Sohp
23 Sohp ahpw sapengki:
3 Ma I ese wasa me I pahn diar Koht ie!+
I pahn patohla wasa e ketiket ie.+
4 I pahn patohwanda ei repenpwung mwohn silangi
Oh kasalehda mehn kadehde koaros pwehn doare pein ngehi;
5 I pahn esehla duwen eh pahn ketin sapeng ie
Oh kilelehdi dahme e pahn ketin mahsanihong ie.
6 Ia duwe, e pahn ketin pelian ie ni eh pahn ketin doadoahngki sapwellime manaman laud?
Soh, e uhdahn pahn ketin karonge ie.+
7 Repenpwung en me pwung men kak kapwungpwungla reh wasao,
Oh I pahn maiaudahsang kadeik kohkohlahte sang ei Sounkopwungo.
8 Ahpw ma I kohla palimese, e sohte ketiket mwo;
Oh I pwurodo, I sohte kak diar ih.
9 Ni eh kin ketin wie doadoahk ni palimeing, I sohte kak kilang ih;
Ih eri ketila ni palimaun, ahpw I pil sohte kilang ih.
10 Ahpw e ketin mwahngih ahl me I keid ie.+
Mwurin eh ketin song ie, I pahn kohieido duwehte kohl tohr.+
11 Nehi kat kin idawehn sapwellime kahk kan ni keneinei;
I kekeidte nan sapwellime ahl ni ei sohte wetsang.+
12 I sohte uhdihsang idawehn kehkehlik en nin doauese.
I nekidala sapwellime mahsen kan+ laudsang dahme e ketin kasik sang ie.*
13 Ni eh ketin koasoanehdi en wia mehkot, ihs me kak pelianda?+
Ni eh kin ketin kupwurki wia mehkot, e kin ketin kapwaiada.+
14 Pwe e pahn ketin kapwaiada douluhl dahme koasoandier* ong ie,
Oh e ketin nekidalahr soahng tohto me duwehte mepwukat.
15 Ihme kahrehda I kin pwunod pwehki ih;
Ni ei kin medewehda ih, ei masak kin laudla.
16 Koht ketin wiahiong ie I en nan kapehd tikitikla,
Oh me Keieu Manamano ketin kamasakiehda.
17 Ahpw pil rotorot mosul sohte katokehdi ngileiet
Mendahki eh kipehdier meseiet.