Esekiel
38 Siohwa ketin pwurehng mahsanihong ie: 2 “Nein-aramas, sohpeiong Kok en sapwen Makok,+ kaunen kaun akan en Mesek oh Tupal,+ oh wia kokohp ong ih.+ 3 Nda, ‘Iet me Kaun Wasa Lapalahpie Siohwa ketin mahsanih: “Kok, kaunen kaun akan en Mesek oh Tupal, I kin uhwong uhk. 4 I pahn kasohpeiukala oh kihong kehs ni ewomwen+ oh waiukala iangahki noumw karis en sounpei kan koaros,+ oahs kan oh soundak oahs kan. Irail koaros likawih likou lingan, oh re wia karis en sounpei laud ehu me wa mehn sansar laud kan oh mehn sansar tikitik kan, oh irail koaros doadoahngki kedlahs; 5 Persia, Idiopia oh Pud+ iang irail, irail koaros wa mehn sansar tikitik oh lisoarop; 6 Komer oh nah pwihnen sounpei kan koaros oh pil kadaudok en Dokarma kan+ sang wasa me keieu doh kan ni paliepeng, iangahki nah pwihnen sounpei kan koaros—aramas tohto iang uhk.+
7 “‘“Onopada, kumwail onopada, kowe iangahki noumw karis en sounpei kan koaros me pokonpene rehmw, oh ke pahn wiahla ar kaun.*
8 “‘“Mwurin rahn tohto I pahn sohpeiong uhk. Ni kaimwiseklahn pahr akan ke pahn kohlongala nan sapwen aramas akan me kapwurupwurdo mwurin ohla kan me kedlahs kahrehda. Re rikirikpene sang rehn aramas tohto pohn nahna kan en Israel me tehnla ahnsou reirei. Tohn sahpwet kapwurupwurdo sang aramas teikan, oh irail koaros kin kousoan ni ar sohte perki mehkot.+ 9 Ke pahn kohdo uhwong irail rasehng melimel ehu, oh ke pahn pwaindi sahpwo rasehng depwek kan, kowe oh noumw pwihnen sounpei kan koaros oh aramas tohto me iang uhk.”’
10 “Iet me Kaun Wasa Lapalahpie Siohwa ketin mahsanih: ‘Rahno soangen madamadau kan pahn kohdo nan mohngiongomw, oh ke pahn koasoanehdi pilahn suwed ehu. 11 Ke pahn nda: “I pahn kohlongala nan sahpw ehu me mie wasahn kousoan kan me sohte kelpene.+ I pahn kohdo uhwong irail akan me kin koukousoan ni ar sohte perki mehkot, me sohte mehkot kin kedirepwe irail. Irail koaros mihmi nan wasahn kousoan kan me sohte perperkihda kehl kan, lepin tuhkehn kateng kan de ewen kehl kan.” 12 Ke pahn nantihong ale dipwisou lohdi tohto oh mahweniong wasa tehn kan me met miehier towe+ oh aramas akan me pwurehng kohpene sang wehi kan.+ Re kin kihpene dipwisou kesempwal kan oh kepwe kan,+ oh re kin koukousoan nanwerengen sampah.
13 “‘Sipa+ oh Dedan,+ sounnetinet en Tarsis kan+ oh nah sounpei kan koaros* pahn ndaiong uhk: “Ke pahn kohlongala nan sahpwo pwe ken ale dipwisou lohdi tohto? Ke kapokonepenehr noumw karis en sounpei kan pwe ken wahsang silper oh kohl kan, dipwisou kesempwal kan, kepwe kan oh kulihada dipwisou lohdi tohto?”’
14 “Eri nein-aramas, wia kokohp oh ndaiong Kok, ‘Iet me Kaun Wasa Lapalahpie Siohwa ketin mahsanih: “Rahn me nei aramas en Israel kan pahn koukousoan ni ar sohte perki mehkot, ia duwe, ke sou pahn ese duwen met?+ 15 Ke pahn kohdohsang omw wasa, sang wasa me keieu doh kan ni paliepeng,+ kowe oh aramas tohto me iang uhk. Irail koaros dake oahs kan oh wia pokon laud ehu, karis en sounpei laud ehu.+ 16 Ke pahn kohdo uhwong nei aramas en Israel kan rasehng depwek kan me pwaindi sahpwo. Kok, ni kaimwiseklahn rahn akan I pahn waiukodo ken uhwong sapweio+ pwe wehi kan en eseiehla ni ei kasarawihiehla mwohn masarail kan ni ei doadoahngkin uhk.”’+
17 “Iet me Kaun Wasa Lapalahpie Siohwa ketin mahsanih: ‘Kaidehn ih kowe me I koasoia duwe mahso sang ei ladu soukohp en Israel kan? Re kohpada erein sounpar tohto me ke pahn kohdo uhwong irail.’
18 “Kaun Wasa Lapalahpie Siohwa ketin mahsanih, ‘Rahno, rahn me Kok kohlongodo nan sapwen Israel, I pahn engiengda kowahlap.+ 19 Ni ei ngoang, ni mpwulen ei engieng, I pahn mahsen; oh rahno e pahn mie lapalahn rerrer en sahpw nan sapwen Israel. 20 Pwehki ngehi, mwahmw en nansed kan, menpihr en pahnlahng kan, mahn lawalo kan en nansapw, sineik oh kieil koaros me kin kerep pohn pwehl, oh aramas koaros pohn sampah pahn rerrer, oh nahna kan pahn mweredi,+ oh paipalap kan pahn pwupwudi oh kehl koaros pahn rengkidi pohn pwehl.’
21 “Kaun Wasa Lapalahpie Siohwa ketin mahsanih, ‘I pahn kadarala kedlahs pwoat en uhwong Kok pohn ei nahna kan koaros. Irail koaros pahn peikipene nair kedlahs kan.+ 22 I pahn wadohng ih ei kadeik iangahki soumwahu lusulus+ oh keredien nta; oh I pahn kamwerehdi powe oh pohn nah pwihnen sounpei kan oh pohn aramas tohto me iangih+ keteu mosul ehu oh aihs takai kan+ oh kisiniei+ oh suwepel.+ 23 Oh I uhdahn pahn kalinganahla pein ngehi oh kasarawihla pein ngehi oh wiahiong aramas en wehi tohto ren ese ihs ngehi; oh re pahn anahne ese me ngehi me Siohwa.’