ESRA

1 Ni keieun sounpar en Nanmwarki Sairus+ en Persia, pwe sapwellimen Siohwa mahsen sang Seremaia+ en pweida, Siohwa ketin kamwakid mohngiong* en Nanmwarki Sairus en Persia en wiahda pakair ehu wasa koaros nan eh wehi, me e pil ntingihedi,+ nda:

2 “Iet me Nanmwarki Sairus en Persia mahsanih, ‘Siohwa, Koht en nanleng ketikihongieier wehi koaros en sampah,+ oh e ketin idihiehda I en kauwadahng ih tehnpas ehu nan Serusalem,+ me mi nan Suda. 3 Eri, sohte lipilipil nanpwungamwail me wia sapwellime aramas, eh Koht en ketin ieiang ih, oh en kohdahla Serusalem, me mi nan Suda, oh onehda sapahl tehnpesen Siohwa, Koht en Israel—ih me Koht mehlelo—tehnpese mi nan Serusalem.* 4 Mehmen me kin kousoan nin duwen mehn liki men,+ sohte lipilipil wasa me e mi ie, en ale sawas sang mehn mpe kan* ni ar pahn kihong ih silper oh kohl, kepwe kan oh pelinmen, iangahki meirong kan me re nsenki wia ong tehnpesen Koht mehlelo,+ me mi nan Serusalem.’”

5 Kaunen peneinei en Suda oh Pensamin kan oh samworo kan oh mehn Lipai kan—koaros me Koht mehlelo ketin kamwakid arail mohngiong*—ahpw onopada pwe ren kohdahla oh onehda sapahl tehnpesen Siohwa, me mi nan Serusalem. 6 Irail koaros me mi limwahrail sewese irail ni ar kihong irail* dipwisou silper oh kohl kan, kepwe kan, pelinmen, oh soahng kesempwal kan, likin meirong koaros me re nsenki wia.

7 Nanmwarki Sairus pil wahieido dipwisou kan en tehnpesen Siohwa me Nepukadnesar wahsang Serusalem oh kihdiong nan imwen eh koht.+ 8 Nanmwarki Sairus en Persia ahpw wahieido mepwukat pahn epwelpen Midredad sounkanekid dipwisou kesempwal kan, me wadekedi mepwukat ong Sespasar*+ kaunen Suda.

9 Eri iet me wadawadedi kan: dahl kohl me mwomwen kopwou meh 30, dahl silper me mwomwen kopwou meh 1,000, dahl teikan meh 29, 10 pwohl kohl tikitik meh 30, pwohl silper tikitik meh 410, dipwisou teikan meh 1,000. 11 Dipwisou kohl oh silper koaros meh 5,400. Sespasar wahda mepwukat koaros ni irail me kalipilipala ko+ ar mweselsang Papilon kohla Serusalem.

2 Oh iet aramas en wehio me kohdahdo sang sensel,+ irail me Nanmwarki Nepukadnesar en Papilon kalipelahng Papilon+ oh mwuhr pwurodo Serusalem oh Suda, emenemen nan eh kahnimw,+ 2 irail me iangodo Serupapel,+ Sesua,+ Nehmaia, Seraia, Relaia, Mordekai, Pilsan, Mispar, Pikpai, Rehum oh Paanah.

Iet tohtohn ohlen Israel kan:+ 3 kadaudok en Paros kan, meh 2,172; 4 kadaudok en Sepataia kan, meh 372; 5 kadaudok en Arah kan,+ meh 775; 6 kadaudok en Pahad-mohap kan,+ kadaudok en Sesua oh Sohap kan, meh 2,812; 7 kadaudok en Elam kan,+ meh 1,254; 8 kadaudok en Sattu kan,+ meh 945; 9 kadaudok en Sakkai kan, meh 760; 10 kadaudok en Pani kan, meh 642; 11 kadaudok en Pepai kan, meh 623; 12 kadaudok en Askad kan, meh 1,222; 13 kadaudok en Adonikam kan, meh 666; 14 kadaudok en Pikpai kan, meh 2,056; 15 kadaudok en Adin kan, meh 454; 16 kadaudok en Ater kan, me iei kadaudok en Esekaia, meh 98; 17 kadaudok en Pesai kan, meh 323; 18 kadaudok en Sora kan, meh 112; 19 kadaudok en Asum kan,+ meh 223; 20 kadaudok en Kippar kan, meh 95; 21 tohn Pedleem kan, meh 123; 22 tohn Netopa kan, meh 56; 23 tohn Anadod kan,+ meh 128; 24 tohn Asmaped kan, meh 42; 25 tohn Kiriad-searim, Kepihra oh Peerod, meh 743; 26 tohn Rama+ oh Kepa,+ meh 621; 27 tohn Mikmas kan, meh 122; 28 tohn Pedel oh Ai,+ meh 223; 29 tohn Nepo kan,+ meh 52; 30 tohn Makpis kan, meh 156; 31 kadaudok en Elam teio, meh 1,254; 32 kadaudok en Arim kan, meh 320; 33 tohn Lod, Adid oh Ono, meh 725; 34 tohn Seriko kan, meh 345; 35 tohn Sena kan, meh 3,630.

36 Samworo kan:+ kadaudok en Sedaia kan,+ peneinei en Sesua,+ meh 973; 37 kadaudok en Immer kan,+ meh 1,052; 38 kadaudok en Pasuhr kan,+ meh 1,247; 39 kadaudok en Arim kan,+ meh 1,017.

40 Mehn Lipai kan:+ kadaudok en Sesua oh Kadmiel kan,+ kadaudok en Odapaia kan, meh 74. 41 Sounkoul kan:+ kadaudok en Asap kan,+ meh 128. 42 Silepen ewen kehl ko:*+ kadaudok en Sallum kan, kadaudok en Ater kan, kadaudok en Talmon kan,+ kadaudok en Akkup kan,+ kadaudok en Adida kan, kadaudok en Sopai kan, patpene meh 139.

43 Ladu kan en tehnpas sarawio:*+ kadaudok en Siha kan, kadaudok en Asupa kan, kadaudok en Tappaod kan, 44 kadaudok en Keros kan, kadaudok en Siaha kan, kadaudok en Padon kan, 45 kadaudok en Lepana kan, kadaudok en Akapa kan, kadaudok en Akkup kan, 46 kadaudok en Akap kan, kadaudok en Salmai kan, kadaudok en Ahnan kan, 47 kadaudok en Kiddel kan, kadaudok en Kahar kan, kadaudok en Reaia kan, 48 kadaudok en Resin kan, kadaudok en Nekoda kan, kadaudok en Kassam kan, 49 kadaudok en Ussa kan, kadaudok en Pasea kan, kadaudok en Pesai kan, 50 kadaudok en Asna kan, kadaudok en Meun kan, kadaudok en Nepisim kan, 51 kadaudok en Pakpuk kan, kadaudok en Akupa kan, kadaudok en Aruhr kan, 52 kadaudok en Paslud kan, kadaudok en Mehida kan, kadaudok en Arsa kan, 53 kadaudok en Parkos kan, kadaudok en Sisera kan, kadaudok en Tema kan, 54 kadaudok en Nesaia kan, kadaudok en Adipa kan.

55 Kadaudok en nein Solomon ladu kan: kadaudok en Sotai kan, kadaudok en Sopered kan, kadaudok en Peruda kan,+ 56 kadaudok en Saalah kan, kadaudok en Darkon kan, kadaudok en Kiddel kan, 57 kadaudok en Sepataia kan, kadaudok en Attil kan, kadaudok en Pokered-assepaim kan, kadaudok en Ami kan.

58 Koaros ladu kan en tehnpas sarawio* oh kadaudok en nein Solomon ladu kan patpene meh 392.

59 Oh aramas pwukat kohdahdo sang Tel-mela, Tel-arsa, Kerup, Addon oh Immer, ahpw irail sohte kak kadehdehda ma samarail mehn mahs ako kohsang rehn Israel de irail mehn Israel kei:+ 60 kadaudok en Delaia kan, kadaudok en Dopaia kan, kadaudok en Nekoda kan, meh 652. 61 Oh nanpwungen kadaudok en samworo kan: kadaudok en Apaiah kan, kadaudok en Akkos kan,+ kadaudok en Parsilai kan. Parsilai pwoudikihda lih emen sang nein Parsilai+ mehn Kilead serepein kan oh adanekihla eden semen eh pwoudo. 62 Aramas pwukat rapahki pwuhk kan me kadehdehda irekidien arail peneinei, ahpw re sohte diarada mepwukat, eri irail sohte kak ahneki pwukoahn samworo.*+ 63 Kepinao* ndaiong irail me re sohte kak tungoale soahng kan me keieu sarawi+ lao e pahn mie samworo men me kak doadoahngki Urim oh Dumim.+

64 Uwen tohtohn mwomwohdiso pwon meh 42,360,+ 65 oh likin neirail ohl oh lih lidu kan, irail meh 7,337; re pil naineki sounkoul ohl oh lih 200. 66 Neirail oahs kan meh 736, neirail dongki laud kan* meh 245, 67 neirail kamel kan meh 435, neirail dongki tikitik kan meh 6,720.

68 Ni ahnsou me irail leledo ni tehnpesen Siohwa nan Serusalem, ekei kaunen peneinei ko wiahda meirong kan sang pein nsenarail+ ong tehnpesen Koht mehlelo, pwe ren onehda sapahl met* wasa me e kin mi ieo.+ 69 Ni uwen arail kak, re kihla nan wasahn nahk dipwisou kesempwal kan ong doadoahko drakma* kohl 61,000, mina* silper 5,000,+ oh likou reirei 100 ong samworo kan. 70 Oh samworo kan, mehn Lipai kan, ekei aramas akan, sounkoul kan, silepen ewen kehl kan, oh ladu kan en tehnpas sarawio* ahpw kousoanla nan arail kahnimw kan, oh luhwen mehn Israel kan koaros* kousoanla nan arail kahnimw kan.+

3 Ni keisuhwen sounpwong+ eh leledo oh mehn Israel kan* mi nan arail kahnimw kan, re pokonpene ni lamalam tehieu nan Serusalem. 2 Sesua+ nein Sehosadak oh ienge samworo kan oh Serupapel+ nein Sealtiel+ oh rie kan ahpw uhda oh kauwada pei sarawi en Koht en Israel, pwe ren kak wiahda meirong isihs powe, nin duwen me ntingdier nan Kosonned en Moses,+ ohlen Koht mehlelo.

3 Irail eri kauwada pei sarawio wasa me e kin mi ie mahso, mendahki ar masak aramas akan sang sahpw kan me kapilirailpene,+ oh irail ahpw tepida wiahda meirong isihs kan ong Siohwa powe, meirong isihs kan en nimenseng oh nin soutik.+ 4 Irail eri wia Kasarawien Impwal kan* nin duwen me ntingdier,+ oh ehuehu rahn re kin kihda uwen tohtohn meirong isihs kan me koasoandier ong ehuehu rahn.+ 5 Mwurin mwo irail wiahda meirong isihs me kin kaukaule wiawi+ oh meirong kan ong maram pwul+ oh meirong kan ong kasarawi koaros+ ong Siohwa, oh pil meirong kan sang koaros me wiahda meirong sang pein nsenarail+ ong Siohwa. 6 Sang ni keieun rahn en keisuhwen sounpwong+ re tepida wiahda meirong isihs kan ong Siohwa, mendahki poahsoan en tehnpas sarawi en Siohwa saikinte wiawihda.

7 Irail kihong mwohni rehn soun-par takai kan+ oh tohndoadoahk saman kan,+ oh kihong mwenge oh pihl oh leh rehn mehn Saidon kan oh mehn Dair kan pwe ren kapeido tuhke sidar kan pohn sehdo sang Lepanon kohla Sopa,+ sang ni mweimwei me Nanmwarki Sairus en Persia kihong irail.+

8 Ni keriaun pahr mwurin arail leledo ni tehnpesen Koht mehlelo nan Serusalem, ni keriaun sounpwong, Serupapel nein Sealtiel, Sesua nein Sehosadak oh riarail teikan, samworo kan oh mehn Lipai kan, oh irail koaros me kohdo Serusalem sang sensel+ ahpw tapiada doadoahko; irail idihada mehn Lipai kan me mahki sounpar 20 kohda en papah nin duwen sounapwalih kan ong doadoahk en tehnpesen Siohwa. 9 Eri Sesua, nah pwutak kan oh rie kan, oh Kadmiel oh nah pwutak kan, me wia kadaudok en Suda kan oh irail mehn Lipai kan, kadaudok en Enadad kan,+ neirail pwutak kan oh riarail kan, ahpw kohpene pwe ren apwalih irail me wie doadoahk nan tehnpesen Koht mehlelo.

10 Ni sounkou ihmw ko ar wiahda poahsoan en tehnpas sarawi en Siohwa,+ samworo kan me likawih arail likou reirei, me kolokol sowi kan,+ oh mehn Lipai kan, kadaudok en Asap kan, me kolokol simpal kan,* ahpw uhda pwe ren kapinga Siohwa nin duwen koasoandien Nanmwarki Depit en Israel.+ 11 Oh irail tepida kokoulpene+ ni ar kapikapinga oh kalahngankihong Siohwa, “pwehki ih me kupwur mwahu; sapwellime limpoak loalopwoat ong Israel me poatopoat.”+ Aramas ako koaros ahpw wer ni ngihl laud kapinga Siohwa pwehki poahsoan en tehnpesen Siohwa wiawidahr. 12 Me tohto rehn samworo kan, mehn Lipai kan, oh kaunen peneinei kan—ohl mah kan me kilangehr tehnpas en mahso+—ahpw sengiseng ni ngihl laud ni ar kilang me poahsoan en tehnpas wet wiawidahr, a aramas tohto teikan weriwerki peren ni ngihl laud.+ 13 Aramas ako sohte kak kasawihada wekpeseng en ngilen me weriwerki peren sang ngilen me wie sengiseng kan, pwe aramas ako weriwer ni ngihl laud me kahrehda ngihlo lella wasa kan me uhdahn doh.

4 Ni imwintihti kan en Suda oh Pensamin+ ar rongada me irail kan me pwurodo sang kalipilipala+ ar kaukauwada tehnpas sarawi ehu ong Siohwa, Koht en Israel, 2 re ahpw mwadangete kohla rehn Serupapel oh kaunen peneinei kan oh ndaiong irail: “Kumwail mweidohng kiht sen iang kumwail kauwada; pwe duwehte kumwail, se kin kaudokiong* amwail Koht+ oh se kin patohwanda meirong ong ih sangete mwehin Nanmwarki Esaradon+ en Asiria, me waikitodohng wasaht.”+ 3 Ahpw, Serupapel oh Sesua oh kaunen peneinei en Israel teikan ndaiong irail: “Kumwail sohte ahneki pwuhng en iang kiht kauwada tehnpas ehu ong at Koht,+ pwe kiht kelehpw me pahn kauwada met ong Siohwa, Koht en Israel, duwehte me Nanmwarki Sairus nanmwarkien Persia ketin kehkehlingkihong kiht.”+

4 Eri, aramas en sahpwo kin doulahte kaluwetehla* aramas en Suda kan oh kamasak irail pwe ren uhdihsang kauwada tehnpaso.+ 5 Irail alehda sounkaweid kan pwehn uhwong irail oh kapingada arail koasoandi kan+ erein mwehin Nanmwarki Sairus en Persia lao lel mwehin Nanmwarki Darius+ en Persia. 6 Ni tepin mwehin Ahasuerus, irail ntingihada kisinlikou ehu pwehn kedipa tohn Suda oh Serusalem kan. 7 Oh ni mwehin Nanmwarki Ardaserksihs en Persia, Pislam, Midredad, Tapeel, oh ienge teikan ntinglahng nanmwarki Ardaserksihs; re kawehwehdi kisinlikowo ni lokaiahn Aramaik,+ oh re ntingihedi kisinlikowo ni mesen nting en Aramaik.*

8 * Rehum kaun lapalap en koperment oh Simsai sounnting men ahpw ntingihada kisinlikou ehu ong Nanmwarki Ardaserksihs pwehn kedipa tohn Serusalem kan, iet audepe kan: 9 (Met kohsang rehn Rehum kaun lapalap en koperment oh Simsai sounnting men oh iangara teikan, sounkopwung kan oh keriaun kepina kan, sekteri kan, aramas en Erek kan,+ mehn Papilon kan, tohn Susa kan,+ me iei mehn Elam kan,+ 10 oh tohnwehi teikan me Asenapper lapalap oh wahu kalipehla oh koasoanehdi nan kahnimw en Sameria kan,+ oh meteikan nan sahpw me mi Palio Pillapo,* oh eri 11 iet audepen kisinlikou me re kadaralahng ih.)

“Ong Nanmwarki Ardaserksihs sang sapwellimomwi ladu kan, ohl akan en sahpw me mi Palio Pillapo: Eri 12 nanmwarki en ketin mwahngih me mehn Suhs kan me patohsang rehmwi oh patohdo reht leledohr Serusalem. Re onohne sapahlih kahnimw uhwong oh suwedo, oh re pahn kanekelahr dihd kan+ oh kamwahwihala poahsoan kan. 13 Eri nanmwarki en ketin mwahngih me ma kahnimw wet pahn onohnsapahlda oh dihd kan wiawihda, re sohte pahn kin pwain daksis kan,*+ oh met pahn imwikihla tikitiklahn mwohni me pahn kohwong nanmwarki kan. 14 Pwehki se kin tungoale soahl en tehnpaso* oh e sohte konehng sen kilang soahng suwed ehu en wiawihong nanmwarki, kahrehda se kadarewei met pwehn kairehki nanmwarki, 15 pwe ehu roporop en wiawi nan pwuhken poadopoad en semomw mehn mahs ako.+ Komw pahn diarada nan pwuhken poadopoado oh mwahngihada me kahnimw wet iei kahnimw uhwong ehu, me kin kahpwalihala nanmwarki kan oh wehi kan, oh nan kahnimwo mie irail kan me kin tapiada uhwong koperment sangete mahsie. Ihme kahrehda kahnimw wet kamwomwmwomwla.+ 16 Se kairehki nanmwarki me ma kahnimw wet onohnsapahlda oh dihd kan wiawihda, komw sohte pahn kak ketin kaunda* sahpw me mi Palio Pillapo.”+

17 Nanmwarkio kadarala mahsen wet rehn Rehum kaun lapalap en koperment oh Simsai sounntingo oh iangara teikan me kin kousoan nan Sameria oh meteikan nan sahpw me mi Palio Pillapo:

“Ei rahnmwahu ong kumwail! Eri 18 kisinlikou me kumwail kadarodo reht wadawad mwohi ni sansal.* 19 Sang ni ei ruwes, roporop ehu wiawiher, oh e dierekda me sangete mahso kahnimwo kin pelianda nanmwarki kan, oh uhwong oh kahngohdi kin wiawi wasao.+ 20 Mie nanmwarki kehlail kan nan Serusalem me kin kaunda sahpwo pwon Palio Pillapo, oh re kin alehdi pweinen daksis kan.* 21 Eri ruwese ohl pwukat ren uhdihsang doadoahk, pwe kahnimwo en dehr onohnsapahlda lao I kihda pil ehu ruwes. 22 Kumwail kanahieng oh dehr seukautihong met, pwe irair wet en dehr doulahte kauwehla mehkan me nanmwarki ahneki.”+

23 Eri mwurin audepen kisinlikou en Nanmwarki Ardaserksihs eh wadawad mwohn Rehum oh Simsai sounntingo oh iangara kan, re ahpw mwadangete kohla Serusalem rehn mehn Suhs kan oh doadoahngki tehtehn pei kan pwehn kauhiraildi. 24 Ih ahnsowo me doadoahk en tehnpesen Koht, me mi nan Serusalem, uhdi; oh e mihmihte lao lel ni keriaun sounpar en mwehin Nanmwarki Darius en Persia.+

5 Soukohp Akkai+ oh soukohp Sekaraia+ nein nein Iddo+ ahpw wia kokohp ong mehn Suhs kan me mi nan Suda oh Serusalem, ni mwaren Koht en Israel me ketiket rehrail. 2 Ih ahnsowo me Serupapel+ nein Sealtiel oh Sesua+ nein Sehosadak tepida onehda sapahl tehnpesen Koht,+ me mi nan Serusalem; oh sapwellimen Koht soukohp kan iang ira oh sewesei ira.+ 3 Ni ahnsowo Tattenai kepinahn sahpw me mi Palio Pillapo* oh Sedar-posenai oh iangara kan eri kohdo rehrail oh idek rehrail: “Ihs me ruwese kumwail en kauwada ihmw wet oh kihda lohlo kan nan dewe?” 4 Re pil idek rehrail: “Ia eden ohl akan me kauwada ihmw wet?” 5 Ahpw Koht ketin sinsile* ohl mah en mehn Suhs kan,+ oh re sohte kauhiraildi lao pakair pahn pekederlahng Darius oh kisinlikou sang nanmwarkio me pid ire wet pahn pekederdohng irail.

6 Iet audepen kisinlikou me Tattenai kepinahn sahpw me mi Palio Pillapo oh Sedar-posenai oh ienge kan, keriaun kepina kan en sahpw me mi Palio Pillapo, kadarala rehn Nanmwarki Darius; 7 re kadaralahng ih pakairo, oh iet me irail ntingihedi:

“Ong Nanmwarki Darius:

“Popohl en ket rehmwi! 8 Nanmwarki en ketin mwahngih me se patohla nan wehio nan Suda ni tehnpesen Koht lapalapo, oh tehnpaso kokoukihda lapalahn takai kei me katapwuriong nan dewe, oh lohlo kan kohdahngehr ni dihd kan. Aramas ako ngoangki doadoahk oh doadoahko kin kekeirda pwehki arail nanti laud. 9 Kiht eri kalelapak rehn neirail ohl mah kan, nda: ‘Ihs me ruwese kumwail en kauwada ihmw wet oh kihda lohlo kan nan dewe?’+ 10 Se pil kalelapak adarail kan pwe sen kairehkin komwi, pwe sen kak ntingihedi eden ohl akan me kin apwalih doadoahko.

11 “Iet me re sapengkin kiht: ‘Kiht ladun Koht en nanleng oh sampah, oh se onohne sapahlih tehnpas me kokoudahr sounpar tohto samwalahr ko, me nanmwarki lapalap en Israel men kauwada.+ 12 Ahpw, pwehki samat mehn mahs ako kahngiangihada Koht en nanleng,+ e ketikihong irail nan pehn Nanmwarki Nepukadnesar+ en Papilon, mehn Kaldia, me kauwehla tehnpas wet+ oh kalipehla aramas ako Papilon.+ 13 Ahpw, ni keieun sounpar en Nanmwarki Sairus en Papilon, Nanmwarki Sairus ketin ruwese tehnpesen Koht en onohnsapahlda.+ 14 Oh pil, Nanmwarki Sairus ketikihsang nan imwen kaudok en Papilon dahl kohl oh silper kan en tehnpesen Koht me Nepukadnesar ketikihsang nan tehnpas sarawio nan Serusalem oh ketikidohng nan imwen kaudok en Papilon.+ Dahl ko kohieng rehn ohl emen me adaneki Sespasar,*+ me Sairus ketin wiahiong en wiahla kepina men.+ 15 Sairus mahsanihong ih: “Wahda dahl pwukat. Kohla, kihdi mepwukat nan tehnpas sarawio me mi nan Serusalem, oh tehnpesen Koht en onohnsapahlda wasa me e kin mi ie mahso.”+ 16 Sespasar eri patohdo, oh e wiahda poahsoan en tehnpesen Koht,+ me mi nan Serusalem; oh sangete ahnsowo lel met kokoudahn tehnpaso wiewiawi, ahpw e saikinte nekila.’+

17 “Eri ma e mwahuwong nanmwarki, roporop ehu en wiawi nan sapwellimen nanmwarki wasahn nahk dipwisou kesempwal kan nan Papilon, pwehn kadehdehda ma Nanmwarki Sairus ketin ruwese onohnsapahldahn tehnpesen Koht nan Serusalem+ de soh; oh sapwellimen nanmwarki pilipil ong ire wet en pekederdohng kiht.”

6 Ih ahnsowo me Nanmwarki Darius wiahda ruwes ehu, oh re wia roporop nan doaropwe kan* wasa me dipwisou kesempwal kan nekinekla ie nan Papilon. 2 Oh doaropwe limilimpene ehu dierekda nan ihmw laud kehl kehlailo nan Ekpadana, wehi ehu nan Media, oh rohng wet me ntingdi loale:

3 “Ni keieun sounpar en Nanmwarki Sairus, Nanmwarki Sairus wiahda ruwes ehu me pid tehnpesen Koht nan Serusalem:+ ‘Tehnpaso en onohnsapahlda nin duwen wasa me irail pahn wia meirong kan, oh poahsoane kan en soandi nan dewe; e pahn ilehki kiupid 60,* tehlapki kiupid 60,+ 4 koasoakoasoak siluh en takai laud kan me katapwuriong nan dewe oh lohlo kan mi powe;+ oh pweinen mepwukat pahn kohsang ni tehnpesen nanmwarki.+ 5 Oh pil, dahl kohl oh silper kan en tehnpesen Koht me Nepukadnesar kihsang nan tehnpas sarawio me mi nan Serusalem oh wadohng Papilon+ en kapwurpwurala, pwe mepwukat en kohdiong nan dewerail nan tehnpesen Koht nan Serusalem.’+

6 “Eri Tattenai kepinahn sahpw me mi Palio Pillapo,* Sedar-posenai, oh iengomwa kan, keriaun kepina kan en sahpw me mi Palio Pillapo+—kumwail keisang wasahn. 7 Kumwail dehr kedirapwa doadoahk en tehnpesen Koht. Kepinahn mehn Suhs kan oh ohl mah en mehn Suhs kan pahn onehda sapahl tehnpesen Koht wasa me e kin mi ie mahso. 8 Oh pil, I wiahda ruwes ehu ong dahme kumwail pahn wiahiong ohl mah en mehn Suhs pwukat ong onohnsapahl en tehnpesen Koht: Sang ni en nanmwarki wasahn nahk dipwisou kesempwal kan,+ sang ni daksis me rikirikpene nan sahpw me mi Palio Pillapo, pweinen doadoahk kan pahn mwadangete kohieng rehn ohl pwukat pwe arail doadoahk en popouslahte.+ 9 Oh sohte lipilipil dahme anahn—koupwul wol kan+ iangahki sihpw wol kan+ oh sihmpwul kan+ ong meirong isihs ong Koht en nanleng, wihd,+ soahl,+ wain,+ oh leh,+ duwehte me samworo kan me mi nan Serusalem kin nda—uhdahn pahn kin kohieng irail ehuehu rahn, 10 pwe ren kak pousehlahte wiahda meirong kan me kin kaperenda Koht en nanleng oh kapakapki mour en nanmwarkio oh sapwellime pwutak kan.+ 11 I pil wiahda ruwes ehu me ma mehmen kauwehla koasoandi wet, apwoat lohlo pahn weweiksang nan imweo oh e pahn pwekipwekda oh katengtengdiong ie,* oh imweo pahn wiahla wasahn kot ehu* ong wehipokon pwehki dahme e wiahdao. 12 Oh Koht me ketin pilada wasao ong mware+ en ketin kamwomwala nanmwarki oh aramas koaros me sapeikiong kehkehlik wet oh song en kauwehla tehnpesen Koht, me mi nan Serusalem. Ngehi Darius, me ruwese met. Met en mwadangete wiawi.”

13 Tattenai kepinahn sahpw me mi Palio Pillapo, Sedar-posenai,+ oh iangara kan ahpw mwadangete kapwaiada mehkoaros me Nanmwarki Darius ruwese. 14 Oh ohl mah en mehn Suhs kan pousehlahte kauwada tehnpaso oh wonlahte nan doadoahko,+ pwehki kangoang sang kokohp en soukohp Akkai+ oh Sekaraia+ nein nein Iddo; re kanekehla ar kauwada tehnpaso sang ni ruwes en Koht en Israel+ oh ruwes en Sairus+ oh Darius+ oh Nanmwarki Ardaserksihs+ en Persia. 15 Tehnpaso eri imwisekla ni kesiluhwen rahn en sounpwong en Adar,* ni keweneun sounpar en mwehin Nanmwarki Darius.

16 Mehn Israel kan, samworo kan, mehn Lipai kan,+ oh aramas teikan me kalipilipala mahso ahpw wia kasarawien tehnpesen Koht ni peren. 17 Oh irail meirongkihla kouwol 100, sihpw wol 200, sihmpwul 400 ong kasarawien tehnpesen Koht, oh kuht wol 12 nin duwen meirong en dihp ong Israel pwon, me pahrekiong uwen tohtohn keinek en Israel kan.+ 18 Oh re idihada samworo kan nan arail pwihn kan oh mehn Lipai nan arail pwihn kan ong doadoahk en papah Koht nan Serusalem,+ nin duwen dahme ntingdi nan pwuhken Moses.+

19 Oh irail ako me kalipilipala mahso wiahda Pahsohpao ni 14 en keieun sounpwong.+ 20 Samworo kan oh mehn Lipai kan koaros eri pein kamwakeleirailda, irail koaros mwakelekelda;+ re kemehla meirong en Pahsohpao ong koaros me kalipilipala mahso, ong iangarail samworo kan, oh ong pein irail. 21 Mehn Israel kan me pwurodo sang arail kalipilipala ahpw tungoale met, iangahki irail koaros me iangirailla oh katohrehsang pein irail wiewia samin en mehn liki kan en sahpwo pwehn kaudokiong* Siohwa, Koht en Israel.+ 22 Irail pil pereperen wia Kasarawien Pilawa me Sohte Doal Ihs+ erein rahn isuh, pwe Siohwa ketin kahrehiong irail en peren oh e ketin kahrehiong mohngiong en nanmwarkien Asiria en pwungkin irail,+ pwe en sewese irail* nan doadoahk en tehnpesen Koht mehlelo, Koht en Israel.

7 Mwurin mepwukat, ni mwehin Nanmwarki Ardaserksihs+ en Persia, Esra*+ ahpw pwurodo. Ih nein Seraia,+ nein Asaraia, nein Ilkaia,+ 2 nein Sallum, nein Sadok, nein Ahidup, 3 nein Amaraia, nein Asaraia,+ nein Meraiod, 4 nein Serahia, nein Ussi, nein Pukki, 5 nein Apisua, nein Pineas,+ nein Eliesar,+ nein Aaron+ kaunen samworo. 6 Esra menet kohdahdo sang Papilon. Ih sounnting* men me samanih* Kosonned en Moses,+ me Siohwa, Koht en Israel ketikihda. Nanmwarkio mweidada soahng koaros me e peki, pwe limen Siohwa eh Koht ketiket powe.

7 Ekei mehn Israel kan, samworo kan, mehn Lipai kan,+ sounkoul kan,+ silepen ewen kehl kan,+ oh ladu kan en tehnpas sarawio,*+ kohdahla Serusalem ni keisuhwen sounpar en Nanmwarki Ardaserksihs. 8 Oh Esra kohdo Serusalem ni kelimaun sounpwong, ni keisuhwen sounpar en nanmwarkio. 9 Ni keieun rahn en keieun sounpwong, e tepida seiloak sang Papilon, oh e lella Serusalem ni keieun rahn en kelimaun sounpwong, pwe limen eh Koht ketiket powe.+ 10 Esra kaunopadahr eh mohngiong* pwe en sukuhlki Kosonned en Siohwa oh kapwaiada met,+ oh padahkih eh koasoandi kan oh kopwung kan nan Israel.+

11 Iet audepen kisinlikou me Nanmwarki Ardaserksihs kihong Esra me wia samworo oh sounnting, semen men me sukuhlki* kehkehlik kan en Siohwa oh sapwellime koasoandi kan ong Israel:

12 * “Ardaserksihs,+ nanmwarki en nanmwarki kan, ong samworo Esra, sounnting en Kosonned en Koht en nanleng: Popohl mwuledek ong komwi. Oh met 13 I wiadahr ruwes ehu me aramas en Israel kan koaros me mi nan ei wehi oh arail samworo kan oh mehn Lipai kan me men iang komwi kohla Serusalem en kohla.+ 14 Pwe nanmwarki oh nah sounkaweid isimen kan kadarkomwihwei pwe komwi en kasawih ma Kosonned en omw Koht, me mi rehmw,* kin kadoadoahk nan Suda oh Serusalem, 15 oh pwe komwi en wahda silper oh kohl me nanmwarki oh nah sounkaweid kan nsenki patohwanohng Koht en Israel, me tehnpese mi nan Serusalem, 16 iangahki silper oh kohl koaros me komw alehdi* nan wehi koaros en Papilon, iangahki kisakis me aramas akan oh samworo kan pein nsenki kihda ong ni tehnpesen arail Koht, me mi nan Serusalem.+ 17 Oh komw pahn mwadangete pwainkihda mwohni wet kouwol kan,+ sihpw wol kan,+ sihmpwul kan,+ iangahki dahme anahn ong meirong en krein kan*+ oh meirong en wain kan+ me iang mahn pwukat, oh komw pahn meirongki mepwukat pohn pei sarawi en tehnpesen amwail Koht nan Serusalem.

18 “Oh sohte lipilipil dahme mwahuwong komwi oh riomw kan en wia, kumwail kak wia met ni amwail doadoahngki luhwen silper oh kohl, nin duwen kupwuren amwail Koht. 19 Oh dahl koaros me kohieng komwi ong doadoahk en tehnpesen omw Koht, komw pahn patohwanla mwohn silangin Koht nan Serusalem.+ 20 Oh soahng teikan me anahn ong tehnpesen omw Koht me komw anahne kihda, komw pahn pwainki mwohni sang nan en nanmwarki wasahn nahk dipwisou kesempwal kan.+

21 “Ngehi, Nanmwarki Ardaserksihs, wiadahr ruwes ehu ong koaros sounkanekid dipwisou kesempwal kan nan sahpw me mi Palio Pillapo,* me mehkoaros me samworo Esra,+ sounnting en Kosonned en Koht en nanleng, peki rehmwail pahn mwadangete kohieng, 22 me uwe sohte pahn daulih silper dalend* 100, sosohng en kor* 100 en wihd, sosohng en pahd* 100 en wain,+ sosohng en pahd 100 en leh,+ oh soahl+ uwen me anahn. 23 Mehkoaros me Koht en nanleng ketin ruwese ong tehnpesen Koht en nanleng en pweida ni ngoang,+ pwe en dehr ketin engiengda pahn aramas akan me mi nan en nanmwarki wehi oh nah pwutak kan.+ 24 Oh pil kumwail sohte mweimwei en idingkihong samworo kan oh mehn Lipai kan, sounkoul oh sounkeseng kan,+ silepen wenihmw kan, ladu kan en tehnpas sarawio,*+ oh tohndoadoahk kan en tehnpesen Koht ren pwain daksis kan.*+

25 “Oh komwi, Esra, nin duwen erpit me komw ahneki sang omwi Koht,* idihada sounsawas ong sounkopwung kan oh sounkopwung kan pwe ren kopwung aramas koaros nan sahpw me mi Palio Pillapo, irail koaros me ese kosonned kan en omwi Koht; oh kumwail pahn padahkihong koaros me sehse mepwukat.+ 26 Oh mehmen me sohte kapwaiada Kosonned en omwi Koht oh kosonned en nanmwarki pahn mwadang ale kalokepe, mehnda ma mehla, pekeusla, pwain, de selidi.”

27 Kaping en kohwong Siohwa, Koht en samatail mehn mahs ako, me ketin kamwakid mohngiong en nanmwarki en kalinganahla tehnpesen Siohwa nan Serusalem!+ 28 Oh e ketin kasalehiong ie limpoak loalopwoat mwohn nanmwarki+ oh nah sounkaweid kan+ oh nein nanmwarkio lapalap akan koaros. Ngehi eri kakehleiehda pwehki limen Siohwa ei Koht eh ketiket pohi, oh I kihpene kaun akan sang Israel pwe ren iang ie kohdahla.

8 Eri iet kaunen peneinei kan oh irail me kileldi nin duwen arail peneinei me iang ie kohdahla sang Papilon ni mwehin Nanmwarki Ardaserksihs:+ 2 sang kadaudok en Pineas kan,+ Kersom; sang kadaudok en Idamar kan,+ Daniel; sang kadaudok en Depit kan; Addus; 3 sang kadaudok en Sekanaia kan, sang kadaudok en Paros kan, Sekaraia, oh ohl 150 me kileldi me iangih; 4 sang kadaudok en Pahad-mohap kan,+ Eliehoenai nein Serahia, oh ohl 200 me iangih; 5 sang kadaudok en Sattu kan,+ Sekanaia nein Sahasiel, oh ohl 300 me iangih; 6 sang kadaudok en Adin kan,+ Eped nein Sonadan, oh ohl 50 me iangih; 7 sang kadaudok en Elam kan,+ Sesaia nein Adalaia, oh ohl 70 me iangih; 8 sang kadaudok en Sepataia kan,+ Sepadaia nein Maikel, oh ohl 80 me iangih; 9 sang kadaudok en Sohap kan, Opadaia nein Seheiel, oh ohl 218 me iangih; 10 sang kadaudok en Pani kan, Selomid nein Sosepaia, oh ohl 160 me iangih; 11 sang kadaudok en Pepai kan,+ Sekaraia nein Pepai, oh ohl 28 me iangih; 12 sang kadaudok en Askad kan,+ Sohanan nein Akkatan, oh ohl 110 me iangih; 13 sang kadaudok en Adonikam kan,+ irail me kohdo keieu mwuhr, oh iet adarail kan: Elipelet, Seiel oh Semaia, oh ohl 60 me iang irail; 14 oh sang kadaudok en Pikpai kan,+ Udai oh Sappud, oh ohl 70 me iang ira.

15 I kapokoneirailpene ni pillap me kohdo Ahapa,+ oh se kauwada imwat impwal kan wasao erein rahn siluh. Ahpw ni ei tehk aramas ako oh samworo kan, I sohte diarada mehn Lipai men wasao. 16 Ngehi eri ileklahng Elieser, Ariel, Semaia, Elnadan, Sarip, Elnadan, Nadan, Sekaraia oh Mesullam, me wia kaun kei, oh ileklahng Soiarip oh Elnadan, me wia sounpadahk kei. 17 Mwuri I kihong irail kehkehlik ehu me pid Iddo kaun emen me kin mi wasa me adaneki Kasipia. I ndaiong irail ren ndaiong Iddo oh rie kan, ladu kan en tehnpas sarawio* me mi nan Kasipia, ren wadohng kiht sounpapah kan ong tehnpesen at Koht. 18 Pwehki limen at Koht ketiket poht, irail wahdo ohl loalokong men sang kadaudok en Mahli kan,+ nein nein Lipai, nein Israel, me iei, Serepaia,+ oh nah pwutak kan oh rie pwutak kan, ohl 18; 19 oh Asapaia, oh me iangih Sesaia sang mehn Merari kan,+ rie kan oh neirail pwutak kan, ohl 20. 20 Oh mie ladu kan en tehnpas sarawio* meh 220, irail koaros kileldi ni adarail kan. Depit oh lapalap akan me kihirailla pwe ren papah mehn Lipai kan.

21 Ngehi eri pakairki kaisihsol ehu wasao ni pillap Ahapa, pwe sen aktikitikla mwohn silangin at Koht, pwe sen rapahki kaweid sang reh ong at seiloak, ong kiht oh nait seri kan oh at kepwe kan koaros. 22 I namenengki peki rehn nanmwarkio sounpei kan oh soundak oahs kan ren pere kiht sang imwintihti kan ni at kohkohdo nanialo, pwehki se ndaiong nanmwarkio: “Limen at Koht kin ketiket pohn irail koaros me kin rapahki ih,+ ahpw sapwellime kehl oh engieng kin uhwong irail koaros me kin kesehla ih.”+ 23 Kiht eri kaisihsol oh peki rehn at Koht me pid duwen met, oh e ketin karonge at pekipek.+

24 Ngehi eri katohrehla meh 12 sang kaunen samworo ko, me iei, Serepaia oh Asapaia,+ iangahki riara meh ehk. 25 Mwuri I paunihong irail silper oh kohl oh dipwisou kan, kisakis me nanmwarkio oh nah sounkaweid kan oh nah lapalap akan oh mehn Israel kan koaros me mi wasao kihda ong tehnpesen at Koht.+ 26 Mwurin ei paunihada met, I kihong irail silper dalend* 650, dipwisou silper 100 me toutouki dalend 2, kohl dalend 100, 27 pwohl kohl tikitik 20 me pahrekiong darik* 1,000, oh dipwisou prons kaselel 2, me weitahta lingaling, me kesempwal duwehte kohl.

28 Ngehi eri ndaiong irail: “Kumwail me sarawi ong Siohwa,+ oh dipwisou kan me sarawi, oh silper oh kohl iei meirong en nsen ong Siohwa, Koht en samamwail mehn mahs ako. 29 Kumwail sinsile mwahu mepwukat lao kumwail paunihada mepwukat mwohn kaunen samworo kan oh mehn Lipai kan oh kaunen peneinei en Israel kan nan Serusalem,+ nan pere kan* en tehnpesen Siohwa.” 30 Oh samworo kan oh mehn Lipai kan ale silper oh kohl oh dipwisou kan me paundahr ong irail, pwe ren wahdo mepwukat Serusalem ni tehnpesen at Koht.

31 Kiht eri mweselsang ni pillap Ahapa+ ni 12 en keieun sounpwong+ pwe sen kohla Serusalem, oh limen at Koht kin ketiket poht, oh e ketin kapitkitasang at imwintihti oh sang irail me rukuruk pohn ahlo. 32 Kiht eri lella Serusalem+ oh mihmi wasao erein rahn siluh. 33 Oh ni kapahieun rahn, se paunihada silper oh kohl oh dipwisou kan nan tehnpesen at Koht+ oh kihong mepwukat rehn Meremod+ nein samworo Uraisa, oh me iangih iei Eliesar nein Pineas, oh me iang ira iei mehn Lipai kan, Sosapad+ nein Sesua oh Noadaia nein Pinnui.+ 34 Soahng koaros wadawadedi oh paunda, oh paunen soahng koaros kileldi. 35 Irail me kohdo sang sensel, irail me kalipilipala mahso, wiahda meirong isihs kan ong Koht en Israel, kouwol+ 12 ong Israel pwon, sihpw wol+ 96, sihmpwul wol+ 77, oh kuht wol 12 nin duwen meirong en dihp; mepwukat koaros iei meirong isihs ong Siohwa.+

36 Kiht eri kihong koasoandi en nanmwarkio+ rehn wiliepe kan* en nanmwarkio oh kepina kan en sahpw me mi Palio Pillapo,*+ oh re sewese aramas ako oh tehnpesen Koht mehlelo.+

9 Oh ni ahnsowohte me mepwukat wiawiher, kaun akan ahpw kohdo rehi oh nda: “Aramas en Israel kan oh samworo kan oh mehn Lipai kan sohte katohreirailsang aramas en sahpw ko oh arail wiewia kasaut kan,+ wiewiahn mehn Kenan kan, mehn Id kan, mehn Peris kan, mehn Sepus kan, mehn Ammon kan, mehn Mohap kan, mehn Isip kan+ oh mehn Amor kan.+ 2 Irail ale ekei neirail serepein kan pwe irail oh neirail pwutak kan en pwoudiki.+ Eri irail, kadaudok sarawio,+ saminla pwehki ar pwopwoudiong aramas en sahpw ko.+ Kaun akan oh keriaun kaun akan me tepin wiahda mwekid salelepek wet.”

3 Eri ni ahnsowohte me I rongada met, I tehrpeseng ei likowo oh ei likou reirei me sohte peho oh waikasang ekei pitenmoangei oh ei alis, oh I mwohndi nan ei pwuriamwei. 4 Eri irail koaros me kin lemmwiki* mahsen en Koht en Israel ahpw kapiliepene pwehki salelepek en aramas ako me pwurodo sang ar kalipilipalao, nindoken ei wie mwomwohd ni pwuriamwei lao lel ahnsoun meirong en krein en nin soutik.+

5 Oh ni ahnsoun meirong en krein en nin soutiko,+ I ahpw uhda sang nan ei namenek, ni ei likou oh likou reirei me sohte peho eh teipeseng, oh I kelepwikihdi oh kapahla pehi kat ong Siohwa ei Koht. 6 Oh I patohwan: “Maing ei Koht, I sarohdier oh I namenek en saradahng silangomwi, Maing ei Koht, pwe at sapwung kan tohtohla daulihalahr moangat kan oh dipat kan koasoakoasoakda leldahla nanleng.+ 7 Sang ni mwehin samat mehn mahs ako leledo rahnwet dipat kan uhdahn kin laud;+ oh pwehki at sapwung kan, kiht, at nanmwarki kan, oh at samworo kan kohiengehr nan pehn nanmwarkien sahpw kan, se kamakamkihla kedlahs kan,+ selidi,+ lohdi,+ oh namenekla, duwehte me wiawi rahnwet.+ 8 Ahpw met erein ahnsou kis, Maing Siohwa at Koht, komw ketin kasalehiongkitehr kupwuramwahu ni omwi ketin mweidala ekei kiht en pitila oh ketikihong kiht wasa me se sohte pahn perki mehkot nan sapwellimomwi wasa sarawi,+ Maing at Koht, pwe komwi en ketikihong kiht peren* oh ketikihong kiht ekis kommoal sang at kalidu. 9 Pwe mendahki kiht lidu kei,+ komwi, at Koht, sohte ketin likidmelieikitala nan at kalidu; ahpw komw ketin kasalehiong kiht sapwellimomwi limpoak loalopwoat mwohn nanmwarkien Persia,+ pwehn ketikihong kiht mour kapw pwe sen kak kauwada tehnpesen at Koht+ oh onehda sapahl wasa ohlahr kan oh ketikihong kiht kehl takai ehu* nan Suda oh Serusalem.

10 “Eri, Maing at Koht, dahme se kak patohwan mwurin met? Pwe se keselahr sapwellimomwi kehkehlik kan, 11 me komw ketikihong kiht sang sapwellimomwi ladu soukohp kan, ni omw mahsanih: ‘Sahpw me kumwail pahn pedolong pwehn sapwenikihla iei sahpw samin ehu pwehki samin en aramas en sahpw ko oh pwehki arail wiewia kasaut kan. Irail audehkihla sahpwo arail samin sang apali lel apali.+ 12 Ihme kahrehda, kumwail dehpa kihong noumwail serepein kan rehn neirail pwutak kan, de pil ale neirail serepein kan ong noumwail pwutak kan;+ oh kumwail sohte pahn sewese irail en ahneki popohl oh paiamwahu,+ pwe kumwail en kehlailla oh tungoale soahng mwahu kan nan sahpwo oh sapwenikihla sahpwo kohkohlahte ong noumwail seri kan.’ 13 Oh mwurin mehkoaros me wiawihong kiht pwehki at wiewia suwed kan oh dihp laud kan—pwe komwi, Maing at Koht, sohte ketin kaloke kiht nin duwen at sapwung kan,+ oh komw ketin mweidohng kiht sen pitila+— 14 ia duwe, se pahn pwurehng kauwehla sapwellimomwi kehkehlik kan oh pwoudiki aramas akan me kin wia soahng kasaut pwukat?+ Komw sou pahn uhdahn engiengda paht me kahrehda komw pahn ketin kamwomwkitala douluhl oh sohte ketin mweidohng emen en luhwehdi de pitila? 15 Maing Siohwa, Koht en Israel, komwi me pwung,+ pwe ekei kiht pitila leledo rahnwet. Iet kiht mwohn silangomwi nan dipat akan, mendahki at sohte kak uh mwohn silangomwi pwehki met.”+

10 Ni Esra eh wie kapakap+ oh wehkada dipen nah aramas akan, sengiseng oh lukupoardi mwohn tehnpesen Koht mehlelo, lapalahn pokon en ohl, lih oh serien Israel kei ahpw kapilpene ih, pwe aramas ako wie sengiseng kowahlap. 2 Sekanaia nein Seheiel,+ emen kadaudok en Elam ko+ ahpw ndaiong Esra: “Se wiahda mwekid salelepek ong atail Koht ni at pwoudikihda* lihen liki kan sang aramas akan en sahpwo.+ Mendahki met, miehte koapworopwor ong Israel. 3 Eri kitail pahn wiahda inou lap ehu rehn atail Koht+ pwe kitail en kadarala lih pwopwoud pwukat koaros oh seri kan me irail naitikihada, me pahrekiong kaweid en Siohwa oh irail me kin lemmwiki* kehkehlik en atail Koht.+ Kitail pahn mwekid pahrekiong Kosonnedo. 4 Komw ketida, pwe omwi pwukoa met, oh se pahn iang komwi. Komw kehlail oh wonla mwowe.”

5 Esra eri uhda oh ndaiong kaunen samworo kan, mehn Lipai kan, oh Israel pwon ren kahukihla inou ehu pwe ren wia dahme Sekanaia koasoiao.+ Irail eri kahukihla inou ehu. 6 Esra eri uhda sang mwohn tehnpesen Koht mehlelo oh kohla nan en Sehohanan nein Eliasip, eh pere laud.* Mendahki e kohla wasao, e sohte tungoal oh sohte nim pihl, pwe e mwahmwahieiki salelepek en aramas ako me pwurodo sang kalipilipala.+

7 Irail eri wiahda pakair ehu wasa koaros nan Suda oh Serusalem me koaros me kalipilipala mahso en pokonpene nan Serusalem; 8 oh nin duwen koasoandien kaun ako oh ohl mah kan, mehmen me sohte kohdo erein rahn siluh, eh kepwe kan koaros pahn kohsang ih oh e sohla pahn iang mwomwohdisohn aramas kalipilipala ko.+ 9 Ohlen Suda oh Pensamin koaros ahpw pokonpene nan Serusalem erein rahn siluh, me iei, ni keduwaun sounpwong, ni 20 en sounpwongo. Aramas ako koaros wie mwomwohd nan wasa me kelpeneo ni tehnpesen Koht mehlelo, oh re wie rerrer pwehki irair en ahnsowo oh pwehki keteu laud.

10 Samworo Esra eri uhda oh ndaiong irail: “Kumwail wiahda mwekid salelepek ni amwail pwoudikihda lihen liki kan,+ oh kumwail eri kapatahiong dipen Israel. 11 Eri kumwail wehkada dipamwail kan ong Siohwa, Koht en samamwail mehn mahs ako oh wia kupwure. Kumwail katohreikumwailla sang aramas en sahpwo oh sang amwail pwoud lihen liki pwukat.”+ 12 Mwomwohdiso pwon sapengki met ni ngihl laud: “Se pahn kapwaiada duwehte me komwi mahsanihen. 13 Ahpw aramas tohto mie, oh met ahnsoun keteu. Se sohte kak kesikesihnen likiet, oh met kaidehn mehkot me pahn kak wiawi erein rahn ehu de riau, pwe me tohto reht me wiahda dihp laud wet. 14 Eri, menlau, atail kaun akan en wiliandi mwomwohdiso pwon;+ oh irail koaros nan atail kahnimw kan me pwoudikihda lihen liki kan pahn kohdo ni ahnsou me kileldi, iangahki ohl mah kan oh sounkopwung kan en ehuehu kahnimw, lao atail Koht sohla pahn ketin engieng kowahlap pahtail me pid duwen met.”

15 Ahpw, Sonadan nein Asahel oh Sahseia nein Tikpa me uhwong met, oh Mesullam oh Sapedai,+ mehn Lipai kan, me utung ira. 16 Ahpw irail me kalipilipala mahso kapwaiada dahme re pwungkipene; oh samworo Esra oh kaunen peneinei kan, koaros kileldi ni adarail ko, irail kelehpw tuhpene ni keieun rahnen kaeisek en sounpwong pwe ren ropada duwen met; 17 oh ni keieun rahnen keieun sounpwong re kanekehla kopwungpen irair en ohl akan koaros me pwoudikihda lihen liki kan. 18 Oh e dierekda me ekei nein samworo kan pwoudikihda lihen liki kan:+ sang nein Sesua+ nein Sehosadak oh rie pwutak kan, Maaseaia, Elieser, Sarip oh Kedalaia. 19 Ahpw re inoukihda ren kadarala arail pwoud kan oh pwehki irail pwukoahki dihp, re pahn meirongkihla sihpw wol men sang pelin sihpw ong diparail.+

20 Iet samworo teikan me dipada: sang kadaudok en Immer kan,+ Ananai oh Sepadaia; 21 oh sang kadaudok en Arim kan,+ Maaseaia, Elaisa, Semaia, Seheiel oh Usaia; 22 oh sang kadaudok en Pasuhr kan,+ Elioenai, Maaseaia, Ismael, Nedanel, Sosapad oh Eleasa. 23 Nanpwungen mehn Lipai kan, ohl pwukat me dipada: Sosapad, Simei, Kelaia (mei iei, Kelita), Pedahaia, Suda oh Elieser; 24 oh sang sounkoul kan, Eliasip; oh sang silepen ewen kehl kan, Sallum, Telem oh Uri.

25 Nanpwungen mehn Israel kan, ohl pwukat me dipada: sang kadaudok en Paros kan,+ Ramaia, Isaia, Malkaisa, Misamin, Eliesar, Malkaisa oh Penaia; 26 oh sang kadaudok en Elam kan,+ Madanaia, Sekaraia, Seheiel,+ Apdi, Seremod oh Elaisa; 27 oh sang kadaudok en Sattu kan,+ Elioenai, Eliasip, Madanaia, Seremod, Seipad oh Asisa; 28 oh sang kadaudok en Pepai kan,+ Sehohanan, Ananaiah, Sappai oh Adlai; 29 oh sang kadaudok en Pani kan, Mesullam, Malluk, Adaia, Sasup, Seal oh Seremod; 30 oh sang kadaudok en Pahad-mohap kan,+ Adna, Kelal, Penaia, Maaseaia, Madanaia, Pesalel, Pinnui oh Manase; 31 oh sang kadaudok en Arim kan,+ Elieser, Issaisa, Malkaisa,+ Semaia, Sihmion, 32 Pensamin, Malluk oh Semaraia; 33 oh sang kadaudok en Asum kan,+ Mattenai, Mattada, Seipad, Elipelet, Seremai, Manase oh Simei; 34 oh sang kadaudok en Pani kan, Maadai, Amram, Uel, 35 Penaia, Pedeia, Keluhi, 36 Panaia, Meremod, Eliasip, 37 Madanaia, Mattenai oh Saasu; 38 oh sang kadaudok en Pinnui kan, Simei, 39 Selemaia, Nadan, Adaia, 40 Maknadepai, Sasai, Sahrai, 41 Asarel, Selemaia, Semaraia, 42 Sallum, Amaraia oh Sosep; 43 oh sang tohn Nepo kan, Seiel, Mattidaia, Seipad, Sepina, Saddai, Soel oh Penaia. 44 Ohl pwukat koaros pwoudikihda lihen liki kan,+ oh re kadarala arail pwoud kan iangahki neirail seri kan.+