwohd ie. 3 Oh re kilangada mehkot me likamwete mpwulen kisiniei kei me mwomwen lowen aramas me kohpeseng oh kohdiong pohn emenemen irail, 4 irail koaros ahpw audaudkihda sapwellimen Koht manaman* oh tepida lokolokaiahki soangsoangen lokaia kan, nin duwen manamano* eh kalokaiahkin irail.

5 Ni ahnsowo, mehn Suhs poadidi kei me kohsang nan wehi koaros nin sampah mihmi nan Serusalem. 6 Eri ni ahnsou me ngihl wet pwarada, aramas tohto ahpw kohpene oh pwonopwonkihda pwehki emenemen irail kak rong pein eh lokaia ni tohnpadahk ko ar lokolokaia. 7 Ni mehlel, re uhdahn pwuriamweikihla oh nda: “Kilang, irail pwukat koaros me lokolokaia iei mehn Kalili kei, kaidehn? 8 Eri ia duwen emenemen kitail eh rongorong pein eh lokaia?* 9 Kitail mehn Pardia, Media oh Elam, me kin kousoan nan Mesopodamia, nan Sudia oh Kapedosia, nan Pondus oh wehin Eisia, 10 nan Prikia oh Pampilia, nan Isip oh sapwen Lipia karanih Sairihni; ekei me mwemweitdo Serusalem sang Rom, mehn Suhs oh mehn liki me iangala lamalam en mehn Suhs; 11 mehn Krihd; oh mehn Arepia​—kitail rongorong pein atail lokaia kan arail koasoakoasoia duwen sapwellimen Koht doadoahk kapwuriamwei kan.” 12 Eri, irail koaros pwuriamweikihla oh pwonopwonkihda, ndindapene nanpwungarail: “Ia wehwehn met?” 13 Ahpw meteikan kapailoke irail nda: “Irail sakaukilahr wain.”*

14 Piter ahpw kesihnenda iangahki me Ehk Emeno oh koasoiaiong irail ni ngihl laud: “Kumwail mehn Sudia oh koaros me kin kousoan nan Serusalem, kumwail en ese met oh rong kanahieng ei koasoi. 15 Ni mehlel, aramas pwukat sohte sakaula nin duwen me kumwail medewe, pwe met awa kesiluh en ni rahn.* 16 Ahpw met iei dahme soukohp Soel koasoia: 17 ‘Koht ketin mahsanih, “Ni imwin rahn akan, I pahn kamwerehdi ei manaman* pohn soangen aramas koaros,* oh noumwail pwutak kan oh serepein kan pahn wia kokohp oh noumwail mwahnakapw kan pahn kilang kaudiahl kan oh ohl mah kan rehmwail pahn wia ouraman kan, 18 oh pil ei ladu kan oh lidu kan, I pahn kamwerehdi ei manaman* pohrail ni rahn ako, oh re pahn wia kokohp. 19 Oh I pahn kasalehda soahng kapwuriamwei kan nanleng oh kilel kan nin sampah​—nta oh kisiniei oh ediniei mosul. 20 Ketipin pahn rotala oh maram pahn weitahtahla duwehte nta mwohn rahn lapalap oh lingaling en Siohwa* eh leledo. 21 Oh koaros me kin likweriong mwaren Siohwa* pahn komourla.”’

22 “Kumwail mehn Israel kan, kumwail rong koasoi pwukat: Sises mehn Nasaret iei ohl emen me Koht ketin kasalehiong kumwail ni sansal sang ni manaman kan oh soahng kapwuriamwei kan oh kilel kan me Koht ketin wiahda nanpwungamwail ni eh ketin doadoahngki ih, duwen amwail pein eseier. 23 Ohl menet me kumwail salihedi oh kihong me dipan akan pwe ren pasurdiong nin tuhke oh kemehla. Koht ketin koasoanehdi en wiawi nin duwen met, pwe e ketin mwahngiher me met pahn wiawihong Sises. 24 Ahpw Koht ketin kaiasada ih sang ni eh ketin kasaledekihala sang medek* en mehla, pwehki mehla sohte ahneki manaman en kolokol ih. 25 Pwe Depit koasoia duwen ih: ‘I kin kilang Siohwa* eh ketiket mwohi* ahnsou koaros, pwehki e kin ketiket ni palimauni, I sohte mwahn pahn perki mehkot. 26 Oh pwehki met, mohngiongi kin perenda oh kilin eweiet kin koasoi ni peren laud. Oh I* pahn kin momour ni koapworopwor; 27 pwehki komw sohte pahn ketin likidmelieiehla nan Sousou,* oh komw pil sohte pahn ketin mweidohng sapwellimomwi me loalopwoato en mwerpeseng. 28 Komw ketin kahrehiong ie I en esehla ahl akan me kolahng mour; komw pahn ketin kadirehkiniehla peren laud ni omwi ketiket rehi.’*

29 “Ohl ako, riei ko, kumwail mweidohng ie I en koasoiaiong kumwail ni saledek duwen moangen peneinei Depit. E melahr oh seridier, oh eh sousou mihmi rehtail lel rahnwet. 30 Pwehki ih soukohp emen oh e eseier me Koht ketin kahukihong ih inou ehu me e pahn ketikidiong emen kadaudoke ko nan mwoale, 31 e eseier mwowe duwen iasadahn Krais oh koasoiaier duwe. E nda me Koht sohte ketin likidmeliehla ih nan Sousou* oh paliwere sohte mwerpeseng. 32 Koht ketin kaiasadahr Sises menet oh kiht koaros wia sounkadehdepen met. 33 Eri, pwehki eh ketin kasapwiladahngehr ni palimaun en Koht oh aleier sapwellimen Koht manaman* me Sahmo ketin inoukidahr, e ketin kamwerehdi poht dahme kumwail kilang oh rong. 34 Pwe Depit sohte kohdahla nanleng, ahpw e pein nda, ‘Siohwa* ketin mahsanihong ei Kaun: “Mwohndiong ni palimauni 35 I lao pahn kihdiong omw imwintihti kan en wiahla utupen nehmw kan.”’ 36 Eri, aramas koaros nan wehin Israel en uhdahn esehla me Koht ketin idihada ih en wia Kaun oh Krais, Sises menet me kumwail kemelahr nin tuhkeo.”

37 Eri ni arail rongada met, likamwete mohngiongirail dokdi, re ahpw ndaiong Piter oh wahnpoaron teiko: “Ohl ako, riat ko, dahme se anahne wia?” 38 Piter ahpw ndaiong irail: “Kumwail koluhla oh emenemen kumwail en papidaisla ni mwaren Sises Krais ong mahkpen dipamwail kan, kumwail ahpw pahn ale kisakis* en sapwellimen Koht manaman.* 39 Pwe inou en ale met iei ong kumwail oh noumwail seri kan, oh ong koaros me mi wasa doh, ong koaros me Siohwa,* atail Koht ketin malipedohng reh.” 40 Oh e usehlahte koasoakoasoi ni eh kadehdehda ni unsek duwen rongamwahwo, oh kangoangehkin irail: “Doarehla pein kumwail sang dih suwed wet.” 41 Eri irail ko me kamehlele eh koasoi ahpw papidaisla, oh rahno mpen aramas 3,000 iangala arail pwihno. 42 Oh irail poadidiongete ale padahk en wahnpoaron ko, werekpene,* mwengepene oh pil kin kapakappene.

43 Ni mehlel, wahnpoaron ko wiadahr kilel kan oh soahng kapwuriamwei tohto. Aramas* ako koaros kilang met, re ahpw lemmwinkidahr. 44 Irail koaros me pwosonlahr kin pokonpene oh sawaskipene soahng koaros me re ahneki, 45 oh irail netikihla sapwarail ko oh soahng koaros me re ahneki oh nehkohng irail koaros mwohni ko, nin duwen anahn en emenemen. 46 Oh rahn koaros, re kin tuhpene wiahki ehu nan tehnpas sarawio, re ahpw kin mwenge nan imwarail kan oh ehukihpene kanarail mwenge kan ni peren laud oh sang ni mohngiong mehlel, 47 kapikapinga Koht oh kenikenla rehn aramas koaros. Oh ehuehu rahn, Siohwa* kin ketin doulahte kapatahiong me pwosonlahr ko irail kan me komourlahr.