Rongamwahu en Madiu
9 Ih eri ketida pohn pwohto oh kotehla sehdo, oh lella nan sapwellime kahnimw.+ 2 A kilang! aramas ekei wadohng reh ohl mwoator men me wonohn pohn mehn roh ehu. Ni Sises eh mahsanihada ar pwoson, e ahpw mahsanihong me mwoatoro: “Koapworopwor, nei pwutak! Dipomw kan lapwadahr.”+ 3 A sounkawehwehn Kosonnedo kei pein ndinda: “Ohl menet wie lahlahwe Koht.” 4 Ni Sises eh mwahngihada arail madamadau, e mahsanih: “Dahme kahrehda kumwail medemedewe soahng suwed kan nan mohngiongimwail?+ 5 Karasepe, mehnia me mengei en nda, ‘Dipomw kan lapwadahr,’ de nda, ‘Uhda oh alu’?+ 6 Ahpw, pwe kumwail en ese me Nein-aramas ahneki manaman en lapwahda dihp nin sampah—” ih eri mahsanihong me mwoatoro: “Uhda, ale omw mehn rohen, oh kohwei ni imwomwo.”+ 7 Ih eri uhda oh kohkohla ni imweo. 8 Ni pokono ar kilang met, irail ahpw masepwehkada oh kalinganahda Koht me ketikihong aramas akan soangen manaman wet.
9 Mwuri, ni Sises eh ketiketla sang wasao, e mahsanihada ohl emen me ede Madiu me mwomwohd nan ohpis en daksis, oh e mahsanihong: “Idawehniehdo.” Ih eri uhda oh iangala.+ 10 Mwuhr ni eh sakasak* nan imwen Madiu, a kilang! sounrik daksis oh me dipan tohto ahpw patohdo rehn Sises oh sapwellime tohnpadahk ko oh tepida iang mwengemwenge.*+ 11 Ahpw ni Parisi ko ar kilangada met, irail ahpw ndaiong sapwellime tohnpadahk ko: “Dahme amwail sounpadahken iangki sounrik daksis oh me dipan akan mwengemwenge?”+ 12 Ni eh karongehda met, e ahpw mahsanih: “Aramas roson sohte anahne toahkte, pwe me soumwahu kan me anahne.+ 13 Eri, kohwei oh esehla ia wehwehn met: ‘I anahne kadek kalahngan a kaidehn meirong.’+ Pwe kaidehn me pwung kan me I kodohng luke, pwe me dipan akan.”
14 Nein Sohn tohnpadahk ko eri patohdo rehn Sises oh patohwanohng: “Dahme kahrehda kiht oh Parisi ko kin kaisihsol ahpw sapwellimomwi tohnpadahk kan sohte kin kaisihsol?”+ 15 Sises eri mahsanihong irail: “Ia duwe, mie kahrepen kompoakepah kan en ohl kamwohdo ar pahn nsensuwed nindoken ohl kamwohdo+ eh mihmi rehrail? Ahpw rahn akan pahn kohdo me ohl kamwohdo pahn pehdsang irail,+ oh ih ahnsowo me re pahn kaisihsol. 16 Sohte me kin deipinahiong ni likou mering mwein likou kapw, pwe mwein likou kapwo pahn teisang ni likowo oh teio pahn laudla.+ 17 Pil aramas sohte kin kihong wain kapw nan edin kilin mahn mering. Ma irail wia met, eri edin kilin mahno pahn pospeseng oh waino pahn wudekla oh edin kilin mahno pahn ohla. Ahpw aramas kin kihong wain kapw nan edin kilin mahn kapw oh ira koaros pahn nekinek mwahu.”
18 Ni eh mahmahsanihong irail mepwukat, a kilang! soumas men pa leledo reh. E ahpw poaridi mwowe oh patohwanohng: “Mwein met, nei serepeino melahr, ahpw komw ketido oh ketikihdi limomwien powe, a e pahn mourda.”+
19 Sises eri ketida oh ketin idawehnla iangahki sapwellime tohnpadahk ko. 20 A kilang! lih emen me lokolongkier soumwahu en nta pwilipwil erein sounpar 12,+ keilahng mpe sang mwuri oh doahke pengkir en sapwellime likou puhp,+ 21 pwe e kin ndindaiong pein ih: “Ma I pil doahkehte sapwellime likou puhp, I pahn mwahula.” 22 Sises ketin pirekek oh ni eh mahsanihada liho, e mahsanihong: “Koapworopwor, nei serepein! Omw pwoson me kamwahwihiukala.”+ A ni awaohte liho pa mwahula.+
23 Eri, ni eh ketilong nan imwen soumaso oh mahsanihada sounkesengki keseng pepeuk kan oh pokono ar mwoaromwoarong,+ 24 Sises ahpw mahsanih: “Kumwail pedoisang men, pwe kisin serepeinen sohte mehla, ahpw e wie memeir.”+ Irail ahpw tepida kouruhrki oh kepitki. 25 Mwurinte pokono ar pedoila likio, e ahpw ketilong oh ketin kolada pehn serepeino+ oh kisin serepeino eri pwourda.+ 26 Eri, rohng wet ahpw lohkseli wasao pwon.
27 Ni Sises eh ketiketla sang wasao, ohl maskun riemen+ ideidawehn oh weriwer patopatohwan: “Maing Nein Depit, komw kupwurei kiht.” 28 Mwurin eh ketilong nan ihmwo, ohl maskun ko ahpw patohdo reh, oh Sises keinemwe rehra mahsanih: “Kumwa pwoson me I kak wia met?”+ A ira sapeng patohwan: “Ei Maing Kaun.” 29 Ih eri ketin doahke masara ko+ oh mahsanih: “En wiawihong kumwa nin duwen amwa pwoson.” 30 Masara ko eri kak kilangada wasa. Sises pil ketin kalikirahdi mahsanih: “Kilang emen dehpa esehda met.”+ 31 Ahpw mwurin ara pedoila likio, ira lohkiseli duwen ih wasao pwon.
32 Ni ara mwesel kohkohla, a kilang! aramas ako wadohng reh ohl lohteng men me ngehn suwed tiada powe;+ 33 oh mwurin ngehn suwedo eh pekeussang reh, ohl lohtengo ahpw lokaiahda.+ Pokono ahpw pwuriamweikihla oh nda: “Se saikinte kilangada soahng wet nan Israel.”+ 34 Ahpw Parisi ko nda: “Ni manaman en kaunen ngehn suwed kan me e kin kauski ngehn suwed kan.”+
35 Sises eri ketin kakahnseli nan kahnimw laud oh kisin kahnimw koaros, ketin padapadahk nan sinakoke kan oh ketin kalokalohki rongamwahu en Wehio oh pil ketin kamwahwihala soangen soumwahu oh luwet koaros.+ 36 Ni eh ketin mahsanihada pokon en aramas akan, e ketin poakeirailla+ pwehki irail wiakaula oh sohte epwelparail* rasehng sihpw kan me sohte sileparail.+ 37 Ih eri mahsanihong sapwellime tohnpadahk ko: “Ei, rahket me laud, ahpw tohndoadoahk kan me malaulau.+ 38 Ihme kahrehda, kumwail peki rehn Soumas en rahket en ketin poaronehdo tohndoadoahk kan nan sapwellime rahk.”+