Rongamwahu en Sohn

6 Mwurin met, Sises ketin kotehla Sehden* Kalili, de Daipirias.+ 2 Oh lapalahn pokon ehu kin ideidawehn ih+ pwehki ar kilang manaman akan* me e ketin wiahda ni eh kin ketin kamwahwihala me soumwahu kan.+ 3 Sises eri ketidahla pohn nahna ehu oh ketidiong wasao, iangahki sapwellime tohnpadahk ko. 4 Eri Pahsohpa,+ kasarawien mehn Suhs akan kerendohr. 5 Ni Sises eh mahsenla oh mahsanihada lapalahn pokon ehu me patopatohdo reh, e ahpw mahsanihong Pilip: “Ia wasa kitail pahn pwainsang ie pilawa ong aramas pwukat ren tungoale?”+ 6 Ahpw e mahsanih met pwe en ketin song ih, pwe e mwahngih dahme e pahn ketin wia. 7 Pilip ahpw sapeng patohwanohng: “Mehnda ma kitail pwainkihda pilawa denari* riepwiki, e sohte pahn itar ong emenemen irail mehnda ma re pil alehte ekis.” 8 Emen sapwellime tohnpadahk, Andru, rien Saimon Piter, ahpw patohwanohng: 9 “Mie kisin pwutak men wasaht me tungoalenki lopwon en pilawa parli limau oh mwahmw riemen. Ahpw ia duwen mepwukat eh pahn itar ong diren aramas pwukat?”+

10 Sises ahpw mahsanih: “Kumwail kamwohdangedi aramas akan.” Pwehki wasao me rehn mehlel, irail eri mwohndi. Mpen ohl 5,000 me iang pokon wet.+ 11 Sises eri ketikihda pilawa ko oh mwurin eh ketin kalahngankihong Koht, e ketin nehkohng irail ko me mwomwohd wasao; e pil ketin wia duwehte ong kisin mwahmw ko oh irail mwenge lao irail medla. 12 Ahpw ni ar medlahr, e mahsanihong sapwellime tohnpadahk ko: “Kumwail rikpene luhwe kan pwe sohte mehkot en lekdekla.” 13 Irail eri rikpene oh audehkihda kopwou 12 luhwe ko sang ni lopwon en pilawa parli limau ko me irail tungoale.

14 Ni aramas ako arail kilangehr kilel me e ketin wiadahro, re ahpw tepida nda: “Met iei uhdahn Soukohpo me pahn pwarodohng sampah.”+ 15 Eri, ni Sises eh mwahngihada me irail pahn kodohng koledi ih pwe ren kasapwiladahng nanmwarki, e ahpw ketila sang rehrail+ oh pwurehng kelehpw ketidahla pohn nahnao.+

16 Ni eh soutikpenehr, sapwellime tohnpadahk ko kohdihla ni sehdo,+ 17 oh douda pohn pwoht ehu, re ahpw kotehla sehdo kolahng Kapernaum. Wasa pwongier, ahpw Sises saikinte ketido rehrail.+ 18 Oh sehdo pil ilokinda pwehki kisinieng kehlail.+ 19 Ahpw ni arail wie seiseiki mpen mwail siluh de pahieu,* re ahpw kilangada Sises eh ketin alialu pohn sehdo oh ni eh kerekerendohng pwohto, re ahpw masepwehkada. 20 E ahpw mahsanihong irail: “Ngehi met; kumwail dehr masak!”+ 21 Irail eri perenda kasamwo ong pohn pwohto, pwohto ahpw mwadangete lel ni sahpw me irail kohkolahng ieo.+

22 Mandahn rahno, pokon me mihmi palio sehdo ahpw kilangada me sohte pwoht wasao. Mwoweo mie kisin pwoht kis kin mi wasao, ahpw sapwellimen Sises tohnpadahk kohte me dakehda pwohto, Sises sohte ketin iang irail ketida pohn pwohto. 23 Pwoht kei sang Daipirias ahpw peidi karanih wasa me re tungoale pilawa mwurin Kauno eh kalahngankihong Koht. 24 Eri ni pokono ar kilangada me Sises oh sapwellime tohnpadahk ko sohte ket wasao, irail ahpw douda pohn pwoht ko oh kolahng Kapernaum pwe ren rapahki Sises.

25 Ni ar diarada ih palio sehdo, re ahpw patohwanohng: “Rapai,+ iahd me komw ketido wasaht?” 26 Sises ketin sapeng irail, mahsanih: “I ndaiong kumwail ni mehlel, kumwail raparapahkin ie kaidehn pwehki amwail kilangehr kilel kan, ahpw pwehki amwail tungoaleier lopwon en pilawa ko oh medkihla.+ 27 Kumwail dehr doadoahk ong mwenge me kin kiteila, ahpw doadoahk ong mwenge me kin mihmi ong mour soutuk,+ me Nein-aramas pahn kihong kumwail; pwe memenet me Sahmo, pein Koht, ketin kadehdedahr* me e ketin kupwurperenki.”+

28 Irail eri patohwanohng: “Dahme se anahne wia pwe sen kapwaiada sapwellimen Koht doadoahk?” 29 Sises ketin sapeng irail, mahsanih: “Iet sapwellimen Koht doadoahk, kumwail en kasalehda amwail pwoson ih me e ketin poaronehdo.”+ 30 Irail eri patohwanohng: “Dahme komw pahn ketin wiahda pwehn wia kilel ehu,+ pwe sen kilang oh kamehlelei komwi? Doadoahk dahieu me komw ketin wiewia? 31 Samatail mehn mahs ako tungoaleier manna nan sapwtehno+ nin duwen eh ntingdier: ‘E ketikihong irail pilawa sang nanleng pwe ren tungoale.’”+ 32 Sises eri mahsanihong irail: “I ndaiong kumwail ni mehlel, Moses sohte kihong kumwail pilawa sang nanleng, ahpw Semeio me ketikihong kumwail pilawa mehlel sang nanleng. 33 Pwe pilawa me Koht ketikihda iei ih me kohdihdo sang nanleng oh kihong sampah mour.” 34 Irail eri patohwanohng: “Maing Kaun, komw ketikihong kiht pilawa wet ahnsou koaros.”

35 Sises mahsanihong irail: “Ngehi me pilawahn mour. Mehmen me kohdo rehi sohte mwahn pahn men mwengehda, oh mehmen me kasalehda eh kin pwoson ie sohte mwahn pahn men nimpilda.+ 36 Ahpw nin duwen me I ndaiongkumwailehr, kumwail pil kilangieier ahpw kumwail sohte kamehlele.+ 37 Irail koaros me Sahmo ketikihong ie pahn kohdo rehi oh I sohte mwahn pahn kasare emen me kohdo rehi;+ 38 pwe I kohdihdo sang nanleng+ pwe I en wia, kaidehn nsenei ahpw kupwuren ih me ketin poaroneiehdo.+ 39 Iet kupwuren ih me ketin poaroneiehdo, I en dehr kasalongehla emen sang rehn irail koaros me e ketikihongieier, ahpw I en kaiasada+ irail ni imwilahn rahn. 40 Pwe iet kupwuren Semei, koaros me kin pohnese Sapwellimeo oh kasalehda arail pwoson ih en ahneki mour soutuk,+ oh I pahn kaiasada+ ih ni imwilahn rahn.”

41 Mehn Suhs ako eri tepida lipahnede pwehki eh mahsanih: “Ngehi me pilawa me kohdihdo sang nanleng.”+ 42 Oh re tepida ndinda: “Kaidehn ih Sises met, nein Sosep, me kitail kin ese seme oh ine?+ Ia duwen eh kak nda ahnsou wet, ‘I kohdihdo sang nanleng’?” 43 Sises ketin sapeng irail, mahsanih: “Kumwail dehr lipahned nanpwungamwail. 44 Sohte aramas emen kak kohdo rehi ma Sahmo me ketin poaroneiehdo sohte ketin kakerenihedo rehi,+ oh I pahn kaiasada ih ni imwilahn rahn.+ 45 E ntingdier rehn Soukohp ako: ‘Irail koaros pahn ale padahk sang rehn Siohwa.’*+ Aramas koaros me kin rong Sahmo oh sukuhlkihsang kin kohdo rehi. 46 Sohte aramas emen me kilangehr Sahmo,+ pwe ihete me kohsang rehn Kohto; memenet me kilangehr Sahmo.+ 47 I ndaiong kumwail ni mehlel, mehmen me kin kamehlele kin ahneki mour soutuk.+

48 “Ngehi me pilawahn mour.+ 49 Samamwail mehn mahs ako tungoale manna nan sapwtehno, ahpw re melahr.+ 50 A iet pilawa me kohsang nanleng, eri mehmen me tungoale, e sohte pahn mehla. 51 Ngehi me pilawa momour me kohdihdo sang nanleng. Ma mehmen tungoale pilawa wet, e pahn mour kohkohlahte; oh ni mehlel, pilawa me I pahn kihda iei udukei pwe sampah en mourkihla.”+

52 Eri, mehn Suhs ako ahpw tepida akamaipene, nda; “Ia duwen ohl menet eh kak kihong kitail uduke pwe kitail en tungoale?” 53 Sises eri mahsanihong irail: “I ndaiong kumwail ni mehlel, ma kumwail sohte pahn tungoale uduken Nein-aramas oh nim ntah, kumwail sohte ahneki mour.*+ 54 Mehmen me kin tungoale udukei oh nim ntahi kin ahneki mour soutuk oh I pahn kaiasada+ ih ni imwilahn rahn; 55 pwe udukei iei tungoal mehlel oh ntahi iei pilen tungoal mehlel. 56 Mehmen me kin tungoale udukei oh nim ntahi, e kin miniminiong ie, oh I kin miniminiong ih.+ 57 Duwen Sahm ieias eh ketin poaroneiehdo oh I kin mour pwehki Sahmo, ih pil duwen mehmen me kin tungoale udukei, e pahn mour pwehki ngehi.+ 58 Ih met pilawa me kohdihdo sang nanleng. Kaidehn soahngo me samamwail mehn mahs ako tungoaleier ahpw mehla. Mehmen me kin tungoale pilawa wet pahn mour kohkohlahte.”+ 59 E mahsanih mepwukat ni eh ketin padapadahk nan sinakoke* ehu nan Kapernaum.

60 Ni arail rongada met, me tohto sang nanpwungen sapwellime tohnpadahk ko ahpw nda: “Padahk pwoatet meid nohn kapwuriamwei; ihs me kak rong?” 61 Ni Sises eh mwahngihada me sapwellime tohnpadahk ko lipilipahnedki duwen met, e ahpw mahsanihong irail: “Ia duwe, met kadipekelekele kumwail? 62 Eri, ia duwen ma kumwail kilang Nein-aramas eh kohdalahng wasa me e kin mihmi ie mahso?+ 63 Ngehn sarawi* iei me kin kihda mour;+ dahme aramas kak wia* iei mehkot mwahl. Mahsen kan me I kin koasoiaiong kumwail kin kohsang ngehn sarawi* oh kin kihda mour.+ 64 Ahpw ekei kumwail sohte kin kamehlele.” Pwe Sises mwahngih sang nin tapio ihs irail me sohte kin kamehlele oh ihs me pahn pangala ih.+ 65 E doula mahsanih: “Ihme kahrehda I ndaiong kumwail, sohte emen kak kohdo rehi, ihte ma Sahmo ketin mweidohng.”+

66 Pwehki met, tohto sang nanpwungen sapwellime tohnpadahk ko pwuralahng soahng kan me re pwilikihdi+ oh solahr idawehn ih. 67 Sises eri mahsanihong meh Ehk Riemeno: “Ia duwe, kumwail pil men kohkohla?” 68 Saimon Piter eri sapeng patohwanohng: “Maing Kaun, ihs me se pahn kohla reh?+ Komw sapwellimanki mahsen en mour soutuk.+ 69 Se kamehlelehier oh eseier me Sapwellimen Koht me Sarawio komwi.”+ 70 Sises ketin sapeng irail, mahsanih: “Ia duwe, kaidehn ngehi me pilada kumwail meh ehk riemen?+ Ahpw emen rehmwail me sounkaraun likamw.”*+ 71 Ni mehlel, e mahmahsanih duwen Sudas, nein Saimon Iskariot, pwe memenet me pahn pangala ih mendahki ih emen meh Ehk Riemeno.+