Rongamwahu en Luk

1 Aramas tohto kin nantihong kihpene oh ntingihedi ire mehlel kan me kitail uhdahn kin kamehlele,+ 2 me duwehte dahme kitail alehsangehr irail ko me pein kilangki masarail+ oh kalohkihda mahseno sang nin tapio.+ 3 Pwehki ei ropada soahng koaros ni pwung sang nin tapio, Maing wasa lapalap Diopwulos, I pil koasoanehdi I en ntingihwei irekidien dahme wiawi,+ 4 pwe komwi en kak ese uwen mehlel en soahng kan me komw rong oh ale padahkpe.+

5 Ni mwehin Erod,*+ nanmwarkien Sudia, mie samworo men me ede Sekaraia, kisehn pwihnen samworo Apaisa.+ E pwoudikihda lih emen sang peneinei en Aaron oh ede Elisapet. 6 Ira koaros pwung mwohn silangin Koht, pwehki ara kin idawehn ni unsek sapwellimen Siohwa* kehkehlik oh kosonned koaros. 7 Ahpw sohte neira seri pwehki Elisapet lih depwen men oh ira koaros likeilapalahr.

8 Eri ni eh wie papah nin duwen samworo men pwehki ih ahnsou me eh pwihno pwukoahki papah+ mwohn silangin Koht, 9 oh nin duwen me samworo kan kin wia,* e pilipildahr en isik warpwohmwahu+ ni eh pedolong nan sapwellimen Siohwa* wasa sarawi.+ 10 A pokono pwon wie kapakap likio ni awahn isik warpwohmwahu. 11 Sapwellimen Siohwa* tohnleng men ahpw pwarohng ih, uh ni palimaun en pei sarawi en isik warpwohmwahwo. 12 Ahpw Sekaraia pwunodkihda dahme e kilangadao oh masepwehkada. 13 Tohnlengo ahpw ndaiong: “Sekaraia, ke dehr masak pwe Koht ketin karongehier omw kapakap ni ngidingid, oh omw pwoud Elisapet pahn naitikihada pwutak emen me ke pahn kihong ede Sohn.+ 14 Ke pahn uhdahn peren oh nsenamwahu oh me ngeder pahn perenkihda eh pahn ipwidi,+ 15 pwe e pahn wiahla ohl lapalap men mwohn silangin Siohwa.*+ Ahpw e dehpa nim wain de pil sakau sohte lipilipil+ oh pil mwohn eh pahn ipwidi, e pahn audaudkihda ngehn sarawi,*+ 16 oh e pahn kasapahldohng mehn Israel tohto rehn Siohwa* arail Koht.+ 17 E pil pahn tiengla mwowe ni ngoang* oh ni manaman me Elaisa ahneki,+ pwe en wiahiong mohngiong en pahpa kan en duwehla mohngiong en seri kan+ oh sewese me sapeik kan ren loalokongla oh wia me pwung pwe en kaunopada aramas akan ong Siohwa.”*+

18 Sekaraia ahpw ndaiong tohnlengo: “Ia duwen ei kak kamehlele met? Ngehi oh ei pwoud likeilapalahr.” 19 Tohnlengo eri sapeng ndaiong: “Ngehi Kapriel+ me kin uh mwohn silangin Koht,+ oh I pekederdohng koasoiong uhk oh lohkihong uhk rongamwahu wet. 20 Ahpw kilang! ke sohla pahn kak lokaia lao lel rahn me mepwukat pahn wiawi, pwehki omw sohte kamehlele ei koasoi me pahn pweida ni ahnsou me kileldi.” 21 Ni ahnsowo, aramas ako ahpw awiawih Sekaraia, irail ahpw pwuriamweiki eh wereila nan wasa sarawio. 22 Ni eh pedoido, e solahr kak lokaiaiong irail, re ahpw wehwehkihda me e ahpwtehn kilangada mehkot kapwuriamwei nan wasa sarawio. E ahpw wie oaloahlki eh men lokaia ahpw e lohtenglahr. 23 Eri ni eh pwaisen papah ni tehnpas sarawio eh erala, e ahpw kohkohla ni imweo.

24 Mwurin rahn ekei, eh pwoud Elisapet ahpw liseianda oh kin mihmihte ni imweo erein sounpwong limau, ndinda: 25 “Ih met me Siohwa* ketin wiahiong ie rahn pwukat. E ketin kupwureiehla pwe en ketikihsang kanamenekpei rehn aramas akan.”+

26 Ni eh lel keweneun sounpwong, Koht ahpw ketin poaronelahng tohnleng Kapriel+ nan kahnimw en Kalili ehu me adaneki Nasaret, 27 rehn meipwon men+ me inoun pwopwoudiong ohl emen me ede Sosep, kisehn kadaudok en Depit, oh eden meipwono Mery.+ 28 Oh tohnlengo pwarohng ih oh ndaiong: “Rahn kaselel kowe me Koht ketin kapaiahda, Siohwa* kin ketin ieiang uhk.” 29 Ahpw e pwunodkihda laud eh lokaia ko oh medemedewe ia wehwehn soangen rahnmwahwo. 30 Tohnlengo ahpw ndaiong: “Mery, dehr perki mehkot pwe Koht ketin kupwureiuk. 31 Oh kilang! ke pahn liseianda* oh naitikihada pwutak emen+ oh ke pahn kihong ede Sises.+ 32 Memenet pahn lapalap+ oh e pahn mwarenki Sapwellimen Wasa Lapalahpie,+ oh Siohwa* Koht pahn ketikihong ih mwoalen seme Depit,+ 33 oh e pahn ketin kaunda imwen Seikop nin duwen Nanmwarki men kohkohlahte oh sapwellime Wehi sohte pahn imwisekla.”+

34 Mery ahpw ndaiong tohnlengo: “Ia duwen met eh kak wiawi, nan ei meipwon?”+ 35 Tohnlengo sapeng ih nda: “Ngehn sarawi* pahn ti pohmw+ oh roson en Wasa Lapalahpie pahn kipeiukedi. Ih kahrepe wet me seri me pahn ipwidio pahn sarawi+ oh mwarenki Sapwellimen Koht.+ 36 Kilang! kisehmw Elisapet pil liseianki pwutak emen oh e miher nan eh keweneun sounpwong, mendahki eh likeilapalahr oh aramas kin nda me ih lih depwen men; 37 pwe sohte mehkot me sohte kak pahn Koht.”*+ 38 Mery eri nda: “Kilang! ngehi sapwellimen Siohwa* lidu serepein! En wiawihong ie nin duwen dahme ke lohkidahr.” Tohnlengo ahpw kohkohlahsang reh.

39 Ni rahn ako, Mery ahpw kaunopada oh mwadang seiloaklahng ni ehu kahnimw en Suda, wasa nahnahn sahpwo, 40 e ahpw pedolong nan imwen Sekaraia oh rahnmwahwih Elisapet. 41 Eri, ni Elisapet eh rong ahn Mery rahnmwahwo, serio pa mwekidida nan kapehde oh Elisapet ahpw direkihla ngehn sarawi* 42 oh ngihl laudida, nda: “Ke meid pai nanpwungen lih akan oh meid pai wahn kapehdomw! 43 Eri ia duwen ei kak ahneki pwais kaselel wet, me inen ei Kauno pwarodo rehi? 44 Kilang! ni ahnsowohte me I rong ngilen omw rahnmwahu, seri me mi nan kapehdiet pa mwekidkihda peren. 45 Ke meid peren pwehki omw pwoson, e uhdahn pahn pweiong uhk dahme Siohwa* ketin mahsanih.”

46 A Mery nda: “I kapinga Siohwa,*+ 47 oh ei mohngiong* sohte kak uhdihsang peren laudki Koht, ei Sounkomour,+ 48 pwehki eh ketin kupwurehla sapwellime lidu serepein sohwar menet.+ Eri kilang! sang met kohla dih koaros pahn lohkihda me I meid peren,+ 49 pwehki Koht manaman ketin wiahiong ie soahng kapwuriamwei kan oh mware me sarawi.+ 50 Sang ehu dih lel ehu dih sapwellime kadek kalahngan kin kohieng irail akan me kin lemmwiki ih.+ 51 E ketin wiahkihda lime roson soahng kapwuriamwei kan; e ketin kasarehla irail me kin kasalehda aklapalap sang ni dahme re koasoanedier nan arail mohngiong.+ 52 E ketin kasapwildi me lapalap akan sang mwoalarail+ oh ketin kasapwilada me tikitik kan;+ 53 e ketin kamedkihla me duhpek kan soahng mwahu kan+ oh ketin kadarewei me kepwehpwe kan kahiep. 54 E ketido pwe en ketin sewese sapwellime ladu Israel, ni eh ketin tamataman sapwellime kadek kalahngan,+ 55 nin duwen me e ketin mahsanihong samatail mehn mahs ako, ong Eipraam oh kadaudoke kan+ kohkohlahte.” 56 Mery eri mihmi reh erein sounpwong siluh, mwuri, e ahpw pwurala ni imweo.

57 Eri, e lelehr ahnsoun en Elisapet eh pahn neitik, e ahpw naitikihada pwutak emen. 58 Oh mehn mpe kan oh kiseh kan rongada me Siohwa* ketin kasalehiong ih kadek kalahngan ni mwuledek, irail ahpw iangih perenkihda.+ 59 Ni kawaluhn rahn, re kodohng sirkumsaisihala kisin serio+ oh re pahn kihong ede me duwehte eden semeo, Sekaraia. 60 Ineo ahpw sapeng nda: “Soh! pwe e pahn adaneki Sohn.” 61 Re ahpw ndaiong ih: “Sohte kisehmw men me adaneki ahd wet.” 62 Irail eri oalehki semeo pwehn idek ahd dah me e men serio en adaneki. 63 E ahpw pekihda mehn nting ehu oh ntingihedi powe: “Ede iei Sohn.”+ Irail koaros ahpw pwuriamweikihla. 64 Ni ahnsowohte, loweo sapwedekda, e ahpw kakehr pwurehng lokaia+ oh tepida kapikapinga Koht. 65 Masak ahpw kipehdi irail koaros me mihmi wasao, oh koasoipen mepwukat koaros tepida wiawi wasa koaros nan sahpw nahnahn Sudia. 66 Oh irail koaros me rong ahpw kihdiong nan arail mohngiong oh ndinda: “Soangen aramas dahmen me kisin seri menet pahn wiahla?” Pwe limen Siohwa* uhdahn kin ketin ieiang ih.

67 Sekaraia, semen serio eri direkihla ngehn sarawi,* e ahpw kohpada nda: 68 “Kaping en kohwong Siohwa,* Koht en Israel,+ pwehki eh ketin sohpeidohng sapwellime aramas akan oh ketin komourirailla.+ 69 Oh e ketikihda koden komour*+ ong kitail nan imwen sapwellime ladu Depit,+ 70 nin duwen me e ketin mahsanih ni eh ketin doadoahngki sapwellime soukohp sarawien mahs ako,+ 71 me e pahn ketin doarehsang kitail atail imwintihti kan oh sang nan pehn irail koaros me kin kailongkin kitail.+ 72 E pahn ketin kasalehda kadek kalahngan me pid samatail mehn mahs ako oh ketin tamanda sapwellime inou lap sarawi,+ 73 inou me e ketin kahukihong Eipraam, samatail mehn mahso.+ 74 Mwurin eh pahn ketin kapitkitailsang atail imwintihti kan, e pahn ketikihong kitail pwais kaselel en papah ih ni atail sohte perki mehkot 75 pwe kitail en loalopwoat oh pwung mwohn silangi rahn koaros en atail mour. 76 A kowe, nei kisin seri, ke pahn adaneki sapwellimen Wasa Lapalahpie soukohp, pwe ke pahn tiengla mwohn Siohwa* pwe ken kaunopada sapwellime ahl akan,+ 77 pwe ken kihong sapwellime aramas akan loalokong en komour sang ni mahkpen diparail kan+ 78 pwehki kupwurkalahngan en atail Koht. Kupwurkalahngan wet me sang powe pahn rasehng marain me lingaling nin sohrahn, 79 pwe en kihda marain ong irail me mi nan rotorot oh mwetehn mehla+ oh kahluwa nehtail kan nan elen popohl.”

80 Oh kisin serio keirda oh kehlailkihla ngehn sarawi* oh e kin koukousoan nan sapwtehn lao lel rahn me e pwarada ni pokon sansal rehn mehn Israel kan.