SOSUA

1 Mwurin sapwellimen Siohwa ladu Moses eh mehla, Siohwa ketin mahsanihong Sosua*+ nein Nun, nein Moses sounpapaho:+ 2 “Ei ladu Moses melahr.+ Eri uhda, kowe oh aramas pwukat koaros, kumwail kotehla Sordan oh kohla nan sahpw me I pahn kihong irail, ong aramas en Israel kan.+ 3 I pahn kihong kumwail wasa koaros me kumwail sokedi ie, duwehte ei inoukihong Moses.+ 4 Irepen sapwamwail pahn sang ni sapwtehn leldahla Lepanon oh lel pillap laud, Iupreitis—sapwen mehn Id koaros+—oh lel ni Sehd Laud* ni palikapi.*+ 5 Sohte emen pahn kak pelianuhkada erein omw mour.+ Duwehte ei kin ieiang Moses, I pil pahn ieiang uhk.+ I sohte pahn mweisang uhk de pil keseiukala.+ 6 Kommwad oh kehlail,+ pwe kowe me pahn kahrehiong aramas pwukat en sohsohki sahpw me I kahukihong samarail mehn mahs ako me I pahn kihong irail.+

7 “Ihte ken kommwad oh uhdahn kehlail, oh kapwaiada ni keneinei Kosonnedo pwon me Moses ei laduwo kehkehlingkihong uhk. Ke dehr wetsang, sohte lipilipil ma ni palimaun de ni palimeing,+ pwe ken mwekid ni erpit wasa koaros me ke pahn kohla ie.+ 8 Ke dehr uhdihsang koasoia pwuhken Kosonned wet,+ oh ke anahne wadek ni ngihl tikitik* ni rahn oh nipwong, pwe ken kapwaiada ni keneinei mehkoaros me ntingdier loale;+ ke ahpw pahn pweida oh mwekid ni erpit.+ 9 I sou kehkehlingkihonguhkehr? Kommwad oh kehlail. Dehr salohda de masepwehkada, pwe Siohwa omw Koht kin ketin ieiang uhk wasa koaros me ke pahn kin kohla ie.”+

10 Sosua eri kehkehlingkihong kaunen aramas ako: 11 “Kumwail kohseli nan kahnimpwalen oh kihong aramas akan kehkehlik wet, ‘Kumwail kaunopada amwail kisin tungoal, pwehki mwurin rahn siluh kumwail pahn kotehla Sordan pwe kumwail en kohla sapwenikihla sahpw me Siohwa amwail Koht pahn ketikihong kumwail en sapwenikihla.’”+

12 Oh Sosua eri ndaiong mehn Reupen kan, mehn Kad kan oh elep keinek en Manase: 13 “Kumwail tamataman dahme sapwellimen Siohwa ladu Moses kehkehlingkihong kumwail:+ ‘Siohwa amwail Koht pahn ketin kakommoaleikumwaildi. E ketikihongkumwailehr sahpw wet. 14 Amwail pwoud kan, noumwail seri kan, oh noumwail pelinmen kan pahn mihmihte nan sahpw me Moses kihong kumwail paliet* Sordan,+ ahpw kumwail sounpei kehlail kan koaros+ anahne kotehla ni ireken mahwen mwohn riamwail kan.+ Kumwail anahne sewese irail 15 lao Siohwa pahn ketin kakommoalehdi riamwail kan, duwehte me e ketin wiahiongkumwailehr, oh irail pahn pil sapwenikihla sahpw me Siohwa amwail Koht pahn ketikihong irail. Kumwail eri pwurala nan sahpw me kohieng kumwail en kousoan loale oh sapwenikihla, sahpw me sapwellimen Siohwa ladu Moses kihong kumwail ni palimesehn Sordan.’”+

16 Irail eri sapengki Sosua: “Se pahn wia mehkoaros me ke kehkehlingkihong kiht, oh se pahn kohla wasa sohte lipilipil me ke kadarkitalahng ie.+ 17 Duwehte at kin peikiong mehkoaros me Moses kin nda, se pil pahn peikiong uhk. Ihte Siohwa omw Koht en ketin ieiang uhk duwehte eh kin ketin ieiang Moses.+ 18 Mehmen me uhwongada omw koasoandi oh sapeikiong kehkehlik koaros me ke kihong ih, pahn kamakamala.+ Ihte ken kommwad oh kehlail.”+

2 Sosua nein Nun ahpw kadarala ni rir ohl riemen sang Sidem+ nin duwen lipoahrok kei. E ndaiong ira: “Kohwei oh dawih sahpwo, ahpw ni mehlel Seriko.” Ira eri kohla oh lella ni imwen lihen netiki paliwere men me adaneki Reap,+ oh ira mihmi mwo. 2 Nanmwarkien Seriko ahpw rongada met: “Kilang! Ohlen Israel kan kodohr wasaht nipwonget pwe ren lipoahroke sahpwet.” 3 Nanmwarkien Seriko eri ileklahng Reap, nda: “Wahieido ohl ako me kohdo oh mihmi nan imwomwen, pwe re kodohn lipoahroke sahpwet pwon.”

4 Ahpw liho ale ohl riemeno oh karukihirahla. Ih eri nda: “Ei, ohl ako kohdo rehi, ahpw I sehse wasa ira kohsang ie. 5 Oh ni eh soutikpene ni ahnsou me ewen kelen kahnimwo pahn ritidi, ohl ako kohieila. I sehse wasa ira kohla ie, ahpw ma kumwail mwadang pwakihirahwei, kumwail pahn koanoairahdi.” 6 (Ahpw e kahreirahdahla pohn ihmwo oh karukihirahla pahn plaks* kan me koasoakoasoakda wasao.) 7 Ohl ako me nanmwarkio kadarala ahpw pwakih ira ni ahl me kolahng wasahn kotehla Sordan kan,+ oh ewen kelen kahnimwo ritidi mwurinte irail kan me raparapahkin ira ar pedoisang.

8 Mwohn ohl ako ara pahn meirla, e kohdahla rehra pohn ihmwo. 9 E ndaiong ira: “I ese me Siohwa pahn ketikihong kumwail sahpwet+ oh se masangkumwaildahr.+ Tohn sahpwet pwon nan kapehd tikitiklahr pwehki kumwail,+ 10 pwe se rongehr duwen Siohwa eh ketin kamadahda pilen Sehd Weitahta mwohmwail ni amwail mweselsang Isip+ oh dahme kumwail wiahiong Sihon+ oh Ok,+ nanmwarki riemen en mehn Amor, me kumwail kamwomwala palio* Sordan. 11 Ni at rongada met, se nan kapehd tikitikla,* oh sohte mehmen kin eimah pwehki kumwail, pwe Siohwa amwail Koht iei Koht en nanleng oh nin sampah.+ 12 Eri menlau, kumwa kahula ni mwaren Siohwa, pwehki ei kasalehiong kumwa limpoak loalopwoat, kumwa pil pahn kasalehiong tohnimwen ei pahpao limpoak loalopwoat; oh kumwa anahne kihong ie kilel ehu me I kak likih kumwa. 13 Kumwa anahne doarehla mouren ei pahpa oh nohno, riei pwutak oh serepein kan oh kisehrail koaros, oh kumwa anahne doareikitasang mehla.”+

14 Ohl ako ahpw ndaiong ih: “Ma se sohte pahn wia met, Koht en ketikihsang at mour! Ma kumwail sohte ndahda dahme se wia, eri se pahn kasalehiong uhk limpoak loalopwoat oh se pahn kapwaiada at lokaia ni ahnsou me Siohwa pahn ketikihong kiht sahpwet.” 15 Mwurin mwo e ale sahl pwoat oh kadarirahdi sang ni wenihmwtoko, pwe imweo mi pohn kelen kahnimwo. Ni mehlel, e kin kousoan pohn kehlo.+ 16 Ih eri ndaiong ira: “Kumwa kohla ni wasa nahnahn kan oh rukurungki rahn siluh wasao, pwe irail kan me raparapahkin kumwa de diarkumwahda. Eri, mwurin irail kan me raparapahkin kumwa ar pwurodo, kumwa ahpw pahn kak kohkohwei.”

17 Ohl ako ahpw ndaiong ih: “Se pahn kolokol inou wet me ke wiahiong kiht sen kahukihla+ 18 ma ke pahn pirehiong sahl weitahta wet ni wenihmwtok me ke kadarkitedi sang ieo ni at pahn kohdo sahpwet. Ke pahn kapokonepene omw pahpa, omw nohno, riomw kan oh tohnimwen omw pahpao koaros nan ihmwet.+ 19 Eri, ma mehmen pahn pedoisang nan imwomwe, ih me pahn pwukoahki eh mehla,* oh se sohte pahn dipikihda. Ahpw ma mehkot wiawihong emen me mi rehmw nan ihmwet, kiht me pahn pwukoahki eh mehla. 20 Ahpw ma ke pahn ndahda dahme se wia,+ se sohte pahn kolokol omw inou me ke wiahiong kiht sen kahukihla.” 21 E ahpw sapengki: “En pweida nin duwen dahme kumwa koasoia.”

Ih eri kadarirahla, oh ira kohkohla. Mwurin mwo, e ahpw pirehiong sahl weitahtao ni wenihmwtoko. 22 Ira ahpw kohkohla ni wasa nahnahn kan oh mihmi mwo erein rahn siluh, lao irail kan me raparapahkin ira pwurodo. Irail raparapahki ira ni ahl koaros ahpw sohte diarirahda. 23 Ohl riemeno eri kohdihdo sang wasa nahnahn ko oh kotehla pillapo oh kohdo rehn Sosua nein Nun. Ira eri ndaiong ih soahng koaros me wiawihong ira. 24 Ira ahpw ndaiong Sosua: “Siohwa ketikihongkitailehr sahpwo pwon.+ Ni mehlel, tohn sahpwo pwon nan kapehd tikitiklahr pwehki kitail.”+

3 Sosua ahpw sangkenei pirida, ih oh mehn Israel ko* koaros eri mweselsang Sidem+ oh kolahng Sordan. Irail eri pweidi wasao nipwongo mwohn arail kotehla pillapo.

2 Mwurin rahn siluh, kaun akan+ ahpw kohkohseli nan kahnimpwalo 3 oh kehkehlingkihong aramas akan: “Ni ahnsowohte me kumwail kilang kohpwahn inou lap en Siohwa amwail Koht, me samworo en Lipai ko kin weuwa,+ kumwail pahn mweselsang amwail wasa oh idawehnla. 4 Ahpw kumwail anahne dohkihsang kiupid 2,000;* dehr karanih, pwe kumwail en ese mehnia ahl me kumwail pahn keid ie, pwe kumwail saikinte keid nan ahl pwoatet.”

5 Sosua ahpw ndaiong aramas ako: “Kumwail kasarawihala pein kumwail,+ pwe lakapw Siohwa pahn ketin wiahda soahng kapwuriamwei kan nanpwungamwail.”+

6 Sosua eri ndaiong samworo ko: “Kumwail pwekada kohpwahn+ inou lapen oh tiengla mwohn aramas akan.” Irail eri pwekada kohpwahn inou lapo oh tiengla mwohn aramas ako.

7 Siohwa eri ketin mahsanihong Sosua: “Rahnwet, I pahn tepida kawauwihiukala mwohn mesen mehn Israel kan koaros,+ pwe irail en ese me I pahn ieiang uhk,+ duwehte ei kin ieiang Moses.+ 8 Ke pahn kihong samworo kan me kin weuwa kohpwahn inou lapo kehkehlik wet: ‘Ni ahnsou me kumwail lel ni keilen Sordan, kumwail pahn sokedi nan pihlo oh kesikesihnente nan pillapo.’”+

9 Oh Sosua ndaiong mehn Israel ko: “Kumwail kohdo wasaht oh rong mahsen en Siohwa amwail Koht.” 10 Sosua ahpw nda: “Sang ni met, kumwail pahn ese me Koht ieias men kin ketiket nanpwungamwail,+ oh e pahn uhdahn ketin kausasang mwohmwail mehn Kenan kan, mehn Id kan, mehn Ip kan, mehn Peris kan, mehn Kirkas kan, mehn Amor kan oh mehn Sepus kan.+ 11 Kilang! Kohpwahn inou lap en Kaunen sampah pwon tihtieng mwohmwail kolahng nan Sordan. 12 Eri kumwail ale ohl 12 sang rehn keinek en Israel kan, wad emen sang ehuehu keinek,+ 13 oh ni ahnsou me patehn nehn samworo kan me kin wa Kohpwahn inou lap en Siohwa, Kaunen sampah pwon pahn sair pilen Sordan, pilen Sordan me kin pwilsang pali powe pahn uhdi oh duwehla dihd ehu.”+

14 Eri ni ahnsou me aramas ako mweselda sang ar kahnimpwal ko mwohnte arail kotehla Sordan, samworo kan me wa kohpwahn+ inou lapo ahpw tiengla mwohn aramas ako. 15 Ni ahnsou me irail me wa Kohpwao lel Sordan oh samworo kan me wa Kohpwao sokedihla ni keilen pihlo (ahnsou wet pilen Pillap Sordan kin loalada lella ni keileo+ erein ahnsoun dondol), 16 pihl me pwilsang pali poweo ahpw uhdi. E ilehda duwehte dihd ehu nan Adam, kahnimw ehu me inenen doh, me karanih Saredan. A pihl me pwilipwildilahng Sehden Arapa, me iei Sehd Soahl* ahpw madada. Pillapo eri sohla pwilipwil, oh aramas ako ahpw kotehla kohla palio Seriko. 17 Erein samworo kan me wa kohpwahn inou lap en Siohwa wie kesikesihnen pohn pwehl madekeng+ nanwerengen Sordan, mehn Israel ko koaros ahpw alialu pohn pwehl madekeng+ lao tohnwehio pwon kotehla Sordan.

4 Ni ahnsou me tohnwehio pwon kotelahr Sordan, Siohwa ahpw ketin mahsanihong Sosua: 2 “Ale ohl 12 sang rehn aramas akan, wademen sang ehuehu keinek,+ 3 oh kihong irail kehkehlik wet: “Ale takai 12 sang nanwerengen Sordan, wasa me samworo ko kesihnen ieo,+ oh wahdo oh pwilikihdiong wasa me kumwail pahn pweidi ie pwohnget.’”+

4 Sosua eri ekerodo ohl 12 me e pilada sang rehn mehn Israel ko, wademen sang ehuehu keinek, 5 Sosua ahpw ndaiong irail: “Kumwail kohla nanwerengen Sordan mwohn Kohpwahn inou lap en Siohwa amwail Koht, oh emenemen kumwail en kapaikada ehu takai, ehu ong ehuehu keinek en Israel kan, 6 pwe en wia mehn kataman ehu ong kumwail. Ma noumwail seri kan* pahn idek rehmwail, “Dahme kumwail kihdihki takai pwukat me?’+ 7 kumwail pahn ndaiong irail: ‘Pwehki pilen Sordan uhdi mwohn kohpwahn+ inou lap en Siohwa. Ni ahnsou me kohpwao kotehla Sordan, pilen Sordan uhdi. Takai pwukat pahn wia mehn kataman poatopoat ehu ong aramas en Israel kan.’”+

8 Mehn Israel kan eri kapwaiada duwehte me Sosua kehkehlingki. Re ale takai 12 sang nanwerengen Sordan, duwehte me Siohwa ketin kaweidki Sosua, pwe en pahrekiong uwen tohtohn keinek en Israel kan. Re ahpw walahng takai ko wasa me re pahn pweidi ie pwohngo oh pwilikihdi wasao.

9 Sosua pil kauwada takai 12 nanwerengen Sordan, wasa me samworo ko me kin wa kohpwahn inou lapo kesihnen ieo,+ oh takai ko mihmi wasao leledo rahnwet.

10 Samworo kan me wa Kohpwao wie kesikesihnen nanwerengen Sordan lao mehkoaros me Siohwa ketin ruwesehki Sosua en ndaiong aramas ako ren wia ahpw imwisekla, pwe en pahrekiong mehkoaros me Moses kehkehlingkihong Sosua. Erein ahnsowo, aramas ako ahpw mwadangete kotehla pillapo. 11 Ni ahnsou me aramas akan koaros kotelahr pillapo, Kohpwahn inou lap en Siohwa oh samworo ko ahpw kotehla pillapo mwohn mesen aramas ako.+ 12 Oh mehn Reupen kan, mehn Kad kan oh elep keinek en Manase ahpw kotehla pillapo ni ireken mahwen+ mwohn mehn Israel teikan, duwehte me Moses kaweidkin irail.+ 13 Mwohn silangin Siohwa, mpen sounpei 40,000 me onopadahngehr mahwen, re ahpw kotehla pillapo oh kohla nan sapwtehn en Seriko.

14 Siohwa ketin kawauwihala Sosua mwohn mesen mehn Israel kan koaros rahno,+ oh re kin uhdahn wauneki* ih erein eh mour, duwehte arail kin uhdahn wauneki Moses.+

15 Siohwa ahpw ketin mahsanihong Sosua: 16 “Ruwese samworo kan me kin wa kohpwahn+ Kadehdeo ren kohdahdo sang nan Sordan.” 17 Sosua eri ruwese samworo ko: “Kumwail kohdahdo sang nan Sordan.” 18 Ni ahnsou me samworo kan me wa kohpwahn+ inou lap en Siohwa karada sang nanwerengen Sordan oh patehn nehn samworo ko sokedi pohn pwehl madekeng, pilen Sordan ahpw pwurehng pwilipwilwei oh loalada lella ni keileo+ duwehte nin tapio.

19 Aramas ako ahpw karada sang nan Sordan ni kaeisek en rahn ni keieun sounpwong oh kauwada arail kahnimpwal nan Kilkal+ ni irepen palimesehn Seriko.

20 A takai 12 ko me re kihsang nan Sordan, Sosua kauwada nan Kilkal.+ 21 Ih eri ndaiong mehn Israel kan: “Ni ahnsou kohkohdo, ni noumwail seri kan ar pahn idek rehn arail pahpa kan, ‘Ia wehwehn takai pwukat?’+ 22 kumwail pahn kawehwehiong noumwail seri kan: ‘Israel kotehla Sordan pohn pwehl madekeng+ 23 ni ahnsou me Siohwa amwail Koht ketin kammadahda pilen Sordan mwohrail lao irail kotehla pillapo, duwehte me Siohwa amwail Koht ketin wiahiong Sehd Weitahtao ni eh ketin kamadahda mwoht lao se kotehla.+ 24 E ketin wia met pwe aramas akan koaros nin sampah en ese uwen kehlail en nin limen Siohwa+ oh pwe kumwail en lemmwiki Siohwa amwail Koht ahnsou koaros.’”

5 Ni ahnsou me nanmwarkien Amor koaros+ me mi palikapi* en Sordan oh nanmwarkien Kenan koaros+ me mi limwahn sehdo rongada me Siohwa ketin kamadahda pilen Sordan mwohn mehn Israel kan lao irail kotehla pillapo, irail ahpw nan kapehd tikitikla*+ oh solahr eimah pwehki mehn Israel kan.+

2 Ni ahnsowo Siohwa ketin mahsanihong Sosua: “Wiahda noumwail naip takai oh pwurehng sirkumsaisihala+ ohlen Israel kan, keriapak.” 3 Sosua eri wiahda naip takai kan oh sirkumsaisihala ohlen Israel kan ni Kipead-aaralod.*+ 4 Iet kahrepen Sosua eh sirkumsaisihala irail: Ohl koaros me mweselsang Isip, ohl akan koaros me iang mahwen* melahr nan sapwtehno nan arail seiloako mwurin arail mweselsang Isip.+ 5 Aramas koaros me mweselsang Isip sirkumsaisla, ahpw aramas koaros me ipwidi nan sapwtehno erein arail seiloak mwurin arail mweselsang Isip sohte sirkumsaisla. 6 Mehn Israel kan sapsapalki sounpar 40+ nan sapwtehno lao tohnwehio pwon mehla, me iei irail ohl akan me iang mahwen me mweselsang Isip oh sohte kin peikiong kapitien Siohwa.+ Siohwa ketin kahukihla me e sohte mwahn pahn ketin mweidohng irail en kilang sahpw+ me Siohwa ketin kahukihong samarail mehn mahs ako me e pahn ketikihong kitail,+ sahpw ehu me inenen pwelmwahu.*+ 7 Ih eri ketin wiliankihda irail neirail pwutak kan.+ Ih irail pwukat me Sosua sirkumsaisihala; irail sohte sirkumsaisla erein arail seiseiloak.

8 Ni ahnsou me re kanekehla arail sirkumsaisih tohnwehio pwon, irail mihmihte nan kahnimpwalo lao irail mwahula.

9 Siohwa ahpw ketin mahsanihong Sosua: “Rahnwet I kihsangehr* rehmwail kanamenek en Isip.” Wasao eri adanekihla Kilkal*+ leledo rahnwet.

10 Mehn Israel kan mihmihte nan kahnimpwalo nan Kilkal, nan sapwtehn en Seriko, oh re wia Pahsohpao ni 14 en sounpwongo,+ nin soutik. 11 Oh re tepida tungoale wahnsahpwo mandahn rahnen Pahsohpao. Re tungoale pilawa me sohte doal ihs+ oh wahn krein* inihn. 12 Oh manna ahpw uhdi mandahn rahno, ahnsou me re tungoalehla ekei wahnsahpwo; solahr manna ong mehn Israel kan,+ pwe re tepidahr tungoale wahnsahpw en Kenan kan nan sounparo.+

13 Ni ahnsou me Sosua karanih Seriko, e sarada oh kilangada ohl emen+ me mi mwowe oh kolokol kedlahs pwoat nan peh.+ Sosua ahpw aluhla reh oh idek: “Komw iang at pali de palien at imwintihti kan?” 14 Ohlo ahpw sapengki: “Soh, pwe I kohdo nin duwen kaunen sapwellimen Siohwa karis en sounpei.”+ Sosua eri poaridiong nanpwelo, lukupoardi oh patohwanohng: “Dahme ei kaun pahn mahsanihong sapwellime ladu?” 15 Kaunen sapwellimen Siohwa karis en sounpeio ahpw ketin sapeng Sosua mahsanih: “Kihsang omw suht kan ni nehmwen, pwehki wasa me ke kesikesihneniehn me sarawi.” Sosua eri mwadangete kapwaiada.+

6 Eri Seriko ahpw ritidi teng pwehki mehn Israel kan; sohte me kohkohsang oh sohte me pedolong.+

2 Siohwa eri ketin mahsanihong Sosua: “Kilang, I kihonguhkehr Seriko oh eh nanmwarki oh nah sounpei kehlail kan.+ 3 Kumwail sounpei kan koaros pahn karis pidakih kahnimwo, pidakihdi pak ehu. Ih me kumwail pahn anahne wia erein rahn weneu. 4 Koasoanehdi samworo isimen en tieng mwohn Kohpwahn inou lapo wa koden sihpw wol isuh mehn pepeuk. Ahpw ni keisuhwen rahn, kumwail pahn karis pidakih kahnimwo pahn pak isipak oh samworo kan pahn peuk mehn pepeuk* ko.+ 5 Ni ahnsou me koden sihpw wol ko pahn pepeuk, ni amwail pahn rongada ngihlo,* sounpei koaros pahn werlaudkihda wer en mahwen. Kelen kahnimwo ahpw pahn rengkdiong nanpwel,+ oh emenemen sounpei pahn wonlahte mwowe.”

6 Sosua nein Nun eri ekerpene samworo ko oh ndaiong irail: “Kumwail wahda kohpwahn inou lapo, oh samworo isimen anahne tieng mwohn Kohpwahn inou lap en Siohwa wa koden sihpw wol isuh mehn pepeuk.”+ 7 E pil ndaiong sounpei ko: “Kumwail doula oh karis pidakih kahnimwo, iangahki pwihnen sounpei kan+ me onopadahr ren tieng mwohn Kohpwahn inou lap en Siohwa.” 8 Oh nin duwen me Sosua padahkihong sounpei ko, samworo isimen me wa koden sihpw wol isuh mehn pepeuk ko mwohn silangin Siohwa ahpw tiengla mwowe oh peuk mehn pepeuk ko, oh kohpwahn inou lap en Siohwa ideidawehn irail. 9 Oh pwihnen sounpei kan me onopadahr ahpw tiengla mwohn samworo kan me pepeuk mehn pepeuk ko, a ehu pwihnen sounpei me kin sile mwurio ideidawehn Kohpwao nindoken mehn pepeuk ko ar wie pepeuk sohte uhdi.

10 Sosua eri kehkehlingkihong sounpei ko: “Kumwail dehr wer de pil mweseisei. Sohte lepin lokaia ehu pahn kohieisang nan awamwail kan lao lel rahn me I pahn ndaiong kumwail, ‘Wer!’ Kumwail ahpw pahn wer.” 11 E koasoanehdi me Kohpwahn inou lap en Siohwa en wisik pidakihdi kahnimwo oh en pidakihdi pak ehu, a mwuri re pahn pwurala ni kahnimpwalo oh pweidi wasao nipwongo.

12 Mandahn rahno, Sosua sangkenei pirida oh samworo ko wahda Kohpwahn inou lap en Siohwa,+ 13 oh samworo isimen me wa koden sihpw wol isuh mehn pepeuk ahpw alu tieng mwohn Kohpwahn inou lap en Siohwa, oh re sohte uhdi pepeuk mehn pepeuk ko. Pwihnen sounpei kan me onopadahr kin alu tieng mwohrail oh pwihnen sounpei teio kin ideidawehn Kohpwahn inou lap en Siohwa nindoken mehn pepeuk ko ar wie pepeuk sohte uhdi. 14 Re karis pidakihdi kahnimwo pak ehu ni keriaun rahn, a mwuri re pwurala ni kahnimpwalo. Iei me re kin wia erein rahn weneu.+

15 Eri ni keisuhwen rahn, ni eh rarahnpeseng, re sangkenei pirida oh karis pidakih kahnimwo ni soangen mwohmwohte pak isipak. Ihte rahno me re pahn karis pidakih kahnimwo pak isipak.+ 16 Oh ni keisuhwen ar pidek, ni samworo ko ar peuk mehn pepeuk ko, Sosua ahpw ndaiong sounpei ko: “Kumwail weriwer,+ pwe Siohwa ketikihongkumwailehr kahnimw wet! 17 Kahnimwo oh mehkoaros me mi loale pahn kamwomwmwomwla;+ Siohwa me sapwellimanki mepwukat koaros. Ihte Reap,+ lihen netiki paliwere me pahn momourte, ih oh irail koaros me iang ih nan imweo, pwehki eh karukihala meninkeder ko me kitail kadaralao.+ 18 Ahpw kumwail kadohwankumwailewei sang dahme pahn kamwomwmwomwla,+ pwe kumwail de inangihada mehkot me pahn kamwomwmwomwla oh ale,+ oh wiahiong kahnimpwal en Israel en kamwomwmwomwla sang ni amwail kahredohng kahpwal powe.+ 19 Ahpw silper oh kohl koaros oh pil dipwisou kan me wiawihkihda prons oh mete iei mehkot sarawi ong Siohwa.+ Mepwukat pahn wisiklahng nan sapwellimen Siohwa wasahn nahk dipwisou kesempwal kan.”+

20 Sounpei ko eri werda ni ahnsou me mehn pepeuk ko wie pepeuk.+ Ni ahnsowohte me sounpei ko rongada ngilen mehn pepeuk ko oh re werlaudkihda wer en mahwen, kelen kahnimwo ahpw rengkdiong nanpwel.+ Mwurin mwo, sounpei ko eri inenlahngete nan kahnimwo oh kalowehdi. 21 Re ahpw kamwomwkihla kedlahs mehkoaros nan kahnimwo, ohl oh lih, me pwulopwul oh me mah, kouwol, sihpw oh dongki.+

22 Sosua eri ndaiong ohl riemen me lipoahroke sahpwo: “Kohla nan imwen lihen netiki paliwereo oh wahieido liho oh tohnimweo koaros, duwehte me kumwa kahukihong ih.”+ 23 Lipoahrok pwulopwul ko eri kohla wahieido Reap, iangahki eh pahpa, eh nohno, rie pwutak kan, oh tohnimwe koaros; ei, ira wahieido eh peneinei pwon,+ oh kahreirailla wasa ehu likin kahnimpwal en Israel.

24 Irail eri isikada kahnimwo oh mehkoaros me mi loale. Ahpw silper, kohl oh dipwisou kan me wiawihkihda prons oh mete, re wahla nan wasahn nahk dipwisou kesempwal kan nan tehnpesen Siohwa.+ 25 Ihte Reap lihen netiki paliwere oh tohnimwen eh pahpao oh tohnimweo koaros me Sosua doarehla;+ oh liho kin mihmi nan Israel leledo rahnwet,+ pwehki eh karukihala meninkeder ko me Sosua kadarala ren lipoahroke Seriko.+

26 Ni ahnsowo, Sosua pakairkihda inou wet:* “Aramas emen me pahn song en onehda sapahl kahnimw en Seriko en riahla mwohn silangin Siohwa. Nah mesenih pahn mehla ni eh pahn wiahda poahsoan en kahnimw wet, oh nah me keieu tikitik pahn mehla ni eh pahn kihong wenihmwen kahnimw wet.”+

27 Eri Siohwa kin ketin ieiang Sosua,+ oh e ndandla nan sampah pwon.+

7 Ahpw mehn Israel kan sohte lelepek ong dahme pahn kamwomwmwomwla, pwe Akan,+ nein Karmi, nein Sapdi, nein Sera, sang ni keinek en Suda, ale soahng kei me pahn kamwomwmwomwla.+ Siohwa eri ketin engiengda kowahlap pahn mehn Israel kan.+

2 Sosua eri kadarala ohl kei sang Seriko ong Ai,+ me karanih Pedapen oh palimesehn Pedel,+ oh ndaiong irail: “Kumwail kohdahla oh lipoahroke sahpwo.” Ohl ako ahpw kohdahla oh lipoahroke Ai. 3 Ni arail pwurodo rehn Sosua, re ndaiong ih: “Sohte anahnepen kariso pwon en kohdahla. Mpen ohl riekid de silikid me itar en kalowehdi Ai. Ke dehr kapwangahda kariso pwon ni omw pahn kadarirailla, pwe tohn wasao me malaulau.”

4 Eri mpen ohl silikid me kohdahla wasao, ahpw re anahne tangasang ohlen Ai kan.+ 5 Ohlen Ai ko kemehla ohl 36, oh re pwakih irail sang likin ewen kelen kahnimwo lella Separim,* re ahpw kemekemeirailla ni arail kohkohdi sang wasao. Mohngiong en aramas ako tepida rerrer oh re solahr kommwad.*

6 Met kahrehda Sosua eh tehrpeseng eh likou ko oh poaridiong nanpwelo mwohn Kohpwahn inou lap en Siohwa lao lel nin soutik, ih oh pil ohl mah kan en Israel, oh re kin kesekesedahng pwelpar pohn moangarail kan. 7 Sosua ahpw patohwan: “Maing Kaun Wasa Lapalahpie Siohwa, dahme kahrehda komw ketikihdohki aramas pwukat leledo paliet Sordan, pwe komwi en pangkitalahng rehn mehn Amor kan pwe sen kamwomwmwomwla? E pahn mwahu ma se nsenamwahu mihmihte palio* Sordan! 8 Komw ketin kupwure ie, Maing Siohwa, dahme I kak patohwan met ni mehn Israel kan ar pweiekdosangehr* ar imwintihti kan? 9 Ni mehn Kenan kan oh tohn sahpwo pwon ar pahn rong duwen met, re pahn kapilkitpene oh kasohrehla adat kat sang sampah, oh dahme komw pahn ketin wiahiong mwaromwi lapalap?”+

10 Siohwa eri ketin sapeng Sosua mahsanih: “Pwourda! Dahme kahrehda ke poaridiong nanpwelen? 11 Israel dipadahr. Re kauwelahr ei inou lap+ me I kehkehlingkihong irail en peikiong. Re ale ekei dipwisou kan me pahn kamwomwmwomwla,+ re pirapahsang+ oh ekihla nan arail kepwe kan.+ 12 Ihme kahrehda, mehn Israel kan sohte pahn kak pelianda arail imwintihti kan. Re pahn sohpeisang oh tangasang arail imwintihti kan, pwehki arail wialahr mehkot me pahn kamwomwmwomwla. I sohte pahn pwurehng iang kumwail ma kumwail sohte pahn kasohrehsang dahme pahn kamwomwmwomwlao nanpwungamwail.+ 13 Uhda oh kasarawihala aramas akan!+ Ndaiong irail, ‘Kumwail kasarawihala pein kumwail ong lakapw, pwe iet me Siohwa, Koht en Israel ketin mahsanih: “Kumwail mehn Israel kan, dahme pahn kamwomwmwomwla mihmi nanpwungamwail. Kumwail sohte pahn kak pelianda amwail imwintihti kan lao kumwail kihsang nanpwungamwail dahme pahn kamwomwmwomwla. 14 Kumwail en pokonpene nimenseng, oh sang nanpwungen keinek kan, keinek me Siohwa ketin pilada+ pahn patohdo mwowe, oh sang nan keineko, peneinei ehu me Siohwa ketin pilada pahn patohdo mwowe, oh sang nan peneineio, tohnpeneinei me Siohwa ketin pilada pahn patohdo mwowe, wad emen. 15 Oh mehmen me dierekda eh ale dipwisou me pahn kamwomwmwomwla pahn isihsla,+ ih oh mehkoaros me e ahneki, pwehki eh kauwelahr inou lap+ en Siohwa oh pwehki eh wiadahr mwekid kanamenek ehu nan Israel.”’”

16 Eri mandahn rahno, Sosua sangkenei pirida oh koasoanehdi mehn Israel kan ren patohdo mwowe, oh sang nanpwungen keinek kan, keinek en Suda me pilipilda. 17 E koasoanehdi me peneinei kan en Suda en patohdo mwowe oh peneinei en Sera+ me pilipilda, a mwuri e koasoanehdi peneinei en Sera en patohdo mwowe, wad emen, oh Sapdi me pilipilda. 18 Ih eri koasoanehdi me tohnpeneinei en Sapdi en patohdo mwowe, wad emen, oh Akan nein Karmi, nein Sapdi, nein Sera sang ni keinek en Suda me pilipilda.+ 19 Sosua eri ndaiong Akan: “Nei pwutak, menlau wauneki Siohwa, Koht en Israel oh patohwan sakarada. Ndaiong ie mahs dahme ke wiadahr. Ke dehr ekihsang ie.”

20 Akan eri sapengki Sosua: “Ni mehlel, ngehi me dipadahr ong Siohwa, Koht en Israel, oh iet me I wiadahr. 21 Ni ei kilangada likou kaselel me kohsang Sainar+ oh silper sekel* 200 oh lepin kohl lep me toutouki sekel 50 nanpwungen dipwisou ko, I mwahukihda mepwukat, ngehi eri ale. Mepwukat seridi pahn pwehl nan imwei impwalo, oh mwohni ko mi pah.”

22 Ni ahnsowohte Sosua kadarala meninkeder ko, oh irail tangala ni impwalo, oh likowo ekiekla nan imwe impwalo iangahki mwohni ko me mi pah. 23 Irail eri wahieisang dipwisou ko nan impwalo oh wahla rehn Sosua oh mehn Israel kan koaros, oh pwilikihdi mwohn silangin Siohwa. 24 Sosua oh mehn Israel kan koaros eri ale Akan+ nein Sera, silper, likou kaselel, oh lepin kohl lep,+ iangahki nah pwutak kan, nah serepein kan, nah kouwol, nah dongki, nah sihpw, imwe impwal, oh mehkoaros me e ahneki, oh irail wairaillahng Wahun* Akor.+ 25 Sosua eri nda: “Dahme ke wadohngkitailki kahpwal?+ Siohwa pahn ketikidohng uhk kahpwal rahnwet.” Mehn Israel ko koaros ahpw katehki takai,+ mwuri re isikirailla.+ Eri, re kateiraildi koaros. 26 Oh re wiahda lapalahn koasoakoasoak en takai ehu powe me mihmihte leledo rahnwet. Sapwellimen Siohwa engieng ahpw meleileidi.+ Ihme kahrehda wasao adanekihla Wahun Akor* leledo rahnwet.

8 Siohwa ahpw ketin mahsanihong Sosua: “Ke dehr perki de masak mehkot.+ Ale sounpei kan koaros oh kohdahla Ai. Kilang, I kihonguhkehr nanmwarkien Ai, nah aramas akan, eh kahnimwo oh sapwe.+ 2 Ke pahn wiahiong Ai oh eh nanmwarki soahngohte me ke wiahiong Seriko oh eh nanmwarki,+ ahpw kumwail kak kihsang oh ahnekihla dipwisou lohdi kan oh pelinmen kan. Koasoanehdi sounpei kan en rukula mwurin kahnimwo.”

3 Sosua oh sounpei kan koaros eri kohdahla Ai. Sosua pilada sounpei 30,000 me kehlail oh kadarirailla nipwongo. 4 E ahpw kihong irail kehkehlik wet: “Kilang, kumwail rukula mwurin kahnimwo. Dehr kohwei dohlahsang kahnimwo, oh kumwail koaros onopada. 5 Ngehi oh aramas koaros me mi rehi pahn kohla ni kahnimwo, oh ni arail pahn kohieidohng peiong kiht duwehte me re wia nin tapio,+ se pahn pweieksang irail. 6 Ni arail pahn pwakihkitdo, se pahn kadohwanirailla sang kahnimwo, pwe re pahn nda, ‘Re tangatangasang kitail duwehte me re wia nin tapio.’+ Oh se pahn pweieksang irail. 7 Kumwail eri pahn pwarada sang wasahn ruko oh kalowehdi kahnimwo; Siohwa amwail Koht pahn ketikihong kumwail kahnimwo. 8 Mwurinte amwail pahn kalowehdi kahnimwo, kumwail pahn isikala.+ Kumwail pahn wiahda duwehte me Siohwa ketin mahsaniher. Kilang, I kihongkumwailehr koasoandi pwukat.”

9 Sosua eri kadarirailla, oh irail karis kohla wasahn rukulao; re rukula nanpwungen Pedel oh Ai, ni palikapi en Ai, a Sosua pweidi nipwongo rehn sounpei ko.

10 Mwurin Sosua eh sangkenei pirida oh kapokonepene pwihnen sounpei kan, ih oh ohl mah kan en Israel ahpw kahluwairaillahng Ai. 11 Sounpei kan koaros+ me mi reh karis kohdahla oh lella mwohn kahnimwo. Irail kauwada arail kahnimpwal paliepeng en Ai, a wahwo mi nanpwungen irail oh Ai. 12 Erein ahnsowo, e ale mpen ohl 5,000 oh karukihala ni palikapi en kahnimwo+ nanpwungen Pedel+ oh Ai. 13 Sounpei ko eri kauwada impwal ko ni paliepeng en kahnimwo,+ oh pwihn me rukulao mi ni palikapi en kahnimwo,+ oh nipwongo Sosua kohla nanwerengen wahwo.*

14 Oh ni ahnsowohte me nanmwarkien Ai kilangada duwen met, ih oh ohl akan en kahnimwo ahpw mwadangieila nimensengo pwe ren mahweniong mehn Israel ko nan wasa ehu me sallahng nan sapwtehno. Ahpw nanmwarkio sohte ese me mie pwihn ehu me rukula mwurin kahnimwo. 15 Ni ahnsou me ohlen Ai ko tepida pei, Sosua oh mehn Israel ko koaros tangala nan ahl me kolahng nan sapwtehno.+ 16 Ohl teikan koaros me mi nan kahnimwo ahpw likwerdo pwe ren pwakih irail; oh ni arail pwakih Sosua, irail ahpw dohdohlahsang kahnimwo. 17 Sohte ohl emen me luwehdi nan Ai oh Pedel me sohte iang pwakih mehn Israel ko. Kahnimwo wie langalang ni arail pwakihala mehn Israel ko.

18 Siohwa eri ketin mahsanihong Sosua: “Kauwalahng Ai ketieu me mi nan pehmwen,+ pwe I pahn kihong Ai nan pehmwen.”+ Sosua eri kauwalahng kahnimwo ketieu me mi nan peho. 19 Ni ahnsou me e kauwala peho, pwihn me rukuruko ahpw mwadangete pwaradahsang wasa me re rukuruk ieo oh tangolong nan kahnimwo oh kalowehdi. Re ahpw mwadangete isikada kahnimwo.+

20 Ni ohlen Ai kan ar sohpeila, re kilangada ediniei en kahnimwo eh kohkohdahla nanleng, oh sohla arail kehl en tangala ehu wasa tohrohr. Sounpei ko me tangatangalahng nan sapwtehno ahpw uhd sohpeiong me pwakih irail ko. 21 Ni Sosua oh mehn Israel ko koaros ar kilangada me pwihn me rukuruko kalowedier kahnimwo oh re pil kilangada ediniei en kahnimwo eh wie kohkohdahla, irail ahpw pirekekte peiong ohlen Ai ko. 22 Oh meteiko kohieisang nan kahnimwo pwe ren peiong irail oh ohlen Ai ko lohdi nanpwungarail, ekei mehn Israel ko mi paliet a ekei mi palio. Mehn Israel ko ahpw kemeirailla oh sohte emen me mourla de pitila.+ 23 Ahpw irail koledi nanmwarkien Ai+ oh walahng rehn Sosua.

24 Mwurin mehn Israel ko ar kemelahr tohn Ai koaros nan patapat en sapwtehno, wasa me re pwakihiraillahng ie, oh irail koaros mehkihla kedlahs, mehn Israel ko koaros ahpw pwurala Ai oh kemehkihla irail koaros me luwehdi nan kahnimwo kedlahs. 25 Irail koaros me mehla rahno, meh 12,000, ohl oh lih akan, aramas koaros nan Ai. 26 Sosua sohte kadaridi peh me kauwala ketieuwo+ lao tohn Ai koaros kamwomwmwomwla.+ 27 Ahpw mehn Israel ko kihsang pelinmen oh dipwisou lohdi ko nan kahnimwo oh ahnekihla, nin duwen me Siohwa ketin ruwesehki Sosua.+

28 Sosua eri isikala Ai oh kahrehiong eh wiahla mohn kahnimw ehu,+ me mihmihte leledo rahnwet. 29 E langahda nanmwarkien Ai nin tuhke pwoat lao lel nin soutik, oh ni ketipino eh pahn kihrlahr, Sosua ruwese irail en kihdihsang paliwar mehlao nin tuhkeo.+ Irail eri kesehdi paliwaro ni wasahn pedolong en ewen kelen kahnimwo oh koasoakehda lapalahn koasoakoasoak en takai powe, me mihmihte leledo rahnwet.

30 Ih ahnsowo me Sosua kauwada pei sarawi ehu ong Siohwa, Koht en Israel, pohn Nahna Epal,+ 31 duwehte me sapwellimen Siohwa ladu Moses kehkehlingkihong mehn Israel kan oh pil duwehte me ntingdi nan pwuhken Kosonned+ en Moses: “Pei sarawi ehu me wiawihdahsang takai me sohte dipwisoun doadoahk mete ehu parada.”+ Re kin wiahda powe meirong isihs kan ong Siohwa oh pil meirong en kaminimin kan.+

32 Sosua ahpw ntingihediong pohn takai ko wasao pelien Kosonnedohte+ me Moses ntingihedier mwohn mehn Israel kan.+ 33 Mehn Israel ko koaros, iangahki ohl mah kan, arail kaun akan, oh arail sounkopwung kan wie kesikesihnen pali koaros en Kohpwao mwohn samworoun Lipai kan me weuwa kohpwahn inou lap en Siohwa. Mehn liki kan oh pil pwilidak kan mi mwo.+ Elep en pokono kesikesihnen mwohn Nahna Kerisim, a elep mwohn Nahna Epal+ (duwehte me sapwellimen Siohwa ladu Moses kehkehlingkier mwowe),+ pwe en kapaia aramas en Israel kan. 34 Mwurin mwo, Sosua eri wadek ni ngihl laud lepin lokaia ko koaros nan Kosonnedo,+ kapai kan+ oh keria kan,+ nin duwen soahng koaros me ntingdier nan pwuhken Kosonnedo. 35 Sohte lepin lokaia ehu sang kehkehlik en Moses ko koaros me Sosua sohte wadekada ni ngihl laud mwohn mwomwohdisohn Israel pwon,+ iangahki lih akan, seri kan oh mehn liki kan+ me kin kousoan rehrail.+

9 Ni ahnsou me nanmwarki kan koaros en palikapi en Sordan+ rongada dahme wiawiher, irail kan me mi wasa nahnahn kan, oh nan Sepihla, ni oaroahr koaros en Sehd Laudo,*+ oh mwohn Lepanon—mehn Id, mehn Amor, mehn Kenan, mehn Peris, mehn Ip oh mehn Sepus+— 2 irail ahpw pokonpene pwe ren peiong Sosua oh mehn Israel kan.+

3 Tohn Kipeon kan+ pil rongada dahme Sosua wiahiong Seriko+ oh Ai.+ 4 Irail eri mwekid ni loalokong oh kihdiong kisin mwenge kan nan ehd mering kan pohn neirail dongki kan, iangahki edin kilin mahn mering kan me teipeseng oh deideipene; 5 re pil suhtihada suht mering deipin kei oh likawihada likou me ohla. Pilawa koaros me re wahda ngalangal oh mweremwer. 6 Re ahpw kohla rehn Sosua nan kahnimpwal en Kilkal+ oh ndaiong ih oh ohlen Israel kan: “Se kohsang sahpw ehu me doh. Eri menlau wiahiong kiht ehu inou lapen.” 7 Ahpw ohlen Israel ko ndaiong mehn Ip ko:+ “Mweinele kumwail kin mihmihte limwaht. Eri ia duwen at pahn kak wiahda inou lap ehu rehmwail?”+ 8 Irail ahpw sapengki Sosua: “Kiht noumw ladu kan.”

Sosua eri ndaiong irail: “Ihs kumwail, oh kumwail kohsang ia?” 9 Irail ahpw ndaiong ih: “Noumw ladu kat kohsang sahpw me inenen doh+ pwehki mwaren Siohwa omw Koht, pwe se rongadahr duwen sapwellime ndand oh duwen mehkoaros me e ketin wiadahr nan Isip+ 10 oh duwen mehkoaros me e ketin wiahiong nanmwarkien Amor riemen me kin mihmi palio* Sordan, me iei Sihon,+ Nanmwarkien Espon oh Ok,+ Nanmwarkien Pasan, me kin mihmi Astarod. 11 Eri nait ohl mah kan oh tohn sapwato koaros eri ndaiong kiht, ‘Wahda kisin mwenge ong amwail seiloak oh kohla tuhwong irail. Ndaiong irail: “Se pahn wiahla amwail ladu;+ eri menlau wiahiong kiht ehu inou lapen.”’+ 12 Kanat pilawa me se wahda wie karakarte ni rahn me se mweselsang ni imwat ako pwe sen kohdo rehmwail. Ahpw met kumwail kak kilang eh ngalangal oh mweremwer.+ 13 Oh ni at audehda edin kilin mahn pwukat, re kapwakapwete, ahpw met re teipeseng.+ Oh at likou oh suht kat ohlahr pwehki reirei en at seiloak.”

14 Ohlen Israel ko eri ale* ekei kanarail kisin tungoal ko, ahpw re sohte kalelapak rehn Siohwa.+ 15 Sosua eri wiahda inou en popohl ehu rehrail+ oh pil inou lap ehu me irail pahn momourte, oh ih met me kaun akan en mwomwohdiso kahukihong irail.+

16 Ni imwilahn kesiluhwen rahn, mwurin arail wiahda inou lapo rehrail, re ahpw rongada me re kin kousoan nan sahpw me karanih irail. 17 Mehn Israel kan eri mweselda oh kolahng ni arail kahnimw kan ni rahn kesiluhwo; arail kahnimw kan iei Kipeon,+ Kepihra, Peerod oh Kiriad-searim.+ 18 Ahpw mehn Israel ko sohte kemeirailla pwehki kaun akan en mwomwohdisou kahukihong irail inou ehu ni mwaren Siohwa,+ Koht en Israel. Tohn mwomwohdiso pwon eri tepida lipahnede kaun ako. 19 Kaun ako koaros ahpw ndaiong mwomwohdiso pwon: “E sohte mweimwei kitail en kemeirailla, pwehki inou me se kahukihong irail ni mwaren Siohwa, Koht en Israel. 20 Eri, iet me kitail pahn wiahn: Kitail pahn mweidohng irail en momour, pwe engieng en Koht de lelohng kitail, pwehki inou me se kahukihong irailo.”+ 21 Oh kaun ako pil koasoia: “Mweidohng irail en momour, ahpw re pahn wiahla sounweseituwi oh idipil ong mwomwohdiso wet pwon.” Ih met me kaun ako inoukihong irail.

22 Sosua eri ekeriraildo oh ndaiong irail: “Dahme kumwail pitihkinkit ni amwail nda, ‘Se kohsang wasa ehu me inenen dohsang kumwail,’ ni amwail kin koukousoante limwaht?+ 23 Sang met kohla kumwail rialahr+ oh kumwail pahn wiewiahte lidu nin duwen sounweseituwi oh sounidipil ong tehnpesen ei Koht kohkohlahte.” 24 Irail eri sapengki Sosua: “Se wia met, pwehki noumw ladu kat rongehr ni sansal me Siohwa amwail Koht ketin ruwesehki sapwellime ladu Moses en kihong kumwail sahpwet pwon oh kamwomwala towe kan koaros mwohn masamwail kan.+ Kiht eri perkihda at mour* pwehki kumwail,+ oh ih kahrepen at wia met.+ 25 Eri se milahr pahn omw kadek kalahngan.* Komw wiahiong kiht dahme komw medewe me mwahu oh pwung.” 26 Oh ih met me Sosua wiahiong irail; e doareirailla sang nan pehn mehn Israel kan, oh re sohte kemeirailla. 27 Ahpw ni rahnohte, Sosua wiahkinirailla sounweseituwi oh sounidipil ong mwomwohdiso+ oh ong sapwellimen Siohwa pei sarawi, wasa me E pahn ketin pilada ie,+ oh ih me re wiewia leledo rahnwet.+

10 Ni ahnsowohte me Adonisedek, nanmwarkien Serusalem rongada me Sosua kalowehdi oh kamwomwala Ai, oh wiahiong Ai oh eh nanmwarki+ duwehte me e wiahiong Seriko oh eh nanmwarki,+ oh duwen tohn Kipeon kan ar wiahda inou en popohl rehn Israel+ oh mihla rehrail, 2 e uhdahn masepwehkada,+ pwehki Kipeon iei kahnimw kalaimwun ehu me duwehte kahnimw kan me mie arail nanmwarki. E laudsang Ai+ oh nah ohl akan koaros sounpei kei. 3 Adonisedek nanmwarkien Serusalem ahpw kadarala rohng pwoatet rehn Oham nanmwarkien Ipron,+ Piram nanmwarkien Sarmud, Sapia nanmwarkien Lakis oh Depir nanmwarkien Eklon:+ 4 “Kumwail kohdo oh sewese ie oh kitail peiong Kipeon, pwe e wiahda inou en popohl rehn Sosua oh mehn Israel kan.”+ 5 Eri, nanmwarki limmen en mehn Amor ko+—nanmwarkien Serusalem, nanmwarkien Ipron, nanmwarkien Sarmud, nanmwarkien Lakis oh nanmwarkien Eklon—pokonpene iangahki neirail karis en sounpei kan, oh re karis kohla oh kauwada imwarail impwal kan limwahn Kipeon pwe ren mahweniong.

6 Mehn Kipeon ko eri ileklahng Sosua ni kahnimpwal en Kilkal+ oh nda: “Komw dehr kesehla noumwi lidu kat.+ Komw mwadangodo! Menlau doareikitala oh sewesei kiht! Nanmwarkien Amor koaros me kohsang wasa nahnahn kan pokonpenehr pwe ren peiong kiht.” 7 Sosua eri kohdahla sang Kilkal oh kahre sounpei koaros iangahki sounpei kan me samanohng mahwen.+

8 Siohwa ahpw ketin mahsanihong Sosua: “Ke dehr masak irail,+ pwe I kihonguhkehr irail.+ Sohte emen rehrail pahn kak pelian uhk.”+ 9 Eri, pwohngo pwon Sosua oh nah sounpei ko karis kohsang Kilkal, re ahpw mahweniong arail imwintihti kan ni ar sasairki. 10 Siohwa ketin kapingirailda mwohn mehn Israel ko,+ re ahpw kemeirailla nan Kipeon, oh pwakih irail nan ahl me kohdalahng Ped-oron oh kemekemeirailla lao lel Aseka oh Makeda. 11 Ni ar tangatangasang mehn Israel ko oh kohkohdilahng Ped-oron, Siohwa ahpw ketin kamwerehdiong pohrail lapalahn keteu aihs takai sang nanleng lella Aseka, oh irail mehla. Ni mehlel, me mehkihla aihs takai ko tohto sang me mehkihla nein mehn Israel kan kedlahs.

12 Ih rahn me Siohwa ketin kalowehdi mehn Amor ko mwohn mesen mehn Israel ko, Sosua eri patohwanohng Siohwa mwohn mehn Israel ko:

13 Ketipino eri uhdi oh maramo sohte mwekid lao wehin Israel kalowehdi eh imwintihti ko. E sou ntinting nan pwuhken Sasar?+ Ketipino uhdi nanwerengen lahng oh sohte mwadang kihrla erein rahn ehu pwon. 14 Sohte rahn ehu me duwehte rahno mwowehsang de pil mwurihsang, me Siohwa ketin karonge ngilen aramas,+ pwehki Siohwa ketin pepeiki Israel.+

15 Mwurin mwo, Sosua oh mehn Israel ko koaros ahpw pwuralahng nan kahnimpwalo nan Kilkal.+

16 Erein ahnsowo, nanmwarki limmeno ahpw tangala oh rukula nan pwoaren paip me mi Makeda.+ 17 Rohng wet ahpw leledo rehn Sosua: “Nanmwarki limmeno dierekda rukuruk nan pwoaren paip me mi Makeda.”+ 18 Sosua eri nda: “Kumwail katapwurehiong takai laud kan ni ewen pwoaren paipo oh kihdi ekei ohl en sinsile irail. 19 Ahpw kumwail me luwehdi kan, kumwail dehr uhdi. Kumwail pwakih amwail imwintihti kan oh kemeirailla.+ Kumwail dehr mweidohng ren pedolong nan arail kahnimw kan, pwe Siohwa amwail Koht ketikihongehr irail nan pehmwail.”

20 Sosua oh mehn Israel ko kemelahr aramas tohtohie lao kereniong irail koaros mehla, ekeite me pitila oh pedolong nan kahnimw kehl kehlail kan. 21 Mwurin mwo, aramas ako koaros ahpw pwurala rehn Sosua ni kahnimpwal me mi Makeda, oh sohte emen me ohla. Sohte emen kak nda mehkot pwe en kauwehki mehn Israel ko. 22 Sosua eri nda: “Kumwail ritingada ewen pwoaren paipo oh wadohng ie nanmwarki limmeno sang nan pwoahro.” 23 Irail eri wadohng reh nanmwarki limmeno sang nan pwoahro: nanmwarkien Serusalem, nanmwarkien Ipron, nanmwarkien Sarmud, nanmwarkien Lakis, oh nanmwarkien Eklon.+ 24 Ni arail wadohng Sosua nanmwarki pwukat, e ahpw ekerpene ohlen Israel koaros oh ndaiong kaunen sounpei ko me iangih: “Kumwail keidahdo. Kumwail sokediong pohn tepinweren* nanmwarki pwukat.” Irail eri keidahla oh sokekidiong nehrail ko pohn tepinwararail ko.+ 25 Sosua ahpw ndaiong irail: “Kumwail dehr perki de masak mehkot.+ Kumwail kommwad oh kehlail, pwe ih met me Siohwa pahn ketin wiahiong amwail imwintihti kan koaros me kumwail kin pepeiong.”+

26 Sosua eri kemeirailla oh langairailda pohn tuhke limpwoat, oh irail wie langalang nin tuhke ko lao lel nin soutik. 27 Ni kihrlahn ketipin, Sosua ruwese me irail en kohdi sang nin tuhke ko+ oh lekdekiong nan pwoaren paip me re rukula ieo. Takai laud kei ahpw kohieng ni ewen pwoahro, oh mepwukat mihmi leledo rahnwet.

28 Sosua kalowehdi Makeda+ rahno oh kemehkihla aramas en kahnimwo kedlahs. E kamwomwala nanmwarkio oh aramas* koaros wasao, e sohte mweidohng emen en mourla.+ E wiahiong nanmwarkien Makeda+ soahngohte me e wiahiong nanmwarkien Seriko.

29 Eri Sosua oh mehn Israel ko koaros ahpw kohkohsang Makeda oh kohla peiong Lipna.+ 30 Siohwa pil ketikihong Lipna oh eh nanmwarki+ nan pehn mehn Israel kan, oh re kauwehla Lipna oh kemehkihla aramas* koaros wasao kedlahs, re sohte mweidohng emen en mourla. Re wiahiong eh nanmwarki soahngohte me re wiahiong nanmwarkien Seriko.+

31 Mwuri Sosua oh mehn Israel ko koaros kohkohsang Lipna oh kohla Lakis+ oh kauwada imwarail impwal wasao oh mahweniong Lakis. 32 Siohwa ketikihong Lakis nan pehn mehn Israel kan, oh re kalowehdi ni keriaun rahn. Re kemehkihla aramas* koaros wasao kedlahs,+ duwehte me re wiahiong Lipna.

33 Oram nanmwarkien Keser+ eri kohdahla pwe en sewese Lakis, ahpw Sosua kemehla ih oh nah aramas akan lao sohte emen me luwehdi me mourla.

34 Sosua oh mehn Israel ko koaros eri kohkohsang Lakis oh kohla Eklon+ oh kauwada imwarail impwal wasao oh mahweniong Eklon. 35 Re kalowehdi kahnimwo rahno oh kemehkihla towe kan kedlahs. Rahnohte re kamwomwala aramas* koaros wasao, duwehte me re wiahiong Lakis.+

36 Sosua oh mehn Israel ko koaros eri kohkohsang Eklon kohdahla Ipron+ oh mahweniong. 37 Re kalowehdi oh kemehkihla kedlahs towe kan koaros, eh nanmwarki, oh aramas* koaros nan eh kisin kahnimw kan, oh sohte mweidohng emen en mourla. E kamwomwala kahnimwo oh aramas* koaros wasao, duwehte me e wiahiong Eklon.

38 Sosua oh mehn Israel ko koaros ahpw wetlahng Depir+ oh mahweniong. 39 E kalowehdi Depir, eh nanmwarki, oh eh kisin kahnimw kan koaros, oh re kemehkinirailla kedlahs oh kamwomwala aramas* koaros wasao+ oh sohte mweidohng emen en mourla.+ E wiahiong Depir oh eh nanmwarki duwehte me e wiahiong Ipron oh Lipna oh ara nanmwarki ko.

40 Sosua kalowehdi sahpw koaros nan wasa nahnahn kan, Nekep, Sepihla,+ oh wasa ukedi kan, oh arail nanmwarki kan koaros, oh sohte mweidohng emen en mourla; e kamwomwala aramas koaros,*+ duwehte me Siohwa, Koht en Israel ketin kehkehlingki.+ 41 Sosua kalowehdi wasa pwukat sang Kades-parnea+ lella Kasa+ oh sapwen Kosen+ koaros leldahla Kipeon.+ 42 Sosua kalowehdi nanmwarki pwukat koaros oh sapwarail kan ni mwekid en mahwenteieu, pwehki Siohwa, Koht en Israel, me ketin mahmahwenki Israel.+ 43 Mwurin mwo, Sosua oh mehn Israel ko koaros ahpw pwurala nan kahnimpwalo nan Kilkal.+

11 Ni ahnsowohte me Sapin nanmwarkien Eisor rongada met, e ileklahng Sopap nanmwarkien Madon,+ oh nanmwarkien Simron, nanmwarkien Aksap,+ 2 nanmwarki kan me mi wasa nahnahn paliepeng, irail kan me mi wasa patapat* ni palieir en Kinnered, irail kan me mi Sepihla oh wasa ukedi kan en Dor+ ni palikapi, 3 mehn Kenan kan+ ni palimese oh palikapi, mehn Amor kan,+ mehn Id kan, mehn Peris kan, mehn Sepus kan ni wasa nahnahn kan, oh mehn Ip kan+ me mi nin tepin Nahna Ermon+ nan sapwen Mispa. 4 Irail oh neirail karis en sounpei kan eri kohieila. Re tohto rasehng pihken oaroahr kan, iangahki kiden oahs oh kurumahn mahwen kan. 5 Nanmwarki pwukat koaros eri pwungkipene ren tuhpene, re ahpw kohla oh kauwada imwarail impwal ni piletik en Merom pwe ren mahweniong Israel.

6 Siohwa eri ketin mahsanihong Sosua: “Ke dehr masak pwehki irail,+ pwe ni soangen ahnsou wet lakapw, I pahn mweidohng mehn Israel kan en kemeirailla koaros. Ke anahne kauwehla nehn neirail oahs akan+ oh isikala wararail kuruma kan.” 7 Sosua iangahki sounpei kan koaros ahpw peiong irail ni piletik en Merom ni arail sasairki. 8 Siohwa ketikihong irail nan pehn mehn Israel kan,+ oh irail kaloweiraildi oh pwakih irail lellahng kahnimw laud en Saidon+ oh Misrepod-maim+ oh palimese lao lel Wahun Mispe, oh re kemekemeirailla lao sohte emen luwehdi me mourla.+ 9 Sosua ahpw wiahiong irail duwehte me Siohwa ketin mahsanihong ih; e kauwehla nehn neirail oahs akan oh isikala wararail kuruma kan.+

10 Laudsang met, Sosua eri pwurala oh kalowehdi Eisor oh kemehkihla eh nanmwarkio kedlahs,+ pwehki Eisor iei me kin moange wehi pwukat koaros mahso. 11 Re kemehkihla aramas* koaros wasao kedlahs, oh kamwomwirailla.+ Sohte emen me luwehdi me momour.+ E ahpw isikala Eisor. 12 Sosua kalowehdi kahnimw koaros en nanmwarki pwukat oh kemehkihla arail nanmwarki kan koaros kedlahs.+ E kamwomwirailla,+ duwehte me sapwellimen Siohwa ladu Moses kehkehlingkier. 13 Ahpw mehn Israel kan sohte isikala kahnimw ko me mi pohn arail wasa ile kan ahpw ihte Eisor; ihte me Sosua isikala. 14 Mehn Israel kan kulihasang oh ahnekihla dipwisou lohdi kan koaros oh pelinmen kan koaros en kahnimw pwukat.+ Ahpw re kemehkihla aramas ako koaros kedlahs lao re kamwomwirailla koaros.+ Re sohte mweidohng emen me luwehdi en momour.+ 15 Duwehte me Siohwa ketin kehkehlingkihong Moses, sapwellime ladu, ihme Moses pil ruwesehki Sosua,+ oh Sosua kapwaiada. Sohte mehkot me e sohte kapwaiada nan mehkoaros me Siohwa ketin kehkehlingkihong Moses.+

16 Sosua kalowehdi sahpwet pwon, wasa nahnahn kan, wasa koaros nan Nekep,+ sapwen Kosen pwon, Sepihla,+ Arapa+ oh wasa nahnahn kan en Israel oh eh Sepihla,* 17 sang Nahna Alak, me kohdahla lel Seir, oh lellahng Paalkad+ nan Wahun Lepanon ni tepin Nahna Ermon,+ oh e kalowehdi arail nanmwarki kan koaros oh kemeirailla. 18 Sosua mahweniong nanmwarki pwukat koaros ahnsou reirei. 19 Sohte kahnimw ehu me wiahda popohl rehn mehn Israel kan, ihte mehn Ip kan me kin kousoan nan Kipeon.+ Re kalowehdi kahnimw teikan koaros nan mahwen.+ 20 Siohwa me ketin mweidohng mohngiongirail en keptakaila+ pwe ren mahweniong mehn Israel kan, pwe en ketin kamwomwirailla ni soh mahk.+ Irail pahn kamwomwmwomwla duwehte me Siohwa ketin kehkehlingkihong Moses.+

21 Ni ahnsowo, Sosua kasohrehla mehn Anak kan+ sang wasa nahnahn kan, sang Epron, Depir, Anap, oh sang wasa nahnahn Suda koaros oh wasa nahnahn Israel koaros. Sosua kamwomwala irail oh arail kahnimw kan.+ 22 Sohte emen mehn Anak me luhwehdi nan sapwen mehn Israel kan; ihte nan Kasa,+ nan Kahd+ oh nan Asdod+ me re mihmi ie.+ 23 Sosua eri kaunda sahpwo pwon, duwehte me Siohwa ketin inoukihong Moses,+ oh Sosua eri kihong mehn Israel kan sahpwo nin duwen sohso ehu sang ni eh nehkpeseng nanpwungen arail keinek kan.+ Sahpwo ahpw kommoaldihsang mahwen.+

12 Eri iet nanmwarki kan en sahpw me mehn Israel kan kalowehdi, me sapwarail re sapwenikihla ni palimesehn Sordan, sang Wahun Arnon+ leldahla Nahna Ermon+ oh wasa koaros ni palimesehn Arapa:+ 2 Nanmwarki Sihon+ en mehn Amor kan, me kin kousoan nan Espon oh kakaun sang Aroer,+ me mi ni keilen Wahun Arnon,+ oh sang nanwerengen wahwo, oh elep Kilead lella Wahun Sappok, irepen mehn Ammon kan. 3 E pil kin kaunda palimesehn Arapa lellahng Sehden Kinnered*+ oh lellahng Sehden Arapa, Sehd Soahl,* kolahng Ped-sesimod ni palimese, oh pahn wasa ukedi kan en Piska ni palieir.+

4 Oh pil sapwen Ok+ nanmwarkien Pasan, ih emen rehn irail me kaimwisekala mehn Repa ko+ oh kin kousoan nan Astarod oh Edrei 5 oh kin kaunda Nahna Ermon, Saleka, oh Pasan pwon,+ lellahng irepen sapwen mehn Kesur oh mehn Maakad,+ oh elep en Kilead, lella sapwen Sihon nanmwarkien Espon.+

6 Sapwellimen Siohwa ladu Moses oh mehn Israel kan kaloweirahdi,+ oh mwurin mwo sapwellimen Siohwa ladu Moses kihong mehn Reupen kan, mehn Kad kan oh elep keinek en Manase sapwara ko nin duwen sohso ehu.+

7 Iet nanmwarki kan en sahpw me Sosua oh mehn Israel kan kalowehdi ni palikapi en Sordan, sang Paalkad+ nan Wahun Lepanon+ kolahng Nahna Alak,+ me kohdahla Seir.+ Mwurin mwo, Sosua eri kihong keinek en Israel kan sapwarail ko nin duwen sohso ehu oh pwaisarail.+ 8 Sahpw pwukat pil iangahki wasa nahnahn kan, Sepihla, Arapa, wasa ukedi kan, nan sapwtehno, oh Nekep+—sapwen mehn Id, mehn Amor,+ mehn Kenan, mehn Peris, mehn Ip oh mehn Sepus:+

13 Eri Sosua inenen likeilapalahr.+ Siohwa eri ketin mahsanihong ih: “Ke inenen likeilapalahr; ahpw miehte sahpw tohto me pahn lohdi. 2 Iet sahpw akan me luhluhwe:+ sapwen mehn Pilisdia kan koaros oh sapwen mehn Kesur kan koaros+ 3 (sang piletik en Pillap Nail* me mi palimesehn* Isip kohla lel irepen Ekron ni paliepeng, wasa me kin wia sapwen mehn Kenan kan mahso)+ iangahki sapwen kaun limmen en Pilisdia ko+—mehn Kasa, mehn Asdod,+ mehn Askelon,+ mehn Kahd+ oh mehn Ekron;+ oh sapwen mehn Ap+ 4 ni palieir; sapwen mehn Kenan kan koaros; Meara me mehn Saidon kan+ sapweniki, lellahng Apek, ni irepen sapwen mehn Amor kan; 5 sapwen mehn Kepal kan+ oh sahpw koaros ni palimesehn Lepanon, sang Paalkad ni tepin Nahna Ermon lel Lepo-amad;*+ 6 koaros tohn wasa nahnahn kan sang Lepanon+ lel Misrepod-maim;+ oh mehn Saidon kan koaros.+ I pahn kasareirailla* mwohn mehn Israel kan.+ Ihte me ke pahn wia iei nehkohng mehn Israel kan sahpwo nin duwen sohso ehu, duwehte me I kehkehlingkihong uhk.+ 7 Eri met, ke pahn nehkpeseng sahpwet nin duwen sohso ehu ong keinek duwauo oh elep keinek en Manase.”+

8 Keinek en Reupen oh keinek en Kad iangahki elep keinek en Manase alehdier arail sohso me Moses kihong irail ni palimesehn Sordan, duwehte me sapwellimen Siohwa ladu Moses kihongirailehr:+ 9 sang Aroer+ me mi ni keilen Wahun Arnon,+ oh kahnimw me mi nanwerengen wahwo, oh patapat koaros en wasa ilehn Medepa lellahng Dipon; 10 oh kahnimw koaros me ahn Sihon, nanmwarkien Amor, me kin kaunda sang Espon, leldahla irepen sapwen mehn Ammon kan;+ 11 oh pil Kilead oh sapwen mehn Kesur kan oh mehn Maakad kan+ oh Nahna Ermon pwon oh Pasan pwon+ lellahng Saleka;+ 12 wasa koaros nan Pasan me ahn nanmwarki Ok, me kin kaunda sang Astarod oh Edrei. (Ih emen rehn irail me kaimwisekala mehn Repa kan.)+ Moses kaloweiraildi oh kasareirailla.*+ 13 Ahpw mehn Israel ko sohte kasarehla*+ mehn Kesur oh Maakad kan, eri mehn Kesur oh Maakad kan kin mihmihte nan Israel leledo rahnwet.

14 Ihte keinek en Lipai me e sohte kihong arail sohso.+ Meirong kan me pahn isihsla ong Siohwa, Koht en Israel iei me re pahn sohsohki,+ duwehte me e ketin inoukihong irail.+

15 Moses eri kihong ehuehu peneinei en keinek en Reupen sohso ehu, 16 oh sapwarail kohsang Aroer, me mi ni keilen Wahun Arnon, oh kahnimw me mi nanwerengen wahwo, oh patapat koaros en wasa ilehn Medepa; 17 Espon oh eh kisin kahnimw koaros+ pohn wasa patapat en wasa ileo, Dipon, Pamod-paal, Ped-paal-meon,+ 18 Sahas,+ Kedemod,+ Mepaad,+ 19 Kiriadaim, Sipma,+ oh Sered-sahar me mi pohn nahna en wahwo,* 20 Pedpeor, wasa ukedi kan en Piska,+ Ped-sesimod,+ 21 kahnimw koaros nan wasa patapat en wasa ileo, oh wasa koaros me ahn Sihon nanmwarkien Amor, me kin kaunda sang Espon.+ Moses kalowehdi ih+ oh kaun akan en Midian, me iei Epi, Rekem, Ser, Urr oh Repa,+ iei nanmwarki kan me kin uhpah Sihon oh kin koukousoan nan sahpwo. 22 Sounkosetipw+ Palaam+ nein Peor iang irail kan me mehn Israel kan kemehkihla kedlahs. 23 Irepen sapwen keinek en Reupen iei Sordan; oh sahpw wet iei sohsohn ehuehu peneinei en keinek en Reupen, iangahki kahnimw kan oh wasahn kousoan kan me mi limwahrail.

24 Moses pil kihong ehuehu peneinei en keinek en Kad sohso ehu, 25 oh sapwarailo iangahki Saser+ oh kahnimw koaros nan Kilead oh elep sapwen mehn Ammon kan+ lellahng Aroer me sallahng Rappa;+ 26 oh sang Espon+ lel Ramad-mispe oh Petonim, oh sang Mahanaim+ lel ni irepen Depir; 27 oh nan wahwo,* Ped-aram, Ped-nimra,+ Sukot,+ oh Sapon, wasa teikan me ahn Nanmwarki Sihon en Espon,+ iangahki Sordan me wia irepen sahpwo, me kohsang palikapi ni Sehden Kinnered*+ ni palimesehn Sordan. 28 Iei met sohsohn ehuehu peneinei en keinek en Kad, iangahki kahnimw kan oh wasahn kousoan kan me mi limwahrail.

29 Moses pil kihong ehuehu peneinei en elep keinek en Manase sohso ehu.+ 30 Oh sapwarail lellahng Mahanaim+ oh wasa koaros nan Pasan, wasa koaros me ahn Ok, Nanmwarkien Pasan, oh kahnimpwal koaros en Sair+ me mi nan Pasan, kisin kahnimw 60. 31 Oh apali Kilead, oh Astarod oh Edrei,+ kahnimw kan me ahn Ok, nanmwarkien Pasan, kohieng nein Makir,+ nein Manase, me iei elep en peneinei en kadaudok en Makir kan.

32 Ih sohso pwukat me Moses kihong irail nan sapwtehn en Mohap, palio Sordan, ni palimesehn Seriko.+

33 Ahpw Moses sohte kihong keinek en Lipai sohso.+ Siohwa, Koht en Israel iei arail sohso, duwehte me e ketin inoukihong irail.+

14 Eri iet me mehn Israel kan ale nin duwen sohso ehu nan sapwen Kenan, me samworo Eliesar oh Sosua nein Nun oh kaunen peneinei en keinek en Israel kan kihong irail en sohsohki.+ 2 Arail sohso nehnepeseng ni usuhs,+ duwehte me Siohwa ketin kehkehlingkihong Moses ong keinek duwauo oh elep en keinek ehu.+ 3 Moses kihongehr sohso ong keinek riauo oh elep en keinek ehu palio* Sordan,+ ahpw sohte sohso me e kihong keinek en Lipai.+ 4 Kadaudok en Sosep me wia keinek riau,+ Manase oh Epraim;+ oh sohte sahpw kohieng keinek en Lipai, ihte kahnimw kan+ me ren kousoan loale oh mohs kan ong neirail pelinmen kan oh soahng kan me irail naineki.+ 5 Mehn Israel kan eri nehkpeseng sahpwo duwehte me Siohwa ketin kehkehlingkihong Moses.

6 Ohlen Suda kan ahpw kohla rehn Sosua nan Kilkal,+ oh Kalep+ nein Sepune mehn Kenis eri ndaiong ih: “Ke uhdahn ese dahme Siohwa ketin mahsanihong+ Moses, ohlen Koht mehlelo,+ nan Kades-parnea duwen kowe oh ngehi.+ 7 I sounpar 40 ni ahnsou me sapwellimen Siohwa ladu Moses kadariehla sang Kades-parnea pwe I en lipoahroke sahpwet,+ oh I pwurekihdo rohng mehlel.+ 8 Mendahki riei ko me iang ie kohdahla kahrehiong aramas ako en nan kapehd tikitikla,* I kin idawehn Siohwa ei Koht ni mohngiong unsek.+ 9 Moses kahula ni rahno, nda: ‘Sahpw me nehmw kan aluher powe pahn wiahla sohso poatopoat ehu ong kowe oh kadaudokomw kan, pwehki omw kin idawehn Siohwa ei Koht ni mohngiong unsek.’+ 10 Duwehte me e ketin inoukihda,+ Siohwa ketin mweidohng ie I en momour+ erein sounpar 45 pwukat sang ni ahnsou me Siohwa ketin wiahiong Moses inou wet ni mehn Israel kan ar alialu nan sapwtehno;+ I mihmihte leledo rahnwet, sounparehr 85. 11 Oh rahnwet I wie kehkehlailte duwehte rahn me Moses kadariehlao. Ei kehl ahnsou wet duwehte ahnsowo, ong mahwen oh wiewia teikan. 12 Eri, kihong ie wasa nahnahn wet me Siohwa ketin inoukihda rahno. Mendahki omw rong rahno me mie mehn Anak+ oh lapalahn kahnimw kehl kehlail kan+ wasao, Siohwa uhdahn pahn ketin ieiang ie,+ oh I pahn kasareirailla,* duwehte me Siohwa ketin inoukihda.”+

13 Sosua eri kapaiahda ih oh kihong Kalep nein Sepune Ipron nin duwen sohso ehu.+ 14 Ihme kahrehda Kalep nein Sepune mehn Kenis sapwenikihla Ipron nin duwen sohso ehu leledo rahnwet, pwehki eh kin idawehn Siohwa, Koht en Israel ni mohngiong unsek.+ 15 Mahso Ipron adaneki Kiriad-arpa+ (Arpa iei ohl lapalap men rehn mehn Anak kan). Sahpwo ahpw kommoaldihsang mahwen.+

15 Sahpw me kohieng*+ peneinei en keinek en Suda leldihla ni irepen Edom,+ sapwtehn en Sinn lel imwin palieir en Nekep. 2 Irepen palieir en sapwarailo tangasang ni imwin Sehd Soahlo,*+ ni palieir en oaroahro. 3 Oh e lellahng palieir ni ukada en Akrappim,+ lella Sinn, oh kohdahla sang ni palieir en Kades-parnea,+ lella Esron, kolahng Addar oh pidek kohla Karka. 4 E ahpw inenlahng Asmon+ lellahng ni Wahun Isip,+ oh irepen sahpwo ididi ni Sehdo.* Ih met irepen palieir en sapwarailo.

5 Irepen palimesehn sahpwo iei Sehd Soahl* leldahla ni imwin Sordan, oh paliepeng en irepen sahpwo tepisang ni sehdo wasa me pillapo kin kusla ie, ni imwin Sordan.+ 6 Irepen sahpwo kohdahla lel Ped-okla+ lella paliepeng en Ped-arapa,+ oh irepen sahpwo kohdahla lel takain Pohan,+ nein Reupen. 7 Irepen sahpwo leldahla Depir ni Wahun* Akor+ oh wetla paliepeng lel Kilkal,+ me mi mwohn ukada en Adummim me mi palieir en wahwo, oh irepen sahpwo lel ni utuhnpihl en Ensemes+ oh ididi Enrokel.+ 8 Irepen sahpwo leldalahng ni Wahun Innom*+ lel ni ukada en kahnimw en mehn Sepus kan+ ni palieir, me iei Serusalem,+ oh irepen sahpwo kohdahla lel ni kadoken nahna me sallahng Wahun Innom ni palikapi, me mi ni imwin Wahun* Repaim ni paliepeng. 9 Oh irepen sahpwo tangasang ni kadoken nahnao lel ni utuhnpihl en Neptoa+ oh lella ni kahnimw kan en Nahna Epron; oh irepen sahpwo tang kohla lel Paala, me iei, Kiriad-searim.+ 10 Irepen sahpwo pidek ni palikapi sang Paala lella Nahna Seir oh douluhllahng ni ukada en Nahna Searim ni paliepeng, me iei Kesalon, oh kohdi lel Ped-semes+ oh douluhllahng Timnah.+ 11 Oh irepen sahpwo lella ni ukada en Ekron+ ni paliepeng, oh irepen sahpwo tang kohla lel Sikkeron oh kohla Nahna Paala oh lel Sapniel, oh irepen sahpwo ididi ni sehdo.

12 Irepen palikapi en sahpwo mi ni Sehd Laudo*+ iangahki oaroahro. Ih met irepen sahpwo ni pali koaros me kohieng ehuehu peneinei en kadaudok en Suda.

13 Sang ni kehkehlik en Siohwa ong Sosua, e kihong sapwen Kalep+ nein Sepune sang nanpwungen sapwen kadaudok en Suda kan, iei, Kiriad-arpa (Arpa iei semen Anak), me iei, Ipron.+ 14 Kalep eri kausasang wasao nein Anak pwutak silimeno:+ Sihsai, Aiman, oh Talmai,+ kadaudok en Anak ko. 15 E ahpw kohdahla sang wasao oh mahweniong tohn Depir.+ (Mahso eden Depir iei Kiriad-seper.) 16 Kalep eri nda: “Ohl emen me pahn mahweniong Kiriad-seper oh kalowehdi, I pahn kihong nei serepein Aksa en wia eh pwoud.” 17 Oh Odniel,+ nein rien Kalep ohl Kenas,+ me kalowehdi. Kalep eri kihong ih nah serepein Aksa+ en wia eh pwoud. 18 Ni Aksa eh kohkolahng ni imwen eh pwoudo, e kin kangoangehki eh pwoudo en pekihda rehn eh pahpao ehu mwaht. Aksa eri doudihsang pohn were dongkio.* Kalep ahpw idek reh: “Dahme ke mwahuki?”+ 19 Aksa ahpw nda: “Menlau kihong ie ehu kapaien, pwe ke kihongieier pelien sahpw ehu me mi palieir;* pil kihong ie Kulod-maim.”* Kalep eri kihong ih Kulod Pali Powe oh Kulod Pali Pah.

20 Iet sohso ong ehuehu peneinei en keinek en Suda.

21 Kahnimw kan me mi keieun palieir en sapwen keinek en Suda, lellahng irepen Edom+ iei: Kapseel, Eder, Seikur, 22 Kina, Dimona, Adada, 23 Kedes, Eisor, Idnan, 24 Sip, Telem, Pealod, 25 Eisor-adatta, oh Keriod-esron, me iei, Eisor, 26 Amam, Sema, Molada,+ 27 Asar-kadda, Esmon, Pedpelet,+ 28 Asar-sual, Peersipa,+ Pisiodia, 29 Paala, Aiem, Esem, 30 Eltolad, Kehsil, Orma,+ 31 Siklak,+ Madmanna, Sansanna, 32 Lapaod, Silim, Ain, oh Rimmon+—koaros patpene kahnimw 29 iangahki arail wasahn kousoan kan.

33 Kahnimw kan me mi nan Sepihla+ iei: Estaol, Sorah,+ Asina, 34 Sanoah, Engannim, Tappua, Enam, 35 Sarmud, Adullam,+ Sokoh, Aseka,+ 36 Saaraim,+ Adidaim, oh Kedera, oh Kederodaim*—kahnimw 14 oh wasahn kousoan kan me mi limwahrail.

37 Senan, Adasa, Mikdalkad, 38 Dilean, Mispe, Sokdeel, 39 Lakis,+ Poskad, Eklon, 40 Kappon, Lahmam, Kitlis, 41 Kederod, Peddakon, Naama, oh Makeda+—kahnimw 16 oh wasahn kousoan kan me mi limwahrail.

42 Lipna,+ Ihder, Asan,+ 43 Ipta, Asina, Nesip, 44 Keila, Aksip, oh Maresah—kahnimw duwau oh wasahn kousoan kan me mi limwahrail.

45 Ekron oh kisin kahnimw kan me kapilpene oh wasahn kousoan kan me mi limwah; 46 sang Ekron ni palikapi, wasa koaros me mi limwahn Asdod oh wasahn kousoan kan me mi limwahrail.

47 Asdod,+ kisin kahnimw kan me kapilpene oh wasahn kousoan kan me mi limwah; Kasa,+ kisin kahnimw kan me kapilpene oh wasahn kousoan kan me mi limwah, leldihla Wahun Isip, Sehd Laudo,* oh sahpw kan me mi limwah.+

48 Oh kahnimw kan me mi nan wasa nahnahn kan iei: Samir, Sattir,+ Sokoh, 49 Danna, Kiriad-sanna, me iei Depir, 50 Anap, Estemo,+ Anim, 51 Kosen,+ Olon, oh Kailo+—kahnimw 11 oh wasahn kousoan kan me mi limwahrail.

52 Arepia, Duma, Esan, 53 Sanim, Ped-tappua, Apeka, 54 Umta, Kiriad-arpa, me iei, Ipron,+ oh Sior—kahnimw duwau oh wasahn kousoan kan me mi limwahrail.

55 Maon,+ Karmel, Sip,+ Sutta, 56 Sesreel, Sokdeam, Sanoah, 57 Keien, Kipea, oh Timnah+—kahnimw eisek oh wasahn kousoan kan me mi limwahrail.

58 Alul, Pedsur, Kedor, 59 Maarad, Pedanod, oh Eltekon—kahnimw weneu oh wasahn kousoan kan me mi limwahrail.

60 Kiriad-paal, me iei, Kiriad-searim,+ oh Rappa—kahnimw riau oh wasahn kousoan kan me mi limwahra.

61 Kahnimw kan me mi nan sapwtehno iei: Ped-arapa,+ Middin, Sekaka, 62 Nipsan, Kahnimw en Soahl, oh Engkedi+—kahnimw weneu oh wasahn kousoan kan me mi limwahrail.

63 Ahpw mehn Sepus kan+ me kin koukousoan nan Serusalem,+ ohlen Suda kan sohte kak kasareirailla,+ kahrehda mehn Sepus ko kin mihmihte rehn mehn Suda ko nan Serusalem leledo rahnwet.

16 Oh sahpw me kohieng kadaudok en Sosep+ sang ni usuhs,+ tepisang Sordan limwahn Seriko kohla lel ni utuhnpihl oh piletik en Seriko ni palimese, kohdahla nan sapwtehno sang Seriko lellahng wasa nahnahn Pedel.+ 2 Irepen sahpwo kohsang Pedel me mi limwahn Lus oh douluhllahng Atarod me iei irepen sapwen mehn Ark kan, 3 e ahpw kohdihla ni palikapi lel ni irepen sapwen mehn Saplet kan lellahng ni irepen Ped-oron Pali Pah+ oh Keser,+ oh ididi ni sehdo.

4 Kadaudok en Sosep kan,+ Manase oh Epraim eri alehdi sapwara.+ 5 Iet duwen irepen sapwen ehuehu peneinei en kadaudok en Epraim: Irepen arail sohso ni palimese iei Atarod-addar+ lellahng Ped-oron Pali Powe,+ 6 oh irepen sahpwo kohla lel ni sehdo. Mikmedad+ mi paliepeng, a irepen sahpwo pidek palimese kohla Taanad-sailo, oh kohla lel Sanoa ni palimese. 7 E ahpw kohdihla sang Sanoa lel Atarod oh Naara oh kohla lel Seriko+ lellahng Sordan. 8 Sang Tappua,+ irepen sahpwo douluhllahng palikapi lel Wahun Kana, oh ididi ni sehdo.+ Ih met sohso me kohieng ehuehu peneinei en keinek en Epraim; 9 iangahki kahnimw kan koaros oh wasahn kousoan kan me mi limwahrail, me kadaudok en Epraim kan ahneki nanpwungen sohso me kohieng kadaudok en Manase.+

10 Ahpw re sohte kasarehla mehn Kenan kan me kin koukousoan nan Keser+ oh mehn Kenan kin mihmihte rehn keinek en Epraim leledo rahnwet+ oh re kin idihdiong ren wia doadoahk idihd kan.+

17 Usuhs+ ahpw wiawi ong keinek en Manase,+ pwehki ih me nein Sosep mesenih.+ Pwehki Makir,+ nein Manase mesenih oh semen Kilead eh wia sounpei kommwad men, e alehdi Kilead oh Pasan.+ 2 Oh usuhs wiawi ong kadaudok en Manase teikan nin duwen arail peneinei kan, kadaudok en Apieser kan,+ kadaudok en Elek kan, kadaudok en Asriel kan, kadaudok en Sekem kan, kadaudok en Ehper kan oh kadaudok en Semida kan. Irail pwukat iei kadaudok en Manase, nein Sosep, ohl akan nin duwen arail peneinei kan.+ 3 Ahpw Selopehad+ nein Ehper, nein Kilead, nein Makir, nein Manase, sohte naineki pwutak kan, ahpw serepein tohr, oh iet eden nah serepein kan: Mala, Noha, Okla, Milka, oh Tirsa. 4 Irail eri kohla rehn samworo Eliesar,+ Sosua nein Nun oh kaun akan oh nda: “Siohwa me ketin kehkehlingkihong Moses en kihong kiht ehu sohso duwehte riat ohl akan.”+ Eri sang ni kehkehlik en Siohwa, e kihong irail sohso ehu duwehte rien samarail ohl ako.+

5 Pil mie pelien sahpw eisek me kohieng Manase likin sapwen Kilead oh Pasan, me mi palio* Sordan,+ 6 pwehki lihen Manase kan pil iang ohl akan alehdi arail sohso, oh sapwen Kilead wiahla sapwen kadaudok en Manase teikan.

7 Oh irepen sapwen Manase kohsang Aser lel Mikmedad,+ me sallahng Sekem,+ oh irepen sahpwo douluhldihla palieir* lel sapwen tohn Entappua. 8 Sapwen Tappua+ wiahla kisehn sapwen Manase, ahpw Tappua me mi ni irepen sapwen Manase wia kisehn sapwen kadaudok en Epraim. 9 Oh irepen sahpwo kohdihla lel Wahun Kana, palieir en wahwo. Mie kahnimw en Epraim kei nanpwungen kahnimw en Manase kan,+ oh irepen sapwen Manase mi ni paliepeng en wahwo, oh e ididi ni sehdo.+ 10 Sahpw me mi palieir iei sapwen Epraim, a sahpw me mi paliepeng iei sapwen Manase oh sehdo iei irepen sapweo.+ Oh Manase* lella sapwen Aser ni paliepeng, oh e lella sapwen Isakar ni palimese.

11 Nan sapwen Isakar oh Aser, Manase ahneki Ped-sean oh kisin kahnimw kan me kapilpene, Ipleam+ oh kisin kahnimw kan me kapilpene, tohn Dor+ oh kisin kahnimw kan me kapilpene, tohn Endor+ oh kisin kahnimw kan me kapilpene, tohn Taanak+ oh kisin kahnimw kan me kapilpene, oh tohn Mekiddo oh kisin kahnimw kan me kapilpene. E ahneki wasa ile siluh ko.

12 Ahpw kadaudok en Manase kan sohte kak sapwenikihla kahnimw pwukat; mehn Kenan kan mihmihte nan sahpwet.+ 13 Ni ahnsou me mehn Israel kan kin kehlailla, re kin idingkihong mehn Kenan kan ren wia doadoahk idihd kan,+ ahpw re sohte kasareirailla* koaros.+

14 Kadaudok en Sosep kan ahpw ndaiong Sosua: “Dahme kahrehda ke kihong kiht* pelien sahpw ehute+ nin duwen sohso ehu? Se me tohto, pwe Siohwa ketin kapaia kiht leledo met.”+ 15 Sosua ahpw sapeng irail, nda: “Ma kumwail me tohto, a kumwail kohdahla nanwelo oh mwatihada ehu sapwamwail nan sapwen mehn Peris kan+ oh mehn Repa kan,+ pwehki wasa nahnahn Epraim+ me nohn tikitik ong kumwail.” 16 Kadaudok en Sosep ko ahpw nda: “Wasa nahnahn kan sohte itarohng kiht, oh mehn Kenan kan koaros me kin koukousoan nan wahwo* wareneki kurumahn mahwen kan+ me mete kin uhsang ie,* iei irail kan me mi nan Ped-sean+ oh kisin kahnimw kan me kapilpene oh pil irail kan nan Wahun* Sesreel.”+ 17 Sosua eri ndaiong kadaudok en Sosep kan, keinek en Epraim oh Manase: “Kumwail me tohto oh kumwail inenen kehlail. Kumwail sohte pahn ale pelien sahpw ehute,+ 18 ahpw wasa nahnahn kan pil pahn wia sapwamwail.+ Mehnda ma nanwel, kumwail pahn mwatihada oh e pahn wia imwin irepen sapwamwail. Pwe kumwail pahn kasarehla mehn Kenan kan, mendahki ar kehlail oh wareneki kurumahn mahwen kan me mete kin uhsang ie.”+

18 Mwomwohdisohn mehn Israel ko pwon eri pokonpene Sailo,+ oh re kauwada impwal en mihting wasao,+ pwehki irail kalowedier sahpwo.+ 2 Ahpw miehte luhwen keinek isuh en mehn Israel kan me arail sohso saikinte kohieng irail. 3 Sosua eri ndaiong mehn Israel kan: “Ia uwen werei amwail pahn pwapwand en ale sahpw me Siohwa, Koht en samamwail mehn mahs ako ketikihongkumwailehr?+ 4 Kumwail kihong ie ohl silimen sang ni ehuehu keinek pwe I en kadarirailla; irail pahn kohieila oh aluseli nan sahpwo pwon oh kilelehdi wasa me re pahn sohsohki. Irail ahpw pahn pwurodo rehi. 5 Irail anahne pwalangpeseng sahpwo nanpwungarail ni pelien sahpw isuh.+ Suda pahn mihmi nan eh wasa ni palieir,+ oh kadaudok en Sosep kan pahn mihmi nan arail wasa ni paliepeng.+ 6 A kumwail, kumwail pahn ntingihedi mwomwen sahpwo me nehnehpeseng ni pelien sahpw isuh, oh wadohng ie, oh I pahn wia usuhs+ wasaht ong kumwail mwohn silangin Siohwa atail Koht. 7 Ahpw mehn Lipai kan sohte pahn ale pwaisarail nanpwungamwail,+ pwehki en papah nin duwen samworo en Siohwa iei me ar sohso;+ oh keinek en Kad oh Reupen oh elep keinek en Manase+ aleier arail sohso ni palimesehn Sordan, wasa me sapwellimen Siohwa laduwo Moses kihongirailehr.”

8 Ohl ako eri onopadahng mwesel, oh Sosua ruwese irail ako me pahn kilelehdi sahpwo: “Kohla oh aluseli nan sahpwo oh kilelehdi wasa kan oh pwurodo rehi, oh I pahn wia usuhs wasaht ong kumwail mwohn silangin Siohwa nan Sailo.”+ 9 Ohl ako eri kohla oh aluseli nan sahpwo oh kilelehdi wasao ni wad en kahnimw kan ong pelien sahpw isuh oh ntingihedi nan pwuhk ehu. Mwurin mwo irail pwurodo rehn Sosua ni kahnimpwal nan Sailo. 10 Sosua eri wia usuhs ong irail nan Sailo mwohn silangin Siohwa.+ Sosua eri nehkpeseng sahpwo nin duwen sapwen ehuehu keinek en mehn Israel kan.+

11 Keieun usuhs kohieng ehuehu peneinei en keinek en Pensamin, oh sapwarail mi nanpwungen kadaudok en Suda+ oh kadaudok en Sosep.+ 12 Ni paliepeng, irepen sapwarailo tepisang Sordan, oh irepen sahpwo kohdahla ni ukada en Seriko+ ni paliepeng oh kohdahla ni nahna palikapi, oh lellahng sapwtehn en Pedapen.+ 13 Oh irepen sahpwo ahpw pousehla sang wasao lella Lus, ni palieir en ukada en Lus, me iei, Pedel;+ irepen sahpwo kohdihla lel Atarod-addar+ ni nahna me iei palieir en Ped-oron Pali Pah.+ 14 Oh irepen sahpwo kohla ni palikapi oh pidek kohla palieir sang nahna me sallahng Ped-oron ni palieir; e ididi Kiriad-paal, me iei, Kiriad-searim,+ kahnimw ehu nan Suda. Ih met irepen palikapi.

15 Irepen palieir tepisang ni keilen Kiriad-searim oh irepen sahpwo kohla palikapi; e lella utuhnpihl en Neptoa.+ 16 Irepen sahpwo kohdihla lel ni tepin nahna me sallahng Wahun Innom,*+ me mi nan Wahun* Repaim+ ni paliepeng, oh kohdihla Wahun Innom, lel ni ukada en kahnimw en mehn Sepus+ kan ni palieir, oh leldihla Enrokel.+ 17 Oh irepen sahpwo kohdahla ni paliepeng oh lella Ensemes, oh kohieila Kelilod, me mi mwohn ukada en Adummim,+ oh e kohdilahng takain+ Pohan+ nein Reupen. 18 Oh e kohla lel paliepeng en ukedio mwohn Arapa oh kohdihla Arapa. 19 Oh irepen sahpwo pousehla lel paliepeng en ukedi en Ped-okla,+ oh irepen sahpwo ididi ni paliepeng en Sehd Soahl*+ wasa me pillapo kin kusla ie, ni palieir en imwin Sordan. Ih met irepen palieir en sahpwo. 20 Oh Sordan me wia irepen sahpwo ni palimese. Ih met sohso me kohieng ehuehu peneinei en kadaudok en Pensamin, iei irepen sahpwo ni pali koaros.

21 Oh kahnimw kan en ehuehu peneinei en keinek en Pensamin iei: Seriko, Ped-okla, Emek-kesis, 22 Ped-arapa,+ Semaraim, Pedel,+ 23 Appim, Para, Opra, 24 Keparammoni, Opini, oh Kepa+—kahnimw 12 oh wasahn kousoan kan me mi limwahrail.

25 Kipeon,+ Rama, Peerod, 26 Mispe, Kepihra, Mosah, 27 Rekem, Irpeel, Tarala, 28 Sihlah,+ Aelep, Sepus, me iei, Serusalem,+ Kipea,+ oh Kiriad—kahnimw 14 oh wasahn kousoan kan me mi limwahrail.

Ih met sohso me kohieng ehuehu peneinei en kadaudok en Pensamin.

19 Keriaun usuhs+ kohieng Simion, ong ehuehu peneinei en keinek en Simion.+ Oh arail sohso mi nanpwungen sohso me kohieng Suda.+ 2 Arail sohso iei Peersipa+ iangahki Sipa oh Molada,+ 3 Asar-sual,+ Pala, Esem,+ 4 Eltolad,+ Pedul, Orma, 5 Siklak,+ Ped-markapod, Asar-susa, 6 Ped-lapaod,+ oh Saruhen—kahnimw 13 oh wasahn kousoan kan me mi limwahrail; 7 Ain, Rimmon, Ihder, oh Asan+—kahnimw pahieu oh wasahn kousoan kan me mi limwahrail; 8 oh wasahn kousoan koaros me kapilpene kahnimw pwukat kohla lel Paalad-peer, Rama ni palieir. Ih sohso me kohieng ehuehu peneinei en keinek en Simion. 9 Sohso me kohieng kadaudok en Simion kohsang nan sapwen Suda, pwehki sapwen Suda nohn laud ong irail. Ihme kahrehda kadaudok en Simion ale sapwarail sang nan arail sohso.+

10 Kesiluhwen usuhs+ ahpw kohieng ehuehu peneinei en kadaudok en Sepulon,+ oh irepen arail sohso kohla lel Sarid. 11 Irepen sapwarailo kohdahla Mareal ni palikapi oh lellahng Dappesed, e ahpw kolahng ni wahu me mi mwohn Sokneam. 12 Sang Sarid, e tangalahng palimese wasa ketipin kin dakada ie lel ni irepen Kislod-tapor, e ahpw kolahng Daperad+ oh leldahla Sapia. 13 Oh sang mwo e douluhlla palimese wasa ketipin kin dakada ie lel Kahd-ehper,+ Edkasin, oh kolahng Rimmon, lella Nea. 14 Oh ni paliepeng, irepen sahpwo pidakih kohla Annadon, oh e ididi ni Wahun Iptahel, 15 oh pil Kattad, Nahalal, Simron,+ Idala, oh Pedleem+—kahnimw 12 oh wasahn kousoan kan me mi limwahrail. 16 Ih met sohso me kohieng ehuehu peneinei en kadaudok en Sepulon.+ Ih kahnimw kan met oh wasahn kousoan kan me mi limwahrail.

17 Kapahieun usuhs+ kohieng Isakar,+ ong ehuehu peneinei en kadaudok en Isakar. 18 Oh irepen sapwarail lella Sesreel,+ Kesulod, Sunem,+ 19 Aparaim, Sion, Anaharad, 20 Rappid, Kision, Epes, 21 Remed, Engannim,+ Enadda, oh Pedpasses. 22 Oh irepen sahpwo lella Tapor+ oh Sahasuma oh Ped-semes, oh irepen sapwarailo ididi Sordan—kahnimw 16 oh wasahn kousoan kan me mi limwahrail. 23 Ih met sohso me kohieng ehuehu peneinei en keinek en Isakar,+ kahnimw kan oh wasahn kousoan kan me mi limwahrail.

24 Kelimaun usuhs+ kohieng ehuehu peneinei en keinek en Aser.+ 25 Oh irepen sapwarailo iei Elkad,+ Ali, Peten, Aksap, 26 Allammelek, Eimad, oh Misal. E lella Karmel+ ni palikapi oh lel Sihor-lipnad, 27 e ahpw pwurala palimese kohla Peddakon oh lella Sepulon oh Wahun Iptahel ni paliepeng kohla Pedemek oh Neiel, oh lella Kapul ni palimeing, 28 oh lella Ihpron, Rehop, Ahmmon, oh Kana kohla lel kahnimw laud en Saidon.+ 29 Oh irepen sahpwo pwurala Rama oh kohla lel kahnimw kehl kehlail en Dair.+ Irepen sahpwo eri pwurala Osa, oh e ididi ni sehdo nan sapwen Aksip, 30 Umma, Apek,+ oh Rehop+—kahnimw 22 oh wasahn kousoan kan me mi limwahrail. 31 Ih met sohso me kohieng ehuehu peneinei en keinek en Aser.+ Ih kahnimw kan met oh wasahn kousoan kan me mi limwahrail.

32 Keweneun usuhs+ kohieng kadaudok en Napdali, ong ehuehu peneinei en kadaudok en Napdali. 33 Irepen sahpwo tepisang Ihlep oh tuhke laudo nan Saanannim+ kolahng Adaminekep oh Sapniel kohla lel Lakkum; oh e ididi Sordan. 34 Irepen sahpwo pwurala palikapi lel Asnod-tapor, e ahpw kohsang wasao kohla Ukkok oh lel Sepulon ni palieir oh lel Aser ni palikapi oh lel Suda me mi Sordan ni palimese. 35 Oh kahnimw kehl kehlail kan iei Siddiem, Serr, Ammad,+ Rakkad, Kinnered, 36 Adama, Rama, Eisor,+ 37 Kedes,+ Edrei, Enasor, 38 Iairon, Mikdalel, Orem, Pedanad, oh Ped-semes+—kahnimw 19 oh wasahn kousoan kan me mi limwahrail. 39 Ih met sohso me kohieng ehuehu peneinei en keinek en Napdali,+ kahnimw kan oh wasahn kousoan kan me mi limwahrail.

40 Keisuhwen usuhs+ kohieng ehuehu peneinei en keinek en Dan.+ 41 Oh irepen arail sohso iei Sorah,+ Estaol, Irsemes, 42 Saalapim,+ Aisalon,+ Idla, 43 Elon, Timnah,+ Ekron,+ 44 Eldeke, Kippedon,+ Paalad, 45 Sehud, Peneperak, Kahdrimmon,+ 46 Masarkon, oh Rakkon, oh irepen sahpwo sallahng Sopa.+ 47 Ahpw sapwen Dan nohn tikitik ong irail.+ Kahrehda re kohdahla oh mahweniong Lisem+ oh kalowehdi oh kemehkihla aramas en kahnimwo kedlahs. Irail ahpw sapwenikihla oh kousoanla loale, oh re wekidala eden Lisem ong Dan, me iei Dan eden samarail mehn mahso.+ 48 Ih met sohso me kohieng ehuehu peneinei en keinek en Dan. Ih kahnimw kan met oh wasahn kousoan kan me mi limwahrail.

49 Irail eri kanekehla arail nehkpeseng sahpwo ong ni ehuehu pelien sahpw nin duwen sohso. Mehn Israel kan ahpw kihong Sosua nein Nun sohso ehu me mi nanpwungarail. 50 Sang ni kehkehlik en Siohwa re kihong ih kahnimw me e pekihda, iei Timnad-sera+ nan wasa nahnahn Epraim, oh e onehda sapahl kahnimwo oh kousoanla loale.

51 Ih sohso pwukat me samworo Eliesar, Sosua nein Nun, oh kaunen peneinei en keinek en Israel kan nehkpeseng+ sang ni usuhs nan Sailo+ mwohn silangin Siohwa, ni wasahn pedolong en impwal en mihting.+ Irail eri kanekehla nehnepeseng en sahpwo.

20 Siohwa eri ketin mahsanihong Sosua: 2 “Padahkihong mehn Israel kan, ‘Kumwail pilada amwail kahnimw en rukula kan+ me I mahsanihongehr Moses en ndaiong kumwail, 3 pwe mehmen me pahn sohte nsenki de sapwungala* kemehla emen aramas* en kak tangala wasao. Oh kahnimw pwukat pahn wia wasahn amwail ruksang aramas me pahn ikih me mehlao.*+ 4 E anahne tangalahng ehu kahnimw pwukat+ oh uh ni wasahn pedolong en ewen kelen kahnimwo+ oh kawehwehiong ohl mah kan en kahnimwo dahme wiawi. Irail ahpw pahn kahrehlong ih nan kahnimwo oh kihong wasa kis oh e pahn kousoan rehrail. 5 Ma aramas me pahn ikih me mehlao* pahn pwakih ih, re sohte pahn pangala me kemehla aramaso reh, pwe e sapwungala* kemehla iengeo oh e sohte kin kailongki.+ 6 E anahne kousoan nan kahnimwo lao e ale kopwung mwohn mwomwohdiso+ oh mihmi wasao lao samworo lapalap me papah ahnsowo pahn mehla.+ Me kemehla aramaso eri kakehr pwurala ni kahnimw me e tangasang ieo, oh e kakehr pedolong nan eh kahnimw oh nan imwe.’”+

7 Irail eri katohrehla Kedes+ me mi Kalili nan wasa nahnahn Napdali, Sekem+ nan wasa nahnahn Epraim, oh Kiriad-arpa,+ me iei, Ipron, nan wasa nahnahn Suda. 8 Nan sapwen Sordan, ni palimesehn Seriko, re pilada Peser+ nan sapwtehn me mi wasa patapat en wasa ile sang nan sapwen keinek en Reupen, Ramod+ nan Kilead sang nan sapwen keinek en Kad, oh Kolan+ nan Pasan sang nan sapwen keinek en Manase.+

9 Wasa pwukat wiahla kahnimw kan me pilipilda ong mehn Israel koaros oh mehn liki koaros me kin kousoan rehrail, pwe mehmen me sohte nsenki kemehla aramas* en kak tangala wasao+ oh sohte kamakamala rehn me pahn ikih me mehlao* mwohn eh pahn ale kopwung mwohn mwomwohdiso.+

21 Kaun akan en peneinei en mehn Lipai eri kohla rehn samworo Eliesar,+ Sosua nein Nun, oh kaunen peneinei en keinek en Israel kan, 2 oh re koasoiong irail nan Sailo+ nan sapwen Kenan, nda: “Siohwa ketin mahsanihong Moses en kehkehlingki me se pahn ale kahnimw kan me se pahn kousoan ie, iangahki arail mohs akan ong nait pelinmen kan.”+ 3 Eri sang ni kehkehlik en Siohwa, mehn Israel kan kihong mehn Lipai kan kahnimw pwukat+ oh arail mohs akan sang nan pein arail sohso.+

4 Keieun usuhs kohieng peneinei en mehn Kohad,+ oh sang ni usuhs, mehn Lipai kan me wia kadaudok en samworo Aaron, ale kahnimw 13 sang nan sapwen keinek en Suda,+ keinek en Simion,+ oh keinek en Pensamin.+

5 Oh luhwen mehn Kohad kan ale* kahnimw eisek sang nan sapwen peneinei en keinek en Epraim,+ keinek en Dan, oh elep keinek en Manase.+

6 Oh mehn Kerson kan+ ale kahnimw 13 sang nan sapwen peneinei en keinek en Isakar, keinek en Aser, keinek en Napdali, oh elep keinek en Manase nan Pasan.+

7 Peneinei en mehn Merari kan+ ale kahnimw 12 sang nan sapwen keinek en Reupen, keinek en Kad, oh keinek en Sepulon.+

8 Eri mehn Israel kan kihong mehn Lipai kan kahnimw pwukat oh arail mohs akan sang ni usuhs, nin duwen me Siohwa ketin kehkehlingkihong Moses.+

9 Iet eden kahnimw kan me re kihsang nan sapwen keinek en Suda oh keinek en Simion,+ 10 oh re kohieng nein Aaron kan me kisehn peneinei en Kohad, mehn Lipai, pwehki irail alehdi keieun usuhs. 11 Re kihong irail Kiriad-arpa+ (Arpa iei semen Anak), me iei, Ipron,+ nan wasa nahnahn Suda, oh mohs akan me kapilpene. 12 Ahpw mohs kan oh wasahn kousoan kan en kahnimwo, re kihong Kalep nein Sepune pwe en sapweniki.+

13 Oh re kihong kadaudok en samworo Aaron kan kahnimw en rukula ong mehmen me pahn kemehla aramas,+ me iei, Ipron+ iangahki eh mohs akan, oh pil Lipna+ iangahki eh mohs akan, 14 Sattir+ iangahki eh mohs akan, Estemoa+ iangahki eh mohs akan, 15 Olon+ iangahki eh mohs akan, Depir+ iangahki eh mohs akan, 16 Ain+ iangahki eh mohs akan, Sutta+ iangahki eh mohs akan, oh Ped-semes iangahki eh mohs akan—kahnimw duwau sang nan sapwen keinek riau pwukat.

17 Oh sang nan sapwen keinek en Pensamin: Kipeon+ iangahki eh mohs akan, Kepa iangahki eh mohs akan,+ 18 Anadod+ iangahki eh mohs akan, oh Almon iangahki eh mohs akan—kahnimw pahieu.

19 Kahnimw koaros me kohieng kadaudok en Aaron, samworo kan, iei kahnimw 13 iangahki arail mohs akan.+

20 Oh luhwen peneinei en mehn Kohad kan rehn mehn Lipai kan ale kahnimw kei sang nan sapwen keinek en Epraim sang ni usuhs. 21 Re kihong irail kahnimw en rukula ong mehmen me pahn kemehla aramas,+ me iei, Sekem+ iangahki eh mohs akan nan wasa nahnahn Epraim, Keser+ iangahki eh mohs akan, 22 Kipsaim iangahki eh mohs akan, oh Ped-oron+ iangahki eh mohs akan—kahnimw pahieu.

23 Oh sang nan sapwen keinek en Dan: Eldeke iangahki eh mohs akan, Kippedon iangahki eh mohs akan, 24 Aisalon+ iangahki eh mohs akan, Kahdrimmon iangahki eh mohs akan—kahnimw pahieu.

25 Oh sang nan sapwen elep keinek en Manase: Taanak+ iangahki eh mohs akan oh Kahdrimmon iangahki eh mohs akan—kahnimw riau.

26 Kahnimw koaros iangahki arail mohs akan me luhwen peneinei en mehn Kohad kan alehdi meh eisek.

27 Oh peneinei kan en Kerson,+ mehn Lipai alehsang nan sapwen elep keinek en Manase kahnimw en rukula ong mehmen me pahn kemehla aramas, me iei, Kolan+ nan Pasan, iangahki eh mohs akan oh Peestera iangahki eh mohs akan—kahnimw riau.

28 Oh sang nan sapwen keinek en Isakar:+ Kision iangahki eh mohs akan, Daperad+ iangahki eh mohs akan, 29 Sarmud iangahki eh mohs akan, oh Engannim iangahki eh mohs akan—kahnimw pahieu.

30 Oh sang nan sapwen keinek en Aser:+ Misal iangahki eh mohs akan, Apdon iangahki eh mohs akan, 31 Elkad+ iangahki eh mohs akan, oh Rehop+ iangahki eh mohs akan—kahnimw pahieu.

32 Oh sang nan sapwen keinek en Napdali: kahnimw en rukula+ ong mehmen me pahn kemehla aramas, me iei, Kedes+ nan Kalili iangahki eh mohs akan, Ammod-dor iangahki eh mohs akan, oh Kardan iangahki eh mohs akan—kahnimw siluh.

33 Kahnimw koaros me kohieng peneinei en mehn Kerson kan iei kahnimw 13 iangahki arail mohs akan.

34 Oh peneinei en Merari,+ luhwen mehn Lipai kan, alehsang nan sapwen keinek en Sepulon:+ Sokneam+ iangahki eh mohs akan, Karta iangahki eh mohs akan, 35 Dimna iangahki eh mohs akan, oh Nahalal+ iangahki eh mohs akan—kahnimw pahieu.

36 Oh sang nan sapwen keinek en Reupen: Peser+ iangahki eh mohs akan, Sahas iangahki eh mohs akan,+ 37 Kedemod iangahki eh mohs akan, oh Mepaad iangahki eh mohs akan—kahnimw pahieu.

38 Oh sang nan sapwen keinek en Kad:+ kahnimw en rukula ong mehmen me pahn kemehla aramas, me iei, Ramod nan Kilead+ iangahki eh mohs akan, Mahanaim+ iangahki eh mohs akan, 39 Espon+ iangahki eh mohs akan, oh Saser+ iangahki eh mohs akan—koaros patpene kahnimw pahieu.

40 Kahnimw koaros me kohieng peneinei en mehn Merari kan, luhwen peneinei en Lipai, iei kahnimw 12.

41 Kahnimw en Lipai koaros nan sapwen mehn Israel kan iei kahnimw 48 iangahki arail mohs akan.+ 42 Ehuehu kahnimw pwukat mie mohs akan me kapilpene—ih duwen met ong kahnimw pwukat koaros.

43 Eri Siohwa ketikihong Israel sahpw koaros me e ketin kahukihla pwe en ketikihong samarail mehn mahs ako,+ oh re sapwenikihla oh kousoanla loale.+ 44 Siohwa pil ketin kakommoaleiraildi wasa koaros, duwehte me e ketin kahukihong samarail mehn mahs ako,+ oh sohte emen sang rehn arail imwintihti kan koaros kak uhwong irail.+ Siohwa ketikihong arail imwintihti kan koaros nan pehrail.+ 45 Sohte inou* ehu sang nan inou mwahu koaros me Siohwa ketin wiahiong mehn Israel kan me sohte pweida; irail koaros pweida.+

22 Sosua eri ekerpene mehn Reupen kan, mehn Kad kan, oh elep keinek en Manase 2 oh ndaiong irail: “Kumwail kapwaiadahr mehkoaros me sapwellimen Siohwa ladu Moses kehkehlingkihong kumwail,+ oh kumwail peikiongehr soahng koaros me I ruwesehkin kumwail.+ 3 Kumwail sohte kesehla riamwail kan erein ahnsou pwukat leledo rahnwet;+ oh kumwail kin kapwaiada kehkehlik en Siohwa amwail Koht.+ 4 Ahnsou wet Siohwa amwail Koht ketin kakommoalehdi riamwail kan, duwehte me e ketin inoukihong irail.+ Eri, kumwail kak pwurowei nan amwail impwal kan nan sahpw me mi palio* Sordan,+ me sapwellimen Siohwa ladu Moses kihong kumwail en sapwenikihla. 5 Ihte kumwail pahn kanahieng kapwaiada kehkehlik oh Kosonned me sapwellimen Siohwa ladu Moses kihong kumwail,+ ni amwail pahn poakohng Siohwa amwail Koht,+ ni amwail pahn kekeid nan sapwellime ahl akan koaros,+ ni amwail pahn kapwaiada sapwellime kehkehlik kan,+ ni amwail pahn loalopwoatohng ih,+ oh ni amwail pahn papah ih+ sang nan amwail mohngiong unsek oh mour* unsek.+

6 Sosua eri kapaiairailda oh kadarirailla, irail eri kohla ni arail impwal kan. 7 Moses kihongehr elep keinek en Manase sohso ehu nan Pasan,+ a Sosua kihong elep keinek teio iangahki riarail kan sahpw me mi palikapi en Sordan.+ Oh ni ahnsou me Sosua kadariraillahng arail impwal kan, e kapaiairailda 8 oh ndaiong irail: “Kumwail pwurowei ni amwail impwal kan wa amwail kepwe tohto, oh pelinmen tohto, silper oh kohl, prons oh mete, oh likou tohtohie.+ Kumwail ehukihong riamwail kan amwail dipwisou lohdi+ sang amwail imwintihti kan.”

9 Mwurin mwo, mehn Reupen kan, mehn Kad kan, oh elep keinek en Manase eri mweselsang mehn Israel teikan, kohsang Sailo nan sapwen Kenan, oh pwurala nan sapwen Kilead,+ sahpw me re sapwenikihla oh kousoanlahr loale sang ni kehkehlik me Siohwa ketikihong Moses.+ 10 Ni ahnsou me re lella wasa me karanih Sordan nan sapwen Kenan, mehn Reupen kan, mehn Kad kan, oh elep keinek en Manase kauwada lapalahn pei sarawi ehu limwahn Sordan. 11 Mwuhr mehn Israel teikan rongada met+ oh nda: “Kilang! Mehn Reupen kan, mehn Kad kan oh elep keinek en Manase kauwadahr pei sarawi ehu ni irepen sapwen Kenan nan wasa me karanih Sordan, nan pali me mehn Israel kan sapweniki.” 12 Ni ahnsou me mehn Israel kan rongada duwen met, mwomwohdisohn mehn Israel ko pwon ahpw pokonpene nan Sailo+ pwe ren kohla mahweniong irail.

13 Mehn Israel kan eri kadarala Pineas+ nein samworo Eliesar rehn mehn Reupen kan, mehn Kad kan, oh elep keinek en Manase nan sapwen Kilead, 14 oh kaun ehk me iang ih, emen kaun sang ehuehu peneinei en keinek en Israel koaros, emenemen wia moangen eh peneinei sang palien eh pahpa nanpwungen mehn Israel kid kei.*+ 15 Ni arail kohla rehn mehn Reupen kan, mehn Kad kan, oh elep keinek en Manase nan sapwen Kilead, re ndaiong irail:

16 “Iet me sapwellimen Siohwa mwomwohdiso pwon koasoia: ‘Mwekid salelepek dahieu met+ me kumwail wiahiong Koht en Israel? Rahnwet, kumwail solahr idawehn Siohwa ni amwail pein kauwada pei sarawi ehu oh uhwongada Siohwa.+ 17 Kitail sohte itarki sapwung me wiawiher Pihor? Kitail saikinte kamwakelekitailsang met lel rahnwet, mendahki kalokolok kohwong sapwellimen Siohwa mwomwohdiso.+ 18 Oh kumwail solahr pahn idawehn Siohwa rahnwet! Ma kumwail uhwongada Siohwa rahnwet, eri e pahn ketin engiengda pahn mwohmwohdisohn Israel pwon lakapw.+ 19 Eri ma kumwail medewe me sahpw me kumwail sapwenikio samin, kumwail kohdo nan sahpw me Siohwa ketin sapwellimanki,+ wasa me sapwellimen Siohwa impwal sarawi mihmi ie+ oh kousoanla reht, ahpw ieremen uhwong Siohwa, oh dehr wiahkinkitailla sounuhwong kei ni amwail pein kauwada pei sarawi ehu likin pei sarawi en Siohwa atail Koht.+ 20 Ni Akan+ nein Sera eh wiahda mwekid salelepek ehu ong soahng kan me pahn kamwomwmwomwla, ia duwe, Koht sou ketin engiengda pahn mwomwohdisohn Israel pwon?+ Oh kaidehn ih kelehpw me mehkihla eh sapwungo.’”+

21 Mehn Reupen kan, mehn Kad kan, oh elep keinek en Manase eri sapengki kaunen mehn Israel kid ko,* nda:+ 22 “Siohwa, Koht en koht akan! Siohwa, Koht en koht akan!+ E ketin mwahngih, oh Israel pil pahn ese. Ma se uhwongada oh sohte lelepek ong Siohwa, en dehr mweimwei sen momourte rahnwet. 23 Ma se pein kauwada pei sarawi ehu pwe sen sohla idawehn Siohwa oh wiahda powe meirong isihs, meirong en krein, oh meirong en kaminimin, Siohwa me pahn ketin kalokei kiht.+ 24 Soh, ehu kahrepe tohrohr me se wiahkihda met, pwe se kin nda, ‘Ni ahnsou kohkohdo, kadaudokamwail kan pahn ndaiong kadaudokat kan: “Dahme kumwail pahn ehukihong Siohwa, Koht en Israel? 25 Siohwa ketikidier Sordan en wia irepen sahpw nanpwungen kiht oh kumwail, mehn Reupen oh mehn Kad kan. Sohte amwailohng mehkot me pid Siohwa.” Oh kadaudokamwail kan pahn irehsang kadaudokat kan ren kaudokiong* Siohwa.’

26 “Kiht eri nda, ‘Kitail uhdahn pahn wia mehkot ni atail pahn kauwada ehu pei sarawi en, kaidehkin mehn wia meirong isihs de meirong teikan, 27 ahpw en wia mehn kadehde ehu nanpwungen kumwail oh kiht+ oh kadaudokat* me pahn kohdo mwurit me se pahn papahki Siohwa at meirong isihs kan, meirong teikan oh meirong en kaminimin,+ pwe ni ahnsou kohkohdo kadaudokamwail kan en dehr ndaiong kadaudokat kan: “Sohte amwailohng mehkot me pid Siohwa.”’ 28 Kiht eri nda, ‘Ma re pahn ndahng kitail oh kadaudokatail kan* koasoi wet ni ahnsou kohkohdo, kitail pahn nda: “Kilang pei sarawi me samat mehn mahs ako wiadahr, me duwehte sapwellimen Siohwa pei sarawio, kaidehn ong meirong isihs de meirong teikan, ahpw en wia mehn kadehde ehu nanpwungen kumwail oh kiht.”’ 29 Se sohte mwahn pahn uhwong Siohwa oh sohla idawehn Siohwa rahnwet+ ni at pahn kauwada pei sarawi ehu ong meirong isihs, meirong en krein, oh meirong teikan, likin pei sarawi en Siohwa atail Koht me mi mwohn sapwellime impwal sarawio!”+

30 Ni ahnsou me samworo Pineas, kaun akan en mwomwohdiso, oh kaunen mehn Israel kid ko* me iang ih rongadahr lokaia kan me kadaudok en Reupen, Kad oh Manase koasoiahda, irail ahpw nsenamwahula.+ 31 Eri Pineas nein samworo Eliesar ahpw ndaiong kadaudok en Reupen, Kad, oh Manase kan: “Rahnwet, se eseier me Siohwa ketin ieiang kitail, pwehki kumwail sohte wiahda mwekid salelepek ehu ong Siohwa. Ahnsou wet kumwail doarehla mehn Israel kan sang nin limen Siohwa.”

32 Pineas nein samworo Eliesar oh kaun akan ahpw mweselsang mehn Reupen oh Kad kan nan sapwen Kilead pwuralahng sapwen Kenan, oh pakairkilahng mehn Israel teiko dahme irail koasoiapenehr. 33 Oh mehn Israel ko nsenamwahukihla pakairo. Mehn Israel ko ahpw kapikapinga Koht, oh re solahr koasoia me re pahn kohla mahweniong mehn Reupen oh mehn Kad pwe ren kauwehla sahpw me irail koukousoan loale.

34 Eri mehn Reupen kan oh mehn Kad kan kihong eden pei sarawio,* pwehki “e wialahr mehn kadehde ehu nanpwungatail me Siohwa iei Koht mehlel.”

23 Mwurin ahnsou reirei me Siohwa ketin kakommoalehdi Israel+ sang eh imwintihti koaros me kapilpene, ni ahnsou me Sosua inenen likeilapalahr,+ 2 Sosua eri ekerpene Israel pwon,+ ohl mah kan, kaun akan, sounkopwung kan, oh opiser kan,+ oh e ndaiong irail: “I likeilapalahr. 3 Oh pein kumwail kilangehr mehkoaros me Siohwa amwail Koht ketin wiahiong wehi pwukat koaros pwehki kumwail, pwe Siohwa amwail Koht iei ih me ketin mahmahwenkin kumwail.+ 4 Kilang, I kihong kumwail sang ni usuhs+ sapwen wehi kan me saikinte lohdi nin duwen sohso ehu ong amwail keinek kan+ oh pil sapwen wehi koaros me I kalowedier,+ sang Sordan lel ni Sehd Laudo* ni palikapi.* 5 Oh Siohwa amwail Koht iei ih me ketin sikenirailla sang mwohmwail,+ oh kasareirailla* pwehki kumwail, oh kumwail sapwenikihla sapwarailo, duwehte me Siohwa amwail Koht ketin inoukihong kumwail.+

6 “Eri kumwail uhdahn pahn eimah pwe kumwail en peikiong oh kapwaiada mehkoaros me ntingdier nan pwuhken Kosonned+ en Moses ni amwail sohte mwahn pahn wetla palimaun de palimeing,+ 7 ni amwail sohte mwahn pahn patehng wehi pwukat+ me mihmi rehmwail. Kumwail dehr pil nda eden arail koht akan,+ de pil kahula ni adarail, oh kumwail sohte mwahn pahn papah irail de pil poaridiong irail.+ 8 Ahpw kumwail pahn loalopwoatohng Siohwa amwail Koht,+ duwen amwail kin wia leledo rahnwet. 9 Siohwa pahn ketin kasarehsang mwohmwail wehi laud oh kehlail kan,+ pwe sohte aramas emen me kin kak uh mwohmwail leledo rahnwet.+ 10 Emente kumwail pahn kin pwakih aramas kid,+ pwehki Siohwa amwail Koht eh kin ketin mahmahwenkin kumwail,+ nin duwen me e ketin inoukihong kumwail.+ 11 Eri kumwail en kin mwasamwasahn ahnsou koaros+ sang ni amwail kin poakohng Siohwa amwail Koht.+

12 “Ahpw ma kumwail pahn pwurala oh patehng irail kan me luhwehdi+ sang wehi pwukat oh pwoudikinirailda+ oh werekiong irail oh irail werekiong kumwail, 13 kumwail uhdahn pahn ese me Siohwa amwail Koht solahr pahn kin ketin kasarehsang* wehi pwukat pwehki kumwail.+ Re pahn wiahla lidip ehu oh nsar ehu oh mehn wokih pengepengamwail+ oh kisin tek kis nan masamwail kan lao kumwail sohralahsang sahpw mwahu wet me Siohwa amwail Koht ketikihong kumwail.

14 “Eri kilang! I kereniongehr mehla, oh kumwail uhdahn ese nan amwail mohngiong unsek oh mour* unsek me sohte lepin lokaia ehu sang nan inou mwahu koaros me Siohwa amwail Koht ketin mahsanihong kumwail me sohte pweida. Irail koaros pweiong kumwail. Sohte lepin lokaia ehu me sohte pweida.+ 15 Ahpw duwehte inou mwahu koaros me Siohwa amwail Koht ketin mahsanihong kumwail ar pweida rehmwail,+ ih pil duwen Siohwa eh pahn ketikidiong pohmwail kahpwal koaros me e ketin inoukihda oh pahn ketin kasohreikumwailla sang sahpw mwahu wet me Siohwa amwail Koht ketikihong kumwail.+ 16 Ma kumwail pahn kauwehla inou lap en Siohwa amwail Koht me e ketin kehkehlingkihong kumwail en kapwaiada oh ma kumwail papah koht teikan oh poaridiong irail, engieng en Siohwa pahn lelohng kumwail+ oh kumwail pahn mwadang sohralahsang sahpw mwahu me e ketikihongkumwailehr.”+

24 Sosua eri kapokonepene keinek en Israel koaros nan Sekem oh ekerpene ohl mah kan en Israel, kaun akan, sounkopwung kan, opiser kan,+ oh re uh mwohn silangin Koht mehlelo. 2 Sosua ahpw ndaiong aramas ako koaros: “Iet me Siohwa, Koht en Israel ketin mahsanih, ‘Samamwail mehn mahs ako+ me iangahki Tera semen Eipraam oh Nahor kin kousoan mahso+ palio Pillapo,* oh re kin papah koht teikan.+

3 “‘Mwuhr I ale samamwail mehn mahso Eipraam+ sang palio Pillapo* oh kahluwaseli nan sapwen Kenan pwon oh kadirehla kadaudoke.+ I kihong ih Aisek,+ 4 I ahpw kihong Aisek Seikop oh Esau.+ Mwuhr I kihong Esau Nahna Seir pwe en sapweniki;+ oh Seikop oh nah pwutak kan kohdihla Isip.+ 5 Mwuhr I kadarala Moses oh Aaron,+ oh I kalokehki Isip dahme I wiahda nanpwungarail,+ I ahpw kahluweikumwaildo sang wasao. 6 Ni ahnsou me I kahluwahsang samamwail ko nan Isip+ oh kumwail leledo ni sehdo, mehn Isip ko pwakihki samamwail ko kurumahn mahwen kan oh sountangahki ko lel ni Sehd Weitahtao.+ 7 Re tepida likweriong Siohwa,+ ih eri ketikihdi rotorot ehu nanpwungen kumwail oh mehn Isip ko, oh kapwiledohng sehdo pohrail oh pwainiraildi,+ oh kumwail pein kilangki masamwail dahme I wiahier nan Isip.+ Kumwail ahpw kin koukousoan nan sapwtehn sounpar* tohto.+

8 “‘Oh I waikumwaildohng nan sapwen mehn Amor kan me kin koukousoan palio* Sordan, oh re mahweniong kumwail.+ Ahpw I kihong irail nan pehmwail kan pwe kumwail en kak sapwenikihla sapwarailo, oh I kamwomwirailla sang mwohmwail.+ 9 Mwuri Palak nein Sippor, nanmwarkien Mohap uhd mahweniong Israel. E ahpw ekerodo Palaam nein Peor en keriaikumwailla.+ 10 Ahpw I sohte mwahn rong Palaam.+ Eri e pwurupwurehng kapaiakumwailda,+ I ahpw doareikumwailsang nan peh.+

11 “‘Kumwail eri kotehla Sordan+ oh kohdo Seriko.+ Oh kaun akan* en Seriko, mehn Amor, mehn Peris, mehn Kenan, mehn Id, mehn Kirkas, mehn Ip, oh mehn Sepus mahweniong kumwail, ahpw I kihong irail nan pehmwail.+ 12 Mwohn amwail lella, I kahrehiong irail en mworusala,* oh re tangasang mwohmwail+—nanmwarkien Amor riemeno. Kaidehn noumwail kedlahs oh kesik ketieu me kahrehda met eh wiawi.+ 13 Eri I kihong kumwail sahpw ehu me kaidehn kumwail me koadoahkihada oh kahnimw kan me kaidehn kumwail me kauwada,+ oh kumwail kousoanla loale. Kumwail kin tungutungoal sang mwetin kreip oh olip kan me kaidehn kumwail me padokedi.’+

14 “Kahrehda kumwail lemmwiki Siohwa oh papah ih ni loalopwoat* oh lelepek,*+ oh kesehla koht akan me samamwail mehn mahs ako kin papah palio Pillapo* oh nan Isip,+ oh papah Siohwa. 15 Eri ma e suwediong kumwail en papah Siohwa, kumwail pein pilada rahnwet ihs me kumwail pahn papah,+ ma koht akan me samamwail mehn mahs ako kin papah palio Pillapo*+ de koht akan en mehn Amor me kumwail kin koukousoan nan sapwarail.+ A ngehi oh tohnimweio, se pahn papah Siohwa.”

16 Eri, aramas ako ahpw sapeng nda: “Se sohte mwahn pahn mweisang Siohwa oh papah koht teikan. 17 Siohwa atail Koht me ketin wahdo kitail oh pil samatail ko sang Isip,+ wasa me kitail wia lidu ie,*+ oh e ketin wiahda kilel kapwuriamwei pwukat mwohn masatail,+ oh e kin ketin sinsile kitail wasa koaros me kitail kohla ie oh pil sang aramas koaros me kitail kin daulih.+ 18 Siohwa ketin kasarehsang aramas ako koaros, iangahki mehn Amor kan me kin koukousoan nan sahpwo mwohtail. Kahrehda, se pil pahn papah Siohwa, pwehki ih iei atail Koht.”

19 Sosua eri ndahng aramas ako: “Kumwail sohte kak papah Siohwa, pwehki ih Koht sarawi men;+ ih Koht emen me kupwurki aramas en poadidiong ih kelehpw.+ E sohte pahn ketin mahkohng amwail kauwehla kosonned kan* oh dipamwail kan.+ 20 Ma kumwail mweisang Siohwa oh papah koht en liki kan, e pahn pil ketin uhwong kumwail oh kasohreikumwailla mwurin eh ketin wia me mwahu ong kumwail.”+

21 Aramas ako ahpw ndaiong Sosua: “Siohwa me se uhdahn pahn papah!”+ 22 Sosua ahpw ndaiong aramas ako: “Pein kumwail me pahn wia amwail sounkadehde me pein kumwail pilada pwe kumwail en papah Siohwa.”+ Irail ahpw nda: “Kiht me sounkadehde.”

23 “Eri, kumwail kesehla koht en liki kan me mihmi rehmwail, oh kumwail papah Siohwa, Koht en Israel ni mohngiongimwail unsek.” 24 Aramas ako ahpw ndaiong Sosua: “Se pahn papah Siohwa atail Koht, oh se pahn peikiong kapitie!”

25 Sosua eri wiahda inou lap ehu rehn aramas ako rahno oh wiahda kosonned ehu oh pil koasoandi ehu ong irail nan Sekem. 26 Sosua eri ntingihedi mahsen pwukat nan pwuhken Kosonned en Koht+ oh ale lapalahn takai ehu+ oh kihdiong pahn tuhke laud pwoat limwahn wasa sarawi en Siohwa.

27 Sosua pousehlahte koasoiong aramas ako koaros, nda: “Kilang! Takai wet pahn wia mehn kadehde ong kitail,+ pwehki eh rongehr mehkoaros me Siohwa ketin mahsanihong kitail, oh e pahn wia mehn kadehde ong kumwail, pwe kumwail en dehr kahmahmkihla amwail Koht.” 28 Sosua eri kadarpeseng aramas ako, emenemen kohla nan sahpw me e sohsohki.+

29 Mwurin mepwukat, Sosua nein Nun, ladun Siohwa, mehla ni eh sounpar 110.+ 30 Re ahpw sarepedi ih nan sahpw me e sohsohki nan Timnad-sera,+ me mi wasa nahnahn Epraim, paliepeng en Nahna Kaas. 31 Israel kin papahte Siohwa erein ahnsou me Sosua momour oh pil erein ahnsou me ohl mah kan me ese sapwellimen Siohwa wiewia kan koaros ong Israel+ ar momourte, mwurin Sosua eh mehla.

32 Tihn Sosep,+ me mehn Israel kan wahsang Isip, seridi nan Sekem, nan pelien sahpw me Seikop pwainkihda mwohni silper 100+ sang rehn nein Amor pwutak kan,+ semen Sekem; oh sahpwo wiahla sohso ehu ong nein Sosep kan.+

33 Eliesar nein Aaron pil mehla.+ Irail eri sarepedi ih ni Dohl en Pineas, nah pwutak,+ wasa me kohieng ih nan wasa nahnahn Epraim.