Lepin Padahk kan
8 Erpit sou kin liklikwer?
Dehde mwahu sou kin kalakalaudehla ngile?+
2 Pohn wasa ile kan+ ni keilen nanialo,
Erpit kin kesihnenda wasa me ahl akan kasangpeseng ie.
3 Limwahn ewen kehl kan me kohlongala nan kahnimwo,
Ni wasahn pedolong kan en kahnimwo,
E kin wie likilikwer ni ngihl laud:+
4 “Kumwail aramas akan, I liklikweriong kumwail;
I kin kalakalaudehla ngileiet ong aramas koaros.*
5 Kumwail me soakoahiek kan, sukuhlki dehde mwahu;+
Kumwail me pweipwei kan, alehda koahiek en wehwehki.*
6 Rong, pwe dahme I kin nda me kesempwal,
Kilin ewei kat kin koasoia dahme pwung;
7 Pwe eweiet kin koasoia me mehlel ni ngihl kadek,
Oh kilin ewei kat kin tatki dahme suwed.
8 Mehkoaros me I kin nda me pwung.
Sohte ehu rehn mepwukat kin likamw de widing.
9 Koasoi pwukat koaros kin sansal ong irail akan me kin dehdehki
Oh kin pwung ong irail akan me diaradahr loalokong.
10 Ale ei kopwung,* a kaidehn silper,
Oh loalokong, a kaidehn kohl me keieu kaselel,+
11 Pwe erpit kin mwahusang rahr* kaselel;
Soahng teikan koaros me aramas mwahuki sohte kak pahrekiong met.
12 Ngehi, erpit kin kousoan rehn dehde mwahu;
I diaradahr loalokong oh koahiek en madamadau.+
13 Lemmwiki Siohwa kin wehwehki kailongki me suwed.+
I kin kailongki ahn aramas ar kin kasapwilda pein irail, aklapalap,+ wiewia suwed oh koasoi suwed.+
15 Pwehki ngehi, nanmwarki kan kin pousehlahte kakaun,
Oh lapalap akan kin wiahda kosonned pwung kan.+
16 Pwehki ngehi, kaun akan kin pousehlahte kakaun,
Oh lapalap akan kin wia kopwung me pwung.
17 I kin poakepoake irail akan me kin poakohng ie,
Oh irail akan me kin rapahkin ie pahn diariehda.+
18 Kepwehpwe oh lingan kin mi rehi,
Oh pil sohso kesempwal* oh pwung.
19 Wahi kan mwahusang kohl, pil kohl kan me mwakelekeldahr,
Oh dahme I kapwarehda kin mwahusang silper me keieu kaselel.+
20 I kin weweid nan elen pwung,
Nanwerengen ahl en pwung pahrek;
21 I kin kihong irail akan me poakohng ie sohso kesempwal,
Oh I kin kadirehla arail imwen nahk kan.
22 Siohwa ketin wiaiehda nin duwen tepin sapwellime kepikipik,+
Iei keieun sapwellime doadoahk mahsie.+
24 I ipwidier ni ahnsou me saikinte mie pihl loal kan,+
Ni ahnsou me pihl kan saikinte kusda sang nan utuhnpihl kan.
25 I ipwidier mwohn nahna kan,
Oh mwohn dohl akan ar koasoandiong nan dewahr,
26 Ni ahnsou me e saikinte ketin wiahda sampah oh mohs akan
De tepin mwodol en pwehl kan.
27 Ni ahnsou me e ketin kaunopada lahng,+ I mihmi mwo;
Ni ahnsou me e ketin kilelehdi irepen lahng oh sehd,*+
28 Ni ahnsou me e ketin koasoanehdi* depwek kan nan wehwe,
Ni ahnsou me e ketin poahsoanehda utuhnpihl loal kan,
29 Ni ahnsou me e ketin koasoanehdi irepen sehd
Pwe pihl akan sohte pahn daulihala dahme e ketin koasoanehdi,+
Ni ahnsou me e ketin wiahda* poahsoanen sampah,
30 Ahnsowo I mihmi limwah nin duwen tohndoadoahk saman men.+
Ngehi me kin kapakaparanih+ rahn koaros;
I kin pereperen mwohn silangi ahnsou koaros;+
31 I perenkihda sampah me wiawihda ong aramas en kousoan ie,
Oh I uhdahn perenkihda aramas akan.*
32 Eri samwa ko, kumwail rong ie;
Ei, meid peren irail akan me kin idawehn elei kan.
34 Meid peren aramas me kin rong ie
Sang ni eh kin sangkenei kohdo* ni ei wenihmw kan rahn koaros,
Sang ni eh kin awiawih limwahn uhren ei wenihmw kan;
35 Pwe mehmen me kin diar ie pahn diar mour,+
Oh e pahn alehdi kupwuramwahu sang Siohwa.
36 Ahpw mehmen me kin pohnsehse ie kin kamedekihala pein ih,
Oh irail akan me kin kailongkin ie kin poakohng mehla.”+