Esekiel
33 Oh Siohwa ketin mahsanihong ie: 2 “Nein-aramas, koasoiong omw aramas akan,+ oh ndaiong irail,
“‘Ma I wahdo kedlahs pwoat pohn sahpw ehu,+ oh aramas koaros en sahpwo pilada ohl emen oh wiahki ih arail sounsilasil men, 3 oh e kilang kedlahso eh kohkodohng sahpwo oh peuk mehn pepeuk* oh pakairkihong aramas akan.+ 4 Ma mehmen rong ngilen pepeuko ahpw sohte tehk pakairo+ oh kedlahso kohdo oh kihsang eh mour,* pein ih me pahn pwukoahki eh mehla.*+ 5 E rong ngilen mehn pepeuko, ahpw e sohte tehk pakairo. Pein ih me pahn pwukoahki eh mehla.* Ma e tehkada pakairo, eh mour* pahn poadoandoarla.
6 “‘Ahpw ma sounsilasilo kilang kedlahso eh kohkohdo oh e sohte peuk mehn pepeuko+ oh aramas ako sohte alehdi pakair oh kedlahso kohdo oh kihsang mour* en emen irail, aramaso pahn mehkihla pein eh sapwung, ahpw I pahn kapwukoahki sounsilasilo eh nta.’+
7 “A kowe, nein-aramas, I idihiukada ken wia sounsilasil ong wehin Israel; oh ni omw pahn rong mahsen ehu sang nin doauesei, ke pahn kihong irail kehkehlik ehu sang ngehi.+ 8 Ni ei pahn mahsanihong aramas suwed men, ‘Me suwed, ke uhdahn pahn mehla!’+ ahpw ke sohte koasoi pwehn panawih me suwedo en wekidala elen eh mour, e pahn mehla nin duwen aramas suwed men pwehki pein eh sapwung,+ ahpw I pahn kapwukoahkin uhk eh nta. 9 Ahpw ma ke panawih aramas suwed men en wekidala elen eh mour oh e kahng wekidala elen eh mour, e pahn mehkihla eh sapwung,+ ahpw ke uhdahn pahn doarehla pein omw mour.*+
10 “Oh kowe, nein-aramas, ndaiong aramas en Israel kan, ‘Kumwail kin nda: “Kitail toutoukilahr atail uhwong kan oh dipatail kan, me kahrehda atail luwetalahr;+ eri, ia duwen atail pahn momourte?”’+ 11 Ndaiong irail, ‘Kaun Wasa Lapalahpie Siohwa ketin mahsanih, “Nin duwen ei ieias, I sohte kin kupwurperenki mehlahn aramas suwed men,+ ahpw I kupwurperenki aramas suwed men en wekidala elen eh mour+ oh momourte.+ Kumwail sohpeisang, sohpeisang elen amwail mour suwed kan,+ pwe dahme kumwail pahn mehkihla, kumwail aramas en Israel kan?”’+
12 “Oh kowe, nein-aramas, ndaiong omw aramas akan, ‘Wiewia pwung en aramas pwung men sohte pahn doarehla ih ma e tepida uhwongada;+ de pil wiewia suwed en aramas suwed men sohte pahn kahrehiong en pwupwudi* ma e pahn sohpeisang eh wiewia suwed kan;+ de pil mehmen me pwung sohte pahn kak momourte pwehki eh wiewia pwung kan ni rahn me e dipada.+ 13 Ni ei mahsanihong me pwung men: “Ke uhdahn pahn momour,” oh e koapworopworki pein eh wiewia pwung kan oh wia dahme sapwung,*+ I sohte pahn tamataman eh wiewia pwung kan koaros, ahpw e pahn mehkihla sapwung me e wiadahr.+
14 “‘Oh ni ei mahsanihong me suwed men: “Ke uhdahn pahn mehla,” oh e sohpeisang dipe oh wiahda dahme pwung oh pahrek,+ 15 oh me suwedo kapwurehla dahme e ale nin duwen kilelepen pweipwand+ oh kapwungala dahme e pirapahda,+ oh e kin keid nan koasoandi kan me kin kihong mour ni eh sohte kin wia dahme sapwung, e uhdahn pahn momourte.+ E sohte pahn mehla. 16 I sohte pahn kaloke ih pwehki dihp kan me e wiahda.+ Pwehki eh wiewia dahme pwung oh pahrek, e uhdahn pahn momourte.’+
17 “Ahpw omw aramas akan kin nda, ‘Elen Siohwa sohte kin pwung pahrek,’ ahpw ni mehlel alarail kan me sohte kin pwung pahrek.
18 “Ni aramas pwung men eh pahn kesehla eh wiewia pwung kan oh wia dahme sapwung, e pahn mehkihla met.+ 19 Ahpw ni ahnsou me aramas suwed men sohpeisang eh wiewia suwed kan oh wia dahme pwung oh pahrek, e pahn momourte pwehki eh wia met.+
20 “Ahpw kumwail kin nda, ‘Elen Siohwa sohte kin pwung pahrek.’+ I pahn kadeik emenemen kumwail nin duwen amwail wiewia kan, kumwail aramas en Israel kan.”
21 Ni kaeisek riaun sounpar, ni kaeisek en sounpwong, ni kelimaun rahn en sounpwong en at kalipilipala, ohl emen me pitila sang Serusalem ahpw kohdo rehi+ oh nda: “Kahnimwo lohdier!”+
22 Eri nin soutiko mwohn ohl me pitilao eh kohdo, limen Siohwa ahpw kohdi pohi, oh e ketin kihpeseng eweiet mwohn ohlo eh kohdo rehi nimensengo. Eri eweiet sarapesengier, oh I kakehr pwurehng lokaia.+
23 Siohwa ketin mahsanihong ie: 24 “Nein-aramas, tohn mohn kahnimw pwukat+ kin ndindahki duwen sapwen Israel, ‘Eipraam ih ohl tehmen, ahpw e sapwenikihla sahpwet.+ Ahpw kitail me tohto; eri sahpwet uhdahn kohiengkitailehr nin duwen sapwatail.’
25 “Kahrehda ndaiong irail, ‘Iet me Kaun Wasa Lapalahpie Siohwa ketin mahsanih: “Kumwail kin tungoale mwenge me mie nta,+ oh kumwail kin kilangdahng amwail dikedik kasaut kan,* oh kumwail kin kakerehdi nta.+ Eri, ia kahrepen amwail pahn sapwenikihla sahpwet? 26 Kumwail koapworopworkihla noumwail kedlahso,+ kumwail kin wia wiewia kasaut kan, oh emenemen kumwail kin kasaminehla en mehn mpe pwoud.+ Eri, ia kahrepen amwail pahn sapwenikihla sahpwet?”’+
27 “Iet me ke pahn ndaiong irail, ‘Iet me Kaun Wasa Lapalahpie Siohwa ketin mahsanih: “Nin duwen ei ieias, irail me kin kousoan nan mohn kahnimw kan pahn mehkihla kedlahs; irail me mi nan mohs, I pahn kihirailla nin duwen kenen mahn lawalo kan; oh irail me mi nan wasahn ruk kehlail kan oh nan pwoaren paip kan pahn mehkihla soumwahu.+ 28 I pahn wiahiong sahpwo en tehnla douluhl,+ oh eh aklapalap oh eh pohnmwahso pahn imwisekla, oh nahna kan en Israel pahn tehnla,+ sohte me pahn keid wasao. 29 Oh irail pahn anahne ese me ngehi me Siohwa ni ei wiahiong sahpwo en tehnla douluhl+ pwehki soahng kasaut koaros me re wiadahr.”’+
30 “A kowe, nein-aramas, omw aramas akan kin koasoakoasoiaiuk nanpwungarail limwahn kehl kan oh ni wenihmwen ihmw kan.+ Re kin ndindapene nanpwungarail, rehn riarail kan, ‘Kohdo, oh kitail rong mahsen me pwilisang rehn Siohwa.’ 31 Re pahn pokonpene pwehn mwohd mwohmw nin duwen nei aramas akan; oh re pahn rong omw mahsen kan, ahpw re sohte pahn kapwaiada mepwukat.+ Pwe re kin kapingahkin uhk* awarail kan, ahpw mohngiongirail kan kin noahroke kamwahuparail ni likamw. 32 Kilang! Ong irail, ke duwehte koulen limpoak, me aramas ngilamwahu oh mai en kesengki keseng sahl kin koulki. Re pahn rong omw mahsen kan, ahpw sohte me pahn mwekidki mepwukat. 33 Oh ni ahnsou me mahsen ko pweida—oh e uhdahn pahn pweida—irail pahn anahne ese me soukohp men mihmi nanpwungarail.”+