Esekiel

34 Siohwa ketin pwurehng mahsanihong ie: 2 “Nein-aramas, wia kokohp ong silepen sihpw kan en Israel. Wia kokohp, oh ndaiong silepen sihpw kan, ‘Iet me Kaun Wasa Lapalahpie Siohwa ketin mahsanih: “Meid suwediong silepen sihpw kan en Israel,+ me kin kamwenge pein irail! Kaidehn pelin sihpw kan me silepen sihpw kan pahn kamwenge?+ 3 Kumwail kin kang wih, kumwail kin likawih likou me wiawihkihda wunen sihpw, oh kumwail kin kemehla mahn me keieu mworourou,+ ahpw kumwail sohte kin kamwenge pelin sihpw kan.+ 4 Kumwail sohte kin kakehlakahda me luwet kan de kamwahwihala me soumwahu kan de kidimpene me ohla kan de kapwurehdo me kohkohlahsang pelin sihpw kan de rapahki me salongala kan;+ ahpw kumwail kin kaunirailda ni kakos oh lemei.+ 5 Eri irail mwarahkpeseng pwehki eh sohte sileparail;+ re mwarahkpeseng oh wiahla kenen mahn lawalo koaros en nansapw. 6 Nei sihpw kan kohkohseli pohn nahna oh dohl kan koaros; nei sihpw kan mwarahkpeseng wasa koaros nin sampah, sohte me kin rapahkin irail de nantihong diar irail.

7 “‘“Ihme kahrehda, kumwail silepen sihpw kan, rong mahsen en Siohwa: 8 ‘“Nin duwen ei ieias,” Kaun Wasa Lapalahpie Siohwa me ketin mahmahsen, “pwehki nei sihpw kan wialahr seiken mahn lawalo kan, kenen mahn lawalo koaros en nansapw, pwehki eh sohte sileparail, oh nei silepen sihpw kan sohte kin rapahki nei sihpw kan; ahpw, re kin kamwekamwenge pein irail oh sohte kin kamwenge nei sihpw kan,”’ 9 ihme kahrehda, kumwail silepen sihpw kan, rong mahsen en Siohwa. 10 Iet me Kaun Wasa Lapalahpie Siohwa ketin mahsanih: ‘I kin uhwong silepen sihpw kan, oh I pahn kapwukoahkin irail mwomwen arail kin apwalih nei sihpw kan,* oh I pahn kauhiraildihsang kamwenge* nei sihpw kan,+ oh silepen sihpw kan sohla pahn kamwenge pein irail. I pahn kapitasang nei sihpw kan ni awarail kan, oh re sohla pahn wia kanarail mwenge.’”

11 “‘Pwe iet me Kaun Wasa Lapalahpie Siohwa ketin mahsanih: “Iet ngehi, oh pein ngehi me pahn rapahki nei sihpw kan, oh I pahn apwalih irail.+ 12 I pahn apwalih nei sihpw kan duwehte silepen sihpw men eh diarada nah sihpw kan me mwarahkpeseng oh kamwenge irail.+ I pahn kapitirailla sang wasa koaros me re mwarahkpeseng ie ni rahnen depwek kan oh rotorot mosul.+ 13 I pahn wairailsang rehn aramas akan oh kihirailpene sang sahpw kan oh wairaildo nan sapwarailo oh kamwenge irail pohn nahna kan en Israel,+ limwahn piletik kan oh limwahn wasahn kousoan kan koaros nan sahpwo. 14 I pahn kamwenge irail nan mohs kaselel ehu, oh sahpw me re mwengemwenge ie pahn mi pohn nahna ile kan en Israel.+ Re pahn wendi wasao pohn sahpw en kamweng kaselel ehu,+ oh re pahn mwenge nan mohs me keieu kaselel kan pohn nahna kan en Israel.”

15 “‘Kaun Wasa Lapalahpie Siohwa ketin mahsanih, “Pein ngehi me pahn kamwenge nei sihpw kan,+ oh pein ngehi me pahn wiahiong ren kommoal.+ 16 I pahn rapahki me salongala kan,+ I pahn kapwurehdo me kohkohlahsang pelin sihpw kan, I pahn kidimpene me ohla kan, oh I pahn kakehlakahda me luwet kan; ahpw I pahn kamwomwala me mworourou kan oh me kehlail kan. I pahn kadeikirailda oh kihong irail kalokeparail.”

17 “‘A kumwail, nei sihpw kan, iet me Kaun Wasa Lapalahpie Siohwa ketin mahsanih: “I pahn kadeikada nanpwungen sihpw kan, nanpwungen sihpw wol kan oh kuht wol kan.+ 18 E sou itarehr amwail mwengemwenge nan mohs keieu mwahu kan? Kumwail pil pahn tiakedi amwail mohs teikan? Oh mwurin amwail nim pihl keieu mwakelekel, kumwail pahn kasaminehla pihlo ni amwail pahn tiakseli? 19 Ia duwe, nei sihpw kan pahn mwenge nan mohs me kumwail tiakpeseng oh nim pihl me nehmwail kan kasaminehla?”

20 “‘Kahrehda iet me Kaun Wasa Lapalahpie Siohwa ketin mahsanihong irail: “Iet ngehi oh pein ngehi me pahn kadeik nanpwungen sihpw mworourou men oh sihpw tihti men, 21 pwe kumwail kin sikenki pengepengamwail kan oh pwopwamwail kan, oh kumwail kin kodomki me soumwahu kan koaros kodomwail kan lao kumwail kamwarakirailpeseng wasa doh. 22 Oh I pahn kapitala nei sihpw kan, oh re solahr pahn wia seiken mahn akan;+ oh I pahn kadeik nanpwungen sihpw kan. 23 I pahn idihada silepen sihpw men pohrail,+ ei ladu Depit,+ oh e pahn kamwenge irail. E pahn kamwenge irail oh wiahla sileparail.+ 24 Oh ngehi, Siohwa, pahn wiahla arail Koht,+ oh ei ladu Depit pahn wiahla kaun emen nanpwungarail.+ Ngehi, Siohwa, me mahmahsen.

25 “‘“Oh I pahn wiahda inou lap en popohl ehu rehrail,+ oh I pahn kihsang nan sahpwo mahn lawalo keper kan,+ pwe ren kousoan nan sapwtehn ni ar sohte perki mehkot oh meir nanwel kan.+ 26 I pahn wiahiong irail oh wasa kan me kapilpene ei dohlo kapai ehu,+ oh I pahn kamwerehdi keteu ni ahnsou me konehng. Kapai kan pahn mweredi rasehng keteu.+ 27 Tuhke kan en nan mohs pahn wa, oh pwehl pahn kapwarehda wah,+ oh re pahn kousoan nan sahpwo ni ar sohte perki mehkot. Oh re pahn anahne ese me ngehi me Siohwa ni ei kauwehla ar tuhkehn wisik kan+ oh kapitirailla sang irail me kin kaliduwih irail. 28 Re sohla pahn wia mehkot me wehi kan pahn saikedi, oh mahn lawalo en sampah kan sohte pahn kadalleirailla, oh re pahn kousoan ni ar sohte perki mehkot, oh sohte me pahn kamasak irail.+

29 “‘“I pahn wiahiong irail mwetuwel ehu me pahn ndandla, oh re sohla pahn mehkihla lehk lapalap nan sahpwo,+ oh wehi kan sohla pahn kanamenekih irail.+ 30 ‘Eri re pahn anahne ese me ngehi, Siohwa ar Koht, me ieiang irail oh me irail, mehn Israel kan, iei nei aramas,’+ Kaun Wasa Lapalahpie Siohwa me ketin mahmahsen.”’

31 “‘A kumwail, nei sihpw kan,+ sihpw kan me I kin apwalih, kumwail ihte aramas kei, oh ngehi me amwail Koht,’ Kaun Wasa Lapalahpie Siohwa me ketin mahmahsen.”